🌹قصة يامنة 🌹جزء اول
دثروني فاني ارتجف من صقيع قدري دثروني فسياطه تجلدني و ما عاد بمقدوري التأني و انيني لم يشفع لي عند جلادي حدتث نفسي في مرآتي انه لم يكن حلمي الا ان ابني ذاتي فاستحال مصيري لافضع كوابيسي فعلى من ارمي ملومتي على اهلي او خط يدي مع كلمتي نظرت لكفي كفكفت دمعي و شكلت قبضتي واجهت بيها مصيبتي فهل اصل لضالتي ام ستكسر انعكاس صورتي دثروني او رد عليا تراب ايامي #راعية الغنم.... من المستقبل… الشتاا خيط من السما محابسااش ...كتنزل قطرات كثييييرة ...والمياه كتجريي والغيوسات بحكم المكان فيه اراضي زراعية والكوريات الفدادن الى غير ذلك ...طبعا فهذا هو العالم القروي الطبيعة ...انعدام المصانع انعدام البنيات العالية او الشاهقة ...وما احسن من هذا العالم ....بيئة طبيعية … في واحدة من الاقاليم المغربية التابعة لجهة الحوز او كتدقيق اكثر لجهة مراكش اسفي حسب التقسيم الجديد ...في احدى البوادي ... ...وفواحد من البيوت ديال واحد العائلة … كتكون من ثلاثة الافراد الاب وبنتو والجدة الي فعمر كبير فايت عليها زمان ومعلمها ....وداز عليها وجوه وناس عرفتها ...اسمها "زينة "... وجهها حروفو زينة عليه ملامح المراة الجبلية ...وخا تجعد وداز عليه زمان والهم ديالو… الا انه كيف كيقولو الى مشا زين كيبقاو حروفو ...واشمة مابين جبهتها وفي ذقنها وشام العيالات ديال زمان ...عينيها خضرين ...بيضة ونقية فحالتها بزاف ...صلاة مكتخطاهاش ...قيام الليل حاضر ...التيمومة عند راسها ديما فوقت الحاجة ليها ...العقل والحكمة فبعض الاحيان ولكن شي مرات كيخونها لسانها وكطلق شي كلام ممكن يكون حكمة وممكن يكون معيور ممكن يكون +18....ولكن العقل وروح عندها هي بنت بنتها الي فعمرها 15سنة وشهور مزالها طفلة .... زينة : اابنتي كحشي ( جري ولا كحزي على حسب ) داكشي لهيه وجمعيه وسدي ديك التقيبة غادي دخل لينا الما ثاني ... البنت : و واخا امي هاني غير صبري معايا را صباعي جمدو ...بزاااف.... زينة : معندك مديري ابنتي صبري هذا مكتابنا ... بقات البنت واقفة مضاربة مع السقف الي من الزنگ حتى سدت واحد تقبة كيهبط منها الما ...عاد نزلت وبدات تجمع فاشنو قالت ليها حتى دخل باها حتى هو رجل كبير شوي فالسن ولدات ليه مرتو على سن كبيرة وماتت فالولادة ...اسمر لملامح وعينيه كحلين ولكن تمارة ديال كل فجر حتى لمغرب وهو خدام في فدادن عباد الله خلات وجهو يشقف ويتكمش ولون بشرتو ولات مصدية بالشمس.... مصطفى : ابنتي سيري طلي على دوك البهيمات (هما الغنم ) ياكما داخل لما تما حتى يصبح الحال ونمشي لسوق نتقدا ليهم الزنك لداك سقف ابنتي .... هي : واخا ابا انا غانمشي ...خلاتهم تما ومشات خرجت فجناب الدار الي كانت متكونة غير جوج بيوت وكوزينة مبنية بالبريك وخا قلة الفلوس ولكن كانو عائلة من نوع الي معندهمش ومخاصهمش قانعين بالي عطاهم الله .... ضارت جيهة البريريكة الي فيها البهيمات كانو ربعة زوج خرفان وزوج خروفات ومعيزة صغيرة وهي المفضلة عند البنت ....دخلت طلت عليهم وتاكدت من ان الما مكيقطرش على البرّاكة من بعد ما رقعت السقف ديال الزنگ الي رشا وصدَّا وبريكولاتو حتى يجيب واحد جديد كيف قاليها باها ....يلاه ضارت باش تاكد حتى قشعت المعيزة ديالتها مكايناش .... هي : اووو فييين هي ...مشات كتقلب عليها تما شعلت البيل تاني كتقلب فجوايه الي مواصلهاش الضو ملقاتهاش ...شوية سمعت صوتها من بعيد ...عرفتها خارجة هزت واحد الميكة كبييرة دارتها على راسها وخرجت من البراكة وهي تابعة صوت وشتا كطيح عليها محابساش بقات غادية حتى وصلت حدا الواد .... لقاتها فواحد القنتة واقفة جنب الواد الي الما ديالو كيجري وقريب يفيض عالجناب ...مشات ليها باش تهزها ...حتى سمعت صوت تخرخير ... هي : شكون هنااا ... زاد تجاهد ...ضورت بالبيل كتقلب على مصدر الصوت حتى تركز على جسد قربت ليه سنات عليه ضو ...بقات تابعة بضو البيل ... …جسد بنت عامرة دمايات وكدمات فوجهها ووجهها مجخلط مابين المكياج الي سرح ليها وطبعا الي ملاحضاتوش ودققت فيه كيبان دم طاغي عليه …مدبوحة من الوريد الى الوريد …… وكسوة مشرگة عليها حتى وصلت لتحت لقاتو عاامر دم ورجليها مفرقين ...عينيها خرجو وبحكم هي بنت مزال صغيرة مفهمت والو حدها طلعت لوجه البنت ومع طلعت ضو لبيل على وجهها مع البنت لاحت دم كثييير من فمها …خرخرت وخرجت روحها ... هي : طلقتها بغوتة حتى تسمع صوت لمسامع باها ...باااااااااااا مصطفى : بسم الله الرحمن الرحيم ...مالها ...خرج على برا ...ونادى عليها باسمها ...يااااااامنة ... #فلاش_باك الله اكبر الله اكبر ...صوت اذان الفجر ...صوت المقراج كيصفر ...وصوت الفروج كيقوقع ...طبعا هذا هو حال الاجواء فالبوادي …الاجواء الطبيعية ...كلشي فيها كيكون طبيعي لا منبه ولا صوت الموسيقى ..فقط صوت الطبيعة الي كاين ...على هاد الاصوات حلت عينيها كيف عادتها قبل متمشي لمدرستها او الاعدادية فين كتقرا ...حلت عينيها على سقف البيت الي كان غير بالمرطوب والفراش كان غير زرابي ومانطات ...ضورت وجهها لقات جداها عاد جايا تعافر داخلة من الطواليط كتمتم بفمها بالاذكار والاستغفار .... يامنة : ميمة صباح الخير ... زينة : استغفر الله استغفر الله ...الله اكبر ...ضارت جيهتها ...صباح الخير ابنتي ...نوضي سيري غسلي وجهك وسيري طيبي لفطور لباك قبل ميمشي لفدان... يامنة : واخا الميمة ...ناضت جمعت فراشها وحطاتو فواحد الماريو ...مشات لطواليط غسلت وطرفت حالتها وخرجت لاوية زيف على راسها على شكل عكفة .. ...بنت فعمر خمسطاش لعام ...زوينة بزاف ملامح مابين السوداء والبنية عينيها خضرين فحال جداها … بيضاء البشرة وجهها مبطبط شوي ...قصيورة شوي فورمتها شوي غليضة ولكن الي شافها كتبان ليه كيوت بزااف جمالها ملفت ...ولما لا و الملامح وارثاهم ابا عن جد ...كتقرا فالسنة الثالثة اعدادي … صبح الحال لقاها خرجت بالصينية ديال القهوة كحلة معطرة والخبز والزيت وشي تويشيات فحال الكوفيتير وزيتون اسود مصايباه بايديها رغم صغر سنها الا انها حادگة كتقن الحاجة وكتعلم لحاجات جايا ...حطتها قدامو كان يلاه دخل من جامع الي حداهم لابس جلابة وطاقية دديال الصوف الحال كان بارد بزااف ... مصطفى : الله يرضي عليك ... يامنة : مييمة ااميمة اجي تفطري ... زينة : ابسم الله ...مدت ايديها لارض وتكلت عليها حتى ناضت ...جمعت جلايلها خشاتهم فحزام القفطان ...كبت ليهم القهوة الي مولفين يفطرو بيها فداك الوقت ...وبداو يفطرو ... يامنة : مي غادي نگرص الخبز وغادي نديه لخالتي زهور طيبو عندها حتى نجي من الكوليج ونجيبو معايا وراه رديت كلشي فالكوكوط راه كيطيب ملي غانخرج غادي نطفي عليه حتى نجي ونسخنو ...ضارت جيهة باها ...ندير بحسابك ابا ... مصطفى : لا ابنتي غادي نمشي نتغذا مع رجال فالسوق ديال الخميس الي فالفيلاج لاخوور ...عنداك تنساي متسرحي دوك البهيمات ... يامنة : متخافش ابا عندي غير ساعتين ليوم الاستاذة مغاديش تجي ...نتغذاو ونخرج نسرحهم ... مصطفى : الله يرضي عليك ..شرب اخر ما تبقى فالكاس وجمع الوقفة وخرج لخدمتو ...اما هي بقات حتى جمعت الماعن وغسلتهم وطفات على الغدا ومشات لبيت لبست واحد سورفيت فالغوز حد الركبة ديال موبرا سخونة ...مشطت شعرها البني وضفراتو ..لبست تقاشر وسبرديلا ...جمعت كتوبتها فالشكارة ...دارتها ورا ضهرها لوات شال على عنقها وخرجت ...الحنيكات كانو مزنگين ومنخرها حتى هو بالبرد ...هزت الوصلة ديال الخبز فوق راسها … يامنة : ميمة هاني مشيت ...المقراج حطيتو ليك فوق الفاخر غايبقا ليك سخون حتى نرجع ... زينة : وخا بنيتي ...رجعت تكمل الاذكار الي مكيفارقوش فمها مرة مرة ... خرجت يامنة وفطريقها تلاقات بصاحبتها الي كتمشي معاها لكوليج ... يامنة : سارة جبتي ليا دفتر الاجتماعيات ديالي ؟ سارة : اه جبتو ليك حتى القسم ونعطيه ليك ... يامنة : صافي ... سارة : زويييينة هاد سورفيت منين جاتك ؟ يامنة : "ضحكت" جابها ليا عمي من ازرو ... سارة : علاه عندك شي عمك عمري شفتو جا لعندكم ... يامنة : معمرو جا …واحد النهار با مشا لفاس باش يصايب شي وراق وداز لعندو تما وعطاهم ليه ... سارة : وعلاش مكيجيش لعندكم ... يامنة : "هزت كتافها " معرفتش قاليا با بالي هو لباااس عليه تما وعايش مع ولادو ...و قال ليا كان كيجي ولكن ملي عيا مبقاش قدر يجي ...كنت ديك ساعة باقي صغيرة فاش كان كيجي معقلتش عليه ...وبابا فاش ماتت ماما الله يرحمها ملي ولدتني قاليه باش يجي يسكن تما ولكن مبغاش با …بغا يبقا هنا ... سارة : حتى ولادو مكتعرفيهمش .؟ يامنة : جاوبتها بالنفي ... تمشاو واحد المسافة تقريبا زوج كيلمتر الي كيضربو حتى الكوليج ...جاو مع الوقت نيشان ...ودخلو لحصص ديالهم ... من بعد ساعتين خرجو بزوجات كيف العادة ...غادين فطريق حتى بانو ليهم شي دراري خارجين من واحد الفيرما ...واحد منهم وقف عليهم بزوجات ... هو : سلام عليكم ... سارة : عليكم سلام "قافزة وقبيحة وخا هكاك " كاين شي مشكيل ... هو : مكاين حتى مشكيل غير بغيت نهضر مع هاد البنت الى بغات ... يامنة : تزنگت ...احم سمح لينا اخويا منقدروش نوقفو مع شي حد مكنعرفوهش ...تمت غادية وهو يوقفها وشدها من دراعها ... يامنة : بعدت دراعها من عليه ...عفاك غادي يجي شي حد ويقولها لبا ... هو : انا مبغيت غير المعقول ..انا سميتي صلاح خدام فهاد الفيرما الي هنا انا كنشوفك ديما جايا نتي وهاد البنت وبغيت نعرف غير شنو سميتك وخلي الباقي عليا ... نقزت سارة ...اسمها يامنة يلاه وخر خلينا نمشيو غادي تجبد ليها صداع ...جرتها ومشاو خلاوه واقف كيشووف فيها فديك البنت الي عجباتو واسراتو من نهار عينيه شافوها...بقا حاضيها بنضراتو حتى سهااا ونطق بدون شعور .... صلاح . : ياامنة ... صلاح شاب في اواخرالعشرينات ينحدر من نفس المنطقة ...اسمر اللون دو عينين بنيتين وطويل القامة مفورمي شوي وخا ولد البادية الا انه حالو حال شباب عندو ايام فالاسبوع مخصصهم لاصال الي كاين ف الفيلاج ... رجعت يامنة هي وصاحبتها لديورهم كل مشات دخلت فحالها ...لكن قبل جابت لخبز من عند جارتهم الي طيباتو ليها ....كيف دخلت مشات نيشان لبيت بدلت حوايجها ولبست بيجامتها...ديال موبرا فالازرق سخونة قديمة شوي ...دارت زيف فوق راسها وضورت عليها طابلية ولبست تقاشر اخرين وخشات رجليها فصباط تاع الميكا ... يامنة : خرجت لقات جداها كالسة مفرشة فواحد البلاصة تحت شمس وكتسبح ...ميمة هاني جيت ... زينة : طاب الغذا ولا مزال ... يامنة : عاد جيت غادي نشعل عليه يطيب اميمة فيك جوع ..؟ زينة : اوكيه ...( بطبيعة الحال ههه ) يامنة : هاني يسخن ونحطو .. داكشي الي كان كيف سخن حطاتو ...تغذاو في جو دافي بناتهم البنت وجداها وخا جداها بعض المرات كتجيها حالتها بحكم كبر سنها وكتبدا بالنگير وحشيان الهضرة وشي كلام من سمطة لتحت ولكن هي احن وحدة عليها تقيصها فعينيها متقيصهاش فيامنة ...ولما لا وهي الطفلة الوحيدة والبنت الوحيدة والكبيرة والصغيرة فالدار وهي بكرتهم واخر عنقود عندهم ...والاهم الطفلة الي تحملت مسؤلية الدار فعمر صغير بزاف وهي الصبارة بمعنى الكلمة والحنينة والحشومية... في واحد من الاسواق الشعبية القريبة للمنطقة ...صوت الناس والدنيا عامرة وصوت البياعة والشراية ومالين الشاحنات الكبار (الكاميو) الدراجات النارية لنقل البضائع ( مايسمى بطريبورطور ) واصوات البياعة فالبوق ...هاد وا الفار ها دوى الي عندو ولدو ولا بنتو كيبول فالفراش عههه ...الشناقة عند راس العجل ولا البقرة ولا الثور كيتناقشو على الثمن ...ولا اصحاب طايب وهاري ...اصحاب الدجاج ...اصحاب الشعير القمح الخ ...اصحاب الحلاقة شعبية وناهييييك على اصحاب صانعي الاسنان واقتلاع الاضراص بكلاب ( باش كيحيدو ضراص هه ) وغواتو الله العلام والكُلاَّب الي ليه سنوات ما قبل تاريخ ولا ما قبل الفينيقيين ...اصحاب الفاكية واصحاب المواد الغذائية والملابس التحتية والفوقية والبيجامات ....الخ ولكن فواحد الجهة ديال اصحاب الشواية ...الكباب والشوا بانواعو واصحاب الصلعة ( هي الكبدة والمصارن والكرشة كيكونو طايبين فالما والكمون والملحة رائعة هاد الاكلة صراحة هههه ) كالس اب يامنة مصطفى ومعاه بعض من رجال المنطقة ... مصطفى : ماعلينا غير نشوفو زريعة من سوق جاي ولا نوصيو عليها سمحمد ... واحد من الرجال : الزريعة سي المعطي مول الفيرما قاليك غير شوفوها وتاكدو منها واش مزيانة وتوكلو عالله والفلوس راه هو غايتكلف راسو عطيهم غير سمية ... مصطفى : وعليه نوصيو عليها من دابا يلاه توصل نيشان مع وقيتها ...كانو كيناقشو امور الفدادن والفيرما فين خدامين وكيتغذاو ...حاطين ليهم طبسيل ديال لحم مشوي وصينية براد تاع اتاي الي فيه الفلجة عند الفم وفيه سكار بزاف ونعناع ريحتو واصلة ...حطو ليهم السرباي الي مع الي كيشوي ...صونا تيليفون مصطفى عندو نوع قديم نوكيا بيل ...مضور عليه لاستيك ديال شمع ... مصطفى "جاوب وهوداير صبعو على لودن لاخرا باش يسمع مزيان بحكم ضجة ديال سوق الي كاينة " : ياوااا سلام عليكم ...سمع صوت واحد راجل وصوتو مخافيش عليه وعارفو وخا يصوني عليه بمية رقم ورقم ...وااهواه وااه سي عبد العالي هذا ولا ... عبد العالي : خويا مصطفى ...وعاش من سمع صوتك ... مصطفى : وا تا كيداير بيخير الحاج وغبرة طويلة هادي الحاج ... عبد العالي : واغير المرض اخويا راك عارف .. مصطفى : ايييه الله يحسن العوان والله يشافي واابغييت نجي عندك وليني العين بصيرة والايد قصيرة ... عبد العالي : عارف الي كاين اخويا وشحال من مرة قلت ليك نعاونك مبغيتيش عييت معاك مكتسمعش ... مصطفى : وراك عارف نفسي كيدايرة الحاج مبغيتش نكلف عليك و... عبد العالي : ومبغيتش حيث راسك هو راسك عاطي الوعد الي مكتبغيش تخلف بيه ...خويا ونعرفك من صغرك ...وعاجباك تمارة راه صحتك تانتا على قد الحال ... مصطفى : وانتا شرفتي انا مزال شاب .. عبد العالي : هههههه ايه اسيدي ..."حنحن وهو يدخل فالموضوع نيشان " غانجي هاد الايام تما فيك ميستقبل خوك الكبير ؟ مصطفى "ابتاسم " : الله اودي واش غايزورني خويا الكبير وخا تكون فيا الموت بلاصتك هي الكبيرة الحاج ... عبد العالي : ههههه وعليه ميعادنا هاد الايام ... مصطفى : بيناتنا تيليفون ...قطع معاه وهو يحط تيليفون عند الكومدينو الي عند راسو حدا ناموسية ...بقا كيباتسم شحاال ...عاد نطق ... عبد العالي : غانشوفو واش باقي عاقل على العهد ديال صغر ولا لا اسي مصطفى ... "طلق تنهيدة " اااه العهد ثم العهد ...."ابتاسم باطمئنان " .... معمرنا نعرفو شنو كيتسنانا فالمستقبل …شنو مخبي لينا …واش سعادة ,حزن ,الم, عذاب ,فقدان شخص …ولا طريق طويلة ولا غاتغير حياتنا لاحسن لاسوء ...معارفينش واش غادي نعيشو كيف ولفنا ولا غايتبدل روتين ديالنا علاش كنا عايشين ولااا غادي تغير حياتنا ميئة وثمانون درجة ....ياترى ماهي النقطة المستقبلية الي غاتكون هي تحول حياتنا ....ياترى شنو مخبي ليك القدر ا ياامنة ...يا طفلة ذات الربيع الاول ... واقفة حدا واحد العين الما ديالها صافي ...حاضية البهيمات ديالها وشادة معيزتها بين اديها كتلعب معاها ...لابسة بيجامتها وفوق منها كبوط فالاسود كتلبسو فوق البيجامة ودايرة العكفة ( يعني لابسة زيف فوق راسها وعاقدة العقدة فوق جبهتها ) لابسة بوط ديال الميكا فرجليها بحكم تواجد الغيس والمراجي تما ...مخليا غنيماتها يسرحو باش ياكلو ...جاها العطش وهي تحط معيزاتها مشات تجري تبعت الغنم الي سارحين تابعة مها وسط منهم ...وهي تحنات كتشرب فالما حنيكاتها مزنگييين وفيهم شوية تشققات بالمشگ ديال البرد ....حتى وقف عليها هو من بعييييد حاضيها ...هزت عينيها شافت فيه لقاتو واقف مراقبها ومبتاسم ....ربع ايديه ... يامنة "بين نفسها " : هذا غادي يجبد ليا صدااع علاش تابعني افففف....حدرت راسها وهي تمشي كتجري تبعت البهايم هازا مزلاط كتحرك فيهم يرجعو لبراكة ....بعداات عليه حتى غبرت من على عينيه خلاتو كيضحك ... في العشية بغات تغرب شمس النهار ...جاي داير قب جلابية وخاشي ايد فجيابها وكيخطوي بخطاوي كبار كينقز فالغيس راجع لدارو بحكم مكانش خدام فلارض كان خارج لسوق يتقداو ...ولايد لاخرا هاز بيها القفة فيها المقدية ديال دار الي جايب من تما وجاي ضحكة ممفارقاش وجهو ....حتى سمع صوت شي حد كيعيط ليه ...ضار لقاه واحد الولد داير ترازة على راسو ... صلاح "سلم عليه من ايدو ": سي مصطفى ياك ... مصطفى : الله يرضي عليك ...