عندما يعشق الشيطان الجزء الثاني

الحلقة 15

(حطواااا جاااام قبل ما تقراااااو)
الحلقة 15:
*فلاش باك....
كملت مكياجها لبست روبتها و عملولها حجابها حظرة على بكري و بقالها روتوش صغير بالياسر ساعة وكان تعطلو ساعتين و يتعدالها جاد يهزها و يمشيو للصالة..خذات تاليفونها من عند اثير عملت سالفي كيما وصاها و بعثتهالو عالميسانجر،شافها اما ما رجعش قعدت تستنا في كلامو الحلو متع العادة و شي ما رجعش،تنرفزت سكرت الكونكسيون و رجعت حذا البنات..رغم هذا فرحانة و طايرة مالفرحة..فرحتها مخلطة بوجيعة قوية و غصة فالحلق و هي تصبر في روحها و تقول خوف عادي تعداو بيه البنات الكل في عرسهم اما احساسها قوى و شدتها رعشة مش عادية وقت نوقز تاليفونها و كلمها جوزيف هزت عليه تتبسم و عينها تلمع الفرحة مش سايعتها اما فيسع ما تمحى كل شي طاح تاليفونها من يدها عالفوتاي و طاحت هي معاه فالقاعة تلمو بيها البنات و هزوها تكاوها يفيقو فيها، هزت دانا التاليفون لقاتو جوزيف لكلمها ستغربت و ما فهمت شي..رعش قلبها توحشتو من الليلة لرجع فيها لامريكا نساها و قطع صيلتو بيها ما كلمهاش بعد الي كان تاليفونها ما يسكتش آخر مرة سمعت فيها صوتو و قت سافر و وصل كلمها و طمنها عليه  بعدها ما عاودت سمعت عليه حتى شي حاولت برشا توصلو و هو كان مسكر كل ثنية تنجم توصلها ليه، تكلمو يا ما يهزش والا يقلها لاهي فيسع و يعلق حارت و حار دليلها معاه بكات و نوحت تتغشش منو و بعد ترجع تسامحو و تهز التاليفون و ترجع تطلبو اما بتصروفاتو فهمت انو بيه حاجة و قاعد كل مرة يتسبب و يخلق لروحو في اعذار باش ما يحكيش معاها..ما تعرش انو هو زادا قاعد على الجمر موجوع و مخنوق و ما يعلم بحالو كان ربي مش بيدو انو ما يهزش على تاليفوناتها ديما يتسبب و يجبد في روحو يبدا حتى قاعد ما يعمل في شي يرا اسمها عاللكرون تطلب بآلاف المرات فالنهار و يعجز انو يهز قلبو يوجعو و يتفتفت عليها يعرف انها متحيرة و خايفة عليه و جوست تحب تطمان ،هو كان يلقا راهو سيب الدنيا و ما فيها و شد جنبها اما الله غالب هكا الضروف حكمت عليه و هذي هي الخدمة لكرهها،كل دقيقة يلعن اللحظة لختار فيها انو يكون عميل و يلعن روحو الف مرة على الضروف لخلاتو  يترأس المهمة هذي بالذات،المهمة الي اضطر فيها انو يتخلى و يتنازل على حبو و على الانسانة لعشقها قلبو و خلاتو يدور ظهرو للراجل لحسبو عدوه و لازم ينتقم منو،للراجل ليرا روحو فيه،يرا خيالو،صورتو و ملامحو، هو مرايتو لتعكس حقيقتو رغم انو علاقتهم تبنات على الكره و الانتقام من الطرفين اما بطريقة او بأخرى ما ينجمش ينكر و يكذب على روحو انو الانسان هذاكا عزيز عليه و ليه في قلبو مكانة خاصة،مكانة يجهل معانيها و تفاصيلها،ما يعرش شنو نوع العلاقة لبيناتهم و الا شنو حقيقة هالاحاسيس و المشاعر القوية ليحسوها الزوز وقت يتقابلو و لوين هازتهم هالصدفة لجمعتهم عن طريق ناس اخرين في ظرف مجهولة نهايتو..
