عندما يعشق الشيطان الجزء الثاني

الحلقة 19

(حطوااااا جاااام قبل ما تقرااااو)
الحلقة 19:
ساعتين رقدهم تقول قرن..رقد مرتاح مطمان كأنو ما كانش يرقد المدة لفاتت الكل..حل عينو و هبطهم وين كانت هي راقدة في سابع نومة كيف الملايكة مكبشة فيه بيديها الصغار تقول باش يهرب عليها، تبسم تبسيمة مخلطة بوجيعة كبس على كتفها بيديه و قرب شفايفو، طبع بوسة حنينة طويلة على جبينها،بوسة كلها معاني و مشاعر و احاسيس،تفقد سخانتها لقاها طاحت حمدلله وقتها باش تنفس و رجعت فيه الروح بعد ما كان خايف و يرعش عليها رعيش،رجع تكى راسو عالمخدة و حط يدو على جبينو عندو برشا على احساس كيف ما هكا..اول ليلة و آخر ليلة جمعتهم كانت ليلة حفلة توديع العزوبية متاعو الليلة لكانت نقطة تحول في حياتهم الزوز،برشا منهم سماوها الليلة المشؤومة اما بالنسبة ليه هو عمرها ما كانت مشؤومة صحيح حياتو و حياة عايلتو تقلبت سافيها على عاليها و صار ما صار و هو يعرف انو هذا اختبار من عند ربي سبحانو و راظي بحكمو ماهوش معارضو، الليلة هاكي اروع و احلى ليلة في حياتو الكل،كانت اول ليلة تجمعهم و توحد بدوناتهم في بدن واحد و روح وحدة و قلب واحد، الليلة هاكي راسخة في بالو و باش تقعد محفورة في قلبو و ساكنة كيانو و وجدانو ﻵخر نفس في حياتو بكل تفاصيلها و احداثها،بكل آآه خرجت منهم و كل حرف و كل كلمة نطقو بيها ،بكل دمعة فرحة هبطت من عينهم الزوز،بكل وجيعة عاشتها هي و عاشها هو معاها، بكل كم الحنية و السياسة و خوفو عليها،بكل الاحاسيس و المشاعر و اللذة و نار الحب لشعلت في جواجيهم و ولدت الشهوة بيناتهم،الليلة الي كانت نتيجتها ثمرة عشقهم،ولدو الي جاي فالثنية من صلبو,ولدو والا بنتو الي قاعد يستنى فيه على احر من الجمر..خزرلها و خرج تنهيدة مالاعماق مخلطة بتبسيمة حزينة طالب من ربي ما تكونش آخر ليلة تجمعو بتأوم روحو.. جبد روحو منها بالشوية ركحلها راسها عالمخدة غطاها و مشى قعد عالفوتاي جبد البيسي يتفقد فالتقارير الي بعثهملو ايهم بخصوص الشريكات لقى برشا خنار و برشا تحيل شك جوزيف طلع في بلاصتو و لازم كل شي يرجع كيف ما كان قبل وقت هو موجود..هو غاطس يسمع فالباب تحل  هز راسو لقاه جوزيف دخل قعد حذاه
-تو نورمال انت جاي هنا و انا موجود اي كان يدخل حد
-تي بلاهي شكون باش يدخل و زيد ما فما حد اثير بايتة حذا دانا و امي سيلين في سابع نومة تعديت على بيتها لقيتها غاطسة و زيد مالدوا لتشرب فيه ما تقوم كان غدوة😆
-ما شافك حد مالحراس البرا؟
-شافوني الكل و سلمو عليا و ما شلق حد
-اي باه رد بالك غلطة صغيرة نمشيو نزمرو الزوز و يطيح كل شي فالماء
-بقدرة ربي لباس..(خزر لايثار) ااا شحال صغرونتي
عطاه قحرة متع مووت😂و جاوبو بالسيف
-😒صغرونتك؟!اي تلم خير ما نقوم نهدلك فمك..لباس حمدلله طاحت سخانتها ابرك شوية الطبيب قلي وحمها خايب و لازمها الراحة و المسايسة و تبعد عالغش
-ممم😑 تباركالله البيبي طالع لبوه هذا مزال قاعد يتكون و متعبها هكا😕
-اي طالع لبوه عندك مشكل!و هي على قلبها احلى مالعسل..طرس اقعد ما تاقفليش على راسي و ما تكملش عليا عصب هالخدمة يكفيني
-(قعد)باهي سكر عليا فمك شعندك تخرنين😒هك بديت تراجع فالتقارير
-اي والله خنار ازرق الشريكات لازمهم وقفة صحيحة.. اما برافو ريت شوية من خدمة ايثار يعطيك الصحة كيف علمتها
-ما عندي ما علمت هي تباركالله عليها ذكية و مخها محلول فيسع تعلمت و حفظت السيستام و كل شي مزالت شوية و تاقف هي على كل شي تبقى تو نعرفها على شركائنا و الكليونات لنتعاملو معاهم سيرتو الريوس الكبار المهمين،غدوة فما اجتماع مهم مع عملاء روس امشي انت في بقعتي و هزها معاك خاطر هي خدمتو و تعبت عليه الدوسي هذا و الصفقة مهمة برشا ليها خاطر اول صفقة تشرف عليها هي وحدها من غير ما نعاونها انا في حتى شي و مهمة لينا زادا هو على عينك و تعرف وضعنا شنو توا،كل شي قدامك اعمل نظرة الشركة هذي باش تزيد من اسهمنا و مربوحاتنا في روسيا و حسب رايي صفقة ما تتفلتش و ايثار حكاتلي عطاتني شوية تفاصيل محظرة مشروع كبير بأفكار جديدة ركز فيه مليح..