ايه اولدي هو هذا ... صلاح : انا صلاح ولد سي حسان رغاي الي فدوار الي حداكم هنا ... مصطفى : ايييه عرفتو ونعم الناس ...نتا ولدو صلاح الكبير لا ؟ صلاح : لا الحاج انا الصغير فخوتي ... مصطفى : ايه ايه تبارك الله تبارك الله ... صلاح "بخجل " : احم انا جيت بغيت نهضر معاك بيناتنا الى بغيتي غادي نجي انا والوليد نيت بغا يشوفك ... مصطفى : مرحبا اولدي خبار الخير ... صلاح : كيف مكتعرف انا الحمد لله خدام مزيان اجير ولله الحمد وناوي نصايب الوراق غايتكلف بيا خويا الكبير الي فاسبانيا يعني كلشي مضمون عندي الحمد لله... ومخاصنا خير فالدار خوتي مخلين عيالاتهم وعايشين مع الوليدة فحال بناتها متفاهمين ... مصطفى : اللهم زيد وبارك ...المعنى اولدي ... صلاح : الى سمحتي جاي طالب ضيف الله ...عرفت عندك بنت تبارك الله وصلت لسن الزواج انا مزربانش حتى تعرف علينا وتعرف حنا شكون وتسول علينا ... مصطفى : مرحبا اولدي وليني هي مزال شوي صغيرة باقي موصلتش سطاش لعام اولدي ... صلاح : عارف الحاج بغيت نرسل دار يشوفوها ونرشموها ( نرشموها هي يهضرو فيها حتى يتفاهمو من بعد على موعد الخطبة وزواج المهم تبقا تسنا وميقبلو تاحد حتى يجيو يخطبو رسمي ) ... مصطفى : اش نقوليك اولدي من غير مرحبا بيكم ...منردوش ضيف الله ماشي من عادة القبيلة .. صلاح "بفرحة " : لهلا يخطيك اسي مصطفى ...ان شاء الله الى كنتي موجود سيمانة جاية نجيبهم ... مصطفى : مرحبا بيكم اولدي ... تسالم معاه وكل شد طريق ديالو ...'وصل لدار حل الباب ودخل لقا نسيبتو كتصلي فالمغرب ... مصطفى : ياامنة ا ياامنة ... خرجت كتجري من لكوزينة ...نعام ابا ... مصطفى كيشوف فيها وكيضحك ...هههه هاكي ابنتي هاد المقدية دخليها ...وهاد لفريرجات ( زوج فرارج ) ...وجديهم وخليهم غايجيونا شي صياف هاد الايام ... يامنة "خاشية راسها كتقلب فالقفة حتى هزاتو " : ولكن ابا معندناش فريزر غادي نحطهم غير عند جارتنا حليمة ... مصطفى : وعليه الي بغيتي ديريه… تقديتهم حيث ليوم كنت فالسوق وجاتني الخبار وحيدت عليا السخرة ... يامنة : واخا ابا ولكن شكون غايجي عندنا ... مصطفى "شاف فيها وضحك ضحكة نااابعة من القلب حتى بانو سنانو وتسمعت قهقهة " : ههههههه جاي ابنتي عمك الي كتسوليني عليه جاي خويا الكبير الي فمقام با ابنتي عمك الي ديما مهلي فيك وخا مشافك ملي كنتي صغيرة بزاف ...ضرب ليها كتفها زوج ضربات خفاف وخلاها واقفة كتساءل على سبب هاد الفرحة الي فعينيه والي شحاال هادي مشافتها بهاد طريقة ملي وعات ... على رائحة القهوة المعطرة بحبات الهيل ...المطهوة على نار الفحم ...وعلى صوت الهاتف الذي يرن ...كانت في المطبخ …الصغيرة جدا مسافته ضيقة تكفي لوقوف شخص واحد ...حطت اخر اطباق الفطور والتي لا تتعدى اربع صحون لا اكثر ولا اقل بحسب الموجود ...رغم قلة المال شوية ولكن مخاصهم حتى خير قانعين بالي عطاهم الله ...وهادشي الي مقتانعة بيه ومربية عليه وحلت عينيها عليه ...وعايشة دفئ فهاد الجو وهاد الحالة ... خرجات من لكوزينة او بالمصطلح ديال البادية فديك المنطقة يطلق عليها ب الكوشينة مصطلح استعماري ... كلسو فلارض مفرشين وقدامهم طابلة مغلفة بميكة مقطعة من جناب ...راشة دنيا بالما ومجففة دويرة ومنقياها عاد حطت الفطور ...فاتح مصطفى الحديث مع ام يامنة لالة زينة ... مصطفى : هضر معايا الحاج عبد العالي الا زينة ...راه جاي ليوم فالعشية غادي نمشي دابا لفيلاج نوقف ليه فقهوة الحاج المعطي ... زينة "كتشرب فالقهوة " : ايييه سي عبد العالي جاي لعندنا وغيبة طوييلة هادي ...مرحبا بيه اولدي .. مصطفى : اييه الا الياقوت عاد طلقاتو الوقت وخا مجيتو جاتني غريبة وليني خويا مرحب بيه فاي وقت ... زينة : الله يعمرها سلعة وخا بعيد اولدي مكان مخصصنا من خيرو الله يرضي عليه .. يامنة "كتفطر وكتسمع حتى نطقت بسؤالها " : با واش غايجي مع ولادو .. مصطفى : وعلى هضرتو بان ليا غير هو الي جاي وليني ابنتي منضن يخليوه يجي وحدو كثير شي ولدو يوسف ميخليهش يجي وحدو ... يامنة : شحال قلتي ليا عندو من ولد ابا ... مصطفى : عندو ربعة ابنتي الصغيرة كبر منك بخمس سنين على اخر مرة قبل متزادي حتى هي ولدتها امها وماتت من وراها بعامين باقي نعقل مشيت انا ومك الله يرحمها عزينا فيهم حتى وقع واحد المشكيل فالعزا هو الي خلا الحاج تنكس ومرض ... يامنة : اشمن مشكيل ابا ... مصطفى : العلم لله معمري قدرت نسول عبد العالي كنخاف يتعصب ويمرض ... ناض وقف قاد القب ديال جلابة خشا فيه ميكة كيهزها معاه فيها مستلزمات ديالو ...كينقي في فمو بصبعو ...يلاه خليت ليكم راحة ...ياكما خاصكم شي حاجة ... يامنة : لا ابا الى خصتنا غانمشي عند سعيد مول الحانوت حتى تخلصو ... مصطفى: صافي ...خرج هو وناضت يامنة دات ماعن الفطور وغسلتهم وجابت شبكة ديال لخضرة قدام جداها والربيع وبدات تنقي ...طفلة فهاد العمر متحملة مسؤلية دار وزوج ديال نفوس ...طفولتها تقريبا عايشة فيها غير فترة الفراغ عندها ...ولكن الي ميزها على البنات الي فسنها انها تعلمت صبر وتعلمت متردش الهضرة ...طبعها زوين من جميع النواحي ... زينة : عجنتي شي بعدا ... يامنة : اه اميمة عجنت غادي نوض نحمي الفران وغانعيط لسارة تجي تعاوني ... زينة : مقارياش ابنتي ليوم ... يامنة : لا اميمة بدينا العطلة لبارح ... زينة : ايييه وتنقول مالها يامس نهار كلو وهي فدار ...وشحال فيها العطلة ابنيتي ... يامنة : عاطينا خمسطاش ليوم عطلة دورة لولة اميمة ...عاد رتاحيت من لحفاضة ديال الامتحان ... زينة : وحتى لين هاد القراية معندك لاش بغيتيها غذا ولا بعدو غاتجوجي كيفك كيف گراناتك ...ناس بدات تسول ... يامنة "حست بغصة " : لا اميمة بغيت نقرا وبغيت نبقا حداك اميمة منقدرش نبعد عليك نتي وبا ... زينة : اكبيدتي تانا منسخاش بيك الفجلة ( كتقول عليها الفجلة حيث بيضة وحناكها وفمها ومنخرها حمرين هههه فحال لفجل عهه ) ...وليني كيقوليك المثل ...الي عندو البنت عندو الهم ... يامنة "عينيها غرغرو " : هي انا هم اميمة ياااك ... زينة : الدار الي فيها البنت هم متهنى تا تزوجها وتهنا عليها البنت غير بنت ابنيتي وراجل غير راجل وعمرك مكنتي هم …نتي دوا الي جاني من بعد ميمتك الله يرحمها "وقفت ليها دمعة فطرف عينها " ...الله يرضي عليك ... رجعت يامنة تنقي الخضرة وتوجد …زينة سرحت بعييييد ونطق فيها العقل الحكيم الي عالم بزمان واش مخبي ... "اللي ما تزوج بخدودها، تزوج بجدودها" ..... في احد المقاهي الشعبية بالفيلاج الي تابع ليه الدوار ...كالس كيشرب فكاس ديال اتاي منعنع بريريد صغير ديال شخص ...داير القب ديال جلابة على راسو وحاط تيليفون حداه ...كيتسنى وكلو شوق باش يشوف خوه الحاج عبد العالي الكبير والصدر لحنين ليه فواحد الوقت ملي كان صغير ...وشاءت الاقدار وكل شد طريقو فالحياة وتدها مع الامور الاسرية والدراري والهم والمشاكيل ...كيضور فراسو وحاضي حتى قشع واحد الكاتكات نوع ford kugo كحلة كلها حتى من زاج فيمي فيها ...ىقفت عند راس الدرب الي فيه القهوة ...عرفو هو .... ناض من بعد ماعيط لنادل وخلصو فالبراد وخرج من القهوة ...بدا يصوني ليه الفون مبغاش يجاوب حتى وقف عند سيارة ...دق فزاج ديال شرجم ...حتى تحل ... مصطفى "كان الشفور ابتاسم ليه وحل ليه الباب ديال طوموبيل لوراني. ".... عبد العالي "رجل فالسبعينيات من عمرو بلحية طويلة فيها شيب داير نضاضر شوف ولابس جلابة بزيوية محببة فالمسكي مخططة بالصفر وطربوش فالگرونة وفرجليه بلغة صفرة ...رجل تقليدي بامتياز كتبان عليه الهيبة والهمة كيشبه ليه مصطفى اب يامنة والي هو خوه الاصغر والعزيز عندو والوحيد ...ترجل من سيارة وتقابل معاه كيضحك حيث شحاال هادي مشافو " مصطفى ...تعانق معاه وتسالمو ... مصطفى : نورتينا الحاج على سلامة ياكما تكرفصتي فالطريق ... الحاج : لا لا جايين بيخير... مصطفى : جيتي غير وحدك ولا مجبتيش دراري ... الحاج : جيت غير وحدي هاد النوبة النوبة جايا نجيب يوسف ولا الياس بغاو يجيو معايا وليني يوسف خرجت ليه شي خدمة والياس عندو القراية فافران والصغيرة كتقرا في فرنسا مغاتجي حتى لشهر جاي ... مصطفى : مرحبااا نورتينا ...مشينا لبليدة ولا ... الحاج : على بركة الله ...ضار طلع ركب حداه وانطالق بيهم شيفور مسافة كلمترات ديال بيست حتى وصلو لدوار ...كان علاين ياذن المغرب لقاهم عند الباب ...نزل مصطفى وعلى وجهو علامات الفرح وسعادة بقدوم الاخ ديالو ...حل ليه الباب ودخل ...لقا زينة كالسة فبلاصتها شادة تسبيحها ... مصطفى : لالة زينة ها الحاج جا ... الحاج "كيبتاسم مشا حتى لعندها " : الحاجة زينة ...سلم عليها من راسها ... زينة : اهلا ومرحبا بسي الحاج زارتنا البركة ... الحاج : ترحب بيك جنة الحاجة ..."هز راسو كيقلب ويشوف فدويرة بقا فيه الحال على خوه وفين عايش رغم انها دويرة مزيانة بالنسبة ليهم مكفياهم ولكن بحكم المعيشة فين عايش هو الفيلا والشيفور وحالة خوه الي كان مربيه معجبوش الحال نوعا ما وخا هكا خباها بابتسامة ....حتى خرجت يامنة ...لابسة بيجامة ديال موبرا ...وكيف العادة عاقدة راسها بزيف جامعاه .... مصطفى : هاا البنية الحاج الي كتهلى فيها وعمرك شفتيها ... الحاج "ضار شاف فيها " ...جات لعندو تحنات على ايدو باستها ليه ...عمي ... الحاج : اهلا بنتي تبارك الله تبارك الله كبرتي ..هههه ... دخل هو وباها لصالون وهي دخلت لكوزينة كانت معاها صاحبتها سارة وبنت جيرانهم كتعاون فيها ...حتى وجدو العشا على حقو وطريقو ...قصرية تاع كسكسو بتفاية بمساعدة جارتهم وجداية يامنة الياقوت الي فتلت ليهم كسكسو بايديها ...كملت وقات القصرية وقادتها مزيان ...عاد استاذنت جارتهم مشات لدارها وبقات هي وسارة ... سارة : اجي قلتي ليا عندو ولادو شفتهم مجاوش معاه ؟ يامنة : مااعرفتش علاش مجاوش يمكن ممسالينش ولا معرفت ...اري اري ندي المعالق وصينية ديال لبن والكيسان ...عطاتهم ليها من بعد ماعطاتهم يغسلو ايديهم فصالة فين كتنعس هي وجداها ...قادتها وفرشتها مزيان وعطرتها بالند الي كيجيبو باها من سوق ...وحطت ليهم طابلة لوسط ...كانو كالسين مربعين رجليهم كيهضرو ويضحكو وصينية اتاي والفاكية قدامهم ...دخلت حيدتها وجمعت طابلة وحطت ليهم المعالق عاد دخلت ليهم القصرية ... شاف فيها الحاج عمها وبقا شحااال وهو كيشوف فيها وكيبتاسم من قلبو ...ضحكة خرجها كانه كيشوف واحد شعلة ديال الامل بالنسبة ليه او يمكن كيبني عليها امال من يدري 🤷🏻♀️ تحطت قدامهم القصرية ...فيها الخضرة والتفاية بالحمص والزبيب وفوق منها زوج فرارج الي جاب باها محمرين ...كبت ليهم كيسان اللبن ...كانو ثلاثة الناس الحاج وباها والشيفور ...سماو الله وبداو ... الحاج : شحااال هادي بيني وبين هاد كسكسو ...اييييه ... مصطفى : عرفتك موحشو وحيث هو العزيز عليك داروه ...صباح ان شاء الله غانديرو ليك تريد ... الحاج : المرة جايا ان شاء الله ...صباح كيخصني قبل الفجر نكون شاد طريق لازرو ... مصطفى : وتقووول واش تشدها تغذا هي تغذا شحال هادي مشفتك وعمرك زرتينا هنا ... الحاج : لا مصطفى خويا ضروري خاصني نرجع انا جيت باش نوثق صلة ونزيد رابطة وهي الي غاتخلينا نتشاوفو اكثر ونتقربو الى بغا الله ...ومدام تفتحت سيرة جات الوقيتة نهضر معاك ... مصطفى "بتساؤل " : خير الحاج .. الحاج : نكملو هاد الخير فالماكلة وشي براد اتاي مشحر ثاني وعطين ودنك وسمعني مزيااان ...داكشي الي كان غير كملو تهزت القصرية وتجمعت دنيا وتحط قدامهم براد اتاي مشحر كيف ما طلب ...كب ليهم وضار الحاج تقاد معاه ... الحاج : عقلتي على العاهد الي عطيتيني ملي كنتي صغير وكنت كنضحك عليك وحلفتي عليا بالله وقلتي كلمة رجال ... مصطفى : وكلمة رجال عندي من ذهب الى خالفتها كنت كنتعصب ... الحاج : ههههه معليكش عاقل ...ايوى اسيدي عقلتي شي ولا ؟ مصطفى "رجعت بيه الذاكرة لور"....لواحد العاهد عطاه ليه وهو صغير .... #فلاش_باك.... اول بنت ليا غادي تكون مرات ولدك الكبير ... الحاج "ضحااااك من قلبو " ههههههه ايييه وزعما ... هنا طلع لمصطفى الدم وزعف عليه ...عليا باليمين الحاج وعاهد الله عليا حتى تكون اول بنت ليا الى بغا الله هي مرت ولدك الكبير وتاواحد مياخذها من غيرو ومنكونش راجل الى خالفت بوعدي .... الحاج : هههههه غاتهدن اولدي تهدن مايكون غا خاطرك مالنا عيالات هي الي تكون وربي شاهد الى طول ليا الله فالعمر غانوقف على عرسهم بنفسي ... #رجوع... مصطفى "ابتاسم حتى بانو سنانو " اييييييه العاهد وشكون ينساااه اييييه اليام ...وليني اش فكرك فيه ... الحاج : الدنيا قصيرة اخويا ومضامنش عمري عيييت ومبقيت قادر وجيت باش نفد هاد العاهد ...تبارك الله وخا عندها خمسطاش العام مها صغر منها تزوجت بيك وخا تكرفصت ...وشاء القدر وخداها ربي عندو ... مصطفى "تفكر الولد الي جا بغا يخطبها وعطاه الكلمة باش يجيو يشوفوها وفنفس الوقت هو سبق ليه عاطي هاد العاهد الي عندو هو كلمة رجال وميبغيش يطيح بكلمتو وخاصة هما ترباو وسط هاد الجو واليديهم معروفين وسط القبيلة ديالهم بالي قياد وناس كبار ومعروفين بالكلمة " ... مصطفى : اش نقوليك الحاج صراحة هاد الوعد تفكرتو ميمكنش نساه غير دهوة ديال المشاكل والدنيا وتمارتها هي الي حيداتو من بالي ومن ناحية ثانية فرحتيني انني غادي نتهنى على بنتي والبنات هم دنيا وبنتي الله يرضي عليها مرضية وصبارة وحنينة هزت مسؤليتنا انا وجداها وهي صغيرة بزاف وكيف كتعرف عندها غير خمسطاش لعام باقي ليها شهرين وتكملها ان شاء الله والى شفتيها تعطيها اكبر من عمرها ...طبع بنتي منتهنا عليه الا عند الي ليها منبغي الي يتكرفص عليها ...وكيف كيقولو خيرنا ميديه غيرنا وانا عطيتك الكلمة نتا لول الحاج ومرحبا بالي جا وجاب ... الحاج "فرح وحس براحة اكثر من سمع عليها " : انا منسيتش العاهد وجيت نوفي بيه قبل منموت ومنوفيش بيه دنيا غدارة وبنتك امانة فرقبتي اخويا وكثير شي من قلتي صبارة وحنينة ومنتهنى على ولدي الا على ايديها…وقبل مايطيرو بيها هنا حيث هنا والبوادي ميخليوهاش توصل لهاد سن ومتخطبش… وغاتعيش معاه وانا نضمن ليك تعيش فالهنا وميخصها خير ونخليوها تكمل قرايتها الى بغات منحرموها من تاحاجة بغاتها خاطرها ... مصطفى : ايه الحاج والنعم منشكش فيك وليني العقد موحال يدوزوها لينا ... الحاج : من هاد ناحية متخممش ... غادي نرجعو غادي نديرو عقد وصدقة دقة وحدة وليني غادي تمشي معانا نتا والحاجة ان شاء الله باش تحضرو لعرس تما فازرو ان شاء الله وباقي التفاصيل غادي نجيو قبل العرس بايام باش نوجدوه مجموعين كيف كنا متافقين ونجمعو شمل ان شاء الله ... مصطفى : مخليتي ليا منقول الحاج وعز النسب …عز النسب الى عندك فحال الى عندي الحمد لله غادي نتهنى عليها ... الحاج "ابتاسم ليه " : وليني خاص نسمعو مولات الشي الى موافقة كيف مكان الحال مبغيناش تكون مبززة عليها تبغي تكمل قرايتها... مصطفى "ضور راسو جهة الباب وعيط ليها ": ياامنة تعالي ابنتي ...شوية حتى تمات جايا حادرة راسها وحشمانة حيث اول مرة كيجي عمها الي مهلي فيها من بعييد ...نعام ابا ..."مشابكة صباعها بتوتر"... الحاج "شير ليها لبلاصة حداه " : اجي ابنتي متحشميش اجي كلسي هنا حدا عمك ابنتي ...مشات كلست حداه وهي مبتاسمة وخجولة فنفس الوقت وحناكها بغاو يطرطقو حيث اول مرة غادي تشوفو وتقرب ليه اكثر ... شاف فيها وضحك على حشوميتها وكيفاش حادرة راسها ...ههههه تبارك الله ...الله يرحم القبر وما خلا غير ميمتك الله يرحمها كاني كنشوف نسخة منها ... مصطفى : اييه الله يرحمها ... الحاج : بنتي سمعيني مزيان ...انا جيت باش ..."عاود ليها المراد ديالو من هاد الزيارة كاملة ولانها حشمانة ماعرفت ماتقول ...كانو كيجيوها لخطاب من قبل وكيلقاوها مزال صغيرة حتى بدات تدخل فهاد سن وقربت تعدى سن خمسطاش ودخل فسطاش وفهاد النواحي وهاد البوادي مكيبغيوش البنت توصل لدرهم بلغة البوادي ...اي عشرين عام بهاد المعنى " يامنة "بقات حادرة راسها وقلبها كيضرب بجهد باغية تكمل قرايتها وفنفس الوقت مباغاش ترفض حيث هاكا ترباو بنات القبيلة وهادشي علاش حلو عينيهم كيتزوجو صغاار وهاد السن كتعتابر الانسب لبداية زواج بالنسبة ليهم ..." : لا رد ... الحاج : بنتي متحشميش انا راني باك وفحالك فحال ولادي فحالك فحال يوسف واليا وصوفيا والي غايكون راجلك ان شاء الله ...