مزالت سارحة في اسمو تتذكر في وجيعتها و بكاها ،غاب عليها و جبد روحو من غير اسباب، من غير ما يبرر موقفو،خلاها معلقة مش فاهمة شي،فاقت على روحها و رجعها لوعيها صياح البنات لمفجوعين على ايثار..تقوات و كلمتو
-وي جوزيف انا دانا..شنو لصار و شنو قلت لايثار حتى داخت و صار فيها هذا الكل😕
-دانا جاد عمل اكسيدون توا و توفى😔
تصدمت عينها وساعت قريب تخرج من بلاصتها و لسانها تعقد للحظة بدنها جمد و ولات ترعش بكلها تكلمت بالسيف
-الله اكبر😨امان جوزيف متأكد😢وينو هو توا😢شكون قلك..تكلم امان ما تقعدش ساكت(ولات تبكي و تصيح)
-الاكسيدون صار قدامي😢حكاية طويلة...😔جات الحماية و الشرطة و هبطنا الدنيا الكل و ما لقيناش جثتو😣احتمال كبير انها تحرقت خاطر طاحت بيه الكرهبة من فوق الجبل و تفجرت.. مجرد انو عاود تخيل المشهد قلبو وجعو و حس روحو خرجت، الاحساس لحسو و وجيعت قلبو القوية وقت شاف الكرهبة تقلبت و طاحت سايي،نظرة جاد ليه و عينو لشاف فيهم اللوم و الحيرة،يشوف في محاولاتو لفشلت باش يسيطر عالكرهبة لكانت طايرة بيه طيران و ما نجم يعمل شي..اول مرة يحس هاكا الكل و اول مرة في حياتو تنزل من عينو دمعة على انسان بالنسبة ليه عدوه،انسان عمرو لا شافو و لا خالطو و لا عاش معاه شنو لخلاه يحزن عليه بالطريقة هاكي..دمعتو خانتو من جديد و هبطت حارة على خدو ومن حرارتها حسو تشق في زوز.. يسمع فيها تبكي زاد كملت على ما بيه تزادت وجيعت قلبو يعشقها ما يحملش فيها ،يهبل و يجن جنونو كيف يتخيلها تبكي و هو عارف انو هو السبب في دموعها ما يعرش كان باش يجي نهار و تسامحو اما نشالله تفهمو عاللقل و تعذرو...كان مزال واقف بعيد شوية على بلاصة الانفجار يد شاد بيها التاليفون و لخرا حاطها على جبينو  كبس على راسو بعصب نفخ و فد كيف سمعها  تبكي بالشهقة ما نجمتش تكمل تحكي معاه..رجع هو يحكي معاها و يحاول يهديها
-دانا عيشك..
الكلام وحل في حلقو ما نجمش يكمل سكت و عجز حتى باش يقلها "عيش عزيزتي"ما نجمش،ما لازموش يضعف هذي خدمتو و هذي هي الاوامر لمستحيل انو يخالفها و يعصيها،طول حياتو و طول هالسنين في مسيرتو المهنية يعرف يفرق بين خدمتو و حياتو الشخصية...
المرة هذي يحس في روحو عجز حتى باش يجبد طرف نفس يملي بيهم رواريه تمالك روحو و رجع يحكي..
-دانا يزي مالبكاء قوي روحك باش تنجم تقوي ايثار،انت اقرب الناس ليها بعد اثير مستحقتكم و محتاجتكم لازمكم تاقفولها هي توا تمر بفترة من بين اصعب فتارات حياتها كونو معاها كيف خيالها و ما تخليوهاش وحدها خاطر الي جاي باش يكون اصعب و اصعب عليها..و رد بالك على روحك انت زادا...😢😔
علق،، ما نجمتش تجاوبو و الا تزيد معاه كلمة مسحت دموعها و رجعت لايثار لكانت مسبولة كيف الميتة و البنات يفيقو فيها..حاولت تتقوى تكلمت ببرود بالسيف نجمت تتصنعو عكس الحرقة و الوجيعة لحاستهم من داخل😐
-وصلها خبر راجلها لتوفى في اكسيدون الساعة شوية(خزرت للبنات اثير و هند و هنيدة لكانو شادين جنب ايثار و الي حستهم مزالو ما ستوعبوش كلامها لقعدو يستناو فيها تعاودو)جاد مات في اكسيدون تفجرت بيه الكرهبة لطاحت من فوق الجبل...
ما لقاوش الوقت باش يزيدو يستفسرو خاطر هي بيدها ما عندها حتى معلومة فيسع بدلو لايثار لحلت عينها شوية اما مزالت دايخة و في عالم آخر مبحرة عينها في السقف لا بكات لا صاحت و لا نطقت بحرف..وصلو للفيلا للقاوها قايمة قاعدة بالعباد و الحاكم دخلوها ديراكت للبيتها و جابولها الطبيب لعاين حالتها و طلب انهم ينقلوها فيسع للكلينيك خاطرها كانت في بدايت دخولها في غيبوبة جراء الصدمة لتعرضتلها و شوف تفيق منها والا لا و لازمهم يقومو بالازم باش يمنعوها انها تصير... بالوقت وصلت الانبيلونص للفيلا و هزوها و قامو معاها بالازم و بقات تحت العناية المشددة.. اثير و دانا كانو معاها لحظة بلحظة ما سيبوهاش دقيقة..
