الحــــارســــات المــــقــــدســــات📖✨️|🇲🇦

1

🌟الجزء الثاني من الرواية الخيالية🌟
🎃🏰أكاديمية يوغموندل🎃🏰
بعنوان: ✨❄️الحارسات المقدسات❄️✨
للكاتبة✒️:Victoria kaelin
💜📖الجزء 1💜📖
فالمغرب و فواحد من المدن ديالو و بالضبط فواحد الليلة هتازات بيها المدينة بعاصفة و رياح قوية خلات أي انسان ساد عليه فدارو و مكمش ففراشو و فوسط من هاد الجو الكارثي ضربات صاعقة رعدية زلزلات الأرجاء خلات السماء السوداء تلون بألوان فشي شكل من بعد اختفى هادشي كامل و رجع الجو عادي كأنه شيئا لم يقع...
🌞فالصباح الباكر و فغرفة من غرف واحد الشقة فالسكن الاقتصادي هاد الغرفة من شكلها و ترتيبها تحلفي ديال الدري ولكن غير نتعمقو شوية غيبان لينا واحد شعر طويل مدلي على الناموسية و مولاتو حالة فمها لسما ناعسة و مجايبة خبار فجأة تسمعو خطوات جاية لجيهة هاد الغرفة...سترااق سترااق ترااق صوت صندالة الميكة تحل الباب و دخل الضو للغرفة كانت امرأة كبيرة فالعمر تكون عندها ديك 50عام ولكن باقة شادة فراسها لابسة بيجامة طويلة و مطلعة كمامها الفوق طالقة شعرها الشايب القصير لي تتخللو شعيرات سوداء و بنية عوينات خضرين و باينة مدوزة الزين فصغرها...
المرأة:سكينة وااا سوكاااااينة
سكينة ناضت قافزة مخرجة عينيها و وقفات بحال شي عسكري و بصوت انثوي مخلط بلكنة رجولية:نعاام ا جددددة
الجدة:نووضي تفطريي تلحقيي لمدراااستك واش غتبقاي ناعسة ليا هنا؟
سكينة تتحك فعينيها و شافت فالساعة لي معلقة فالحيط:اوووه وايالاه 7:30 هادي ا جدة و انا مداخلة حتال 9
الجدة خنزرات فيها و سكينة معاوداتش الهضرة ناضت دغيا مخلية بيتها مقلوبة و غادة خارجة حتى شداتها جدتها من قبها:اجي فين غاادة؟؟
سكينة بلعات ريقها:غادة نفطر
الجدة:غتجمعي هاد البيت هو الأول ولا غنجمعها مع حفيدتي
سكينة:الله الله احمباك ا فطييطيمة خليني غير نحنجر و نجمعها
فطومة جمعات معاها بقرصة:هااهيا بدات بهبالها تااني زييدي قداامي كون ماتتبقاي فيا كون تشردتي من شحاال هادي زييديي(تدفعها)
سكينة:الله ياا جدة خلينيي عليييك شكوون مسلطك عليا ياااربي خلينيي غير نغسل وجهي و سناني و هانا معاك
فطومة:هي دابااا
سكينة طارت دخلات لطواليت سدات عليها و هي تنهد:خصني نطلق راسي ولا غتفرع عليا الباب
جبدات الشيتة و الدونتيفريس و حكات سنانها هزات صابونة و دوزاتها على وجهها تحنات فلافابو تترش الما على وجهها و تدوز عليه بيديها فاش طلعات راسها فالمرايا و هي طلقها بغووتة خلات فطومة لي كانت فالكوزينة طييح صينية اتاي فالأرض...
فطومة جات تتجري مسكينة حلات الباب على سكينة لقاتها مكوانسية فالمرايا...
فطومة:تفف تتففف ياكمااا تشييرتي ا بنييتيي خرجوو علييك افلام الخلييع فاش تتفرجي
سكينة هازة يديها تتشوف فيهوم بحال الى أول مرة تشوف شي يدين فحياتها و فطومة واقفة عليها مستغربة تتشوف اش غتصنع هاد الهبيلة حتى قفزاتها بضربة فكتفها...