-اوكي مريقل..راجع حذا ايهم؟
-اي..عندي قضية نكملها و نمشيلو ديجا محظر قعدة يا غيبتك و برا
-نشالله ينفعكم😒انا من غير القعدة و نركح في مخي بالسيف..الحاصل سايس روحك فالطريق و كيف توصل اعلمني
-اوكي فرار..اي على خير طمني على ايثار كان فما حاجة كلمني..سلام
اذاكا خرج و جاد رجع غطس فالاوراق لقدامو راجع روحو و ركح مخو و عرف شنو لازم يعمل..كمل و رجع شد جنبها فالفرش جا و راها عنقها من تالي خباها في حضنو و رقد...
7:00 متع الصباح قام عمل دوش و هبط حضرلها فطورها و دواها في بلاتو و طلعهولها للبيت لقاها فايقة قاعدة فالفرش شعرها على جنب عينها ذابلة باين عليهم التعب لدرجة انو لونهم باهت،القلق باين في عينها و ظاهر داخلة بعضها من غير ما يشعر قلها صغرونتي تبسم و قربلها
ضيقت عينها بمجرد انها سمعت الكلمة خاطر جاد الوحيد لكان يقولهالها
-صباح النور دجو(قالتها بصوت تاعب)
تبسم بوجيعة كيف قاتلو دجو اما ما حبش يظهر رسم الفرحة في عينو و قعد جنبها
-صباح العسل يا روح دجو😘
-سافا توا شتحس في روحك
-حمدلله ابرك اما فاشلة شوية
-رقدت مليح البارح؟
هبطت راسها كانت متلبكة نظراتها بين الحشمة و نوع من تأنيب الضمير
-اي رقدت بالباهي و مرتاحة برشا راحة عندي برشا ما حسيتش بيها دجو نحب نصارحك بحاجة انا بيدي مش فاهمتها حاسة روحي داخلة بعضي و كثرو عليا برشا حاجات لين معاد فاهمة شي..
هو زادا بدا عليه القلق و الحيرة
-تكلم والله حيرتني😟 ايثار شفما؟
-ما نعرش وليت نتخيل فيك جاد لدرجة اني حاسة بقربو مني تصروفاتو و نضرتو الي عمري ما ننساها،طريقة كلامو وقفتو كل هاذم وليت نراهم فيك هالايامات ممكن انا نهتري والا هاذم اعراض مني خاطر توحشتو و عايشة كل ثانية من عمري على امل انو يرجعلي و نملي منو عيني حتى لو كان من بعيد لبعيد..و هذا الكل حسيتو بقوة البارح وقت جيت و رقدتني عندك كان لاحظت حتى كيف حكيت معاك خاطبتك على اساس هو كنت انجم نبعدك عليا و ما نخليكش تقربني اما احساسي انك هو غلبني و سيطر عليا حبيت نعيش اللحظة حتى كانها وهم و خيال..ما نحبكش تفهمني بالغالط والا يهزك مخك لبعيد و تتوقع حاجات اخرين الله غالب والله حاجة اقوى مني يا جوزيف
كانت تحكي و هو مركز معاها يسمع في كل حرف تنطق بيه و حاسس بيها و بوجيعتها عارف قداه متعذبة في غيابو و بعدو عليها
-ما تخافش مش انا الي باش نفهمك بالغالط يا ايثار انت تعرف معزتك و قيمتك عندي و مستعد نعمل اي حاجة تنجم ترتحك و تخليك فرحانة..شوف حالتك كيفاه ولات الكلهم يشوفوك محلاك و مزينك و يصدقو الضحكة الي ترسمها على شفايفك اما انا نعرف شنو مخبي وراها التبسيمة هاكي،نعرف انها مش من قلبك و انو انت قاعدة تتصنع فيها، نعرف قداه انت متعذبة و مكش مصدقة الي صار و تعديت بيه،نحبك تكون قوية و ما تستسلمش لضعفك،كون قوية مش لروحك والا على خاطر حد اما على خاطر البيبي الي قاعد يكبر في وسطك توا..ما تقولش خسرت،لا انت ربحت كل شي،البيبي هذا هو الحاجة الوحيدة الي خرجت بيه مالدنيا و هو الي عوضلك خسارتك،بيه و على خاطرو لازمك تاقف على سقيك هو كل شي بالنسبة ليك..ايثار ما نعرش شنو باش نقلك و اكيد مش وقتو في حالتك توا اما الحاجة هذي لازم منها ولازم نكملوها في اقرب وقت..انا سبق و جبدتلك موضوع العرس و كيف حكيتلي انت و صارحتني على حبالتك زيد انا شديت الصحيح و ديجا قررنا وحكينا مع العايلة الكل وحددنا الدات و حضرنا و على اساس النهارين لفاتو و نورمالمون اليوم العرس، الكلهم يعرفو قداه جاد عشقك اما الله غالب ربي حبو،هوما ما يعرفوش شنو صار آخر و حد ما عندو علم بحبالتك غيري انا،الوقت يجري و كان باش نزيدو نأجلو العرس مش لصالحنا خاطر كرشك باش تكبر و احنا مازلنا مش معرسين و على اذاكا لازم نكملو الحاجة هذي و على اساس ولدي و  كان باش نزيد نأجلو مش حكاية و مانحب حد يقول فيك كلمة زايدة والا ناقصة لا في وجهك لا في قفاك..