الى مشيتي عندي تعيشي معانا وعلاش لا تكملي قرايتك مغاديش نمنعوك عليها ونتهلاو فيك حيث بنتنا قبل متكوني بنت خويا وعندك كنية وحدة ... مصطفى : ابنتي هادي هي سنة الحياة انا مساخياش عليا "دموعو على طرف عينيه " وليني خاصني نتهنى عليك انا عارفك غادي تزوجي تزوجي وخاصني نتاكد لمن غانعطيك وفرصة تزوجي بولد عمك ...عمك الي هو خويا وبا وعطيتو الكلمة ونتي عارفاني كلمتي منبغيهاش طيح وكون معارف غادي يتهلا فيك وتعيشي فالجنة معاهم مغاديش نعطيك نتي بنتي ومن الواجب ديالي نعرف بمن نعطيك وتكوني مرتاحة ...والى على القراية غادي تكمليها من بعد وهذا غايكون شرطي عليهم ...اش قلتي ... يامنة "حدرت راسها اكثر مقدرتش تهضر خشات راسها فكتف عمها من الخجل ودعقة وهادشي عطاه انطلاقة باش يفرح ويبتاسم " ... الحاج : السكوت علامة الرضى اس مصطفى ...وعليه بناتنا تيليفون وغانجيو قبل انا ودراري ان شاء الله باش نبداو فالتحضيرات والى على شرطك كلمتي عندك اخويا وكلمة عائلة رمسيس معمرها طاحت لارض .... متاكد الحاج ههههههه سول شي ولدك صعصع وكان ... كيف ديما وكيف العادة والي خاصنا ديما نديروها فبالنا بالي القدر هو الي كيتحكم فينا ومشيئة ربي هي الي كتكون …وخا طير لسما وتنزل وخا تخطط وتخطط فالاخير داكشي الي خططتي ليه هو الي مقسمو ليك الله اصلا …فمعندك متعاند ...وديما كل توخيرة وفيها خيرة ...كل حاجة بانت ليك شر ليك فيه خير ....وكل خير بان ليك …غايكون فيه شر ...خاصنا نرضاو بالي مقسمو لينا الله ومدام عايشين فواحد المحيط ضاير بينا ...ديما نديرو فالاعتبار اننا غادي نعيشو بحسب معتقدات داك المحيط الي حنا فيه ... وفواحد من المحيطات الي عايشة فيه يامنة ...فرض عليها انها تزوج على سن مبكرة ...باتفاق من باها وعمها ...وبالعاهد الي عطاوه لبعضياتهم متزوج غير من الولد الكبير ....هاهي بعد ايام غادي تزف لمدينة بعيييييييييدة على بلادها وباها وجداها الي عاشت وسط حضنها ...ليوم كانت عندها صاحبتها سارة الي كبر منها بعام وخا كتقرا معاها ...وبنت جيرانهم هي وامها ...الي فمقام امها ...في القاع ديال دار كيدقو فالحنة الي غادي طليها لحمها ...معاها بعض الاعشاب … زينة "كتعيط لسارة " : اديك البنت هااا اجي لهنا مدي ليا داك الفردو لهنا "الفردو هو مهراز طويل ديال العود كيستعملوه باش يدقو الحنة ولا العشوب هو كيطحن حسن من الماكينة صراحة هههه " مدي ونتي حالا عليا ز**ك… تي تگعدي قضي غراض المصيبة ... سارة : هاني اميمة "مشات كتجري تجيب ليها اشنو طلبت " هاهو ... زينة : نوضي ابنتي يامنة ديري الما يسخن باش تخلطي فيه هادشي وطليه لذاتك نوضي الله يرضي عليك ... جارتهم "اسمها زهور " : مي زينة خاصها طليه وتغسلو متحكش ومتعومش سبع ايام باش نهار الحمام يخرج ليها الوسخ مزيان ... زينة "بدات كدق فالحنة والعشوب المرافقة ليها " : ايييه دير حنينة واش داكشي شريتي ليها من سوق ؟ زهور "حلت الكواغط الي شرات من سوق عند العطار وبدات تعد ليها فيهم " : هاادو امي زينة ...اداد وشبة والنيلة وشوية العكر الفاسي الي جاب نسيبكم من فاس ...و العرعار...ولشعر جبت ليها ...سرغينة وريحان والورد والخزامة ... زينة : نقيهم وديريهم يتشمشو ... زهور : راه من جبتهم من سوق نقيتهم وشمشتهم امي زينة خاص غير دقيهم ونشططوهم ( نغربلوهم ) ... زينة : الله يرضي عليك ...ايااامنة الى سخن الما اري نخلط ليك الحنة مع العشوب وطليهم لراسك ابنتي ...ساااارة اديك لفاسدة تي شقلت ليك جيبي ابنت لحرام ... سارة : مي زينة راه جبت ليك اشنو بغيتي ... زينة : شفتك كلمة كلمة معايا الخوينزة "هزت صندالتها بغات تشير عليها " نوضي جيبي الغربال اليهودية الي قلت ليك ... سارة : راك مقلتيش ليا اهى اهى ... زينة : تبكي فيهم دم ينعل والديك ابنت لهم نوضي جيبي الغربال لعن طاسيلتك ...هايهاي على المسندرة ...الى مقلتش ليك جيبيه راسك المگوسة عوجة ركابي راه لا طحتي بين ايدي ليع الكلبة الي ولدات بين الفخاد ...اتريكة الرحبة الي جا تقولو مرحبا ...هااااكيلي هاكاوا غسلات دجاجة رجليها ونسات مافات عليها ...نقزت جارتهم زهور ... زهور : تي شدارت لهادشي كلو امي زينة ... زينة"جنونها ديك سارة حيث تترد عليها الهضرة " : تعلم الكلبة تراد معايا فالهضرة نعل طاسيلتها الخانزة ... ناضت سارة تخبط وتبرگم بين نفسها ...اهى اهى شي يتجوج ويعيش فالرفاهية وشي يتعاير ويتحگر تفووو اهى ... ........ في هاد الاثناء كان جاي اب يامنة من الفيلاج فوق كروسة صغيرة سايقها حمار(حشاكم ) ...مقدي ومحمل فيها رغم قلة شي الا انه باغي صدقة بنتو دوز كيف تمناها...حتى قرب لدار وهو يسمع النداء ديال واحد الشخص الي نسااااه مع دهوة ديال توجاد....قال لمول الكروسة باش يوقف ...هبط ورسلو هو لدار يدي المقدية ... مصطفى : اهلاان ولدي صلاح ... صلاح "سلم عليه من ايدو " : سلام عليكم با مصطفى كيف الاحوال الامور هانية ... مصطفى "كيهضر وحشمان حيث عرف عطاه الكلمة وغفل على كلمتو الي عطا لخوه حيث مكانش كيضن بالي فعلا غايطبق العاهد الي بيناتهم " الحمد لله اولدي ...فين غبورك ... صلاح : غير الخدمة وصافي اسي مصطفى ...عاد تيسرت الامور ولله الحمد ...كنت جاي لعندك لدار قلت غاتكون فهاد الوقيتة ...باش نعلمك بالي غانرسل دار نهار الخميس ان شاء الله ...الى كانت الوقت مطلوقة "حشمان " .... مصطفى : ولدي صلاح كيقوليك الارزاق بيد الله ونهار جيتي اولدي علمتيني فرحت وخا بنتي صغيرة شوي وليني عرفتك غادي تهلى فيها وعرفتك بعقلك وداركم من خيرة ناس ونعم النساب ....ودنيا مكاتيب وارزاق ...بنتي تخطبت تقريبا جوج سيمانات هادي باش جا عمها وتصاب اولدي كنت عاطيه الكلمة من صغر ... ومجاتش نخلف بالوعد الي عطيتو وجا حتى لعندنا برجليه وخا مريض وخويا اولدي اقرب ليها حتى نتوما اولدي ولاد الخير ولكن الكلمة الى خرجت من فمنا فالعائلة ميمكنش طيح هادشي علاش رباونا واليدينا وجدودنا ...تمنيتها ليك حتى نتا وليني خيرنا ميديه غيرنا اولدي ...الله يسر ليك ويعطيك رزق حسن من بنتي حيث تستاهل اولدي ماحسن ... صلاح "تزير وحس بدمعة واقفة ليه على طرف عينو وقلبو تزير ولما لا وهو عشقها من اول نضرة ومن يدري قد يكون عشق عتيييييق " : احم ايه اكحكح ...ايه الحاج الارزاق بيد الله ...اللهم يسر الله يكمل بالخير ...سلام عليكم الحاج ....سلم عليه وحدر راسو وزاد مع طريق رجع فحالو ... غادي فطريق ومزير ليه خاطرو وصدرو وحاس بضيق فصدرو ...ااااه شحال من حاجة بغيناها ومكانتش لينا وشحال من هدف حتى كنوصلو ليه وفرحانين بيه حتى كيتبخر فلحضة ...الاحساس الي حاس بيه صلاح فهاد اللحضة ماشي شمتة وانما حزن وقهرة وضيق انه موصلش البنت الي بغا ...لحد الان معرفناش واش حب من نضرة لولة ولا حب قديم وخا صغيرة .... اااااااه هي تنهيدة خارجة من الاعماق يمكن كتحمل هم حزن الم ممكن رااحة بعد عناء وتعب طويييييل وحافل ...يمكن تكون ناتجة من كترت التفكير العميق والتفكير فادق التفاصيل وممكن تكون ناتجة من تخطيط والحساب لاشنو جاي وكيفاش غادي يكون ...ديييما حنا كنبغيو نعرفو شنو غايجرا لينا فالمستقبل وفنفس الوقت كنخافو نعرفو ...كنبغيو نعرفو غير الحاجات زوينة واش غاتكون ولا لا ...المهم راسنا كيتضغط ويتضغط بكترت تفكير حتى كتخرج مننا هاد الاااااه ...ومادراك ما الاااه .... ليل الليل وعتمت دنيا …دوا العشا ومشاو رجال القبيلة او الدوار يصليو فجامع الي بناه احد المحسنين ...حتى بان البرق وتسمع صوت رعد على غير العادة ...ونزلت شتا كثييييييرة ... خرجو رجال كيتجاراو ويتحماو من شتا الي كطيح كثييييرة وقطرات غليضة ...من بينهم مصطفى مشا كيجري كان جامع بعيد شوي على دار جاي وكيخطوي كانت الارض اصلا مزال منشفت من الشتاوات الي دازو بحكم هما في شهور الشتاء ...كينقز هنا وهنا حتى وصل لدار ودخل عليهم ...لقا يامنة كتجري هنا وهنا كانت عاد خرجت من دوش كدير الوصفات الي كيعطيوها ديرهم قبل متعوم ....وجداها فالبيت كتوريها شنو دير ...وواقفة كتصايب فواحد جيهة من سقف ديال زنگ كدخل الما ... مصطفى : ابنتي سيري طلي على دوك البهيمات (هما الغنم ) ياكما داخل لما تما حتى يصبح الحال ونمشي لسوق نتقدا ليهم الزنك لداك سقف ابنتي .... هي : واخا ابا انا غانمشي ...خلاتهم تما ومشات خرجت فجناب الدار ...ملقاتش معيزتها الصغيرة فخرجت تقلب عليها ومن تم حتى حصل ما حصل (نهاية الفلاش باك).... مع غوتت جا باها كيجري ويقلب عليها شاعل البيل الثاني .... يامنة "واقفة كترعد من المنضر خلعها بقات سانية البيل وكتقفقف لا من البرد ولا من المنضر ....حتى سمعت صوت تخرشيش وراها شمت ريحة جاتها زوينة وماعرفتها واش رجالية او نسائية ولكن بحكم انها كانت مجهدة فغالبا غاتكون رجالية ضورت البيل وهي كتفتف ": شش شكون هنااا ؟؟؟ قلبت وضوات مبان ليها حد حتى وقف عليها باها ....مخلوع عليها ... مصطفى : ياك لباس اش كاين ؟ ضور البيل لفين سانية حتى لقا داك المنضر ...الله اكبر الله اكبر امصلي عليك ارسول الله ...الله اكبر لا حول ولا قوة الا بالله ... سيري ابنتي جيبي تيليفون جري دغيا ...لا حول ولا قوة الا بالله ...مشات كتجري لدار تجيبو ليه وهو ضار جيهة البنت قشع واحد الباش مليوح مكان عليه غير يغطيها بيه باش يسترها ...حرمة الميت ...بقا واقف كيحسبن ويذكر الله والي جات في فمو ينطقها ... صبح الحال على دنيا تما مجموعة جنب الواد وناس كتجارا تشوف اش واقع كلشي مجموع جوندارم وشرطة العلمية محاوطين المكان تما ومضورين بصكوتش على الجثة الي صبح وجهها بيض وفمها زرق بقات هكاك معرية من لتحت ورجليها مفرقين ...جا الطبيب شرعي من بعد ساعات وهو جاي من مدينة مراكش …الطب الشرعي ...خلاوه يدير خدمتو ...حتى جا واحد من المسؤلين تما من شرطة العلمية ...كانت واقفة يامنة منخششة في باها ... الضابط : غادي تفضلو معانا لمركز ومن بعد غادي طلعو حتى المديرية ديال الامن الي فمراكش ... يامنة "برد ليها الما فركابي وعينيها غرغرو حتى زيرت فايد باها بجهد " : ب ب بااا اهى اهى ... مصطفى "زير عليها " : وليني اشاف حنا لقيناها علاش غادي تديونا ... الضابط : حيث نتوما لقيتو الجثة وتصادفت جنب دار ديالكم ضروري من الاجراءات والاستجوابات ...من دابا شوية غادي تجي سيارة جوندارم تديكم حتى لمركز الي فالفيلاج هو اللول ...الى ما اثبت والو غادي ترجعو فحالكم ليوم ... جا واحد مسؤول على جوندارم كيعرف عمها شخصيا ... جوندارم : سي مصطفى خو الحاج رمسيس ؟ مصطفى : ايه هو هذا اشاف ... جوندار "سلم عليه " : انا صديق قديم لحاج شكيت فالكنية وقلت نسولك ...غير سيرو معاهم متخافوش غادي نكون معاكم تما ...عطيو اقوالكم ويكون خير ان شاء الله ... مصطفى : شكون هاد البنت الي ميتة ؟ جوندارم : معندهاش لحد الان حتى وثيقة تبت اسمها ونسبها حسب طبيب شرعي رجح انها كانت بنت وتعرضت لاغتصاب شنيع وضرب حتى الموت والنحر...وانها اجنبية نضرا لون بشرتها ولون عينيها ...كيبقى مجرد احتمال ؟ ... وفعلا البنت ملي صبح الحال عاد بانت ملامحها فتاة صهباء صهباء يعني بلقا بزاف وشعرها حمر فحال دفنه الي فحب للايجار كتقريب )…شعرها احمر وبشرتها ثلجية اللون وعينيها زرقين بزاف ...كانت لابسة كسوة سماطي فالشيبي ...اشنو الي جابها لتما واش وقع ليها ...القضية لحد دابا بادية بغمووض كبييير.... جات سيارة رباعية الدفع من نوع Jeep التابعة لابريگاد ....خذات كل من يامنة والاب ديالها من بعد ما وصات سارة وجارتهم لاخرى باش يردو البال لجداها حتى يرجعو ...وهادشي الي مبغاتش تفهمو جداها ملي عرفت وهي تولول وتعدد ليهم تما .... سارة "كتطمن فيها " : اميمة زينة راهم غايرجعو فالعشية والله هادشي الي قال با مصطفى ... زينة "تخبط فجنابها ": اااااااا بنتي غادي دوز عمرها فالحباسات واش داها لشي غصيييييب فين تعرفو ... سارة : اسمو اغتصاب امي زينة ... زينة : منعرف ليه انا …حتى يديروه ليك ابنت الفاجرة ...عاد نعرفو غبري عليا زلافتك خبارك كي وجهك .... سارة : ياك 😿.... بخطى ثابتة كثبات طبعو… خطوات بعقلها كتسمع طقطقة صباطو كان شي واحد فعمرو ربعين عام ...مشية كلاس ...جاي فالممر المؤدي لمكتب ديال باه فين كيقرا القران وكيجودو ...المكتب فين كيقوم بحسابات الاعمال ديال الورشة ديال الخشب ديالو ...طوييل القامة ...عريض الكتاف ...طبعا فورمة رياضية ...جاي كيلعب بايديه كيضربهم ببعضياتهم كيصفق بيهم على شكل بونية فليد ليمنى وليد ليسرى كتضرب فيها ...لابس قميجة بلومارين وسروال دجين فنفس لون وسبرديلا كحلة ...كيشوف قدامو وكيتمتم بفمو مقطع كلمات من اغنيته المفضلة ...حتى وصل لعند الباب ودق ... الحاج "حنحن " : دخل اولدي دخل ... دخل وسد الباب من وراه شاف في باه بابتسامة ...الوليييد ... الحاج "ضحك حتى بانو ضروسو " : ولدي الحنييين سيدي يوسف .... قرب لعندو باس ليه راسو وايديه ... الحاج "بابتسامة " : كلس اولدي ... يوسف "كلس مقابل ليه " : كيف وليتي شوية ؟ الحاج : ولله الحمد هاد الساعة ...ساليتي خدمتك الي فاس ... يوسف : وراه خدمتي تما شكون غايقابل شركة .. الحاج : الشركة عندها مولاها يجي حتى هو يوقف على شغلو ينفس عليك ... يوسف : الوليد حتى انا من مالين شي وانا من احد اعضاء مجلس الادارة راه شركة قابضة الوليد ... الحاج "غوبش " : وهو مناويش يرجع مناويش يطل عليها ؟ حتى لين هادشي ايوسف كيجي جوج مرات فالعام ويرجع دغيا ... يوسف : نتا عارفو كيف داير وعارف بالي منقدرش نقوليه والو ... الحاج معلم ولادو قاعدة وهي الصغير يحتارم الكبير ... الحاج : نتا خاصك ترد لبال لراسك مضغطش على راسك شوية نتا وشوية هو ...عندك 30 عام مناويش دير دارك حتى نتا ... يوسف "ضحك" : هههه مزال هاد ساعة ... الحاج : حتى نتا ؟ يوسف : الكبير كيسبق وحتى يسبق هو عاد نشوفو حنا هاد ساعة مزال باغي نعيش ونضور ونرجع ندير دكتوراه...متنساش راني غير ماستر في الاقتصاد ... الحاج : ايه مدير دكتوراه تنموت انا ومنشوف حفايدي ... يوسف "غوبش وناض لعندو باس ليه ايدو وتقابل معاه " : غاتعيش حتى تشوف حفايد حفايدك ان شاء الله ... الحاج " ضحك من قلبو " : هههههه ان شاء الله الى بغا الله بالفرحات ... يوسف"رجع لبلاصتو " : ان شاء الله ...احم مهم هاني جيت اشنو لموضوع ... الحاج "تقاد فالكلسة وهز فيه عينيه بنضرات جدية وصارمة بزااف " : عاطيك الوكالة هو ياك تصرف فاش مبغيتي باسمو ؟ يوسف "باستغراب ...حك فنيفو ودوز على لحيتو " : ايه الوليد علاش !! الحاج : غادي تمشي معايا فين غانقوليك وغادير شنو غانقوليك ومنبغيش كلمتي طيح لارض فات مني وخرجتها والى محطيناهش امام الامر الواقع عمرو مغايحس بالمسؤلية ...عارفك غادي تخاف منو ومتقدرش وليني انا باك انا غادي نتكلف بيه .... يوسف "برد ليه الما فركابي حيث كيموووت منو وزاد باه غايكمل عليه " : ا ا اشنو ناوي الحاج ... الحاج "هز فيه عينيه بلا ميرمش " : الوكالة جيبها وخود سيمانة كونجي وسمعني شنو غانقوليك ....(عاود ليه ) ... يوسف "وجهو ولا بيض ههه " : لا لا لا لاااا الحاج انا مزاااوگ والله تاينحر العباد .... شي مرات كنكونو مابينا مااعلينا حتى كتنزل علينا صدمات مسرسبة وحدة تابعة لاخرا حتى كنگعدو راس باش نستوعبو الصدمة الي فاتت …كتجي ثانية تهبط لينا راس تاني حتى مكنبقاو نفهمو والو ....وشي مرات او اغلب الاحيان كنكونو غادين على واحد روتين ديال حياتنا تعودنا عليه وهو علاش بانين طريقنا حتى كتجي شي حاجة او شي حدث مكنعرفو باش تبلينا وخاصة الى كانت شي حاجة فوق طاقتك والمشكيل انك انت غاتگدم فيها ...وهادشي الي وقع ليوسف مسكين هههه.... يوسف "بلع ريقو ثلاثة المرات الثالثة روحو كانت غاتخرج ..." : الوليد لا عافاك متحطنيش فهاد الموقف هو حاط ثقتو الكاملة فيا بعينيه مغمضين وملاقيش سلاكة الحاج فمابالك لو استغليت الوكالة ... الحاج : يوسف انا كلفتك مخديتش رايك والى مدرتيش هادشي غادي نتقلق منك ...علاش خالعك وانا معاك ؟ قلت ليك انا الي غانتكلف بيه نتا دير شنو قلت ليك بالضبط ... يوسف : وعلاااش الوليد علاش تحطو فهاد الموقف وتحطنا تاحنا معاه ؟ الحاج : البنت على مسؤليتي غادي نتكلف بيها وعاطي كلمتي لخويا تعاهدنا ومستحيل كلمتنا طيح لارض ...عمر كلمة رمسيس طاحت وهو خاصو يحس بالمسؤلية ...الى كان مزوج غادي يتهرس ويحس بالمسؤلية مبقاش ليه بزاف ويدخل ف 32 سنة حتى لين ديك الطريق ممسلكاهش ... يوسف : هذاك مكتابو وديك الطريق صعيب يخرج منها الوليد تعود على الوضع ...عفاك الحاج متحطنيش فهاد الموقف وزايدون ايخص وكالة زواج انا الي عندي غير الحق التصرف فاملاكو باعتباري النائب على اعمالو هنا ...