فطومة:مااالكي دوييي راك طييحتيي مني النص!!
سكينة مخرجة عينيها:ي ي يدي ك كانت فيهوم العافية
فطومة:لا لا قلت ليك بلي خرجو عليك افلام الخليع بالمعقول
سكينة:وحق الرب المعبود اودى جدة الى شفت العافية شاعلة فيدي
فطومة جراتها من قبها مخرجاها من الطواليت:واش خصني نقولك 100 مرة قادي هضرتك بحال البنات
سكينة تتحاول تتفك منها:وا طلقييني وصاافي راه مبقيتش صغيرة
فطومة جلساتها فوق واحد السداري و جلسات قدامها:شوفي مغدوزيهاش عليا باينة واش شي سبة باش متمشيش لمدرسة اممم
سكينة حركات راسها بالنفي:لا لاا وحق الرب المعبو...
سدات ليها فطومة فمها:قلت لييك قاادي هضرتك
سكينة بلعات ريقها و فطومة طلقات منها:ر راه داوية من نييتي ا جدة الله يرزيني فيك الى تنكذب
فطومة:ترزاي فيا ان شاء الله نوضي تكعدي جمعي ديك الصينية لي طاحت فالكوزينة
سكينة ناضت مبرقة عينيها:و نتي ا جدة؟؟
فطومة:اش بغيتيني طيريي يالااه
سكينة معاوداتش معاها الهضرة عارفاها الى طولات معاها فالهضرة غادي تخرج غير بشي قرصة اللهم تدير لي قالت ليها اما فطومة مشات لبيتها و سدات عليها..
🌟الجزء الثاني من الرواية الخيالية🌟
🎃🏰أكاديمية يوغموندل🎃🏰
بعنوان: ✨❄️الحارسات المقدسات❄️✨
للكاتبة✒️:Victoria kaelin
💜📖الجزء 2💜📖
فثانوية من بين أفضل الثانويات فالمدينة و بالضبط فلبيرو ديال المدير ديالها واقف هاد الأخير بتوتر و قدامو امرأة أربعينية باين عليها من الطبقة الاجتماعية الراقية لابسة صاية حد الركبة و شوميز قصيرة فيها وريدات و طالقة شعرها البني القصير ملامحها زوينة و باين عليها الهدوء و من موراها بنت شابة شقراء شعرها طويل و عينين زرقين تحلف عليها گاورية منزلة راسها الأرض و باينة عليها الحشمة و السكينة..
المدير:ولكن ا مدام الضاوي بنتك من أفضل تلاميذنا علاش غتحرميها من التخرج من وحدة من أفضل الثانويات فالمدينة بل فالجهة كلها و تديها لثانوية ديال ولاد الشعب؟؟
مدام الضاوي:سمح ليا ا موسيو المدير ولكن صحة بنتي و نفسييتها هي الأهم بالفعل حنا من طبقة راقية ولكن هادشي متيعنيش بلي ميمكنش لينا نتخالطو مع ولاد الشعب
المدير:و السمعة ديالك؟؟ كيفاش بغيتي يدويو عليك الناس؟؟
مدام الضاوي:كيف قلت ليك من قبل صحة بنتي هي الأهم عندي مستعدة نتخلا على أملاكي كاملين غير ترتاح ليا نفسييتها و هاد الراحة لي بغيتها ليها للأسف مكايناش فأرجاء المؤسسة ديالك موسيو بنتي من بعد الحصص المكثفة عند طبيبها النفساني خرج ليها بقرار و هو هاد الوسط مأثر عليها بزاف البنت قالت ليه بلي مقدراتش تكون صداقات هنا و السبب انه هاد المدرسة تيجيو ليها غير صحاب الفوحان و البوخ شي تيفوح على شي ها بابا شرا ليا طوموبيل ها ماما شرات ليا الألماس هاني شريت فهاد ليمارك و زيد و زيد و صداقات المصلحة لا غير داكشي علاش قال ليا نديها لثانوية عمومية تختالط مع ناس جداد عليها بعيدا على الرفاهية و الفلوس باش تقدر تبني حياتها و الأهم شخصيتها بنتي منطاوية على نفسها ا موسيو و بوحدي لي تنعاني معاها باباها مات و معندها حد من غيري داكشي علاش تنتمنا تسيني على الانتقال و نخرجو بسلام
المدير شاف حتى عيا و جبد ستيلو:نتي تعرفي ا مدام كيف قلتي صحة بنتك هي الأهم فهادشي كامل
مدام الضاوي بتاسمات و تلفتات عند بنتها:سمعتي ا بنتي غتنتاقلي يالاه بتاسمي شوية
البنت بتاسمات بخجل و رجعات حدرات راسها..