سكت شوية و هو يخزر لملامح وجها كيفاه قاعدة تتبدل مع كل كلمة يقولها و الظاهر انها مستوعبة الوضع و عارفة مليح انو على حق و كلامو الكل صحيح،هزت راسها و هي مشابكة صوابعها،الحكاية صعيبة عليها اما لازم منها و على اذاكا تقوات على روحها و خذات قرارها في الوقت لكان هو يحكي فيه
-كلامك الكل صحيح والي بديناه لازم يكمل ديجا كل شي حاضر و احنا مش عاملين حاجة كبيرة. اليوم العشية يجي العدول نقيدو الصداق و نعملو لمة صغيرة  فالدار و برا
-اي حتى انا ماذبيا الليلة خاطر نهيرين اخرين و لازمني نرجع لامريكا كلموني مالخدمة عاللقل كيف نمشي نكون مطمان عليك هاو معاك امي و اثير
-باهي الي تراه صالح انا معاك فيه
تبسملها و باس جبينها حست بنفس الاحساس الي كانت تحسو قبل و هو معاها بوستو حيرت كل ذكرياتها و مواجعها غمضت عينها بقوة من شيرة تمنع في دموعها انهم يهبطو و من شيرة تتبنن فيها و تحاول تسترجع احاسيس مستعدة انها تدفع عمرها و ترجع تعيشهم من جديد..بعد عليها شوية بعد ما حسها باش تنهار فيسع بدل الموضوع
-اي سي بون توا تفاهمنا في كل شي من اليوم نحب نرا كان ايثار القوية لنعرفها.. سافا توا تفرهدت بعد ما حكيت الي كان مقلقك؟
-اي سافا والله تفرهدت قلت بالك يفهمني بالغالط رتحت برشا عيشك دجو
-عيشو روح دجو😙نحبك تتصرف كيف ما انت حتى لو كان عاودت حسيت لحسيتو البارح و خلاك داخلة بعضك عادي انا قتلك مستعد نعمل اي حاجة ترتحك و تخليك فرحانة دونك انت تصرف على طبيعتك و ما يهمك في شي
-ههه باهي...امان والله مت شر ياخي جايبلي فطوري باش تشهيني و تهزو😛
-ههه عدنا😂صحيت نحبك ديما لسانك طويل..اي ايجا نوكلك و الا تاكل وحدك
-وكلني😆
-😑يساسي و يتشرط زادا
-ههههه كان عجبك😝
بدا يوكل فيها ياخي تنرفزت
-😠ياعمبو لقلك وكلني بلاه هات هنا انا نقلك ميتة شر و انت توكل فيا بالشوية كيف الصغار
فكتلو من يدو و طاحت تاكل وحدها تقول كانو حابسينها.قعد يضحك عليها
-😂ملا متوحشة😒
هزت راسها خزرت للوقت تفجعت و عينها تحلو على وسعهم مصدومة😨و قامت تصيح
-اااا برا يكب كبوبك الصباح لهيتني..امان دجو والله لا عاد وقت7:45 توا و انا لتو ما حضرت و عدنا اجتماع و انت سيادتك مسكر فمك و ما ذكرتنيش و تعرف انو اول اجتماع ليا باش نشرف عليه وحدي..مبلدك الززح
-هههه و مجنونة زادا😂يا بنتي شبيك تحولت و ترص لوطا نقص مالتفرفيش متاعك راك هازة روح في وسطك مكش وحدك الخرا هذي😒 والله يا ايثار مازلت تقوم هكا بزربة الا ما نعلقك😠تو نورمال انت و زيد مولات المول تمشي وقت ما تحب و وقت ما يظهرلك و ابار سا الاجتماع 9:00 مازال بكري كمل فطورك و حضر روحك في عقلك و اهبط مدام انا كملت لبست تو تلقاني لوطا
-باهي سامحني معادش نعاودها اما والله ننسى مش مستانسة و مازلت ما تعودتش على وضعي الجديد
-باهي صغرونتي السماح يلا كمل فطورك عيش كعبورتي😘و نشالله ما تكملوش😑
طبس عليها باسها و خرج خلاها كالمصدومة تصروفاتو المتقلبة المتناقصة الي ما تنجمش تتنبأها هي لزاد دخلتها في حيط و فرعستلها مخها..