انا مزااااوگ غير مجرد الفكرة فشلو ليا ركابي ... هنا الحاج ناض وخبط المكتب حتى غوبش يوسف .... الحاج "كيغوت ووجهو كيحمار ويتزير " : ماااااااااااااغااااادييييييش نزل كلمتي لارض الينت خطبتها غادي تجي لهنا بصفتها زوجة ديالو وغاتكمل قرايتها عندنا تحت مسؤليتو وغادي تكلف نتا وغادي نحطووه امام الامر الواقع باش يتعلم يحشم على عراضو ويعرف ماشي غير هو الي يتحدانا ويدير لي قاليه راسو ويحطنا ديما تحت الامر الواقع ... يوسف : الوكالة الوليد الوكالة معنديييش خاصو يوقع عليها هو الوليد ...اااالوليد راه صحتك على قد الحال الله يخليك غاتحل علينا باب جهنم والله انا رااجل وركابيا فشلو .... الحاج : انا معاك وديك ساعة المواجهة غاتكون معايا انا والى كيقلب على السخط نعطيوه ليه ...ونتا غاتجيب الوكالة من عندو مدام كيثيق فيك غادي نعيط ل صهيب المحامي سوجد لينا الوكالة .... يوسف : تا صهيب باغي تلگيها ليه 🤕 العاار الدري باغي يخطب خليه غير تيدير العرس ويولد يتووب عليييك الحاج ... الحاج "خبط عالمكتب تاني " : يوووسف متعصبنيييش متعصبنيييش واش بغيتي نسخط عليك بغيتي نمرض فصحتي الى طاحت كلمتي لارض عمري منسمح ليك عمرييييييي ...ياا انا يا هو واختار دابا ؟ يوسف "فيه البكية " : نتا الحاج نتاااا الله ياربي واش هاد المكتوووب "سخف ليه فوق المكتب " ياربي انا غا درويش خليني الوليد غير حتى ناخذ دكتوراه .... الحاج "جاب ليه الضحك " : ههه الله يرضي عليك ....تيقوليك واحد المثل ...كبرها تصغار ...الى حطيناه فهاد الامر الواقع كون اكيد غادي يتبدل ...البنت منو وفيه غادي تمشي معايا باش نديو ليهم كراطن سكار وداكشي دالخطبة ...عيط لداك المصنگع ديال الياس تاهو غايحضر ...ولكن حتى ترجع من عندو وتجيب الوكالة وفهاد المسالة انا معتامد عليك اولدي ... يوسف : هاد بنت عمي عمري شفتها غاتكون قريبة ليه فالعمر لا ؟ علاش مكانوش كيجيو لعندنا ... الحاج : حيث بعاد ونتوما تدهيتو مع القرايا والخدمة والسفر ...البنت صغر منو ... يوسف : شحال فعمرها .؟ الحاج : 16 عام يوسف : لااا صافي داابا عااااد غانحس باليتم تاااع بصح ....لااا وااالو ...دابا بيتي دير ديك القضية تاع خيرنا ميديه غيرنا ولكن فهاد الحالة خاص يديه غيرنا احسن احسن ..."شاف فباه " ...وتقوووول واش نغامر بحياتي كون غير عضامي لباس ....🙂 الوجهة لابريگاد بالضبط فين متواجد الي والبنت تحت تحقيقات والاستجواب...كالسة جنب باها من بعد ماكملو معاهم وعاودو ليهم كيفاش حتى لقاوها ..مخشية جنب باها وكترعد وخايفة كلشي مخلط عليها ...طبعا والبوليس او اي رجل امن كيخلعو بيه دراري صغار ...هي دابا فقلب خدمتهم وكتستجوب على جريمة كبييييرة عليها وبزاف وجريمة جد جد غامضة ... يامنة "عينيها مغرغرين " : با حنا مدرنا والو علاش جابونا ؟ مصطفى : ابنتي هادي خدمتهم ...متخافيش غادي نخرجو ليوم ان شاء الله ... يامنة : ولكن هما قالو لينا غايديونا حتى لمراكش ... مصطفى : غير قالوها وصافي معندك مناش تخافي ...لاجودان شاف قاليك متخافيش ...مزال كيهضر معاها دازت واحد نصف ساعة حتى خرج الكوميسير الي غايتكلف ومعاه لاجودان .... لاجودان : سي مصطفى تفضلو معانا ... ناض هو وياها شادة ليه فايدو ...دخلو ودخلو معاهم وسدو الباب كلسو فالكراسا الي مقابلين مع المكتب ... الكوميسير "كيشوف فيامنة حادرة عينيها ووجهها مزنگ ": بنتي علاش خايفة ... يامنة "هزت عينيها فيه حمرين " : مدرنا والو ... الكوميسير "ضحك ": هههه طبعا مدرتو والو ابنتي متخافيش ...احم المهم اسي مصطفى شكرا على ...يلاه غايكمل الهضرة حتى صونا الفيكس ...جاوب ...الو ...نعم سيدي ...كيفاش ؟؟ احم سمح ليا اشاف ...ايه واخا شاف علم وينفذ "قطع وهو حادر راسو ومفهم والو جاتو تعليمات صارمة من الفوق " ...سي مصطفى ...تقدرو تفضلو ... مصطفى : مغاديش نرجعو ؟ العميد : لا صافي القضية تسدات مع الاسف ...بان المجرم عاد غانمشي نفهم شنو كاين ...وشكون هذا ... مصطفى : ايه وخا اشاف ...ناض ونوض يامنة ...يلاه غايخرج حتى ... العميد : غاتخرج غادي تلقا دراري كيتسناوك باش يوصلوك منين هزوكم .... وسلم لينا على سي عبد العالي رمسيس ... مصطفى "بابتسامة " : مبلغ اولدي مبلغ ههه ...شد فايد بنتو وخرجو لقاو نفس سيارة الي جابتهم ركبو فيها وداتهم ...فاتجاه الدوار ... كيف خرجو ضار الكوميسير جيهة لاجودان ... الكوميسير : المجرم تشد والقضية تسدت ... لاجودان : بهاد سرعة !! الكوميسير : سلم راسو دغيا ...هاني غانشوف ...ولكن بيني وبينك شغل المافيا هادشي ... لاجودان : محتمل جدا ... كيف وصلو مشات يامنة كتجري لحضن جداها تلاحت عليها والي غير شافتها عطاتها لنواح وتعداد .... زينة : وااااااهيا بنتي هااا ومزال مادا يديها لحنة وداوها هاااا واااهيااا هااا وتقويصة جاتها من "شافت فسارة بنص عين " الحساد الخانزاات هاااا ... يامنة : ههه اميمة هاني مكاين والو غير سولونا صافي والله ...وهاني جيت دغيا ... زينة "منخششاها فيها ومزال كتعد " : الله يابنيتي الله عاد غاتقولي بسم الله ومزال مقلتيها وداوك لديك المخلية ديال المخزن ...الله يابنيتي يالفجلة ونوارة الربيع ومتستاهلي ....وليني العينين تبعوك .،،."عيطت لزهور " ااا زهور وزندي فيخرات نبخرو دنيا وجيبي ديك شبة نديروها ليها ...ونطفيوها فكاس لما ... مصطفى : ههههه هادشي كلو الا زينة هههه غانديرو صدقة ضروري وندبحو ..الحمدي الله مكاين باس حيدت علينا الباس ... زينة : الحمدي لله (الحمد لله ) ... مصطفى : انا مشيت لسوق نشوف اش خاص ونوصي ابراهيم شناق على البهيمة ...سلام عليكم ....خرج لسوق وخلا بنتو منخششة فجداها وزهور دارت داكشي الي قالت ليها ... زينة "خنزرت فسارة " : نوضي اشارفة الهارفة جيبي شبة نطفيها ليك فالعينين ..."خرجت فيها عينيها لخضرين " ... سارة : اش درت ليك انا ... زينة : هااانتي الخانزة غاتراد معايا نوووضي ينوض عليك جنبك ابنت ليهودي ...هزت صندالة وشيرت عليها بيها جاتها لراس ...مشات كتجري تهرنن ودموعها دايزين ...حتى ... يامنة : ههههه اشنو دارت ليك امي ... زينة : اتبقى تقلب عليا تنكوي والديها من لتحت على داك ردان الهضرة ...اللفت المحفور سودانية ...حتى حزقت عاد جمعت رجليها... خرج من عند باه من المكتب ...مبغاش يبقى يتزايد معاه عارفو صحتى مكتستحملش الي يتناقش معاه وعارف انه غير كيكب فالما عالرملة ...وعارف ان باه الى فات حتى خرج الكلمة طبق طبق ...من عادة عائلة رمسيس الكلمة بمثابة رجلة عندهم ...دمهم حامي وقبيلتهم معروفة بهاد شي ومعروف الكبير كيحتارم الي كبر منو ...وهاد العادة فولادو ...يوسف كيحتارم خوه الكبير بزااف وباعتبارو بكر عائلة رمسيس ككل ...فا كيكن ليه احترام خاص ومن صغرهم ترباو ميهزوش عليه العين ...من يوسف لاصغر فرد فيهم وهي البنت الي كتقرا في فرنسا .... فضل انه ميتجاحدش معاه وخا هو ضد هاد القرار ...لو ان البنت غاتجي بعزها والمعني بالامر بعلمو وبرضاه ...ولو انها فعمر عادي ...ولكن العكس والعكس الي عندو توابع وامشاكل وباب ديال الجحيم غايتحل كيف قال هو وكلهم عارفييينو اش كيسوى والا ردة فعل يوسف شخصيا مكانتش غاتكون هاكا ...خوتو كاملين كيموووتو منو بمعنى الكلمة ...عندو سلطة الكبيرة عليهم ...وخا باه متعاند معاه ولكن مخلي ليه صلاحية وسلطة فتربية خوتو والتحكم فيهم ...حيث عارفهم مكيهزوش فيه العين ... وصل البيت ديالو من بعد ما طلع لطابق الثاني ...دخل وحيد القميجة الي كان لابس حطها فسلة الوسخ الي غايمشي يتصبن وحتى سروال والبوكسر ...دخل لدوش طلق ما سخون ودوش مزيان ...كمل وخرج لوا على راسو فوطة من تحت وفوطة كينشف بيها شعرو ...لبس بوكسر جديد وسروال قطن كحل ولفوق عريان ...هز الفون وخرج لبالكون ...تقابل مع جردة ديال لفيلا ...واشم جهة كتفو من ضهر ودراعو من لور ... دوز رقم ديال خوه الاصغر .... يوسف : الحمار فينك ...اشنو ؟ ...عندك المراجعة ؟ الله يمسخك نتا كتقرا نتا مكنعرفش كيف كدير لهاد القراية ...مباقي فيا غير ديك الاخوين الي داخل ليها ....شوف مكاين بو قراية راه عارف شادين عطلة ...شد طريق دابا تلاح لفيلا محتاجك الوليد وجي لداركم البغل ...راني عارفك كاين في فاس ... راه لا عرفك كاين فشي بار من البيران غايملخ ملة مك عصا ...لحد الان طالق المسؤلية عليا لاتخلييهش يجي لمك فطيارة على قبلك ...باليل تكون هنا ...تلاح ...قطع عليه ..قلب الفون لقا بعض من اتصالات شركة ...خشا لفون فجيبو ..هز ايديه ودوزهم على راسو ذهابا وايابا بالقلق وتوثر حتى دق عليه الباب ... يوسف : شكون ... نجود "سيدة كبيرة شوي هي الي مقابلاهم من بعد موت الام ديالهم وهي الي مسؤلة على البنات الي كيجيو الى جاو دراري وعمرت دار ...مربية ديالهم بهاد المعنى " : انا اوليدي انا ... يوسف : ميمة نجوىد دخلي دخلي ...دخلات مشا لعندها كيجري قبل ايدها وباس راسها ...صافا اميمة ... نجود: الحمد لله اولدي ...هبط تغذا مع باك ... يوسف : ايه انا لبس تيشرت ديالي ولحق عليه ...ابتاسمت ليه وخرجت وهو مشا هز تيشرت بيض ولبسو دغيا ...خشا رجليه فكلاكيط وخرج من البيت هبط لتحت لصالة فين كياكلو لقا باه كيهضر فالتيليفون ... الحاج : ايييه وامتا هادشي ؟ سلامة ياربي ...الله اكبر الله اكبر ...المهم حمد لله عالسلامة خويا ...لقات عليكم الباس ...صدق صدق امصطفى ...شي ايام ونجي انا ودراري نجيبو الخطبة قول الخميس جاي قبل بنهار غاناكد عليكم ....اللهم يسر ...قطع ... يوسف : احم الوليد علاش هي بالضبط ... الحاج : راه قلنا ليك نبقاو نعاودو اولدي ...تعاهدنا وخيرنا ميديه غيرينا خليني نحطو اما الامر الواقع باش نفتح ليكم طريق نتا وخوتك ..وختك دابا يجي نصيبها ..."شاف فيه بجدية " يوسف خوك خاصو بنت عمو وبنت عمك خاصها ولد عمها ... يوسف "بحزن " : هي صغيرة وهو راك عارف ... الحاج : المواجهة غاتكون معايا ...باليل جاي صهيب غايجيب الوكالة الي وصيتو عليها حتى يجي ونشرح ليه ...مغاديش يردني ولا يخيب ضني ...هو تربيتي كيفو كيف خوتك.... خلاه غير كيبرق يعني مصر على رايو ...تحط الغذا وتغذاو بزوج ...داز نهار ووصل ليل ...دق الباب ديال برا فتح ليه العساس الباب ودخل بسيارة كاتكات نوع ميرسيديس ...سكتها وضار لكوسان لي حداه هز شكارتو وفيست دارها فايديه وترجل من سيارة ...حلو ليه الباب دخلاني ... الخدامة : سي صهيب .... صهيب "محامي العائلة والشركة وصديق الدراري ومربي معاهم وهو ولد نجود نيت المربية "ابتاسم ليها : الحاج فالمكتب ؟ هي : اه دخل نيشان لعندو كيتسناك ...حدر راسو ومشا فاتجاه المكتب اما يوسف فكان فالمكتب الي ملاصق مع بيتو ...كيطابي فلابتوب امور شركة ...حتى صونا ليه الفون ... يوسف "شاف فالتيليفون فلايكخون مكتوبة سميتو قداش ...صرط ريقو وهز تيليفون باش يجاوب فساعتو ..قبل مينطق حك على جبهتو بتوتر خايف لاتزلق ليه ويقولها بلهلا يطريه ليه ...بعد شحال عاد قدر ينطق بلا ميبان عليه القلق ....الوو... فهاد الاثناء سيارة اخرى لكن هاد المرة سيارة من نوع رينج فالاسود ...كلاكصونا على العساس حل ليه الباب من بعد مسافة وهو جاي فريق حتى وصل لازرو من فاس ...دخل بسيارة وبلاصاها جنب سيارة خوه ...طفا المحرك وهز صاكادو ترجل من سيارة حتى هو ودار صاكادو فكتفو ...حادر راسو ...دوز بصباعو على لحيتو الكثيييفة ...حك مسطاجو طويل ...هز راسو شاف فالفيلا بانو ليه ضواوها كلهم شاعلين ...لابس قبية ديال لخايط …وداير القب ...وسروال دجين ولابس گات فرجليه ...حنحن قبل ميتوجه لفيلا ويدخل لداخل ... هابط يوسف مع دروج خاشي ايديه فجيابو ...كيعض فشفايفو ...سمع الحس وجه بالنضر ديالو لمصدر …حتى قشعو داخل ...الياس !!! الياس : "هز راسو فيه ..ضحك ووسع دراعو جايه "هاااي بروووو ...مشا لعندو باش يعنقو حتى وقفو مخنزر فيه ... يوسف "طلعو وهبطو من ساسو تالراسو …ش ش شهاااد الحالة ؟ شهاد الخرا لابس ....طلع فيه عينو وخرج عينيه فاللحية والموسطاج ...فحال شي بوهالي ...شهاذ الوسخ ؟ ...اسلگوط... الياس : سيي لاامود مون فخيغ ( الموضة اخويا ) ... يوسف : "صعر " سي البعر والله يالكلب وماتحسن هاد الحبس تنتفاهم معاك السلگوط ...تگعد حيد هاد الزمر ... الياس : تا خلينا اصحبي نفرحو براسنا ... يوسف : والله ثم الله ومتحيد هاد العجب ..."هز الفون ومشا لكونطاكت وراه سميتو " مكالمة وحدة تلقاه عند خنشوشك ... الياس "صرط ريقو " : تااا هاا شور يا ...خالني غير هاد العطلة كاين واحد الحفلة دايرينها العشران وداكشي ... يوسف مجاوبوش حدو خنزر فيه وكيكدد فشفايفو ... الياس : على بركة الله نعيطو لمحسن الحلاق يحسن لديلمي عالضص ...نخلي مو كي ركبة …تا تلعبو هنا ... بقا كيخنزر فيه حتى نعل شيطان وساس ايديه ضربهم اخماس اسداس ...لا حول الله يارب لا حول الله يارب ... الياس : فين الوليد وعلاش عيطتي ليا ... يوسف : الوليد فالمكتب مع صهيب وعيطنا ليك باش تجي لداركم فالعطلة يشوفك باك وتشوفو منخليوهش وحدو راه مريض ...وزايدون عندنا منقضيو ...طحنا فمصيبة قررها باك غاتحل علينا مشكيل كبيييير مع خوك ... الياس : ياك لباس ؟ يوسف : زيد قدامي سلم عليه وغاتعرف ...تمشا يوسف قدامو وتبعو دقو فالمكتب حتى اذن ليهم بالدخول عاد دخلو ... الياس "جاي كيضحك لعند باه " : الولييييييد ... الحاج : الياس على سلامة ...سلم عليه الياس من ايدو وباس ليه راسو ...سلم على صهيب حتى هو .. الحاج"بقا يحنزز فيه من ساسو تالراسو تاهو ههه " : اش هادشي لابس العجل ؟ ... صهيب : هههههههههههاو العجل عههه الياس : الوليد غير بغيت نجرب هاد ستيل وصافي نضربو بيه تصيورات الحاج وداكشي راك عارف ... يوسف : صباح ملقاكش محيدو نصور حبك مع الحايط سمعتي ؟ الياس : صافي غاتهنى اناري 😑 مشا كلس حدا صهيب ويوسف ...واستانف الحاج الهضرة الي سبق ليه بداها مع صهيب ... صهيب : الحاج هالوكالة علاش وصيتيني ..."جبدها ليه دايرها فملف من شكارة حطها ليه " هاهي خاص غير سنية ديالو وسنية ديال يوسف ... يوسف : توما شكون يوسف ؟ صهيب "على نيتو مفاهم والو " : انتا مالك هبلتي اصحبي ... يوسف : كون غا هبلت يديروه بعين الاعتبار ... الحاج "خنزر فيوسف " : يوسف هضرنا بلا مطلع ليا دم راه قلت ليك انا غانهضر معاه غانهضر معاه والى عصاني غانغضب عليه الى يوم الدين ومتخلينيش نفكر نغضب منك تانتا ... يوسف "حذر راسو احتراما لباه " : سمح ليا الوليد ... الحاج : مخليه يربيكم ومكنهضرش الى ملخكم عصا حيث هو الكبير ولكن متماداش لا نتا لا هو لا خوتك الله يرضي عليك فهاد الامور ديال العائلة وزواجو مني ليه ... صهيب : علاش ميجيش هو يدير العقد ؟ ويرجع الى ممساليش ... يوسف : يااا ليت ولكن راه هو مفخبارووش ... صهيب : كيفاش ؟ الحاج : غايتزوج بالوكالة حتى يجي عاد غايعرف راه تزوج ... صهيب "شرع عينيه " امم؟ الياس : وخا تفهموني اش كاين … يوسف : خوك الكبير غايتزوج ازين ... الياس : اييييه يهودي مات فالملاح كيف طرا وجرا ؟ الحاج : وصل الوقت الي يكمل فيه نص دينو ... الياس "تمتم بشوي " حتى يبداه عاد نشوفو النص ... يوسف"وجه كلامو لالياس " : عندك الزهر مكاينش اما يعطيك طرشة حتى يضور ليك الحنك …مغايخنزر فحبك …ميعطيك وقت تبربيقة تجيبك مصلي ... الياس : هاني انسكت ... صهيب "ضار جيهة الحاج" : هالوكالة الوليد "تيقوليه الوليد حيث مربيه فحال باه الله يرحمو " ...وليني خاص يسنيها هو ويقولينا شحال صداق الي بغا يعطي …ويوكلك على شروط عاد شوف العروسة اشنو شروطها ... الحاج : العروسة بنتي وبنت عمو منو وفيه وشروطها مجابة وفوق منها زيادة والخير ...وبالنسبة الامضاء اولدي بغيتك تجيب الوراق الي خاص يمضي… ويوسف غايجيب الوراق من شركة حتى هو باش نكثرو الوراق وميعرفش راها وثيقة زواج ... صهيب "مزال مدخلهاش لراسو عههه" : اياااو كيفاش الحاج ؟ يوسف : بغاه يسني يتزوج بلا خبارو... الياس : شاااااا ارااااولكلكلكلك العاااااالي مولانا شحال هادي مشنا صهد نيت نكمدو عضامنا معاه ...ابشرو ... صهيب "عينيه مرمشوش " : اويلي غدايدي ... الياس : صهيب ولا كي الولية هههههههههههه صهيب : كيفاش الحاج علاش غادير ليه هاكا ؟ والى عرف را عندو الحق يطلق الى كشف بالي سنا بلا ميعرف .. الحاج : الى قلتوها وشهدتو غادي نغضب عليكم ... صهيب : شور يا الحاج تا شمن غضب غا فهمني بعدا ... الحاج : الي عندي قلتو ...دابا يا يوسف غايدي ليه الوراق حتى لموسكو يسنيهم يا نتا بنفسك يا الياس باش ميشكش واحد فيكم ... الياس : صهيب صهيب : يوسف ... يوسف : الياس ... ضار صهيب عند يوسف ...