المنطقه 13
الكاتبه مريم السعدي
احمد- بضرف سبوعين قدمت كملت معاملتي مكدرت تجي ويايه رحت وحدي كملتها ورجعت اول مطبيت الغرفه دكتلي. جانت مختفيه لاسبوع واني ملحيت عليها
الو
هلو احمد انت بالمحل
دك تلفوني بس طبيت
لا بالغرفه معزل
شعجب
والله توني راجع من التربيه
كملتها لو بعد
اليوم كملت. الحمد لله ههه ونطوني موعد للامتحانات واستلمت كتب من مدرستي القديمه ورجعت توني
الحمد لله اعذرني شوي امي مريضه وحايره بيها من طبيب لطبيب هلكت
الله يساعدج محتاجه شي ست تره معزل
لاالحمد لله احسن صارت باوع ماما جبتلك ملازم
اي والله تعيشين
وهاي محضره غده. بس لاتغديت
والله ههه لا بس توني داكلي
لالا طفي هاي جبتها الك
سدته مني
واني انتضر سمعت باب المخزن انفتح دكمت القميص ووخرت البرده. بينت الفتحه وشفتها
روحي وردت لجسمي ابتسمت وتنهدت
كانت فكرتي باكمال دراستي لخاطرها اكثر من خاطري
بلكن تشوفني اكبر من عمري
ها ماما شونك شون الروح المعنويه
زينه الف الحمد لله
كلتها بابتسامه وروحي مرفرفه ماعونين تمن ومرك طببت ماعون ماعون متكفي الفتحه. اكثر خليتها عالطبله كالت
اجيب الملازم واجي
خوش
وكعدت اكل متحملت شوي وجابت جيس مليان ملازم كمت اخذتها منها وباوعتلها
اخذت منها الماعون تبتسم
ست العربي والانكليزي صفر عاليسره تره مييح
مالك دخل من سبوع اليجي ادرسك وي بنت اخويه وابن عمتها هنا بالحديقه. ساعتين اخلي الكم زلاطه
انتي مو مدرسه كيميا
اي بس ادرس بقيه الدروس دارستها لتشيل هم. عليك تقره
ههه ماشي مشكور
هله بيك
كالتها وابتسمت خزرتني عود اقره
صفنت يممه هههه اي صار صار
وراحت سديت البرده وكعدت كملت اكل وبقيت اكلب بالملازم. الرياضيات شوي فهمته. فيزيا سهل كيميا حلو اله العربي يابويه طابوكه على كلبي سديته وشمرته اخترعت منه
وكمت يوميه الفجر افتح والملازم بيدي احل اقره وابيع. يوم يومين ومر سبوع دكت عليه.
كمت اشوف يوميه ب١ الغده يم الفتحه وتخابر اخذ غداك واطب اخذه مالكاها
مر سبوع وشفت سياره طبكت يم بيتهم نزلت منها بنيه تطلع كد اسونه بت عمي ووياها شاب. هم يطلع كدها توه شاربه خاط
شوي ودكت عليه
الو
ها احمد تجي وي الطلاب لو عدك شغل
لاست هاي هعزل جيت
عزلت بس كلش خجل رجال بلحيته وشاربه طول بعرض اكعد وي مزعطه بس شسوي اخذت اقلام ودفتر مسوده ويايه وطبيت ميت بدمي