كملت فطرت و دخلت للدريسينغ لبست عملت شوية مكياج و برفنت تفقدت اوراقها و حلت البيسي متاعها عملت نظرة على التقرير و الخدمة الي حضرتها و  هبطت لقاتو يستنتى فيها..كان واقف فالصالة يخزر لتصويرتو لمعلقة قدامو، واقف وقفت العادة اك الوقفة الشامخة مرفوع الراس حاط يد في مكتوبو و الاخرى يشرب بيها في كاس شاف انعكاس صورتها عالكواترو و هي هابطة فالدروج كانت لابسة سروال لارج تاي هوت نوار عليه شوميز نوار واسعة شوية من فوق  حاشيتها تحتو و جيلاي ترواكار بلو و نوار مريقلة فولارتها الي كانت حاصرتلها خدودها شوية و ما ركزش في ساقها، دارلها تبسم بحب،قلبو رفرف و عينو ولات قلوب قربلها غرس راسو ديراكت في رقبتها يستنشق في ريحتها و بعد باس خدها شدلها يدها و كركرها وراه للباركينغ من غير ما نطق بحتى كلمة😂😍 وصلو مشات ديراكت هزت مفتاح ال مازدا كازاماي البلون
-اطلع انا باش نسوق😆
-ههه باز تفدلك ايثار😕مازلت حاجتي بروحي(من غير ما يشعر قلها)مت مرة وحدة يزي فيه الف بركة
خزرتلو ديراكت ضيقت عينها و فيسع ما الضحكة تمحات من على وجها و ظهرت عليه برشا تساؤلات وقتها باش فاق على روحو شقال و فيسع قلب الحكاية
-مت البارح وقت كلمتني سيلين وقاتلي اجري لايثار وقتها انا مت و حييت بالفجعة و جيتك ساقيا اعلى من راسي
-اللطف عليك بابا اي اطلع اطلع
-يا بنتي متأكدة باش تسوق انت تي حتى البيرمي خذيتو هالنهارين برك راك
-حط حط اك السانتير و نقص حسك😂
طلع جنبها و قعد مركز معاها كيفاه تسوق،
كانت مركزة على ثنيتها تسوق بكل راحة و كل شوية تخزرلو و تتبسم،فرحان بكل حاجة تعملها معجب بكل تفاصيلها مهما كانت صغيرة..وصلو للشركة و دخلو الزوز يمشيو جنب لجنب هي بكل التواضع الي فيها بهك التبسيمة الي على وجها بنظرة التفاؤل الي في عينها،كان يمشي معاها بكل غرور و تكبر نفس اوصاف الشموخ الي عمرها ما تتبدل فيه،بمشيتو المتعالية، براسو المرفوع،بنظرتو الحادة،بملامح وجهو الجامدة الي ما توحي بشي.. كل بلاصة تتعدا منها تخللي تبسيمتها في وجه كل موظف،تسلم و تسأل على حوال الناس الكل..دخلو لبيروها و مشات قعدت عالكرسي و هو سكر الباب و اتكى عليه دور عينو في البيرو و من ديكورو فهم رزانتها المتوقعة في كل مرة و مخها الكبير رغم صغر سنها،جذب انتباهو تصاورو لكانت في كل بلاصة، يخزرلها و يعاود يثبت فيها و مركز مع كل حركة تعملها،فرحان بالانجازات الي قاعدة تعمل فيهم والي وصلتلهم، عرف قداش هي قوية رغم انو يعرف انو هذا الكل تحدي لروحها و تصنع قدام العباد باش ما تظهرش ضعفها و الا تظهر قدامهم مثيرة للشفقة،يعرف انها مصممة على انها تكون روحها و تاقف لوضعها و تبدا من جديد،الحاجة الوحيدة الي تحسر عليها انو سبق و وعدها انو يحققلها الحاجات هاذم الكل و يكون معاها فيهم لحظة بلحظة اما توا هو موجود و معاها اما بطريقة اخرى توجع،لا ينجم يشاركها فرحتها و لا يعاونها و لا حتى يعبر على فرحتو بيها ك جاد بشخصيتو هو و طريقتو هو،صحيح انجم يعملهم الكل اما تحت شخصية جوزيف الي باش يقعد عايش و مربوط بيها سنين و سنين لوقت غير معلوم.. كان يتبع فيها و هي هاي مشات هاي جات ظاهر عليها الاستراس و القلق و لخوف اما مش حابة تظهرهم قدام حتى حد،قعدت على بيروها تثبت و تعاود و تقرا و تحسب في كل شي..كانت غاطسة هزت راسها لقاتو مركز معاها و قداه حستها اك الخزرة منو ،خلات لحمها يقشعر،خزرة ممزوجة بين الاعجاب و الحب و الفخر الي مستانسة ديما تراهم  في عينين جاد،تبسمت😊