خويا العشير را بغيت ندي الوليدة تشوف ليا شي بنت نخطب نكمل ديني العااار ... يوسف : يمشي الياس نيت خاصو يتنجر باش يترجل ويدير عقلو ... الياس "خرج عينيه وتلفت ليه الهضرة مبقا عرفاش يقول " : لا اخويا انا ناوي نمشي لعمرة فالعيد الكبير والحج ان شاء الله غانديرو فرمضان تقبل الله منا ومنكم صالح الاعمال 🙂 الحاج بداو كيجعروه ... خبط عليهم فوق المكتب حتى قفزو ... الياس / العداااو ...خلعني ..😟 يوسف "غوبش " الوليد متبقاش تدير هاد ردات الفعل غايطلع ليك سكار ثاني ؟ الحاج : نتوما بهادشي غاطلعو ليا سكاار نتوما مالنا اش كاين ؟ جوج كلمات مغانبقاش نعاود فالهضرة "وجه هضرتو لصهيب " نتا وجدتي الوكالة الله يرضي عليك وصباح جيب الوراق باش يسنيهم …الف اي حاجة دخلها مع الملف ...ونتا "ليوسف " غاتمشي بعد غذا فالصباح لعندو لهيه قطع لبيي ليوم وسير لعندو قضي الغراض ورجع لغذ ليه ...وسدينا سمعتي سديييينا ... ونتا "لالياس " هضر مع ختك راوية قوليها تجي فالويكاند تحضر لعرس ونبه عليها متقول ليه والو والى ساق الخبار قبل ميتسنا عقد زواج اقسم بالله حتى نغبر عليكم وجهي ونغضب عليكم سمعتوووني ....كلمتي مطيحش وعطيت كلمتي لخويا والي زغبو الله هو الي يخصر علاقتي بيه ...وهو لا حفات ليه هو وطلق البنت غاياخد السخط من عندي ...ناض من الكرسي وخرج خبط عليهم الباب ... صهيب "ضار لعند يوسف " : متاكد انه مغايطلقش البنت ؟ يوسف "معصب ومخنزر وصعرة دنيا ودين فيه مباغيش يتحط فهاد الموقف وحاس براسو كيغضر فخوه والى قتلو حلال فيه ...كيكدد فشفايفو بعصبية حتى نفخهم " : عارفو ميقدرش على سخط باه وخا يطير وينزل هادي هي نقطة ضعفو مع الاسف ... الياس : اش غانقول لهاديك سلوم التريسيان ديال ختك ؟ يوسف : هاديك انا غاندوي معاها غا هنينا وسكت ... في واحد الجهة واحد الاسرة فرحانا بتوجاد وانتظار قدوم اهل العريس ...في القاع ديال دار كيف العادة كالسة جداها كتغربل فالعشوب الي غادي طلي لحمها ثاني والعطور ديال الجسم الطبيعية ...خدامة كدق زهور فالفردو وسارة مع يامنة كينقيو فيهم ... زينة "وجهت كلامها ليامنة " : بنتي هذا شيح والخزامة ديريهم فالما وغير يبداو يتبخو طفي عليهم الما توضاي بيه ابنتي وخوي منو شوي فكاس شربيه ...والعشوب الي تصفاو منو ديريهم فزويف وديريه (العيالات الكبار تيقولوها لبنت نيشان ههه ) ديريه تحتك ولبسي عليه سروال سخون باتي بيه ليوم وصباح حيديه ...بقاي ديريهم ثلاث ايام باش يحيد منك البرد ... "البنات هادي الي كتجيها العادة بالوجع ديرها كتخرج البرد وفنفس الوقت فيها شيح معقم ديريها قبل فاش كديريها فحال طريقة الي شرحتها زينة زيف تحت منك كتحسي بالبرد بارد بزاف كيخرج منك ..." يامنة "قبطتهم من عندها " : واخا هاني غانمشي نديرها دابا ...مشات وبقات زينة مع جارتهم وصاحبتها حتى هي جارتهم ... زهور : مي زينة جارتنا نزهة سولاتك على دوك العشوب اشنو فيهم باش تخرج تولد تاني ... زينة "كانت فايامها قابلة ديال دوار " : صبري نستعقل ليك (نتفكر ) ...ايييه قولي ليها تاخذ شيح بانواعو بجوج والزعتر تاهو بجوج نواع والخزامة تاهي وفليو والعسل الحر ...دقهم مزيان وتغربلهم وتجعم بالعسل على شكل قويلبات وتسنى نهار تجيها العادة فنهار ثاني تبداهم حتى تكمل منها وديرهم من القدام (يعني من بلاصة من كتخرج ليغيگل ...هاد المعلومة عطيتها العيالات المزوجات الي عندها تاخر الانجاب وقاليها طبيب معندك حتى مشكيل ولكن مجاب ليها الله ولاد والي عندها البرد هاد الوصفة كتخرج البرد من الوالدة وكتخرج الميكروب مع دم الحيض والله يفرح كل مزوجة مشتاقة لدرية ) ... زهور : واخا مي زينة غانقولها ليها ........والخياط ديال الفيلاج خاص نمشيو عندو باش نجيبو داكشي الي حطت .... زينة : ايييه ابنتي سيري نتي وياها والحاجة شوفو الي يديكم فوق الكروسة ...مبقا والو نيت ... بقاو العيالات كيدقو فالعشوب وكينقيو داكشي ديال الحلوة زنجلان وحبة حلاوة والخ .... اما يامنة فردت هذاكشي الي قالو ليها ...وتبعتها سارة وبنت جارتهم لاخرا ...اسمها نورة .... نورة : يامنة ...هاكي جبت ليك هذا زيت اللوز باليل غسلي وجهك بهاد صابونة العادية ديال دوف مزيان ودهنيه لوجهك قبل متنعسي وصباح عاودي غسليه مزيااان باش متشدش فيك الشمس ...وباش حناكك يحيد منهم تشقاق ديال البرد .... سارة : ههههه غير كتشد فيها كتولي حمرة مكتكحالش يامنة ... يامنة : ههههه وايه ... نورة : الله يمسخك ههه مهم ولفمك ديري تلاتة المرات فسيمانة تقشير بسنيدة والحامض حكيه بيهم مزيان ودهنيه بفازلين ...ولا من تبغي تعومي قبل ديري گلوص ديال الفريز راه عندك الي رسليك عمك مع الحوايج ... يامنة : تسمعك ميمة تليعنا بجوج ( تقرصنا ههه ) ... سارة : تي مالك راك عروسة دابا وخا ديري مكياج راكي غاتولي مرات راجل ... يامنة "تزنگت " ... نورة : مهم هاهو جابتو الفرصة ...شدي هذاك الگلوص وديريه لفمك قبل مدخلي تعومي مع سخونية غاتحيدي الجلدة الميتة ديال شفايفك دقة وحدة ( بنات هادي كنديرها ديما قبل منمشي لحمام كندير كلوص غاكندخل لسخون كنحيد من فمي جلدة وحدة هههه ) ... يامنة : وااخا .. سارة : تانتي انورة غا راجلها يمصمص ليها لفم ينفخو ويرطبو دقة وحدة ههههههه نورة : الله يمسخك هههههه يامنة "وجهها بغا يطرطق عههه " حرام عليك سكتي من الهضرة الخايبة 😟.... هي روسيا رئيسها فلاديمير بوتين… بلاد الفلاسفة امثال تسيولكوفسكي بوجدانوف ...بلاد الاتحاد السوفياتي ...الشيوعيين البلاشفة ...الرئساء السابقين امثال ...غورباتشوف ...خروتشوف ...الذين تركو بصمات كبيرة في تاريخ روسيا ....بلد يحمل تاريخ عضييييم جدا ...بلد الكاتيوشا .."كاتيوشا هي فتاة كانت تنتضر حبيبها الذي كان خادم بلاده في الجيش ليعود" ...الخ ...وغيرها ... عاصمتها موسكو او باللغة الروسية ماسكڤا ... ……… غير مكبل اليدين …يعتبر من اشرس الاعداء لكنه غير مكبل وما سادينش ليه فمو ...العرق نازل ليه من نواضرو وجبهتو كيشوف ويترقب مصيرو حتى ...وقف حداه رجل قريب لعمر الاربعين شعرو شهب وعينيه زرقيين ...هبط ليه عند وجهو ...اسمو فلاديمير... فلاديمير : علاش بيعتي بينا ؟ هو يلاه بغا ينطق حتى ... ناض من فوق كرسيه من بعد مكان حاضيهم بزوج من بعيد ..لاح الكارو الي كان كيكمي فيه …طوا كمايم القميجة ...مشا ليه بدون سابق انذار حط ايديه على راسو وبغفلة وبسرعة البرق ضورو بجهد حتى طرطق ليه العنق ...طاح ميت… صفات النسر على الفريسة مكيعطيش انذار ولا يهضر ...نيشان بلا تضياع الحجرة ...انه الملقب ب اريلماسكڤا او نسر موسكو... يااارب اشنو هادشي كيوقع ؟ وعلاش هادشي ...اشنو ذنب هاديك البنت الي غادي تزوجها بشخص مغانقولوش فارق سن كبير ولكن فهاد الوقت الى كان راجل متفهم مع الزوجة ديالو وكانو مفاهمين فالافكار ومضحيين ببزاف دالحوايج وعايشين بيخير وبسلام الفرق كيبقى غير ارقام ...رغم ان الفارق عادي جدا ...المهم انه مزوجهاش لراجل فعمر باها او جدها ...وانما بشاب ناضج ...ولكن واش بعقلو واش غايتفهم واش غايتقبل ...لا ندري ردة الفعل ديالو لحد الان غامضة وهو لحد الان غامض ... لو كان شخص عادي ردة الفعل ديالو حتى ولو كانت عصبية عنيفة من حقو ...لانه تزوج بدون علمو غايسني على ورقة حددت ليه مصيرو وربطاتو بمسؤلية كبيييرة وربطات بزوجة وانسانة غاتشارك معاه حياتو وهو ماشي فهاد العالم هههه غريبة هاد دنيا ...والمشكيل غاتربطو بزوجة عمرها صغير ...والمشكيل الاكبر غايتغدر من خوه الي واثق فيه وعاطيه صلاحية فكل اعمالو فالمغرب حتى انه مكيسولش على الحسابات والاموال الي كدخل لشركة عارف لمن محمل المسؤلية وعارفو قدها وقدود ... ولكن انه يتعاون مع باه باش يطيحوه فشباك الزواج الي هو معالم عليه والو ...غايحس بغدر كبييييير ماشي من باه وانما من شخص الي واثق فيه ثقة عمية حتى غايعميه ويتقب ليه العينين ...وياااويييييل الي كسر ثقتو ياوييييل ...عينيه كيتعماو حتى مكيبقاش يفرز شكون قدامو واش خوه واش بنادم اصلا ... وهادشي الي خايف منو يوسف ...والمسالة ماشي هي الخوف من ردة الفعل ..المسالة ان يوسف مرضو التفكير في انه غايطعن خوه ...جا بين البينات وبين نارين ...الحاج الي باغي هاد زواج باي طريقة كانت وبين خوه الي مجايب خبار ونهار يعرف غايحس براسو حمار ....وكاين شي راجل كيبغي يكون حماار ؟؟!!!... ليل الييييل لقاه متكي فوق ناموسية ديالو عريان من لفوق وداير ايديه تحت راسو كيفكر فهادشي الي تذكر ...راسو تنفخ ...قلبو كيضرب فور مكيعرف شنو كيتسناه ...مراضيش مباغيش مقادش على مشاكل مع خوه ...ولكن من ناحية باه والى غضب عليه ...وهما مربيين على هاد المبدا باهم شي حاجة مقدسة بالنسبة ليهم ...خاصة هو الي بقا ليهم من بعد الام ديالهم ومجابش عليهم زوجة الاب ورباهم حتى طلق ايد المسؤلية لخوهم الكبير الغائب والي نايضة عليه هاد الهيلالة والرعب ... وبهاكا كيرجع لنقطة الاصلية من اللول حتى تبخ ليه راس بالمزيان ...هز الفون عاود تاني صونا ليها وكيتحلف الى مجاوباتو هاد المرة يمشي ليلة يقطع باش مكان تالعندها يملخ ملتها عصا ...ولكن لحسن حضها جاوباتو فالحين ... راوية "اختهم الصغرة ذات العشرين سنة كتقرا ادارة الاعمال في جامعة paris_sud university بمنحة من عند خوها الكبير " : وي بونسواغ يوسف ... يوسف : بون زبل كتفلاي لمك ؟ راوية: خوياا سمح ليا وحق الله حتى كنت مع البنات كنراجعو عندنا امتحان بعد غذا والله والله اكبيدة مقصدت سمح ليا ... يوسف "ابتاسم " : تترشيني بكبيدة لملتك ؟ راوية : خهههه منبقاش نعاود افخيغو ... يوسف : توحشت نبقا نعطي فحبك العصا تتصلي على رسول الله ... راوية : احح توحشت نبقا عطيني نعطيك والكراطي وداكشي ويجي الياس يدخل معانا يهزو فؤاد من گرفادتو باش ييمشي يحفض ههههههه توحشتكم والله ... يوسف : هههه ايوى جي عندنا فالويكاند ... راوية"بحزن وخوف " : مكرهتش ولكن فؤاد الى عرف جيت وسط الامتحانات غالقاه عندي ... يوسف : هههه غير جي غانقطع ليك صباح وجي وتنين فالصباح رجعي وفؤاد على ضمانتي ... راوية : حلف بالله ؟ يوسف : والله اصلا الوليد بغاك تجي محتاجينك هاد الايام ... راوية : اش كاين ؟ يوسف : وحتى تجي تانتي ونشوفوك اش غاتقولي مهم بداي تجمعي اش خاصك غذا غانعلمك ونرسليك البيي فجمايل ديالك داكوغ ما پتيت ... راوية : داكووغ مون سوسو ....قطع معاها ورجع دوز الخط لصهيب ... يوسف : صهيب وجد راسك غانطلعو نيهرو ف فاس ليلة مسالي ... صهيب : على قبل شياخ نتيسع العشير امر وانا نغامر سير عالله ... في احد بيران مدينة فاس من بعد ما وصل بلاصا طموبيل وعطا لكونطاكت لامن ديال البارك دخلها لبارك ديال لوطيل الي فيه البار ...حرك ليه واحد من الفيدورات الي قدام الباب راسو احتراما وحلو ليه الباب ...مع دخل لقا دنيا عامرة وخا وسط سيمانة ناس حاضرة تما ...الموسيقى عالجهد وزدحة لعلك ترضى ...بنات طبقة راقية تما ...كاين فوطويات ديال الطوابل ديال كليكة الي فيها عدد الافراد كتار وكاين طاولات عادية وكاين طوالة ديال البار الي مقابلها البارمان شخصيا ...وهي الي مشا ليها لقاه كالس وشاد ليه كاس ويسكي وطبيسيل صغير فيه فواكه جافة واخور فيه زيتون ولاخور فيه مخلل الكورنيشو باش كيقطع ...حط الفون وتلاح فوق الكرسي .... صهيب : العشير "سلم عليه بحركة ايد على شكل بونية " ... يوسف "غمزو " : كيفاش العشير لباس توحشتك ... صهيب : تانا توحشتك من قبيلة لدابا ... يوسف "غمز البارمان ": واحد فودكا خويا .. البارمان : نهرسها ؟ يوسف : مكرهت قصح منها نسا راسي ..تت سي هرسها ليا ...ابتاسم ليه ومشا يخلطها وضار هو جيهة صهيب ... صهيب : تانا جيت باش نسا …..تا بوك شتيخربق الخو ...علاش ميخويش علينا ليصانص رباعتنا ويشعل فينا العافية ؟ يوسف : ياريت ...كيخربق الوليد حق الرب العالي حتى كيخربق ...ماقدنيش خايف منو …انا راجل بشلاغمي وخايف منو حيث عارفو مصيبة كحلة راه ميعقلش عليا والله ميعقل والى دارها بصحتو حيث عندو الحق وحلال عليه ... صهيب : ضالم معاه تا بنت ناس حشومة عليه ... يوسف : مضمونو فيها انها غادي تجمع فؤاد وتقادو لطريق المستقيم ... صهيب كان كيشرب فكاسو غاسمعها خرج عينيه وهو يرش عليه من فمو بضحك مقدرش ميضحكش ...وااات ؟نعااام اختي ؟ تقاد فؤاد 🤣🤣🤣🤣🤣🤣🤣و مصراني وامعائي تيخراو بضحك عديلمك هربتيه ليا ..."عيط لبار مان " عثمان خويا عطيني فودكا زيد فيها ويسكي وروج مشروب شعب وزيد معاها معيلقة ديال لهيروين .... يوسف : اتاا مالك ؟ صهيب : باش نفهم اش بغا بوك اش بغاا بووووك ...ونااري انا الي وجدت الوكالة ...نتا غاتديها ...صحيبي خويا خاصنا نتوبو ونمشيو نزورو مقام الله تا لاقتلنا تكون خاتمتنا نقية وميتة فيما يرضي الله ... يوسف "خذا كاس ديالو مص طرف ديال الحامض هو لول عاد رشف منو رشفة " والله الى عندك صح ...ههههه كنا هانيين والله العضيم بغا يكرفصنا ويكرفص البنت وباقي صغيرة ... صهيب : 16 عام وهو داخل ف 32 بففف هو عادي الى كانو طرفين مفاهمين وليني هي طبع وهو غير كل طباع خوك تركيبة وحدها ... يوسف : الهيبة عاطيها ليه الله سبحانه وتعالى قاصح بزاف غير الى كحب خوتي صغار كيخراو تحتهم كيعرفوه جا كيوقفو الي كان مزبلها كيقادها باش ميحصلش ... صهيب : عمرك شفتيها ؟ يوسف : راك كابر معانا زعما كون شفتها كنتي غاتشوفها تانتا ...هي تزادت لقاتنا كل شاد راسو فقنت كيقرا عمري شفتها ولكن على حسب معاود ليا الوليد ضريفة بزاف وحنينة مكتردش الهضرة وكتحتارم وحادگة قليل فحال طبعها مجموع فيه كلشي وزوينة ... صهيب : انا غانكون مع باك من واحد ناحية هي قلتي مكتردش الهضرة "شاف فيه يوسف ونطق " يوسف : اكثر حاجة كيبغي فؤاد رمسيس ... صهيب : وليني غايقتلها غابالخلعة هنا فين كعلصها باك ...غي الله يستر ... يوسف "دوز على وجهو وشعرو بتوتر وعصبية وشلا ما مجموع فيه " ...صباح عطيني الوراق نزيدهم فالملف ... صهيب : كيغادير غا قوليا فؤاد را مدوزش عليه ونتا حايه فواحد اللحضة مفاجئة ؟ يوسف : قلت ليه غانجي عندو قبيييلة هضر معايا ...ولكن قاليا جي نسنيهم ليك ورجع لغد ليه ممساليش ليك هاد الايام ...معصب معرفت شنو عندو ... صهيب : امتا غاتمشي ؟ يوسف : بدع غذا مع الفجر عندي طيارة ...وغانرجع الغد ليه ... متكية حدا جداها فالبيت وكتشوف فالسقف ...كتخمم كيفاش غاتكون حياتها فدار عمها الى جانب زوجها الي باقي عمرها شافتو ...يامنة فتاة تربات وسط مجتمع الى جاها نصيبها وكان نصيب مقاد ماديا او كان نصيب مزيان وعائلة تستحق النسب تقبل بيه ...يامنة فتاة خجولة مربية حنينة سكوتية الى تقلقت ممكن تكمدها ممكن دافع على حقها على حسب اللحضة ...الى شافت الحاجة متستاحقش تناقش عليها كتميك ...عمرها عمر جد عادي انها تكون عارفة العلاقة زوجية ولكن ضروري من شي حد يفقهها ويعلمها كيفاش تصرف ومن غيرهم صاحبات الخبرة القديمة اي نساء الي مزوجات و والدات ...وفي ضروفها هي معندهاش امها الي توريها وتعلمها كيفاش تصرف لقات جداها ولكن جداها دقة قديييمة. عندها خبرة غير بالعلاقات زوجية القديمة ...وهي كتحشم من جداها رغم ذلك وهنا كان تدخل وتعليم من نصيب جارتهم زهور الي هي الي عطاتها بعض نصائح وفاش تفكرتهم دابا ...حست بسخونية طالعة مع وجنتيها فزادو احمرارا عن عادتهم ... زهور : خليه هو الي يتحكم فاللول نتي معارفاش هو الي غايعلمك هادشي فنهار اللول وفاش تكملو متخليهش يقرب ليك حتى دوز ايام قليلة قولي اربع ايام وبقاي توضاي بالعشوب الي عطيتك خزامة وشيح بزاف وفاش نمشيو لفيلاج غادي نتقداو واحد الما ديال لوضوء من الفارمسيان ...نوصيك نضافة ثم النضافة متخليهش يشم فيك ريحة ...وعاد ابنتي نتي اصلا نقية الله يرضي عليك .... يامنة "غير كتبلق فعينيها وساكتة كتسمع وكتقيد فراسها " زهور : وريه حداگتك شهيوات ديال ايديك وشهد الي كتخرجي منهم هما ولاد ديك البلاد غايكون موحش ماكلت بلادو ... يامنة : ههه معرفتش زهور : نتي غير ديري اش قلت ليك اليوم وغذا تاني نوريك اشنو تاني اخور ابنتي ...اجي هو فين ساكن ... يامنة : قاليا با خدام فروسيا عندو شركة تما هادشي الي عارف ... زهور : ولد خوه يا بنيتي وممتاكد منو ... يامنة : قاليا راه ولد خويا وكان شايفو من قبل ميهاجر لبرا فاش كان كيقرا فلافاك ... زهور : اييه الجامعة يعني قاري تبارك الله ... يامنة : ياربي يخليني نكمل قرايتي حتى انا بغيت نوصل فحالو ... زهور : وبنيتي ههه نصيحة لله عندك راجل كامل مكمول مخصك بقراية لا بغيتي غيرديريها فوق شبعة وصافي ... نقزت سارة الي عادو دخلت عليهم ... سارة "كضور لا تكون زينة وراها ههههه " : يامنة .."