عندما يعشق الشيطان الجزء الثاني

الحلقة 11

(حطواااا جااااام قبل ما تقرااااو)
الحلقة 11 :
بعد ما روحت بدلت و قعدت مع بوها لمزال تاعب شوية هي و اثير حكاولو عاللي صار و زيد كلمو راشد قلو الي هوما جيين يخطبو في البنات غدوة و وافق.. دخلت هي رقدت مالتعب تعدا الوقت فيسع حاسة روحها طايحة من بلاصة عالية تصيح و مش يسمع فيها حد قامت مفجوعة و قلبها مقبوض شدتها غصة في حلقها احساس غريب خلاها تهلوس و تتخيل حاجات خايبة ما تعرش علاه ديراكت هزت تاليفونها تطلب فيه اما ما هزش عليها جا لبالها انو راقد هدات شوية و قامت تلقا اثير قاعدة في الصالة توكل في بوها قعدت معاهم..
كانو ملمومين في الصالة يحكيو عالخطبة،ما كانتش مركزة معاهم سارحة تخمم فيه حاولت برشا تنحيه من بالها ما نجمتش فيسع ما فرض حضورو في قلبها و ولى من اولويات تفكيرها حاجة اقوى منها
-اسامة: دانو شبيك و ين سارحة اا طفلة.. امي بنتك ندرا شبيها اليوم مش عاجبتني
-عايشة: حتى انا هاني قاعدة نشوف كنت باش نسألك هالرزانة و العقولية منين هبطو عليها مش عوايدها😕
-يعجبكشي تو باش تعملو مشكلة خاطرني ساكتة😒
تاليفونها نوقز وصلها ميساج رقم ما تعرفوش
-سلام. سافا؟
-و عليكم السلام..شكون؟
-بكري مكش قد بعضك قعدت متحير عليك سافا توا؟؟
تفجعت وجها صفار وولات ترعش عرفتو هو اما حبت تتأكد
-شكون
-جوزيف
-جوزيف لكنت قاعد معانا بكري؟؟
-ههه وي
-لباس عيشك😊شوية تعب و برا
-نشالله لباس صغرون😚
تبسمت😄قداه حستها منو كلمت صغرون و بعد فاقت على روحها رجعت تكتب بزربة
-ياخي منين جبت رقمي؟؟
-ههه ما يصعب شي على جوزيف..اما كان نعملك مشكلة والا حاجة قلي نوعدك معادش نقلقك
-(تربثت)لا عادي اما ستغربت خاطر ما يعرفو حد خلاف الفامي و صحباتي
-و انا توا 😛
-ما جاوبتنيش
-نخدم في الحاكم(كذب عليها) معناها نجم نجيبو بسهولة
-😏😒برا عاد
-شبيك😕
-اكثر عباد نكرهكم
-اول مرة نسمع طفلة تقلي هكا😮علاه ساعة البنات يموتو علينا
-وانا مش كيف البنات
-باه فسرلي علاه تكرهنا للا
-نعرش،اما ما نحبكمش هكا لله في سبيل الله،،ممكن خاطر صعاب مربطين برشا.. المهم فكرتي عليكم و نضرتي ليكم سافابا..ما هضمتكمش سبحان الله كل حد و كيفاه يخمم
-😂كأنو لسانك بدا يتسرح شوية اه😛اي باه هاني عرفت كيفاه انطقك،ما كذبش خوك كيف قال لفعة و لسانها طويل عاللول ما صدقتش اما هاني قاعد نكتشف
-(حشمت)لا نحكي عادي و مش مع الي يجي
-معناها انا مش الي يجي بالنسبة ليك؟؟
-عادي
-نكلمك توا كان ما فماش قلق
-لا مش وحدي خلي مرة اخرى قاعدة مع الدار اي نخليك
-اوكي نشالله مرة اخرى..سلام
اسامة كان مركز معاها اما ما حبش يسألها و يحرجها يعرف اختو كيف تحكيلو وحدها
-نقوم نعمل دوش انا..دانو حضر روحك باش تمشي معايا انا و اثير نقضيو ما نبطاوش خاطر جوزيف راجع لامريكا مستدعينا عالعشا