جوزيف كان لاهي مع المحققين و الشرطة لمزالو يعاينو في موقع الحادث و يبحثو فالبلايص القريبة على امل انهم يلقاو جثتو و الا حتى اثارها وشي حتى الانفجار لصار طفاوه و بربشو الكرهبة ما لقاو كان بقايا باسبورو و تاليفونو و اوراق اخرين ما عدا هويتو..الندم ياكل فيه و ينخر في عظامو صحيح امنيتو كانت الانتقام لموت صاحبو و انو يكمل مهمتو،كان ماخذ عهد على روحو انو يقتل الي قتلو عشير عمرو اما بعد تقلبت الآية و تقلبت معاها الموازين الكل،بعد ما تعرف على جاد و الي صار الكل خلاه يبرد و يتخلى على فكرتو رغم انو فاللخر تلز انو ينفذها اما ما كانش عامل حسابو لهذا الكل،ما عملش حساب للكرهبة  و انو ممكن تصير حاجة تقلب كل شي،،شكون كان يعرف انو باش يصير الي صار الكل..هذا حكم ربي و ماشاء فعل.. الخطة كانت انهم يواجهوه و يستفزوه باش يسلم روحو لسلوطات الامريكية و يخضع للبحث و ياخو جزاتو و يتحاكم على التهم الموجهة ليه والي تتمثل في تعطيل الشرطة الفدرالية على القيام بمهامها السرية و تعطيل سير ابحاث  قضايا متعلقة بشبوهات فساد و تجارة اعضاء و مخدرات و اسلحة و القتل بالعمد و بغير عمد لناس كان من المفروض انو القانون هو ليعاقبها و يحدد مصيرها و القيام بمهام سرية من اختصاص الشرطة و فرقة مقاومة الفساد..جوزيف شاكك في حاجة،فايتتو حلقة لازم يعرفها شنو و يكشفها،سياقت جاد ما كانتش عادية و يستبعد كل البعد انها عملية انتحار منو و هو يعرف مليح فرحتو بعرسو فالنهار هاكا،كيف ركز معاه حس انو قاعد يحاول يسيطر على الكرهبة و يوقفها اما ما نجمش و مستحيل زادا جاد يخللي كراهبو من غير كونترول خاطرو مهووس و معين حتى شكون لاهي بيهم و حارص عليهم،حاسس فما إن فالحكاية، موتو مش عادية و ما تكون كان عملية  و وراها شكون..😕😕 هز روحو و مشا يطل على ايثار لعرف انها فالكلينيك سأل على حالتها طمان عليها و رجع للفيلا يلوج يلقاشي طرف خيط يوصلو للحقيقة و اول ما وصل تعدا للباركينغ تفقد الكاميروات للقاهم مدغدشين و داخلين بعضهم لمدة درجين كاملين،مدة كافية تخللي اي واحد يتلاعب بخيوط الكرهبة و يعمل فيها حاجة شاف الوقت من وين لوين و مشا يسأل فيهم بالواحد بالواحد و ممكن تفصيل صغير و تافه يوصلو للجاني و شي ما لقا.. برد الحكاية نهارتها خاطر لازمو ياقف مع ايثار و يواسيها دخل للصالة وين عرضتو تصويرة جاد لمعلقة على كبر الحيط عينو دمعت و ما فهمش علاش مخنوق و حاسس على موتو،حس انو فقد حاجة منو و فيه،،،حاول يبعد عينو من عليه و يحاول يشتت افكارو و مشاعرو بحاجة اخرى،لقى الاعمام بنساهم و ولادهم و بناتهم الكل قاعدين يتقبلو فالعزاء معاهم راشد لكان مطيش عالفوتاي طالعو الدم و دايخ يقرقو بيه باش يهزوه للطبيب و هو شاد الصحيح في لا،،راجل كبير كيفو بوقارو و قوتو و التسلط لعندهم وراثي فالعايلة انهار قدام الخبر و الفاجعة لهدتهم الناس الكل حفيدو الي لا شبع من بوه كمل ما شبعش منو هو وفي كل مرة يكبر بيه الندم علي عملو في هالعايلة من كارمن و والياس قبل لجاد توا و حمل روحو مسؤولية كل شي صار،بعد ما تصالحو و رجعت المياه لمجاريها بعد السنين هذي الكل و بعد التشتت و الضياع لعرفتو العايلة اخيرا تلم شملهم من جديد حتى جات الموت و سرقتو منهم..