-دجو شبيك واقف غادي..امان ترا فيا واحلة وقاعد تتفرج
هوما هكك و دخل السكريتار بعد ما دق الباب
-مدام ايثار قاعة الاجتماعات حضرت و الجماعة وصلو
-مجد وصل (المترجم)؟
-وي مدام هو زادا وصل
جاد كان متبع حديثهم و يتشوحر للسكريتار كيفاه يتبسم ليها و باش ياكلها بعينو يهز فيه ماللوطى الفوق و يعاود كان يغلي مش عاجبتو طريقة كلامو مع ايثار رغم انها كانت عادية كيما اي موظف و عرفتو اما هو كان يغلي ما صبرش ركز عينو على السكريتار و تكلم بغش
-من وقتاه تخدم هوني انت(خزر لايثار) و شبيه السكريتار متاعك راجل مش مرا؟
شهالحالة هذي ياخي خليتها هكا انا الشركة😠
قعدو الزوز باهتين فيه
-ووه جوزيف..تو نورمال انت شبيك صبحت تهز و تنفض يا راجل..مش انت لعينتو علاء و قتلي ذكي و متربي و يفهم فالخدمة و باش يعاونك برشا و زيد الي كانت في بلاصتو عرست و مشات على روحها..ياخي صبحت فاقد الذاكرة انت اليوم 😕اي يزي مالهداري الفارغة و قوم نتوكلو على الله نكملو هالاجتماع على خير و نربحو الصفقة و بعد عندي كلام آخر معاك
قالت للسكريتار يسبقهم،هزت دوسياتها و ما لازمها ريقلت فولارتها و قامت
-ايا و الا مازلت قاعد
اسبقني تو نخلط عليك
-ندخل كان بيك ساقي ساقك..اسمع الاسترااس يهز فيا و ينفض ما تكملش عليا انا مصتنصرة بيك و ناخو في قوتي منك و انت تقلي تو نخلط😔
كان منرفز سمع كلامها و زيد شافها كيفاه رخات شفايفها و بان عليها القلق ربعت يديها و عطاتو بالقفا تبسم و قام قربلها ناسي روحو و هويتو المزعومة و الاجتماع و الدنيا الكل، قربلها عنقها من تالي كبس بيديه الزوز على كرشها و حط راسو على كتفها،هي جمدت في بلاصتها و ما نجمت تعمل حتى ردة فعل  ديما نفس الاحساس يتبع فيها و يخليها تدخل بعضها و تولي ماهي فاهمة شي،نفس السؤال يدور في بالها وقت تتحط في موقف كيف ما هكا معاه،كمشت وجها و عقدت حواجبها عينها تسكرت و دخلت في صراعات العادة مع روحها،قلبها يخض مش فاهمة علاه و عقلها تنبشت كل تريكنة فيه تحمل ذكريات حتى كان وهمية لجاد،لكل لحظة تعدات معاه،لكل لحظة مزالت ما صارتش و باش تنسجها هي في خيالها و تعيشها حتى و هو مش معاها فالحقيقة،تعدا سيناريو حياتها قدامها من اول لحظة تقابلو فيها و جات العين فالعين حتى  للحظة موتو.هبطت دمعة حارة من عينها و بدات تدخل في حالتها الهستيرية متع العادة اما صوت همسو و قت قرب شفايفو لوذنها و بدا يحكي خرجها نوعا ما من حالتهاو خلاها تفيق و تسمع و تحاول تستوعب الكلام لحكاه
-هدي روحك ما تخممش،ما تحسب لشي، خللي كل حاجة تمشي بطبيعتها و عيش كل لحظة من حياتك كيف ما هي بحزنها و فرحها تلذذ دموعها و طير مع كل تبسيمة و ضحكة تخرج من قلبك،ما تخممش فالماضي و تعاود تعيش حزنك و لا تحسب للمستقبل و تخاف فالاخر تطلع خاسرة،كل شي لباس بإذن الخالق نشالله،ما تخليش الي قاعد يصير يوترك و يزعزعلك كيانك خليك ديما قوية واثقة من روحك والي تعمل فيه و عمرك ما تندم على قرار خذيتو حتى لو كان فاللخر غالط..