-عايشة: محلاه هك الطفل و محلا امو قداش رتحتلهم سبحان الله تقول نرا في كارمن الله يرحمها و جاد قدامي الكل تصدمنا كيف ريناهم داخلين بالعمل بابا عينو دمعت،قداشو نادم عللي عملو معاهم اما الحمد لله الي عجزنا عليه احنا سنين جات ايثار و عملتو في ايامات و لمت شملهم من جديد و رجعنا عيلة وحدة قداشي بنت اصل هك الطفلة و عندها القبول وين تمشي تخلي وراها محبة الناس ليها،جاد تو بالوقت يستانس و بالشوية بالشوية يحن لاهلو و يرجع معانا مريقل
-اسامة: نشالله امي ربي يهدي ما خلق،هو زادا عندو الف حق لتعدا بيه مش شوية،،اي دانا قوم عاد تحرك راني ما نستناش دريجين نلقاك حاضرة
قام مالنوم قريب 7 متع العشية راسو في حالة و خواطرو دايرة يلقى روحو مطيش عالفرش بدبشو شوميزتو محلولة..دخل عمل دوش و رجع تفقد تاليفونو،طلبتو برشا مرات تبسم و كلمها
-صغرونتي😍
-شبيك ما تهزش ياخي وين كنت غاطس
-والله دوب خرجتو ديراكت طلعت رقدت قمت شربت كاس و تقول جا شكون بنجني ما نعرش على روحي كيفاه رجعت غطست قمت كان توا عملت دوش،تفقدت تاليفوني لقيتك طالبتني ما سمعتوش حتى كيف نوقز لقيتو تحتي باز حطيتو سيلونسيو مش بلعاني عزيزتي هاني ديراكت كلمتك
-اووه شتغلي يا لطيف وسع بالك و خوذ نفس و انت شديتها على بعضها😂..صحة الدوش😛
-😂باهي زيد تبولد حتى تحصل اهو شمزال جمعة من زمان و نولي ندوشلك انا عزيزتي ما تحط شي في بالك
-جاد خيرلك راهو😄حقا كلمك اسامة
-ما نعرش ريت رقمك ديراكت كلمتك..علاه شفما
-قلك جوزيف قريب يرجع لامريكا و مستدعينا الليلة عالعشا البرا
-معناها اسامة كلمك انت والا قال لاثير و هي قتلك😕
-لا كلمني جوزيف😂😂
-😡باهي لحظة اسمعني و حل طاستك مليح..صديق و كيف خويا و امو عوضتلك امك و رتحتلهم هذا الكل نعرفو و حفضتو و ديجا مريقل اما باش يتحل هو فالعريض و يقعد ضربة ثنين يكلم فيك و هو جايك للدار والا هو هازك لدارهم قال شنوا امو توحشتك هذا الكل تمضمض عليه،انا هاني سي بون وصيتك للا و جرب سعدك نرا حاجة هكا والا هكا راسك و راسو نكسرهم 😠
-وه وه وسع بالك يعجبكشي تو😬انت قلت كلامك و انا هو في بالي
-معناها اسمع وفلت😡؟؟
-كلام الناس يغلط هههه😂😂😆
ضحك و بعد كبس روحو بالسيف😞
-اي تلم عاد😒
-هههه برا برك سيب روحك و كمل اضحك سمعتك راهو
-هههه برا يحرق جد بوك يا فرخة حتى نشدك😁 اي كيفاه تو انت تحب نخرجو معاهم والا نركشو وحدنا راس و رويس
-وه يا غلبتك الراجل مستدعينا واول مرة نقلولو لا عيب مايجيش
-لا يا للا مش اول مرة يستدعاك انت عاد وليت مولات الدار
-جاااد
-اي باهي مالا ريقل امورك و حضر روحك نكلم اك الزفت نفهم منو كيفاه و نتعدالك
-اوكي..
كمل دوش لف منشفة على روحو و خرج جاه تاليفون مالخدمة نرفزو قعد عالفوتاي هز المسدس متاعو يقلب فيه صب كاس و قام وقف مع البلكون يترشف فيه مضيق عينو و سارح مع افكارو على قد ما كان متحمس لهالمهمة السنين هذي الكل و ماخذ عهد على روحو انو يوفي بوعدو و ينتقم على ما توا برد عالحكاية و حس روحو حن والا كيفاه،قلبو مش عاطيه يكمل و الا يوصل يضر جاد مع انو الخطط الي يخمم فيها الكل شيطانية و كل وحدة خير من اختها و فيها نكهت انتقام خاصة و ممتعة يعشقها.