مدام الضاوي بعدما سينا المدير على الانتقال خرجات شادة فيد بنتها غاديين حتى خرجو لقاو السائق تيتسنا فيهوم حل ليهوم الطوموبيل و شدو طريقهوم...
🌻🌻فحي من الأحياء الشعبية المغربية و فدار من ديورو...
الأب:وااا شيماء شيماااااا
خرجات بنت من الكوزينة تتجري و فمها عامر خبز:وا نعااام ا با
الأب:ا تي حطي لينا داك الفطور نحنجرو و نتي سايرة تاكلي بوحدك
شيماء:وراه كنت غادة نحطو ا الوليد (هزات الصينية و حطاتها فوق الطبلة)
الأب:فيناهياا مووك دايعة تاني على الصباح
شيماء حطات الزيت و كونفيتور و الزبدة مع الخبز:اييه ا با مشات عند خالتي نعيمة تعاونها فشي تصبين
الأب:ممم ايوا كبي لينا كاس د أتاي الله يرضي على بنييتي
شيماء:اييه ا با(كبات ليه أتاي و لراسها)
الأب:اجيي و داك الشمكار ديال خوك فيناهو مبانش ليا صابح هنا؟؟
شيماء معمرة فمها:شكون فيهوم ا با؟؟ واش يعقوب؟؟؟
الأب:هدااك عقرب ماشي يعقوب فيناهو؟
شيماء:مشفتوش ا با واقيلة بايت عند صحابو
الأب ناض:انا نوض لخدمتي اوكان شي نهار تفرقعو ليا مرارتي
شيماء:و الفطوور ا باا؟؟
الأب:كوولي غير نتي(ضرب بالباب)
شيماء تتغمس فالكونفيتير:ايوا بصحتيي نفطر ليا اوكان قربات نيت وقت المدرسة خصني نطرگ سكينة لتبدا تهلل عليا تاني بفينك
ناضت شيماء جمعات الطبلة و الكوزينة حيت عرفات الى مجمعاتهومش غتزلزل عليها مها الدار الى رجعات مشات لبسات حوايجها و قدات حالتها شيماء بنت طبيبيزة شوية وجهها عامر عينيها قهويين و شعرها قهوي دايرة ليه ليميش من التحت و قصيرة
هزات صاكها و سدات موراها الباب...
🌟الجزء الثاني من الرواية الخيالية🌟
🎃🏰أكاديمية يوغموندل🎃🏰
بعنوان: ✨❄️الحارسات المقدسات❄️✨
للكاتبة✒️:Victoria kaelin
💜📖الجزء 3💜📖
بعدما فطرات سكينة جمعات بيتها و فطومة واقفة عليها بالصندلة د الميكة حتى سالات و رجعات البيت نقية عاد رتاحت..
فطومة:ايوا دابا مزيان لبسي حوايجك دابا وقيتة فاش تمشي باش يالاه توصلي فالوقت
سكينة جبدات حوايجها واخا ا جدة
يالاه خرجات فطومة مخلية حفيدتها تبدل حتى تيتسمع الشرجم تيضرب بالحجر..