جوزيف من غير ما يشعر لقى روحو مركز مع تفاصيل و ملامح الناس الكل بدون استثناء يدور بعينو عليهم و يتفحص فيهم بالتدقيق و سبحان لخلق فيه دقة الملاحظة فيسع ما جذب انتباهو احمد لكان واقف بعيد عليهم شوية متكي عالعرصة مالي وجهو البرود و الامبالاة و ساعات يظهر عليه انو يتصنع فالحزن كأنو مش ولد عمو لمات و حسب ما سمع علاقتهم كانت مش ولابد.. عكس بقية الاولاد لكانت ظاهرة على وجوههم ملامح الحزن و القلق رغم العلاقة الضعيفة لجمعتهم اما بداو يتأقلمو في البريود الاخيرة.. بيناتهم اسامة لكانت صدمتو قوية و حالتو ما تبعدش برشا على حالة راشد و ايثار كان مستقوي نوعا ما و منهار في نفس الوقت، لا كلام يوصف و يعبر على مدى صدمتو على خسارتو لولد عمو لكانلو الصاحب و الخو الكبير و العشير كان رفيق دربو و ما ختارو كان هو دون ولاد عمو الكل،جاد الوحيد لكان مكروه بيناتهم و كان هو  طول عمرو يدافع و يعارك عليه في حضورو و في غيابو،شهد على حبو المجنون لايثار،شهد على التحول لوقعلو من نهارت الي عرفها و من شيطان تحول ل ملاك،شهد على عركهم و هبالهم كيفاه يجي يشكيلو والا يفرغلو قلبو رغم معرفتو بيه قليل كلام و كل شي يخليه في قلبو بينو و بين روحو..توا قعد وحدو خلاه و مشى تمنى راو هزو معاه😢كانو مع بعضهم في الحلوة و المرة في الفرح و الحزن اما هو كان اناني و رحل وحدو من غيرو، كان مستعد يمشي معاه حتى لجهنم كان لزم.. كلام الدنيا الكل ما يعبرش على حالتو توا.. كانو يحضرولو في عرسو و فرحتو ليستنا فيها بالدقيقة و الدرج ياخي حضرولو جنازتو و هاهم قاعدين توا يتقبلو في العزاء على روحو لبقات الدور بيناتهم و ساكنة فيهم و معاهم..
لقا بلاصة فارغة جنب غسان لكان هو زادا متطرف بعيد عليهم شوية مشى قعد حذاه و حاول يجبدو بالكلام..
-الله يرحمو حد ماهو مصدق😢
خزرلو غسان و تبسم بوجيعة
-تعرف وين نراك انت تقولش جاد قدامي من نهارة لدخلت لحياتنا لا مرة فرقتكم على بعضكم و ديما نغلط بيناتك مش كان انا الناس الكل سبحانو ليخلق من الشبه اربعين عاللقل بقيت انت معانا نشالله ما تخليناش بيك نحسو بوجودو بيناتنا اكثر رغم انا ما نستحقوش حاجة تذكرنا بيه خاطرو باش يقعد معانا في قلوبنا،خسارة إنا ما كناش قراب لبعضنا برشا، جاد كان ديما حارص انو يخلي مسافة كبيرة و فراغ ما اكبر بيناتنا بسبب خلافات قديمة بين الكبار و خلصنا احنا الصغار حقها و تحرمنا من بعضنا من الصغرة..الله يهديهم و كهو😢😢
-اما الحمدلله ديما ابرك عرفت انكم على خلاف اما البريود الاخرة لاحظت انو علاقتكم الكل رجعت مريقلة معاه و تلم شملكم من جديد و وليتو حتى تقعدو قعدات و لفترة لباس  بيها مع بعضكم على ما اظن..