دورها ليه و هو مزال لاصق فيها حط راسو على جبينها و حكى بصوت اقرب منو للهمس..ما تخممش فيا انا قريب حتى لو بعيد،انا خيالك الي ما يخليكش حتى فالظلام و عتمة الليل،انا معاك في كل وقت و كل مكان،نعرف ما ترانيش و اذاكا شنو نحب اما يكفيني انك حاسة بوجودي و ما نفارقش تفكيرك و دقات قلبك لحظة😨❤
باس جبينها و كبس على كتفها بيديه الزوز  لكان حاطهم عليه باش يخلي بدنها لكان يرعش يهدى و تفيق هي من ذهولها
-فيق ايثار و ما تخليش كلامي يسيطر عليك ما تخلطش خدمتك بأمورك الشخصية.. عندك اجتماع توا..فازي..
كمل طيشلها هك الكلمتين زاد دخلها في حيط اكثر من قبل و خرج سبقها لقاعة الاجتماعات و خلاها غاطسة في افكارها الي قريب تسرقها من كل شي اما فيسع ما اتداركت روحها و نجمت تخرج من بحر الافكار و الشكوك لغرقت فيهم..خذات نفس و خرجت..
دخل سلم و شد بلاصتو على راس الطاولة البلار الكبيرة،كلامو ليها من جيهة حب يلمحلها بحاجات مستحيل انو يكون وقتهم توا و من جيهة اخرى يختبر في مدى قوتها و ثيقتها في روحها و في قراراتها قدام اي مشكلة بسيطة تنجم تعرضها..صحيح ما يعرش امكانياتها اما يعرفها قداش حساسة و فيسع ما تتزعزع لأبسط الحاجات،،كان متوقع حاجتين يا تلغي الاجتماع والا تأجلو يا تدخل متأزمة و يطيح الي عملتو الكل فالماء و تضيع عليه الصفقة يا تصير معجزة و يتقلب كل شي اما توقعاتو كانت غالطة يسمع فالباب تحل و يرا فالرجال لقدامو مركزين مع الشخص الي دخل،دار بالكرسي و تصدم و تفاجئ بدخولها القوي اما كالعادة حافظ على ملامح وجهو و ما ظهر شي،صوت طالونها باش ينقب القاعة و الي وترلو عصابو و نجم يسيطر عليها،راسها مرفوع تمشي بكل ثيقة فالنفس و لمعة الاصرار و التحدي مالين عينها الخضر و كالعادة تبسيمتها مش مفارقة وجها،ريحت برفانها سبقتها و تغلغلتلو في رواريه رهوجتو، تعدات بجنبو ما خزرتلوش اما هو استغل الفرصة و قام شدها من وسطها مع تبسيمة صفرا للجماعة قربلها يحكي بعصب و ينزل على سنيه بغزول
-تو نورمال انت ااه😠..نورمال تلبس طالون بالعلو هذا و انت اونسانت ياخي ما تعرش مش باهيلك والله فرخة حتى نطرف بيك😠
حارت في الاستحقاق الي يفرض فيه عليها و طلايعو الي كل مرة شكل و نوع لين يصدمها و يخليها حايرة و يزيد يحكم عليها ما تطالبوش بحتى تفسير و الا تحاول انها تسألو و تستفسر منو،تحولت تبسيمتها لتبسيمة متصنعة مرقت فيه و جبدت منو روحها بالسيف،ترأست الطاولة مالشيرة الاخرى بعد ما سلمت عالجماعة مدت دوسيات للسكريتار باش يوزع عليهم،ما قعدتش عالكرسي جملة خذات الكوموند و هبطت الاكرون الكبيرة وراها و بدات تفسر و تحكي و جايبة ما عندها و هوما مركزين معاها و مع المترجم لكان يترجم في كلام الطرفين لبعضهم،كل سؤال يتوجه ليها فيسع ما تلقى اجابتو و تقنعهم بأتم معنى الكلمة من غير ما تقعد تخمم شنو باش تقول و تحكي كانت تتصرف بكل عفوية و تلقائية في كل حركة تعملها،تحكي بكل راحة و كلامها موزون و عارفة شنو قاعدة تخرج من فمها،مش كان هو كان معجب بيها هي سحرت الموجودين الكل،مزال يحب يختبرها هز تاليفونو و بعث ميساج لواحد مالرجال المستثمرين و الي هو تونسي زادا و كان معرفة قديمة لجاد و ديراكت سألها محاولة منو باش يدخلها بعضها و يفقدها السيطرة على سير الاجتماع لكان ماشي مريقل