شيماء:واااا سوكااااينة واا تي طلييي
سكينة لاحت لي فيديها و مشات دغيا حلات الشرجم تشوف هاد الهبيلة لي تسلطات عليها مع الصباح...
سكينة:افيين ا العشييرة جيتي ليومة مبكرة شوية
شيماء:وراه مكاين ميدار قلت حسن نمشي لمدرسة ههه
سكينة:طلعيي طلعيي
شيماء:كاينة جداك؟؟
سكينة:و علاه فين غتكون فهاد الوقت؟؟
شيماء:لا لا مطالعاش خليني غير هنا نخاف على راسي
سكينة:اوكي هانا نلبس و نهبط عندك
سدات سكينة الشرجم دغيا و لبسات حوايجها و هزات ساكادو ديالها شافت فالمرايا ولو نقطة مكياج فوجهها و شعرها الطويل مطلوق و بتاسمات:كلشي هو هداك.. ولكن سرعان متفكرات لي وقع مع المرايا د الطواليت بلعات ريقها ولكن من بعد ساست دوك الأفكار الخيالية من راسها و هبطات عند صاحبتها..
شيماء تتعض فطرف ديال الخبز عامر بلانشون و الفرماج:صباح الخير
سكينة سلمات عليها سلام الرجال من الكتف:صباح النواور واش غنطرگو أميمة تاني؟
شيماء شافت فيها بعويناتها و عضات فالخبز:واش غتبقاي تسوليني هاد السؤال كل مرة
سكينة:وراه خوها البرهوش متنستحملووووش ديما خارج ليا بشي مصيبة
شيماء:وراه نتي لي ضسرتيه اش داك نهار الأول تخالطي مع البراهش
سكينة:عندك الصح انا لي واكلاني
شيماء:هانتي مزيان ملي عتارفتي
بقاو غاديين حتى خرجو من الاقامة و شدو الطريق حتال واحد الشارع كانت دار تطل على الشانطي كانت واقفة قدامها بنت متوسطة الطول سمراء و شعرها قصير أسود تتشيير ليهوم بيديها بجوج..
شيماء:مالكي على التشيار راه شفناك
أميمة عنقاتهوم:صباح الخير حبيباتي كيف صبحتو؟
شيماء:بيخيير و نتي
سكينة تتشوف هنا و لهيه:ياكما فايق خوك؟؟
أميمة بابتسامة:لا راه مكاينش هنا فاق بكري داوهوم المدرسة رحلة
سكينة رتاحت:ااه صافي مزيان زيديي نمشيو
بقاو غاديين هاد الثلاثة على رجليهوم حتى وصلو قدام الثانوية لي من شكلها باينة ثانوية شعبية شي جالس مجمع شي واقف شي غادي جاي عند مول الزريعة شي شاد قنييتة جابد گارو البنات موالفين هاد الأجواء بل تولدو فيها شدو ركينتهوم حتى هوما مسندين على حيط الثانوية تيشوفو فليغادي و لي جاي و تيتسناو فالجرس ديال الدخول يرن حتى وقفات سيارة فاخرة قدام بوابة المدرسة كلشي خلا اش تيدير و بقاو يبرقو بعينيهوم فهاد الحديدة لي أول مرة تحط قدام مدراستهوم و شنو غيدير واحد من الطبقات الراقية قدام هاد الثانوية الشعبية؟؟
حتى هبطات مدام الضاوي بعدما حل ليها الشيفور الباب و يديها فيد بنتها لي حادرة راسها على حدو بتوتر متهربة من نضرات التلاميذ ليها الدراري شافو القوق تحلو عينيهوم...
سكينة:شكون ديك الگاورية؟؟
شيماء:منعرف اختي يمكن تلفو واقيلة
أميمة:شحال زوينة ا ا البناات
سكينة:تتبان ليا فشكل شوفو حركاتها
شيماء:راه بسيف و هاد الحيوانات بغاو ياكلوها بعينيهوم
دخلات مدام الضاوي و بنتها ل الثانوية حل ليهوم العساس الباب و دخلهوم لعند المدير...