مشات كلست حداها فلارض وربعت رجليها " ...قولي ليا واش عندو فيسبووك ؟ يامنة "هزت كتافها بعدم دراية " : ماا عرفتش !! سارة : شايفاه ؟ يامنة : قاليا عمي فاش غايجي مع ولادو لاخرين غايوريوه ليا فتصاور هو ميقدرش يجي حيث عندو الخدمة غايرسل غير وكالة مع يوسف ولد عمي ... سارة : غايديك معاه ؟ يامنة : حتى يجي انا غانمشي غير لازرو عند عمي فالفيلا ... سارة : احح سعداتك الله يكمل عليك بالخير .. زهور : وكان من يوريه ليك ورينا معاك .. يامنة : واخا هههه سارة : اجيييي "جبدت تيليفونها من جيبها واحد سامسونغ لانكاسابل ديالو ولات غربال بضفار سارة خهههه " عطيني سميتو بالفرونسي نجبدوه نشوفو وشا عندو انسطا ولا فيس بوك؟ يامنة "بفضول " : ايييه هانتي فؤاد رمسيس ولا fouad ramssisse هاكا كتكتب كنيتنا ... سارة : احححح على كنية عندكم فشكل ههه تسناي ...دخلت سمية فالفيس لا بالعربية ولا فرنسية مطلعتش ليها ...اوه معندوش الفيس ...سناي نشوف انسطا ...ونري ينري تي هذا منعازل ديلمو ..."يسمعك يكحش لمك العينين " بلاتي طلع ليا غير يوسف رمسيس و الياس رمسيس و بنت تاهي عندها نفس الكنية ... يامنة : انشوف بنت عمي اسمها راوية ..."وراتها " يااه زويينة حتى يوسف زوين والياس هههه عندو تصاور هبال ههههه ... سارة : حبك كاين تيتيز باينة راجلك مبوگص 😻... يامنة "حدرت راسها بخجل وضحكت "ههه ... زهور : اجي غاتوري جداك سرولك (صباح وهادي عادة مزالة فالبوادي وحتى فالمدن لا نقاش فهادشي كتوريه لامها وكاين الي كتحتافض بيه بينها وبين راجلها ولكن اكثر انتشارا فالبوادي ) ... يامنة "تزنگت تاني " حتى نمشي عندو ماعرفتش حتى نمشي لازرو عاد غانعرف اشنو ندير والى حبكت ميمة ضروري نوريه ليها من بعد ... زهور : الحشمة فلول بينيها ولكن حاولي تحيديها راه راجلك بقاي تحشمي تاتجي شي خانزة ديه ليك ... سارة : دابا تي ازهور محيدة الحشمة ... زهور "شافت فيها بنص عين ووسعت رجليها " : واش نقوليك غير يدخل من الفيرما كانحتي على طاسيلة مو من الكول وندخلو لبيت نسميو الله واراك عطيني ونعطيك مكاين غالله يعطيك صحيحتك حتى كيخرج يلهت مسكين الله يسمح ليا منو .... يامنة وسارة طرطقو بالضحك عليها وخا بعقلها ولكن مع رجلها هبيلة هي وياه .... بقات كتفكر الهضرة الي ضارت بيناتهم وضحك حتى جاها نعاس ونعست مكمشة فبلاصتها ... اصبح يوم جديد على مدينة ازرو الجميلة ذات الجو والمناخ الرااائع والطبيعة الخلابة ...تحية لهاد المدينة وناسها ...اصبح يوم جديد على فيلا عائلة رمسيس ...الجو صابح داير شتاء ثاني ...جو زوين بزااف عاطية فيه ريحة تراب مبلل بقطرات شتاء والندى ...صوت القطارة تاع القهوة كيتسمع وريحتها عاطية فالمطبخ ...كان ديك الليلة رجع صهيب مع يوسف وبات عندهم فالفيلا ...وهو اول من فاق ودخل على مو الكوزينة الي فيها زوج بنات كيعاونوها ...كانت واقف عليهم حتى حست بيه عنقها من لور عينيه منفوخين لابس قميجة كحلة وسروال دجين ...وفوق منها مونطو بيج بقب فيه ريش موقف شعرو بجيل وهاز شكارتو ... صهيب : صباح نور وتيسير اميمتي الغالية ...باس. راسها ... نجود : ولدي الحنين صباح الورد ...كلس تشرب قهيوتك ... صهيب : قادي معاك زوج ها بوسف تابعني ... نجود : ايه على راس والعين ...مال عينيك منفوخين ... صهيب : سهرت انا وياه مع الهضرة ديال هادشي الي واقع وهاد الموصيبة الي تحطينا فيها ... نجود : الحاج عارف صواريه اولدي وهانا هانتا الى مصدق هو الي رابح ... صهيب : ايه يربح هو وحنا نموتو اميمتي حق الله حتى يقتلنا غا سكتي خليني مجمع معاك نشبع من شوفتك ... نجود : الله يمسخك ههه الله يخفض ولدي فؤاد وخا هكاك حنين اولدي ... صهيب : غير معاك اكبيدتي اخويتي الحنينة جوييينة ☺️... تم داخل يوسف وسمع هضرتهم ...باس ليها راسها وصبح عليها ... يوسف : تي را غايجمع الحزاق كامل ويشعل فيه العافية راه من حقو اميمتي متنسايش الغدر بعينيه وشمتة حق ربي الى الي دارها عندو فيها الحق وبنت عمو وهو مباغيش يتزوج كارهو خلوق وببنت صغيرة ااا سكتي هااا سكتي ... نجود : زدتو فيه يهديكم الله ...عيط ل الياس خرج صباح بكري معرفت فين زاد ... يوسف : مشا يحسن عند محسين فدارو … حلفت على مو نفيق لقاه محيد داك الوسخ قريب يشد الماستر ودخلو تسلگيط …لقاه ممساليش ليه ومكاينش اما يحسنو ليه بمحكة الگدام .... صهيب : ههههه ... حطت ليهم فطرو بزوج ...مد صهيب ليوسف الملف الي بغا... يوسف :غانمشي لشركة نجيب دوك الوراق الي اختارعتهم باش يسنيهم ونهبط نجيب باسبوري ...توصلني معاك تنرجعو بزوج ؟ ولا ممساليش ... صهيب : لا نديك نديك ونرجعو بزوج معنديش شي قضية اليوم ونيت بغيت ندوز لشركة نجيبدوك الشكايات الي عندكم ...كملو فطور وناضو استاذنو ..دخلو عند الحاج لقاوه كيقاد فشي وراق ديال الورشة سلمو عليه وتمو خارجين ...حتى تلاقاو ب الياس واخيرا حسن و ولا كي ناس ... يوسف :دابا عاد وليتي بنادم وسير دوش وفطر مع راسك ... الياس : جزاك الله خيرا اخي ...غادين لمصيركم ولا مزال ؟ يوسف : غادين لخلا عشتك تانتا معانا اخويتي فالمعركة 😊... الياس : مالي انا تنجي لرمسيس شي حاجة ؟؟ انا غا معروض لعرس غاناكل غا مع دراري صغار ولا عطيوني سيرو دنعاس ولوحو مي فشي بيت معاهم 🌚... سداتي سادتي اعزائي المسافرين المتوجهين الى مطار فنوكوفا موسكو ...ربط الاحزمة ستهبط طائرة الخطوط الملكية المغربية على الاراضي الروسية ...شكرا ... فور ماسمع ربط الحزام وعدد دقات قلبو كتسارع بزاف كيحس براسو قرب لمصير موتو هههه وناااااري والى ساق الخبار وحمروه ( ردوه حمار وسطهم ) نااااري مجرد مكيفكر فيها تتجيه البكية هههه ....حطت الطيارة الرحال فالمطار ...خرج وقام بروتين الاجراءات حتى خرج كان مقطع درجة رجال الاعمال ...خرج من المطار لابس مونطو كحل فيه ريش ومقطن من لداخل والقب فيه ريش وتحت منو قبية كحلة بالقب مبطنة بزاف وسروالها فنفس اللون كحل وسبرديلا ايرماكس ...لاوي عليه كاشكول ديال الخايط بحكم الجو مثلج بزااف تما لقا فاستقبالو شيفور خوه ومعاه زوج بوديكارد ...ابتاسم ليهم وطلع فسيارة الي كانت من نوع هامر ايتش hammer 2018 كلها كحلة وزاج فيمي مكيبينش ...زاد بيه مسافة حتى دخلو لواحد البيست كتدي لغابة ... دنيا مثلجة بزااف ...بقاو غادين مسااافة نيت جبدة ... حتى وصلو لقدام واحد الفيرما صغيرة شوي فيها دار لداخل فيلا صغيرة بطابقين وقدامها جردة كبيرة وفجناب الفيلا كاين شجر وربيع جردة كبيرة وعامرة وجنابها ضايرين بولات مزينينها باليل كيشعلو ...ضاير بيها واحد العدد قليل من البوديكارد تحت طلب ديالو هو وكون جات عليه ميبغيهمش معندوش مناش يخاف الخوف اخر همو .... دخلت سيارة من بعد ما حل ليهم العساس الباب ودخلو ....ترجل يوسف من سيارة هاز صاكادو ورا ضهرو ...هز عينيه لفوق قشعو كالس فالبالكون ...قاد قبيتو وسروالو الي تعنكشو ...حلو ليه الباب ديال لداخل.... لقا فاستقبالو واحد من الي خدامين تما .... القى عليه تحية وسلم عليه .... يوسف "كيهضر بروسية غير دفيش فكل مرة كيجي عندو " : فؤاد... هو : طلع عندو لفوق كيتسناك فبيتو ... ابتاسم ليه ...حيد المونطو عطاه ليه يعلقو بحكم الفيلا من لداخل سخونة بزاف ...حنحن وحدر راسو وطلع نيشان لعندو ...دق الباب سمع تحنحينتو زعما باش يدخل ... شاب في عمر 32 سنة ...ذو هيبة ورجولة طاااغية جدا ...ملامح سمراء عينيه فحال عينين نسر تماااما وكحليييين ....حجبانو ديما معقودين ...قلييييل القلة فين كيضحك ...كالس فوق كرسي مقاد مع البالكون حاضي ثلج كيطيح عاد فايق كيشرب فقهوة كحلة وكيكمي فالگارو ...ومخنزر عاقد حجبانو ...طاوي رجل فوق رجل وفخادو كل فخد قداش ناهيك على دراعو سبحان من صور تلك درعان بديك تورمات الي فيهم بكترت رياضة كتافو عراض وزادو عراضو بيها ...لابس ضوني سماطي فالبيض وشورط كحل قصير … حس بيه …تسناه حتى وقف ليه عند راسو ...هز صبعو وشير ليه باش يجي يعنقو وداكشي الي كان… ضار لعندو وعنقو عناق حاار ... يوسف "قرب يموت ههه " خوووياا توحشتك ... فؤاد "ابتسامة بالكاد كتبان " : الامور مزيانة ؟ يوسف : كلشي هاني ... فؤاد "رجع عقد حجبانو كالمعتاد " الوليد ؟ يوسف : مزياان تاهو ... فؤاد : الياس ؟ يوسف : حتى هو مزيان وراه جامع راسو غير تهنى و راوية مكتساليش من القراية غاديا مزيان تهنا عليهم ... فؤاد "عض فشفايفو "مزياان ... كيدازت طريق ؟ يوسف : امم بيخير .... هز ايديه ...وشير بصباعو ...ارا دوك الوراق نشوفهم ... يوسف "مااات " اشمن وراق ؟ فؤاد: "هز فيه عينيه فحال تخنزيرة وهي غير نضرة عادية عندو اما تخنزيرة فهي تطبيق عندو ...اشنو مغانشوفش علاش غانسني ؟ ... يوسف"تلفت ليه الهضرة مبقاش عرف اش نطق " : وااامي 😳 خيبة أمل عندما تحلم أحلام وتعلق عليها آمالك لتصل إلى حلمك وأنت تترقب ساعة الأجل. خيبة أمل عندما تخسر ثقة الناس بك لتحاول جاهداً بكل الوسائل أن تعيدها وعندما تعود تفقد ثقتك بنفسك. خيبة أمل عندما تشعر بأنّك قادر على أن تكون زعيم قبيلة وتثابر للوصول لتتزعم أخيراً قبيلة دون شعب. كان متوقع انه يعطيه الوراق ويسني عليهم بعينيه مغمضين لان من طبعو دييما كيجيب ليه الوراق ولا فاش كيجي كيسني على وراق الي يوسف معندوش صلاحية عليهم وخا بالوكالة ...بحيث كيكونو وراق مصير مهم او قرار اهم او شي حاجة كبيرة ...كيضطر ساخذ رايو او مشورتو فيها ... فقط كيعطيه تلخيص اشنو فيهم وكيسني بلا ميشوف ... هاد المرة وقع العكس تماااما ... يوسف : اشمن وراق ؟ فؤاد "هز فيه عينيه بنضرة نارية والي هي نضرتو طبيعية ديال ديما واحد اخور غادي تخلعو " : شنو مغاديش نشوف هاد الوراق الي غانسني عليهم ؟ يوسف : ها اااه احم ايه واخا ...يلاه بغا يضور باش يجبدهم ليه من صاكادو ديالو ووجهو ولا صفر فمو كيترعد ...ليس بالخوف او وانما الي مخليه فهاد توتر وهو انه مرضاش يدير لخوه هاكا ويحطو فهاد الموقف ...غايحس براسو اكبر حمار وقدرو يلعبو عليه وكلشي من باهم ...لو ان الامور تحل بعدك طرق مكانوش وصلو لهاد المواصل ولكن شنو السبب الي دفع الحاج رمسيس يدير هاد تصرف اشنو واقع من غير انه بغا يقاد ولدو الي دخل لواحد طريق صعيبة وخايبة ....فؤاد كان من اعز الولاد عند الحاج وكان فرحتو لولة .... يوسف "كيحل فصكادو وكيتعطل باغي يعيش واخا غير قسمين ديال لمگانة ههههع " حتى ... فؤاد "ناض كيشوف قدامو ونطق " غير خليهم ...تمشا وتخطاه ..."هضر بشوي وهو غادي عاطيه بضهر ....بصوت خشن خفييف مترجل "تبعني نفطرو لتحت ...مشا خرج من البيت ... يوسف "بالفرحة غاتزادو واحد ساعتين من عمرو " واخااا ...سد صاكادو ...يلاه بغا يخرج حتى صونا ليه تيليفون كان صهيب ... يوسف : اش كااااين فرعتي ليا ك*** بالتعياط الحبس 😡 صهيب : هاناري غير بغينا نشوفوك واش وصلتي ياك لباس ... الياس "لاصق لصهيب عند وجهو " : سولو اش دار ... صهيب "ضار جيهة الياس " : ديلمك را حلاقمي دخلتي ليهم تا كحز يعطيك الحبس خليني نهضر معاه ... يوسف "رجع خماس بالغوات خاف لايسمعو خوه ولا شي حاجة والدرب مكيطمنش " : يااالو ....ياااه ااه وصلت …فؤاد بيييخير هاهو نبلغو سلامكم ان شاء الله انا هابط نفطر معاه ... صيهب : هنن ؟؟ الياس : مالو رجع كي الخماس فسوق الخميس ؟ يوسف : ايييه الو ايييه مشا ريزو وقيلة ايه سلم على الوليد انا مشيت ..."هضر بشوييي" ومتهضروش معايا يغرق لبوكم شقف الحبس مالكم مالكم تفو ....قطع عليهم خلاهم غير يبرقو ... صهيب : والله يخرج سربيسك على خير ...ناري الكلابي قطع ..."ضار جيهة الياس " معرفت مال خوك ؟ الياس : ههههههه زعزع ليه الكارط مير ههههههه كان الساعة تشير لثامنة صباحا بتوقيت المغرب وبالبط المكان بمنطقة البادية عند عائلة يامنة ... كالسين كيفطرو قدام ديك الطويبلة صغيرة ديالتهم الي موالفين كيفطرو عليها ديما ...هاد المرة داخلين البيت بحكم كان لجو مشتي وقطرات شتاء الباردة والبرد البارد ونقي كاين وريحة تراب عاطية ...كيفطرو وحاطين حداهم مجمر زاند دايرين فيه جلفة ديال الحامض باش ميضرهمش راسهم ....وحاطين صينية ديال اتا وجنبها بريق طويل ديال القهوة كحلة معطرة بحبات الهيل وبديانة واعواد القرفة وسكينجبير وخودنجال ...هاد العطور كيتقداهم شخصيا اب يامنة من سوق ...وطبيسيل صغير فيه زيتون اسود مصاوب فدار منسم بزعتر وزيت زيتون واخر بالهريسة وثوم والربيع مقطع والكامون وشوية تحميرة ...وطبسيل من زيت زيتون لمنطقة وبطبوط عاد سخون من ايدياتها ... مصطفى : السيمانة جايا الا زينة جاي خويا ودراري ... يامنة "حدرت راسها بالخجل " ... زينة "شربت جغمة من اتاي ": ايييه مرحبا بالي جا وجاب ...مولاي سلطان مجايش ... مصطفى : مولاي سلطان على مقاليا الحاج عبد العالي ميصيبش مزير مع شغال ...مشا يوسف يجيب من عندو الوكالة ... زينة : وزواج بالوكالة ماهو زواج اولدي ويني الغايب حجتو معاه ...يصير خير اولدي ... مصطفى : والحاج الي عليه العمدة راه جا ومنردهاش فوجه خويا العزيز الميمة ...يسالي امورو غايجي تالعندك ... زينة "كتهضر بالحكمة " واش نقوليك الي مجا بمحبة ميجي بحزارة ... مصطفى : المعنى... زينة : تاايجي على خاطر خاطرو والى مهزاتو براكتنا تهزو عينيا غير على انه راجل بنيتي راه من دمك ولحمك ومرحبا بعزيزك والغالي ديالك ... مصطفى : القلب الكبير امي زينة القلب الكبير ... يامنة غير كتسمع وهي مزنگة كثير شي ملي كيهضرو عليه ...قلبها كيبدا يضرب بجهد ... زينة : وليني اولدي الى جاو شكون غايجي بعدا ... مصطفى : الخطبة غايجي هو ويوسف والياس ولالة نجود الي ربات ليه دراري والبنت قاليا فالشك ... زينة : مرحبااا... هضر مع عباس يسلفنا دويرة نسيبو الي فطاليان ينقيوها دريات فين ينزلو راه مغايقدهمش هنا ... مصطفى : هضاارت معاه وعطاني ساروت كلشي ناضي ... زينة : صلاة عالنبي الله يكمل بالخير ... مصطفى : امين ..."شاف فيامنة " بنتي خاصاك شي حاجة فلوس متقداي شنو خاصك .. يامنة "ابتاسمت ليه " لا ابا هاد ساعة مخاصني والو ... مصطفى : غايجيك فالخطبة حوايج من هاد ناحية متهزي هم والي خاصاتك غانزيدوها ضروري ابنتي ... يامنة / وااخا ابا ... ناض مصطفى استاذن منهم وخرج لشغالو ...وبقات يامنة هي وجداها ...حتى دخلو عندها بنات جيرانهم وشي عيالات واقفين معاهم من الي تخطبات يامنة كيوجدو معاهم تحضيرات الصدقة والرواح ... نزهة : الالة زينة غاديرو غير صدقة ؟ ضروري البنات يلعبو لا ؟ زينة : ضروري وايه عرس الفجلة هذا ... رجعو العيالات عندهم ثاني كل معاونة فجيه ...هذا حال البادية باقين فمنطقة يامنة على تقاليد القديمة وهي توجاد العرس وسط الاهل والاحباب والجيران ولكن بحكم ان يامنة فمنطقتهم معندها غير باها وجداها فالجيران الي تربات وسطهم وعلى ايدهم هما سندها واهلها فهاد اللحضة ... يامنة : ميمة انا غانمشي نرعى البهيمات معندهم مياكلو ... زهور : تي كلسي لارض مبقا ليك خروج فالشمش سيري ديري خميرة بلدية مع العكر الفاسي الي عندك والحمض لرجليك وديري عليهم تقاشر ... يامنة : حتى نرجع عفاك غانتوحشهم وغانتوحش معيزتي 😿... زينة : غا خليها تمشي دير مبغات مغاتبقاش ديرو خليها تسرحهم تحيد منهم الوحش ... زهور : سارة سيري معاها ومتخليهاش تبقى فشمش ...ومتعطلوش غا فجناب هنا ... زينة : سيري الله يرضي عليك ابنتي ... سارة "جاوبت قبل متبدا تعطي فيها بالمعيور ههه " : ايه يالاه ...ناضت يامنة وسارة خرجو باش يرعاو البهيمات ...بعدو شوي على دار حتى وصلو لواحد الفدان ( ارض مزروعة ) وطلقوهم ... سارة "كتشير ليها لواحد شجرة " : يامنة هذاك الولد صلاح ولد الورديغي شوفي فين واقف ... يامنة "ضورت عينيها وقشعاتو واقف متكي عالشجرة وحاضيها من بعيد ...عينيه مغرغرين كيحس بحزن كبيييير ...يقدر بغاها من قبل يقدر اول مرة شافها وعجباتو بزاف وشاف فيها المراة ديال احلامو ودارو ولكن حتى واحد فينا مكيدي الحاجة الي بغاها بقلبو بسهولة كل وكيف مكتب ليه الله ومقسمو ليه " .... سارة : اشنو باغي هذا ؟ يلاه نرجعو فحالنا تنجيبو لبيهمات الفصة ... يامنة : يلاه ...مشات سارة كتجمع في البهايم بالعصا ديال مزلاط ...هنا استغل الفرصة ومشا كيخطوي بسرعة لعندها ... صلاح : يامنة ... يامنة "كضور بجنابها وكتهضر وعينيها لتحت مباغاش تشوف فيه من خوفها لا يحصلها شي حد وهو مقراش ليها الحساب وخا ولد الدوار " ...