بداية-الحب-🍃-باللهجة-الجزائرية-💫

P.A.R.T 13

قالي راهي في الجزائر في داركم قتلو تعرف العنوان قالي ايه قالي عايشة مع جدك وجداتك سبحان مغير الاحوال شحال حاولوها متسافرش بينا سافرت ورباتنا بعاد عليهم وضرك راحتلهم قتلو تقدر تديني قالي ايه ريزارفينا واتجهنا الى ارض الاجداد الي نعرفها غير في التلفزيون وتصاورنا مع بابا وصلنا للجزائر قتلو نرتاحو في اوتيل وغدوة نروحو بغيت نحضر روحي نفسيا للقاء احكم كل واحد شمبرة اخرجنا تعشينا ورحنا رقدنا الصباح نضنا بكري وتوجهنا لدار جدي الي يسكنو في الدوار قربنا للدار كانت فيرما كبيرة فكرتني فالي اداني ليها علي طاحتلي دمعة اصلا انا بكاية مهما تصنعت القوة دموعي ديما يخونوني حكملي يدي يحسب نبكي من وحشي لامي ههههه مسكين دخلنا للفيرما
لقانا واحد قالنا تفضلو فتنا كانت دار واسعة بزاف والي لاحظتو شمبرات بزاف دخلنا هذاك الراجل وقال استناو هنا هبطو عمومي وولادهم وعمتي عرفوني عليهم فرحو بيا وزادت جات جدة وجدي وامي تحضنتهم ونبكي امي تبكي وتقول سامحيني بنتي اظلمت انت واختك وخاصة انت اختك على الاقل لقات الي سترها وكملت قرايتها وخدامة اما انت ضيعتلكي حياتك بستها وقلتلها احنا ولاد اليوم
ضحكت وعنقتني ريحنا لثمة شهر واخطبني شوقي من اهلي وقبلو وانا ثاني وافقت درنا خطبة رائعة وفوتنا ايامات هايلين سافر للبنان وجدي وجداتي كبشو فيا قالولي كي تزوجو وروحي معاه عقلية جزايرية يا محاينك فاتو 6 اشهر وشوقي يقعد في لبنان شهر واجي سمانة يقعد معايا قرب العرس قاتلي امي واهلي نعيطو لاختك تحضر ونتعرفو على راجلها في الاول خفت امبعد قلت مادام صاين اختي ميهمنيش انا ضرك عندي الي يدافع عليا ويحميني من كلش فاتت سمانة ووصلت اختي وسهيل كنت نتهرب نشوفهم باش ميجبدولي حتى موضوع كنت نهرب من المواجهة واحد الليلة كنت راقدة طبطب الباب قلت فوت دخلت اختي وراجلها كان بقى لعرسي يومين قالولي بغينا نحكيو معاك قلتلهم اذا على علي صفحة واطويتها قالي سهيل باه يبدا الواحد من جديد لازم يسكر كل الي فات قتلو تفضل بدا يحكيلي هو واختي افهمت بلي سهيل كانت عندو اختو صغيرة 18 سنة هوما من عائلة غنية جدا قبل مايموت باباهم خلالهم ثروة كبيرة بينو هو اختو كان الكل طامع فيها حبت واحد وجا خطبها كي سقسا عليه سهيل لقاه اسكرو وعندو سوابق حاول افهمها سكتت جا علي خطبها وافق خوها بالطبيعة خاطر صديق عمرو وتفاهم هو وياه امدلو اختو ازوجو وجامي طمع في مالها خلاها تقرا واحد النهار راح اروحها من الجامعة لقاها مع هاذاك الي خطبها قاتلو عادي صديق فهمها والو حتى جا النهار الي روح من الخدمة لقاها في حضنو هربت وراحت تعيش مع هاذا صاحبها راح حاول معاها سهيل والو دارتلو وكالة لكل املاكها وهزت منو الكرش اداها فرصي للطبيب وهبطهولها وماتت على الطابلة وهرب خلاها دارو خوها وراجلها في المحكمة مالقاو حتى دليل وخرج براءة جن جنونهم والي زاد هبل علي انو مرتو اطلقت وادات نص املاكو الي زاد استولى عليهم هذاك الكريمنال