الوقت لف لف،وصل للي حب عليه و لقى عدوو،لقا المجرم الي عدا سنين يفركس عليه واخيرا جاء وقت الانتقام،جاء الوقت لباش يرجع يمارس فيه خدمتو اما علاه حاس روحو مربوط و فاشل مش منجم يعمل شي عاجز انو يخطي خطوة في هالحكاية مش عارف لا منين باش يبدا ولا وين باش توفا و كيفاه باش تكون النهاية، برشا حاجات تبدلو عمرو ما تخيل حماسو و مصداقيتو في خدمتو باش يرخو بالطريقة هذي و يبرد عليهم، علاه احساسو هكا ناحية جاد، كل ما يخمم فيه يكون قلبو بارد بالعكس عمرو ما حمل عليه بغض والا كرهو حاسس انو قريبلو برشا اما لازمو يتغلب على هذا الكل مش قرا و خدم و تعدات سنين في المهمة و خسر اقرب الناس ليه باش يجي توا و يتراجع مستحيل انو ينجر وراء احاسيس تافهة ماعندها من الصحة حتى شي،،من شيرة اخرى الكونجي قريب يوفا و لازمو يرجع لامريكا و يرجع يمارس خدمتو و يشوف معاهم شنو المطلوب و شنو لتبدل بعد ما لقاو عليه دليل يثبت ادانتو،المشكلة انهم مع آخر نهار ليه في الكونجي يرجعو يراقبو تحروكاتو لحظة بلحظة و اكيد باش يفهمو الحكاية على اذاكا لازمو يريقل امورو فيسع ما عندوش برشا وقت بدا يتقرب من جاد و العيلة و حسهم رتاحولو و خرجتو مع الجماعة الليلة لازمها تجيب نتيجة، راحتو توفا غدوة و طيارة غدوة الليل ما يعرش وقتاه ينجم يرجع لتونس اما عارف انو ماشي و مخلي قلبو و عقلو فيها،زيد على هذا الكل القنبلة لفجرتها سيلين في الخطبة و حكاية خوه التوأم الي ما سمع بيها كان اليوم خذاتلو تفكيرو مع انو قاعد يبذل في مجهود كبير و يحاول يلاهي روحو بأي حاجة باش يتجنب التخمام فيها ما نجمش عجز في كل مرة يشرد بأفكارو يدور يدور و يلقا روحو ما يخمم كان فيها، نفى من مخو فكرة انو يحكي معاها والا يناقشها و يحاول يفهم الحكاية خاطر باش يفتح ماضي قديم و ممكن حتى يكتشف حكايات مش وقتها،ممكن كان باش يحكي معاها باش يحل موضوع صعيب انو يتسكر و خايف لا يعرف حقيقة ممكن هو ما يحبش يعرفها والا تقلبلو حياتو الكل و يضطر بيها يتنازل و يتخلى على برشا حاجات،على اذاكا قرر انو يقعد في وتيل باش ما يروحش و يتلز يواجها و يقلها كلام يوجعها وهي مش ناقصة وجيعة المرض يكفيها..
رجع المسدس لبلاصتو و دخل للدريسيينغ لبس حوايجو و هز تاليفون كلم اسامة قلو نتقابلو في الفيلا متع جاد يمشيو من غادي..
كمل حكى معاها هي بدات تحضر في روحها و هو كمل لبس و هبط ماشيلها و يحكي مع اسامة
-اا سلعة وينكم
-ما عنديش برشا ملي روحت هزيت اثير تقضي للخطبة غدوة و خرجت معانا اك الفرخة قسما بالله حفاولي ساقي و هوما من بوتيك لبوتيك اكويني كان مازلت نعمل هالعملة الي يحب يدعي دعوة على راجل يقلو برا ربي يبعثلك خرجة قضية مع مرا😂😯يا معلم ما وصلت للدار كان ما وليت نلهث و اك السخانة عاد جاب ربي خارجين فالعشية..
-😂😂تستاهل هاكم دعواتي ليك ربي استجاب
-زيد تشمت انت روووح.. اي برا فوتني انا هاني حضرت نستنا دانا و نتعداولكم،كلمني جوزيف قللي نتقابلو  عندك
باهي..انا حضرت و هاني هابط نتفقد البنات نشالله حضرو(دخل جوزيف و راكا الكرهبة) حتى جوزيف هو وصل توا..اي تحركو عاد
-مريقل حتى دانا هي هبطت دريجين و نكونو حذاكم
علق و مشا لجوزيف..
-سلام
-اهلا..هك ما بطيتش
-لا خوك يحترم الوقت
-اي باه ايجا نقعدو نتنسمو شوية جنب البيسين حتى يخرجو البنات
-اسامة جا؟؟
-😉كلمني هو فالثنية معادش يبطا.. اما اركزلنا روحك صاحبي ياسر عليك
قعدو يحكيو لين دخل اسامة هبط سلم عليهم،عينو ترشقت في دانا دوب شافها دخل بعضو و حس روحو عرق اول مرة في حياتو يتحط في موقف كيما هكا،
ايثار و اثير زادا حضرو و خرجو حذاهم دوب وصلتلو ديراكت حوطها بيدو و جبدها ليه باسها بوسة حنينة بين خدها و رقبتها ريحتها ليعشقها تغلغلت في صدرو جبد منها نفس قوي و عاود طبع بوسة طويلة على جبينها😍😘اسامة ما كانش يبعد عليهم برشا هو زادا داخ في اثير مشالها هو باسلها يدها و رجع بيها حذا الجماعة
-اسامة: دانو عزيزتي وين تحب تطلع اطلع 3 كراهب على ذمتك و انت على شكون ترضى
-دانا: هههه زايد الدنيا و المصالح راك تحصل يا اسامة..انا نورمال نخلط حتى في تاكسي المهم انتوما كوبلووات ما تحطونيش في وسطكم😉 شدان الشمع مش خدمتي😂😛
-جوزيف: علاه تخلط في تاكسي وانا موجود و اونبليس وحدي اي معايا
-اسامة: سي بون مالا مريقلين هكا هك مع ولد الدار جوزيف معادش غريب.. نقصدو ربي مالا..
جاد يوشوش لجوزيف
-والله و تعرف تستغل الفرص يا كلب 😂😂(حطواااا جاااام قبل ما تقراااو)