Isang dalaga, sa bintana’y nanungaw, Sa pispis na dilim siya’y tumanaw
Hatid ng gabi ay pamamanglaw, Liwanag ng buwan sana’y bigyang tanglaw
Ang kanyang pusong uhaw, tinataglay na damdaming nagmamaliw
Umaasam na di papanaw
Walang anu-ano’y may tunog na narinig
Nanambitang tinig, pamimintuho gamit isang awit
Sa saliw ng gitara’y pag-ibig ayaw iwaglit,
Mga salita ng pangako gaganaping pilit
Klasikong mga linyang, bituing marikit at Susungkutin mula sa langit
Mga talata’y kakantahin, nilapatan ng malamyos na melodiya
Sa pandinig ay tunay na nakakahalina
Ginoo’y patutunayan, Hangarin walang kawangis
Walang bahid na pag-ibig, siya nawa’y di maghinagpis
Pagmamahal na wagas sana’y may katugon
Mula sa dalagang, Sa bintana’y naroroon
Binibining nasiyahan, Sulsol ay pinakinggan
Sabi ng iba’y sundin kanyang kalooban,
Sa kanyang puso’y tingnan, Damhin ang katotohanan
Bibigyan bang pag-asa, Binatang gamit ay harana
Nagpaunawa ng mga katagang “Mahal Kita”
Ngayon at tuwi-tuwina, at hanggang ako’y lagutan ng hininga.