-وي كلامك صحيح اما باقي تحس انو فما حاجز كبير بيناتنا الكل كيف نتلمو مع بعضنا خاطر الاولاد تحسهم مش الكل صافين و حتى كيف نقعدو ديما ناقصين اكيد عندك علم انو علاقة جاد و احمد سافا با و عمرهم من صغرهم لا تفاهمو.. جاد بارد و لا علاقة و احمد يبخر بريحتو و نتذكر من اول نهار حط فيها  جاد ساقو فالفيلا و تلمينا العيلة الكل رحبنا برجوعو وقتها تعاركو و مرة اخرى زادا  قامت القيامة بيناتهم فالمزرعة صحيح ما كناش حاملينو على خاطرو متكبر و مغرور و ياسر شايف روحو علينا اما لا حد عبر على رايو خلاف احمد لكان في كل مرة هو الغالط و حسب ما لاحظت طبيعة جاد ما تكلموش ما يكلمكش و يا ويلك كان ضلمتو و الا قلت فيه حاجة وقتها ما يرحمش عمري لا ريتو تبلى على واحد فينا والا جبدنا بكلمة رغم معرفتو بكرهنا ليه..اما كل شي تمحى كيف تبدل هو و حل قلبو لينا و دخلنا في جو بعضنا وقتها بدينا نفهمو طبيعتو و نستانسو بيها  هو زادا معذور خاطر ما عاشش كيفنا بين والدينا هو تيتم على صغر سنو و لا نهار شاف في حياتو فرحة  قبل ايثار الي الكلنا لاحضنا و شهدنا على حبو ليها...الله يرحمو و كهو نشالله ربي يغفرلو و يسامحو...
جوزيف بدا باش يحكي و يرا في سيلين جاية ناحيتو الظاهر انها سمعت بخبر موت جاد ما حبش يقلها باش ما يفجعهاش و بالك تصيرلها حاجة آخر مدة لاحظ اسألتها الزايدة و استفساراتها الملهوفة على جاد و اصرارها انها تعرف اخبارو و حتى تفاصيل حياتو اليومية كان لزم ،اما بللي تخيل ردة فعلها ما جاش البالو انها باش تكون بالطريقة هاكي.دوب وصلتلو ترمات عليه من كلامها و تصروفاتها الي ما فرزهمش ان كانو  لوم و الا اتهام و الا شنو بالضبط.. شدتو من كتفو تخض فيه بجهدها الوافي، تصيح و تبكي تقول ماتلها ولدها، الحاضرين الكل تحول انتباههم ليهم هوما و الضجة لعملتها سيلين بعد الهدوئ لكان مخيم على الصالة خلاف صوت القرآن و المقرين،،تبكي و تحكي لين يتسد عليها النفس تجبد الهوى بزربة لين تسمع شهقتها تسكت لثواني و ترجع تحكي بزربة و تصيح😢😰
-علاه هكا علاه والله حسيتك باش تعمل حاجة علاه كلمتو و علاه حبيت تراه و تقابلو كان مش انت راهو حي و عايش بيناتنا😢كان مش انت و خدمتك و مهمتك الزفتة رانا قايمينلو عرسو توا مش جنازتو،يا ربي لا تشويني و لا تذوقها وجيعة لولية،،(زادت كبست على كتفو و ركزت عينها في عينو) تعرف هكا شكون؟ هاكا خوك😲هاكا لحمك و دمك😲هاكا التوأم متاعك😲هاكا لكنت تجري في جرتو سنين و سنين،هاكا لأصريت و حلفت بيمين انك تنتقم لموت صاحبك منو ،هاكا لمات و لا فرح ولا شاف فرحة في حياتو، هاكا ولد امك و بوك  كارمن و الياس دمكم واحد و روحكم وحدة😢(جبدت تصويرة لجاد و هو عريان من فوق و حطتها قدام جوزيف) حل عينك ثبت شنوا الي في كتفو اليمين من قدام،مش نفس الوحمة الي عندك ؟!!اه تكلم و امبوسيبل كان باش تقللي ما حسيت شي ناحيتوو 😢😢يا ربي علاه هو راني ما شبعتش بيه حضتنو مرتين في حياتي في ولادتو و قبل موتو،علاه هكا يا ربي ما قلناش لا و ما عارضناش حكمك يا ربي صبرنا و سامحنا يا ربي..يا ربي تغفرلو و تسامحو..😢😢
شدتها الدوخة ما نجمتش تكمل تحكي طاحت فالقاعة تبكي و تخبط لين صوتها ضاع😢...
افكارو ولات فلو في مخو عينو ضباب ما يرا في شي بعد الي سمعو  راسو وجعو شدو بين يديه الزوز و عطاهم بالقفا وقتها وين بدا يربط فالخيوط و بين الاحداث لصارت و الاحاسيس الغريبة لحسها...(حطواااا جاااام قبل ما تقرااااو)