-حكيت و فسرت كل شي و كلامك الكل مقنع و افكارك برفاي و فرحانين بيها تبقى نجيو لأهم نقطة الي من الممكن تخلينا ما نبرموش الصفقة معاكم و تخلينا احنا كمستثمرين نلغيو انو نظمو اسهمنا ليكم و تبطل فكرة مشروع سلسلة شريكات جاد  و هي الاشاعات المنتشرة و الي اتداولتها معظم وسائل الاعلام و آ سافوار صحيحة والا،اول حاجة خبر احتمال افلاس وحدة من اكبر شريكاتكم الي يأثر بدورو على مردود بقية الشريكات بعد ما توفى سي جاد شخللى اسهمكم اتطيح في البورص العلامية و تفقدو جزء من اكبر المستثمرين و الممولين و اهم حاجة صمعتكم فالسوق و هذا بعد الاشاعة الثانية المتداولة الفترة هذي بوجود قضايا فساد و تحيل في شريكاتكم..
كان مالمتوقع تدخل بعضها و يبان على وجها الخوف مثلا اما بقات كيف ما هيا ملامحها ما تبدلوش بالعكس زادت تبسمت اكثر من قبل و بكل ثيقة تكلمت و رجعت تفسر
-برافو سؤال في بلاصتو و كان متوقع و هذا من حقكم  انكم تعرفو مصير اسهمكم و انتوما زادا تخافو على صمعتكم كيف تولي مربوطة بينا و على اذاكا تنجمو تعملو نظرة على الدوسيات الي قدامكم كل شي موجود فيه الحسابات و الاحصائيات و فما تقرير زادا ينجم يعاونكم و  يفسر  كل تساؤلاتكم و فيه المعلومات الازمة الكل على شريكاتنا و كان ممكن تعملو نظرة زادا على مخطط و بيانات المشروع الجديد الي نشالله باش نبداو فيه معاكم و كان تفاهمنا و تمت الصفقة نكملو ندرسوه بالتفصيل و نتفاهمو فيه اكثر هذا بالنسبة لمردودية الشريكات و الصمعة اتسترا..اما قبل هذا الكل حبيت نوضح نقطة صغيرة كان تسمح،رغم انو كلامك على شريكاتنا صحيح و مش باش ننكر الي قاعد يدور من اشاعات ممكن يكون مبالغ فيها او مغلوطة نوعا ما،حبيت نصلحلك حاجة من النهار الي تأسسو فيه الشريكات و بوجود سي جاد عمرو ما مولنا حد حتى بمليم بالعكس شريكاتنا كانت تمول في برشا شريكات اخرين و من بينهم شركة بوك سي نوردين وقت تعدات هي بدورها بعجز مادي كان ينجم يتسبب بأفلاس كبير ليكم لولا تمويل شريكات جاد الي هي زادا كانت في اول بداياتها و في اوج صعودها و هذا الكل وقت انت مازلت تقرا ادارة اعمال في طوكيو و توا ما شالله مزالت فالعلالي بعد ما توفى بوك الله يرحمو و خذيت عليه انت المشعل يا مسيو اوس و رغم صغر سنك كملت في طريقو و نشالله تواصل بنفس المنوال و على نفس الطريق و تحافظ على كل حاجة امن عليها معاك بين يدك و الاهم انتك تعرف قيمتها و ما تضيعهاش☺
سكتت و هي مزالت محافظة على نفس الهدوئ و الابتسامة تستنى في قرار منهم و زاد توترها كيف بداو يتشاورو بين بعضهم و يحكيو بالشوية، خزرتلو لقاتو مركز يقرا فالدوسي الي فوتو البارح و ما درسوش و رفض زادا انو يعمل طلة على التقارير الي حضرتهم و تفاجئ بيهم توا..كل شي عجبو كيفاه خلطت عرفت المعلومات هذي الكل و الظاهر انو عارفة خدمتها مليح و راكزة في كل حاجة، داهش في خدمتها الي تمكنت منها و فهمتها فيسع في وقت ضيق وسط الخوضة لكانت عايشتها الكل و الاحداث الاخرة الي صارت و رغم حالتها النفسية المتدهورة و حبالتها و وحمها الصعيب الي متعبها برشا و رغم النيفو متاعها و زيد ما عندهاش برشا على رجوعها تقرا.. وقتها عرف انو قرارو صحيح كيف كتبلها كل شي باسمها و كيف امن على شريكاتو بين يديها،عرف قداش قوية و مصرة انو توصل للقمة و للي تحب عليه مهما كلفها حتى لو كان على حساب صحتها.. ما قال شي سكر الدوسي و وخر ظهرو لتالي و اكتفى انو يكمل يشوف نتيجة هذا الكل..هو زادا كان متوتر كيفها والا اكثر خاطر بالحق الشريكات في تدهور ملحوظ و لازم حد ياقفلهم و المستثمرين هاذم بالذات لازم يربحهم..