بعد عفاك بعد غاتخزج عليا اخويا ... صلاح : يامنة مبغيت والو غير نقوليك الله يكمل عليك بالخير ...انا كنت تمنيت تكوني حلالي ولكن مكتابش انا جيت غير نشوفك ونتوادع معاك حيث قريب يخرجو ليا لوراق سيمانة جايا رسل ليا خويا ورقة من اسبانيا ودفعتها لمالين ترجمة وعطاوني موعد .... يامنة : اه مزيان الله يسر ليك اخويا ...بغا يهضر وهي تمشي كتجري ناحية سارة خشات ليها ايدها فدراعها ودفعو البهايم غادين وكياكلو حتى مشاو .... احيانا كنبغيو الحاجة كيضرنا خاطرنا بزاف اننا بغيناها ومكتابتش لينا شي مرات حتى كنبغيو نعصاو الله وكنحطو عليه هو السبب فالي جرا لينا ولكن مع مرور الايام والزمن وتوالي الاحداث كتخلينا نفكرو ان لكل قدر قدرو علينا الله سبحانه كان فيه حكمة باالغة ونقطة تحول لواحد الحياة او روتين جديد ... تمت راجعة يامنة وسارة وتلاقاو بشي رباعة ديال البنات واي عروسة طبعا لا تخلو من حاسديها وخا غير بضحك المهم ضروري حشيان الهضرة ...نقزت وحدة منهم دوات بجهد ... وااااااا يامنااااو ...وتي مبارك مدرتي ... يامنة : الله يبارك فيكم العقبة ليكم .... هي : وسعدنا ماهو كي سعدك فين لقاو فحال سعدك ... يامنة : الله يعطيكم حسن من سعدي البنات هههه سارة. : لعفوووو كي شتوها كي تخليوها خمسة وخمامس والحرمل فالكمامس ....نبيلة نعلي شيطان مكتوبيش ... نبيلة : ومضنيناها فيامنة هاد سعد كامل سعدااتها رجال يتجاراو عليها منهم صلاح ولد الورديغي ... يامنة "برد ليها الما فركابي خافت لا يحساب ليهم بينها وبينو شي حاجة .." سارة : مالو قرب ليك الصگعة 😱... نبيلة : الله ينجيييني ... يامنة : اييوا مكاتيب اختي نبيلة الله يفرحك ويرزقك سيد رجال ... سارة : داكشي بالمكتاب وموحااال يجيب ليك الله مكتاب يامنة عرفتي علاش ؟ ...جرت يامنة وساقت البهايم وضارت عندهم ...حيث لالاهم لالاهم وفكلشي فايتاهم زين وهمة وعقل ...هاكا ديما لسما رافعة راسها هاكا ديييما جايبة لعز لناااسها ... شافت فيها ...نبيلة يااه عاد بانو عينيك ملي خنزرتي المغيمضة ....الله يفرحكم البنات تهلااو ...خلات نبيلة دايرة ايدها على جنبها وكتشوف فيها بتخنزيرة الي عاد بانو عينيها فيها بالكشيفة هههه ... فالجيهة لاخرا من فيلا مدينة ازرو فيلا رمسيس الاب الحاج الي خرج قرار مصيري لكلا الاطراف ماشي حتى الطرفين ...ممكن تغير حالة العائلة لاحسن او الاسوء ...تواحد معارف اشنو مخبي المستقبل ...اشنو غايكون ردة فعل واحد شخص الي هو الضحية الكبرى فهادشي كامل رغم صغر سنو الا ان هاد زواج ممكن يدمر ليه حياتو ممكن يزيدو مسؤلية اكبر من المسؤلية الي كان واخذ قبل ميجي لهاد العائلة ... في المكتب ديالو كالس على كرشيه شاد ستيلو وكيكتب ف تقارير بعض مشترايات الورشة ديال نجارة الي مشهور بيها الحاج رمسيس فديك المنطقة ...حتى دق الباب ودخلت عليه نجود ... الحاج : الحاجة دخلي ... نجود : سي الحاج "حطت ليه القهوة ديالو من بعد ما فطر " ها قهوتك الحاج ... الحاج : الله يكثر خيرك الحاجة ...كلست فالكرسي الي مقابل معاه ...دراري فطرو ... نجود : فطرو وخرجو بزوج ... الحاج : مزيان ... نجود : الحاج الى عرف ... الحاج : الى عرف فا انا الي غانقولها ليه ... نجود : لو مدرتيش ليه هاكا ... الحاج : عارفاه غايدير مية طريقة وطريقة باش ميتزوجش علاه مالي انا مجبدتش ليه موضوع زواج ؟ نجود : معارفش بالي بنت عمو ؟ الحاج : لا ومبغيتش نقوليه انا عاطي لعهد لخويا وهو كذلك عاطين العهد بيناتنا منقدرش نطيح بكلمتي ... نجود : الى عرف يقدر يطلقها ... الحاج : من هنا لديك الوقت لكل حادث حديث ...الحاجة نجود راه ولا راجل 32 عام خاص يقتح طريق لخوتو ...طريق الي مشا فيها خايبة بزاف ...راه ولدي ومعندي كيندير ليه مبغيتش نسخط عليه ومبغيتش نتفرق عليه راه كبدتي الحاجة ...دخل لديك طريق صعيب يرجع منها ماعليا غير بصبر ونطلب ربي ينجيه من كل شر .... نجود : والى تزوج غايعرف بالي عندو مسؤلية ويدير بحسابها ويقدر يتهرس طبعو الصعيب وكثير شي لا ولاو عندو دراري ؟ الحاج : واكثر ... نجود : واشنو الي ضمن ليك فؤاد غايقبل ؟ الحاج : عارف اش غاندير الحاجة ....نزلت دمعة من عينيه خانتو ...ولدي دخل لديك طريق مبقا يقدر يخرج منها ... بزاف ديال ناس ولادهم كيمشيو لبرا باش يضمنو حياة زوينة ومعيشة الي كيحلمو بيها حتى كيتصيدو فطريق الحرام وخايبة وكيضطرو الوليدين يتقبلو طريقهم مقابل يبقاو ولادهم عايشين ويعيشو كيف بغاو ...حتى واحد ملقاها كيف بغاها ...فهاد الدنيا .... على مائدة الفطور ديال صباح ...عامرة بما لذ وطاب ...بعض ما تشتهي الانفس ليس بكل ما تشتهي لانه الى جينا نحطو كاع الي تشهاه خاطرنا مغاديش تقدنا طابلة ...محطوط فيها فطور بلدي على حقو وطريقو فطور مغربي مئة بالمئة ...الفطور الي كيعجبو هو شخصيا وعارفينو شنو كيبغي وشنو مكيبغيش بدون نقاش ...ماشيين على سيستيم ديالو هو وشخصيتو هو ....محطوط كاس ديال القهوة كحلة بزااف وبدون سكر ...شاد صحيفة كسقرا فيها وعينيه منيرين نضرات عندو ديال نسر ...عاقد حجبانو ...قليل الكلام ...شخصيتو طاغية بزاف بلا ميهضر .... يوسف "جاي ولحق عليه من الفوق " : سلمو عليك الياس وصهيب ... فؤاد "شاف فيه حرك راسو بشوييي زعما مزيان " ....كلس يوسف كب ليه كاس قهوة كحلة حتى هو ... حط فؤاد الجريدة وهز صباعو بزوج حطهم على فمو متكي عليهم ...هز فيه عينيه نطق ورجع حدرهم كيشرب فالقهوة ...الياس يجمع راسو سمعتيني ... يوسف "صدمو " علاش مالو ... فؤاد "شاف فيه " : غير وصيتك ... يوسف : ايه وخا كون هاني ... فؤاد : مزيان ...رجع شرب كاسو ديال القهوة وهز باكية الگارو هز منها سيجارة حطها في فمو وشعل بالبريكة ...جبد منها ونفخ ...كيشوف قدامو ...مبغيتش نعرف عليه مشاكيل ...تفاهمنا .. يوسف : كون هاني خويا ... فؤاد : تهلى فالوليد .. يوسف : على راس والعين ... فؤاد "ناض وقف " سالي فطورك براحتك وتبعني المكتب جيب دوك الوراق نشوفهم وعطيني تقرير ...قبل مينطق يوسف ...مشا طلع لفوق ...معرفوش يوسف واش غايبدل حوايجو ولا يهضر فتيليفون ولا يشوف شي حاجة ويرجع ...رجع يفطر ويفكر اشنو يقوليه ...هبط معاه صاكادو ديالو ...حط الكاس ديال القهوة .... حك وجهو بايديه وشعر راسو وهو كيفكر اش يدير ...مشا لصاكادو جبد الملف ومشا لجيهة ممر المكتب حل الباب ودخل كلس فالمكتب وخا عارفو مزال مهبطش دخل يتسناه ...هو الوحيد الي كيدخل اما ممنوع على مخلوق كان يدخل لمكتب من غير يوسف والي كينضفوه تحت وصاية الرجل الي مسؤول تما .... واحد نص ساعة حتى شم يوسف ريحة رجالية عااطية نوع sauvage و ريحة الگارو الي جاي كيكمي فيه ...حتى دخل لابس قميجة سوداء مطرطقة عليه وصدايفها لفوقانيين محلولين وسروال فصالة فالاسوط وصباط كلاس لمااع ... ...عينيه بنفس نضرة المعتادة ...حتى دخل ومشا نيشان كلس فالمكتب ديالو ... يوسف : هاهما ... فؤاد "عاقد غوباشتو " شنو تقرير ؟ يوسف : واحد السلعة باش نصدروها كيخصنا نخلصو ديوانة ديالها غالية شوي وباش منواجه حتى مشكيل كيخص توقع على "صرط ريقو " هاد الوراق ...وكاين واحد سلعة جايا من كولومبيا ماليها عطاو شروط وهاد شروط انا مقتانع بيهم مزيانين ولكن خاص تمضي باش تاكد قراري ونعطيه لمجلس الادارة ...وشي وراق ديال واحد السلعة ديال الوليد ... فؤاد : غايبقاو هنا حتى نرجع ونسنيهم دابا ممساليش ...بقا هنا وصباح رجع ...ساط دخان بزاف وطفا لكارو فطفاية و ناض وقف ووقف حتى يوسف ...ضار جيهتو ...حل صدافي دالكمايم ديال القميجة ومشا قرب ليه هز ايديه ودار وجه يوسف بيناتهم .. فؤاد "كيهضر بملامح باردة وكيشوف فيه بنضرات صارمة " : عندك ثقتي العمية ...خبط ليه حناكو بشوي ..وضار هز مونطو تروا كار لبسو وخرج ... يوسف كلس فوق الكرسي حادر راسو ...حتى سمع صوت طوموبيل خرجت من الفيلا … جبد الفون ودوز الخط لصهيب ... صهيب : اك لباس هل انت في الجنة ام جهنم ... يوسف : شدني الوجع فكرشي اخويا 😐... حال اي عروس فهاد دنيا كتوجد لنهار ديالها بكل فرح واستعداد ...في التقاليد المغربية او بعض المناطق كان زمان كيحضرو لعرس بشهوور وايام قبل وكيف كيقول المثل عرس ليلة تدبيرو عام ....وملي كتبقى شهر او ايام قليلة على الزفة كيتلاقاو الحباب وكيوجدو ليها بضحك ونشاط كل نهار حتى كتعرف القبيلة بالي فلانة بنت فلان راها غاتزوج وهنا كيولي اشهار اما قبل في الفترة الي كيكون فيها تعارف وخطبة يفضل دوز بسرية حتى يتم كلشي بيخير وعلى خير وميكون حتى توابع او عواقب ممكن العين تلعب دور فضهور عرقلات لتوجاد وهادشي علاش الرسول عليه افضل الصلاة والسلام كيقوليك "استعينوا على قضاء حوائجكم بالكتمان فإن كل ذي نعمة محسود" .... تفصلنا ايام قليلة على موعد حضور اهل العريس او كتدقيق عم العروس يامنة واولادو ...والي لحد الان المسالة غامضة عند عائلة رمسيس ديال ازرو ...شكون غايكون بالضبط وشكون الي مغايكونش ؟ واش غاينجح يوسف في نيل مبتغى باه الي لحد الان مفهموش علاش تصرف هاكا مع ولدو وبغا ياخذ معاه الضحية الوحيدة والي ماليها تا ذنب فهادشي كامل غير انها كتعيش ايامها كاي عروس ... سارة : يامنة هاكي هاد الماسك الي صايبت ليك زهور ... يامنة : شنو فيه ؟ سارة : هذا ماسك فيه دوف محكوكة فنص ايترو حليب نيدو فايض وسخون ونص كاس ماء ورد خلطتهم ليك مع غاسول ابيض ودارتهم فهاد القرعة حطيهم فثلاجة كل نهار دخلي طليهم لوجهك وذاتك وخليهم حتى ينشفو وتشللي مزيان وموراها طلي الصقلة ... الصقلة فيها ( معيلقة شبة مطحونة معيلقة نيلة الحرة ومعيلقة حمص مطحون والحنة ومعيلقة عكر الفاسي وصابون البلدي ومعيلقة زيت فليو ) وتشللي ونهار نمشيو لحمام غادي نكسلوك حيث غاتحطي جلدتك كلها .... يامنة : هههه ولكن راه لحمي كيضرني الى كترت الحكان ... سارة : وغير صبري وخا لحمك رطب هادي عادة باش تمشي لعند سي سيد نقية ورطيطبة باش يلقى مايتلمس ويقيص ويعجن ... يامنة : الله يمسخك فين تعلمتي هادشي ..تسمعك ميمة تبدا بيك ثاني ... سارة : لا صافي هاناري اغير من الفيس بوك ..وصافي دابا ديري هادشي بداي من اليوم را باقي غير ربعيام لعرس ونتي بادية بالصقلة مزيان نيت ... يامنة : واخا ... سارة : اجي مواجداش ليه ؟ يامنة : شكون ؟ سارة : سي لعريس مولاي سلطان ؟ ... يامنة "حشمت " م معرفتش بيني وبينك خايفة ... سارة : من اش .. يامنة : خايفة من اول ليلة خايفة لايكون شي واحد كبير ولا واعر ... ويقصحني "حدرت راسها " سارة : فاش خدام ... يامنة : قال ليا عمي فروسيا ولكن خدمتو هنا مقابلها يوسف ... سارة : همم مبقا غير ايام ونتعرفو على هاد ولاد عمك ... يامنة : ان شاء الله ... تضارب الافكار وصراعات فعقلو ...من جهة خوه الي مبغا يسني ليه على هاد الوراق تتجيه العادة شهرية غا بالخلعة والتوثر ومن جهة كيقوليه واحد الراس قولها ليه والي بغا يكون يكون المهم متخبي عليه تاحاجة وكثير شي ملي نطق ليه جملة "ثقتي فيك عمية " خلاتو يرجع يعيد حساباتو ولكن من كيتفكر باه كيرجع ثاني لنص وكيتقهر ...اشنو ناوي باه وعلاش تصرف بهاد طريقة ؟ فؤاد ليه اكثر من عام ونصف موصلش المغرب ...وهادشي كل مرة كيتكرر حتى اصبح كيغيب ويطول الغيبة ... هز الوراق ومشا هز صاكادو وطلع لفوق البيت الي كيجي ليه مرة مرة ...حيد حوايجو ودخل لدوش يدوش بما سخون باش يرخي عضامو من تعب السفر ويرخي ذاتو وعقلو من تعب التفكير وكثرة الضغط والتوثر ...ويحاول يفكر اشنو يدر واشنو يتصرف ...في حالة حصل الورقة ...كمل وخرج نشف راسو وذاتو ومشا هز سورفيت مبطنة جديدة فالگري والاسود ولبس تقاشر... خلا شعرو مخربق بالما … خشا رجليه فبانطوفة ومشا هز الملف... نيشان الورقة ديال موت الحزاق كامل الي خلاها هو هههه ...هبط عينيه ولكن هنا كانت المفاجئة ...مشا هز الفون وعيط ليه .... يوسف : الوليد لباس عليك ... الحاج : يوسف ولدي وصلتي بيخير ... يوسف : وصلت صباح عاد ارتاحيت الحاج "بعد تردد ضغط على قلبو وسول عليه " : لباس عليه ؟ يوسف : لباس عليه سولني عليك وصاني نتهلى فيك ... الحاج : الله يرضي عليك اولدي رد بالك نتا سير غير فاشنو وصيتك وخلي الباقي عليا ... يوسف : علاش درتي اسمك فالوكالة ...امتى بدلها ليك صهيب ؟ الحاج : غادي نضلمك معايا اكثر اللهم خليني انا نتوكل عليه ... يوسف : الى عرف الوليد غادي يتفرق منها بسهولة وخاصة الى كانو عندو شهود بالي مفراسوش ... الحاج : مغادي يدير والو ...خليني انا نتواجه معاه ... يوسف : الوليد مع احترامي ليك هادشي ممسلكش غادي ضلم معاك حتى ديك بنت الناس ... الحاج : يوسف الله يرضي عليك اخر مرة نسمعك عاودتي هاد الهضرة غادي نتقلق منك بزااف ...كاع الوسائل سالاو ليا معاه هادي الطريقة الوحيدة وزايدون عاطي الوعد لخويا متحطونيش بوجهي من هنا لفاش يعرف لكل حادث حديث ...خوك مراتو هي بنت عمو وسدينا .. يوسف : الي بغيتي الحاج الي بغيتي ... الحاج : مضى عليها ولا مزال ... يوسف : حتى ل عشية يجي يسنيهم ....عمرو فحياتو قرا شي ورقة حتى لهاد النهار ...المهم. ا راني باقي شاد نوبة عند عزرين الحاج قربات نوبتي متخممش ...الله المعين ... حتى واحد فينا معندو خيار يعيش الحياة الي بغا ...كاين الي تفرض عليه يعيش حياة الدل والمهانة وكاين الي عايش حياة العز والكرامة وكاين الي عايش الرفاهية بدون ضمير وراحة البال وكاين الي عايش على قد الحال ومرتاح البال ...كل فين تيسرت ليه وتسرحت ليه ...وكاين الي عايش فواحد المستنقع ديال دياب الداخل مفقود والخارج مولود ...مستنقع اسود فاسود مافيهش ياما ارحميني فيه الغالب هو المعلم والمغلوب هو الميت ... في واحد من اكبر النوادي الليلية الخااااصة جدا كيدخل ليها غير رووس الكبيرة ومكيدخلش ليها من مكان ...الي حفات ليه جرية يفكر يدخل لتما الى خرج غير جي عكر ليا باش مابغيتي ...هاد المكان خاص بزاف او هاد النادي الليلي ...فيه كيسهرو اغلب تجار المخدرات الي معروفين لناس ومكيشدوهمش البوليس… القادرين على الخروج منها فحال شعرة من العجين وفيه تجار الاسلحة و الخ ...من الممنوعات والمحرمات ...كل وفاش مختص في المجال ديالو...ولكن القاسم المشترك بيناتهم وهو #المافيا .... في واحد من الجلسات الخاصة واحد الزاوية فيها فوطويات كباار جات معزولة ...جالسين فيها ثلاثة رجال وزوج بنات ... جالس في فوطوي وحدو ...شاد كارو فايديه وكالس مسرح رجليه كيكمي وقدامو طبلة فيها قرعة ديال الويسكي وفجناب ديالو انواع القطعة ...زيتون مخللات وفواكه جافة ...هز كاس شرب منو وحطو وجر جرة طويييييييلة من السيجارة ونفخها وعينيه مكيرمشوش كيشوف قدامو وكيحك فلحيتو بصبعو ديال سبابة ... نقز واحد من هادوك الي جالسين معاه ...روسي الجنسية ... ايمانوييل : علاش قتلتيه ؟ فؤاد "الصمت كيشرب وكيكمي مجاوبوش كيشوف غير قدامو " ايمانوييل : علاااش قتلتيه ؟ باشمن حق ؟ كان ممكن تسولو وبلا هاد التصرفات شنو هادشي فؤاد ... فؤاد " كما حتى كما على خاطرو شرب ماتبقى من الكاس ضار شاف فهذاك الي حداه والي كيرافقو اسمو فلاديمير ناض كب ليه كاس وهو مكلفش راسو حتى ينوض حدو كحز شوي جيهة ايمانويل ...خنزر فيه وحط عليه الكارو شااعل طفاه ليه فوق حجرو حتى غوت لربي الي خلقو ...هز صباعو وغرسهم ليه فقرجوطو حتى روحو بغات تخرج .... ايمانويل : قخخح قحخحخ قحخه لا قحخحخخ ...بقا غارسهم فيه حتى قربو عينيه يتغمضو وهو يدفعو بجهد حتى جا طايح ووجهو زرق ...لوخرين ضربو طم فحال المعروضين ههه فؤاد "ساس ايديه ومسحهم بكلينيكس … وهز الكاس سكل عليه وناض جمع الوقفة تبعو فلاديمير… تبعو فلاديمير تاهو يلاه غايمشي حتى تمات جايا واااحد مولاتي الى قلتي عليها قرطااسة راها قرطاسة بمعنى الكلمة ....طبعا الجمال الروسي طاااغي فديك البلاد ...القوق,, التوت ديال بصح ...البياض الناصع العينين زرقين ... ولكن مسمرة جسمها … هي طويلة ولكن طولتها موصلتش لطولة فؤاد داك صنديد ضخم الجثة البارد الطبع الساخن النضرة اعصار الغضب …الي كيطبقو نيشان بلا هضرة وتضياع الوقت فالبلابلا ....فورمتها كاي بنت من داك نوع كتلعب عليها وكتهلى فيها باش تبقى بداك القوام الممشوق ...والمؤخرة البارزة ...شعرها البني دايراه جنب ...فمها او شفايفها مرسومين بالعكر حمر مغلوق ماط عطاهم جمالية ...بشرة صافية ... لقاتو غادي كيلبس فمونطوه حتى وقفت ليه عند وجهو قربت ليه بزاااف حتى بغات تلاصق معاه ...