يسمع في تصفيق خفيف بجنبو محى ضبابة الافكار لكانت حاجبة كل شي قدامو ،يرا فيهم واقفين و يتبسمولها،هي بيدها تفاجأت تكلمت المرا الروسية لكانت قاعدو بين الزوز رجال و المترجم يترجم لايثار شقاعدة تقول
-برافو ايثار هذا المشروع لكنت نلوج عليه صغيرة و تفاجأت بعمرك كيف سألت عليك و حقيقة حقرتك و قلت هذي صفقة فاشلة من اولها و الحمدلله عطيناك فرصة، تشاورت انا و راجلي و عجبتنا افكارك و التحسن الملوحظ و النجاح الي رجعتلو الشركة و بدات تحقق فيه بعد الاشاعات و الي تقال الكل انا متأكدة انك ماشية في طريق صحيح و عارفة شقاعدة تعمل، (مدت يدها لايثار)مبروك علينا الصفقة احنا موافقين عليها و قررنا نرفعو من نسبة اسهمنا معاكم بنسبة 40%😊
مش مصدقة لقاعدة تسمع فيه مدت يدها للمرا و الرجال الزوز بعد ما سلمو على جاد الي وقف ديراكت هو زادا فرحتو ما تتوصفش مش على خاطر الصفقة تمت لا،فرحتو كانت اكبر للانجاز الي حققتو هي،كلامها و طريقة اقناعها و حساباتها و كل شي شافو بعينو و درسو و تعدا قدامو خلاه فخور و فرحان بيها كل شي اثر فيه لدرجة انو قربلها و عنقها قدامهم لايزي هي مش فاهمة شي و زيد كمل عليها بالتعنيقة و ختمها ببوسة حنينة على خدها و قعد معنقها عندو لين المرا رجعت تصفق
-وااوو محلاكم حبكم ظاهر كبير و عشقكم باين في عينكم و نظراتكم الي كانت من تحت لتحت لبعظكم بين الفترة و الفترة في وقت الاجتماع و الي خلا اعجابي بيكم يزيد تعرفو مليح تفرقو بين الامور الشخصية و الخدمة و الي هاذم الزوز اذا اجتمعو مستحيل ينجحو الزوز فرد وقت لازم حاجة منهم تشوف النور و الاخرى تفشل. برافو
عنقت ايثار
-انا حبيتك و نتمنى علاقتنا ما تاقفش عالخدمة كهو و الي باش تكون ممتعة معاكم نستنا زيارتكم لينا و نستقبلوكم على القريب العاجل في دارنا لو كان تسمحو😊
جاوبها جاد و كان فرحان خاطر وين ما تتحرك صغرونتو تلاقي حب الناس ليها و اهتمامهم الكبير بيها رغم بساطتها في كل شي..
-اكيد مدام هذا شرف لينا
كملو الاجراءات الازمة و صححو في الاوراق الكل و تفاهمو باش يعاودو يتقابلو و يحكيو اكثر..وصلتهم ايثار للباب و سكرتو و رجعتلو شاعلة..
-جوزيف في بالي جاي باش تاقف معايا و تدعمني ياخي سيادتك عديتو اجتماع كامل ساكت قاعد كان توزع فالابتسامة الساحرة متاعك و شنوا الحركات الجديدة لولات عندك ضربة ثنين معنقني و ترمي فالكلام الي قاعد تحاول بيه انك توصلي حاجة،ما فماش خروج اليوم من هوني  كان ما تفسرلي الكلام لقلتهولي في بيرويا و نفهم شقاعد يصيرلي،احساسي ما يخيبنيش حاجة مش عادية تصيرلي كيف نبدا معاك ما صارتش قبل هذي حاجة جديدة اما قديمة راسخة فيا..مكش جوزيف😕
انت شكون..؟؟(حطواااا جااااام قبل ما تقراااااو)