يلاه بغات تبوسو فشفايفو وهو يبعد وتخطاها غادي مخنزر وعاقد غوباشتو مزير على سنانو بالعصبية من هذاك خينا حتى وقفاتو بصوتها .... هي : فين غادي ؟ انا عاد جيت ... مجاوبهاش تم غادي وهي تجنن ...كتمووووت عليه مووت فؤاد شي حاجة مقدسة بالنسبة ليها ...مشات كتجري كانت لابسة كسوة كحلة بصماطي وصباط طالون ذهبي ... وصلت حتى لعندو ومشات ليه قدام وجهو ثاني ...هييي عطييني وقت علاش كتجاهلني ... فلاديمير : ايشا "غمزها وشير ليها براسو بمعنى سيري حسن ليك " ... ايشا "حطت ايدها على كتفو دفعاتو بشوي منو وغييير حطتها ماعرفتش كيفاش وقع حتى لقات راسها ايدها تولات ليها حتى تسمعت طرطيقة ديال دراعها " : اااااااااااااااااااااااااااي اهى اهى .... شدها من فكها وضغط عليه حتى زادو نزلو دموعها ...كتحس غير بانفاسو سخووونة على وجهها اما هي عينيها مغمضين من حر الالم ... دفعها حتى تلاحت لارض تخطاها عينيه حمرين معصب بزاااف ...مناش تعصب هو الي عارف وزاد جننو لاخور الي كان غايقتلو لولا لطف الله وتحكم فراسو ....خرج هو وهي بقات تغوت وتبكي بحر الالم ديال ايدها الي طرطقها ليها ...هبط لعندها فلاديمير ... فلاديمير : قلت ليك راه عدوه ضصارة عدوووه ضصارة بقيتي حتى جبتيها فعضامك ا انسة ايشا ايفانوفا ..."هز راسو" ...هزوها ديوها ل بالنيتسا "المستشفى" ... مشا لسيارة ديالو وركب فيها ...خلا فلاديمير فسيارتو وصى على الي يتبعو حيث دعوة مكتعجبش فهاد الفترة بينو وبعض الاشخاص شي مشاحنات ...ورك عالكسيراتور وزاد طار حتى تهزت طوموبيل وخلاو روايد بلاصة لحموم ... فلاديمير هز الفون وتاصل بواحد الشخص ...الو ...ايلاف ... ايلاف : رد ليه البال راه تصرفاتو غايجبوها ليه فراسو ... فلاديمير : معصب هاد الايام مبقاش كيتحكم فتصرفاتو بزاف ... ايلاف : الي عليك ترد ليه البال هو مننا وفينا عارفو مكيخافش ولكن راه كيبقى عضو معانا وروس الكبار عزيز عليهم مغايبغيوش واحد فخدمتو عندنا توقع ليه شي حاجة ...حتى نساليو شغل الي فكولومبيا ونجي لعندو ... فلاديمير : وخا سي ايلاف كون هاني ...قطع معاه ... هو بقا مكسيري وغادي مسافة طويلة شوي حتى دخل لبيست المؤدي لدارو ...سمع العساس صوت السيارة عرفو هو حل ليه قبل ميوصل ...بقا غادي حتى دخل نيشان لداخل ... دخل لدار ...حيد المونطو ولاحو وهو يوقف فالنص ...عينيه حمرييين بكترة ماكما فداك الگارو والشراب ...غوت غوتة وحدة بسمية يوسف الي فشلو ليه ركابي ...يحساب ليه كشفو ... يوسف : ااااايما الحبيبة شكون قالها ليه ؟؟ ماعرف باش تبلى مشا كيجري هبط لعندو قبل ميزيد تعييطة الثانية ويصدق طالع لعندو موريه الشمس ف مالاوي ... يوسف "هبط لعندو لقاه واقف صدرو منفوخ عينيه منيرين " : نعام خويا ... فؤاد "شاف فيه " جيب الوراق نسنيهم ليك صباح قبل ميطلع نهار تكون شاد طريق لمغريب ...قاليه هاد الهضرة ومشا جيهة المكتب ... ضرب ضورة ورجع طلع جاب الملف وهبط كيجري ويولول سمع الفون كيصوني خلاه وهبط لعندو بجرا ...دق ودخل لعندو المكتب ...عطاه الملف ... فؤاد "حجبانو عاقدين حداش وشفايفو كيتورمو حيث ضاغط على سنانو ..شد الملف حلو مشا لستيلو ديالو هزو وبلا ميشوف فالوراق كيهز فيهم غير من لتحت كيسني يسني يسني حتى حبس واحد اللحضة ...هز عينيه نيشان فيوسف مخنزر ... ...شاف فيه ... فؤاد : هادو وراق كثار على الي قلتي ليا ... يوسف : غير حيث وراق ديوانة فيهم بزاف والباقي عادي ووراق السلعة ديال الوليد راك عارف هو معارفش بالي نتا الي مكلف بيها خاصة داك نوع ديال العود كيجيه من البرازيل عارفني غير انا الي مكلف ... فؤاد "كيشوف فيه يشوف حتى حذر راسو وسنا عليهم كاملين جمع الملف سدو بالزربة وعطاه ليه ...كيهضر معاه وعينيه مكيشوفوش فيوسف ..." : دير شنو قلت ليك تفاهمنا ... يوسف : صافي كون هاني ... فؤاد : عندي شي مشاكيل هنا مخاصكش تكون هنا ...رد البال لدار وخوتك والوليد ...مبغيتش نجي لقا المشاكيل فوجهي ...مخلي خوتك على راحتهم ...متخلينيش نضطر ندير كاميرات فالفيلا ولا مراقبة ليكم كلكم ... يوسف : لا لا غير تهنى وايلي ... فؤاد : ورجع حيد داك الوشام من لحمك ...مبغيتش نتفاهم معاك حيث بعقلك ... يوسف "حدر راسو " : واخا ... فؤاد : تصبح على خير ... يوسف : تصبح على خير ...ابتاسم ليه وخرج من المكتب طلع نيشان لفوق البيت حط الملف فصاكادو وحيد القبية الي لابس بقا غير بسروال قطن والفوق عريان ...صونا ليه الفون ثاني ...جاوب مشربن ... يوسف : الله يلعن سلسفيل بات مات مك البغل الكيدار الدحش الكارووش ... صهيب : عنديلمك الحماار ... يوسف : غانرجع صباح نركل طاسيلتك غا صبر ...فرعتي ليا **** خربقتي ليا الكارط مير بتعياط واش لديلمك مالكم كديروها بلعاني ... صهيب : حق ربي حتى غير خفنا عليك يوقع ليك شي مشكيل ...امضرا ... يوسف "عاد سرا معاه راه سلك منها بيخير ...طلعت معاه الباردة ورجع سخف " يااااااااااااخووووياااااو خوووووووياااااو خوياااو ... صهيب : اولدي ... يوسف : ياااااااويلاااااي ويلااااي ويلاااااااي ... صهيب : ابنتي ... يوسف : ههتهتهتهاهتتتت هنتتتتت ... صهيب : اش كاين الخراااا ... يوسف : صلي عالنبي ... صهيب : عليه الصلاة والسلام ... يوسف : بارك ليا سربيسي اللول خرج على خير .... مع توالي الايام والتحضيرات من جيهتهم فرحانيين ومقاداهم فرحة وتوثر العروسة الي غادي تفارق دارهم الي تربات وسطهم ووسط جيرانهم حتى هما ...تربات وسط دوار وشكون ماعزيزاش عليه يامنة بنت مصطفى حفيدة مي زينة القابلة ديال دوار القديمة ... دخل عليهم مصطفى مع داك الصباح عاد جاي من الجامع صلى الفجر وراجع طوالة عاد وصل لدار حتى بان ضو ...لقاهم عاد كالسين كيتسناو فيه باش يفطرو نفس الروتين الي تعودت عليه يامنة هاهي قريب بزاف تودعو ... مصطفى : صباح الخير ... بزوج : صباح الخير ...كلس كبت ليه قهيوتو كيف العادة ...شد الكاس شرب منو وحطو ...هز ايدو حطها فوق كتافها ... مصطفى : بنتي الله يرضي عليك نتي غاتمشي لدار راجلك دارك ودار عمك ابنتي الله يرضي عليك ماشي من لول تحي تشكاي ولا تغضبي فعائلتنا المراة خاصها تكون صبارة وصبارة ماشي جوج كلمات تعيطي ليا ...نتي غاتمشي لدار عمك قبل من كلشي يعني فحالي فحالو والي ضراتك شكي عليه هو ...وصبري لراجلك هو را وخا قوصيح شوي وليني نتي متعصايهش وسمعي ليه .... انا كنعرفك صبارة مكتهزيش العين طبعك بقاي عليه ابنتي وميخصك حتى خير ...ولد عمك منك وفيك ...من الخير وربي غايرزقك براجل من دمك ومكاين ما حسن من خيرنا ...هاد العاهد ابنتي راه قديييم بيني وبين عمك وهو متوارت عندنا فالعائلة ...عمك الله يطول فعمرو تزوج ببنت عمنا نيت غير انا الي سلكت حيث مكانتش عندنا شي بنت العم كلهم كبر مني غير هي الي كانت قدها قد الحاج ...ولدات هاديك البنت صغيرة راوية على كبر شوي هي والياس ... ربي مرزقهاش الولاد حتى دازت خمسطاش ل عام عاد خرجت تولد براجلك وتبعاتو يوسف من بعد عامين… عاد جاو لاخرين من بعد اعوااام تاهما حيث تعطلات فالولاد تاني ...ولكن ربي بغاها قبل متكبر البنت فحجرها ...باش نوريك ان من بعد الصبر صبر صبر كيعطي ربي الفرج ...صبري ابنتي وزيدي فصبرك راه ربي كبييير ...."مسح دمعة من عينيه " وخا غاتخلي علينا دار خاوية ابنتي ولكن هذا المكتاب ...المهم عندي غاتعيشي وسط الخير وهادشي كيتمناه اي بو لبنتو ... يامنة "دموعها دايزين وحادرة عينيها كتسمع ليه حتى ناضت باست ليه ايديه ": واخا ابا كون هاني اهى اهى ...تبعتها زينة حتى هي بدات تبكي وتنوح على فجيلتها ...حتى سكتتها بزز ... مصطفى "ناض كيمسح فدموعو " : مي زينة براكة من البكا عينيك طابو هذا هو المكتاب غذا ولا بعدو غادي تمشي لعند راجلها ... زينة : وشكوون غايقوم بيا وشكووووون غايسخن ليا الما وشكووون غايمد ليا تيمومة ...ياوشكووون غايضحك معايا وينعس ليا عند راسي ...يااا وشكووون غانفيق مع الصباح شكوون ياو شكووون غايعمر عليا دويرتي شكون "دموعها دايزين وعينيها حمرين حتى لونهم الاخضر ولا مشعشع " ...يااا كبدتي ماهي هنا ولا لهيه يااااا كبدتي غادي طول طريق عليا وخاصني ليها جوج كيران وشوف تشوف ...يا ضو عينيا المرضية… قلبي ماهو هاني عليها ..يا فجلتي منعرف ليها غير انا وشكون يهز ليا ونهز ليه هبالو ...يا خلات علينا دويرة سي مصطفى وليدي خلات علينا البراكة ...يا بقاي ياااا بنيتي مقديت على فراقك ...اسي مصطفى قلبي ممهنينيش عليها ... يامنة "كتبكيييي تلاحت عليها معنقاها وكتنخصص معاها ": صافي مغاديش نمشي اهى اهى هاني معاك معااااك اهى اهى ... مصطفى : ههه يهديكم الله راها عند عمها ووسط عائلتها اما حسن من دمها ومنها وفيها ولا البراني يتكرفص عليها ... زينة : البراني كيكون حسن من الي منك وفيك الخير الي تلقاه فالبراني ماهو فالي من دمك ...ابنيييتي وكيما قرب الوقت قلبي كيضرني عليييك افجيلتي ...اربي هاد الفجلة عنداك يخليوها تلوا ويكحال لونها ... مصطفى : الله يهديك ...هههه الحمد لله على كل حال هادي حال دنيا ربي معانا ...كل ورزقو ورزقها مع ولد عمها ...يالاه انا مشيت لسوق مع سي لعاطي وولد ف البيكوب باش نجيبو ديك الضروبة من سوق "الضروبة هي عجلة او عجل او ثور " وغايجيو باش يبنيو الخزانة من اليوم باش كلشي يكون ناضي والكراسا ويقادو جيهة العيالات ...وعيطو لدريات يفرشو دار لاخرا را بعد غذا يكونو هنا ... يامنة "مسحت دموعها وهي وسط حضن جداها " : و واخا ابا ...سلم عليهم وخرج ...واحد شوي حتى جات زهور وسارة ثاني يعاونوهم ...كلسو نيشان قدام طابلة ... زينة : لفعة سيري ديري الما يطيب وعجني مخمار وعجني طرح الملوي والمسمن نتي ويامنة ... سارة : وخا مي زينة ..."مشات تجري دير شنو قالت ليها يلاه بغات تنوض يامنة تبعها وهي تحبسها زينة" ...: كلسي وسمعي من زهور اش غانقولو ليك ...جلسات لارض حداهم … زهور : هانتي فاول ليلة عقلتي اش قلت ليك ياك ...خليه هو يتصرف ...وعنداك من يبان ليك ديالو تغوتي ولا تهربي ... يامنة : اويلي علاش 😟 زهور : ايوى شوف ليك غير دكرناه خافت ماعساك كون شافتو مباشرة ...يا هااه متخافي مدهشي را صعيب فلول وفتالي ايعجبك ... يامنة "مبقاتش فجلة ولات مطيشة كلشي ولا حمر فوجهها " ..اننن زهور : يا مي زينة البنت تزيزنت غير من الهضرة عليه وتي را البنت عقوووبة ... زينة : ههه راها متعرف لداكشي… مزيان من فقهتيها ...بنيتي سمعي اش قالت ليك ...ومن يجي يدخل عليك خزني داك سروال باش نشوفو ونرضى عليك ...ونوضي خودي من عند لفعة ديال سارة الما ديري فيه شيح وتوضاي بيه وسيري لبيت سبقينا هاني تابعاك ... يامنة "مفهمتش ولكن دارت شنو قالت ليها "...من بعد شوية دخلت لبيت وتمت داخلة مي زينة وزهور منعت زهور على سارة باش دخل عليهم سدت البيت وراها شي الي خلا يامنة تخلع ومتفهم والو ... زهور : حيدي سروالك وكيلوطك ونعسي ايامنة .. يامنة : علاش ؟ زينة : ديري اش قالت ليك ...حيدت سروالها وحناكها بغاو يطرطقو حشمانة بزاااف ...جابت ليها زهور ايزار حتى نعسات عاد غطاتها وحيدات الكيلوط ...جابت ليها مخدة دارتها تحت منها وعلات رجليها ...جات زينة هزت ليزار وخا كبرات باقي كتفرز وتشوف ...جابت زهور البيل وشعلت عليها ضو حتى قلبتها ...هزت زينة راسها ... زينة : نوضي الكبيدة الله يرضي عليك ابنتي نوضي الله يفرحك دنيا واخرة ونعم البنات وتربية ...الله يطمن قلبي عليك ...ناضت يامنة لبست ...عرفت بالي قلبوها وخا زينة متاكدة من بنتها ...ولكن زهور كانت ضمن شهود بانها بنت بنوت ...جرتها لعندها باست ليها جبهتها ... زينة : هانتي الولادة لولة ليك انا نولدك ونوقف عليك وخا كبيرة باقي نولد قبيلة ...الى مولدتك انا منسمح ليك هاا ... يامنة : وخاا امي ههه .. على قطرات المطر الخفيييفة جدا ...رائحة التراب المبلل التي تبعث في نفس الانسان الراحة ...الي كتحسي بنقاء الطبيعة فيها والي كتميز بيها هاد المدينة وهي النقاء والجو الي كيعطي راحة وهواء بارد ونقي ...كان الصباح ...الفطور فالكوزينة كيوجد فانتظار ينزل الحاج والدراري الي تصادف ايضا بالي صهيب بايت تما .... كل مرة واش… كيبات تما ولا فبارطما ديالو في فاس ...ولا فالفيلا وحتى هو عندو بيت جنب بيت الام ديالو الي مخلاوهاش دراري تمشي معاه واكثرهم الوحش الي كيولي طفل قدامها وميهزش فيها العين نهااائيا ... الحاج الي كان فالبيت ديالو كيجود القران مع الصباح ...ما تيسر من الذكر الحكيم ...كمل وناض لبس جلابة مليفة غليضة سخونة فالبوردو مخيطة بسفيفة ملكية فالابيض وسروال قندريسي مع تقاشر بيضين وصباط موكاسان فالابيض لون سفيفة ....لبس نضاضر شوف ديالو وهز التسبيح فايديه ودار طاقية فالابيض مطرزة بالبوردو ...حك شوية المسك وسما الله وهبط .... دخل المكتب ديالو فانتظار تعيط ليهم نجود باش يفطرو ويتجمعو دراري ...يلاه كلس حتى دق الباب ودخل كان مع وصلتو جا نيشان من مطار فاس سايس دخل لعندو ديريكت ... يوسف : صباح الخير الوليد ... الحاج "ابتاسم حتى بانو سنانو " : اهلاااان ولدي الحنين على سلامتك ... يوسف " مشا باس ليه ايدو وراسو كيف العادة " : كي وليتي شوية ... الحاج : بييخير الله يرضي عليك ...امتا وصلتي ... يوسف "عبر ليه بايدو " عاد دابا جيت نيشان من المطار ... الحاج : كيفاش ركبتي بكري ... يوسف : ركبت قبل تلاتة صباح فطيارة خاصة رسلني ليها ... الحاج : دغيا رسلك مالو اش كاين ... يوسف : ماعرفتش عندو شي مشاكيل سنا ليا الوراق بالخف ورسلني مغايكونش فموسكو هاد الايام داكشي باش ... الحاج : اممم ..."حك على لحيتو الكثيفة البيضة بالشيب " .. يوسف "بدون نقاش وصل عيااان ميت مسالي سخفان كلشي تلاقا عليه باغي غير ينعس " هاهي الورقة الي عليا درتو ونتا وشطارتك الحاج ...غانمشي نعس عيااان ...مخلاهش يهضر حدر راسو وضار خرج من المكتب مخليه ... يوسف : خليتك نتا وضميرك الحاج ...الله يحضر سلامة وصافي ...تم غادي حتى وصل لدروج وهو يتلاقا بالياس وصهيب عاد نازلين ... صهيب : هايهاي هاي هاي على سي الحاج ...على سلامتك ... يوسف : لا رد ...كيتسنى فيهم يكملو باش يطلع يصهط مفقووووووص ... الياس / خويا امتا وصلتي ... يوسف : عاد وصلت بغيت نمشي نعس ... صهيب : مالك ايوسف ... يوسف : "تنهد " انا اكبر حمار ...خلاهم ومشا طلع ... صهيب : ياه عاد عرفتيها 🙄... نزلو دراري وجا الحاج لحق عليهم ضروص العقل كيبانو ليه ...وسنانو كيبانو مستفين بكترة مكيضحك ومع مركب فم كيبانو بيضين ومستفين ...غير كيضحك وفرحاااان وتقولي معندوش سوق فداك البركان الى فات حتى ناض العافية ومتقدهمش ...تيلعب معاه بالنااار ...كلس كيضحك حطت ليهم نجود الفطور وكلسو يفطرو ...حتى سمعو صوت الهضرة عند الباب ...حتى جات كتجرييي شعرها كيطاير وتضحك ... راوية "عنقت باها من لور " : بابااااااااا ... الحاج : اه اه اه هههههههه اهلان اهلان بنتي الكبيدة على سلامة ... راوية : الله يسلمك ... الياس : اهلاااان سلوم تريسيان ... راوية : تفوو عليك ...مشات لعندو عنقاتو حتى جمعها معاها بصلية تا بان ليها ضو كيضرب ... الياس : يسمح مك گرينك دفلي عليا تيهبط يوسف ابلاتي ... راوية : اسمح ليا هاناري ... سلمت على صهيب تاهو عنقاتو ...صوصو ... صهيب : مك انا على سلامة ... الياس : اقلبي عليا تنوصلها لجهات العليا ... راوية "تخلعت " : الا غاكنضحك معاك والله 😰بابا هضر معاه .... الحاج : والله يالعجل ومتفرق عليها تنتفاهم معاك ... راوية : هههع عجل ...فين يوسف ... تم يوسف هابط من سمعها لابس سروال قطن بيض وتيشرت كحل ...هاني ازوينة هااني ... صهيب "ضار جيهة الياس " تا ياك مشا ينعس ... الياس : باقي شي حد غاينعس هاد الايام خلينا نعيشو ايامنا خليييييييينا ... يوسف : مكاين بو نعاس مجانيش حتى ليل باش نعس نيشان ...ناضت راوية مشات تجري لعندو تلاحت عليه عنقاتو ...خويااااا ... يوسف : عنكش ليها شعرها ...بنتي على سلامتك ... راوية "من بعد ماكلسو فطابلة مجموعين " : ايوى اشنو كاين ؟ مقلتو ليا والو جايبيني… جي فالويكاند ...شنو جاري .. الحاج "تقاد معاها وعاود ليها اشنو كاين ".... راوية : لا رد بقات غير تندغ فالماكلة وتحنزز فباها ... الياس : تا شكون دار ليها پوز هادي ... صهيب : شكون شرط ليها CD يوسف : نغز الخرية توگض معانا ...راااااوية ... راوية : هااا نعاام .. يوسف : داكشي الي كاين وجدي لعندك شي قفطان ولا داكشي الي تتلبسو ... الياس : سلوم تريسيان خاصها ستة ميترو ديال توب ... راوية : ولكن الى عرف ؟ الحاج : حتى نقضيو الغراض ... راوية : وعمي معارفش اشنو غادير والى صدق فؤاد جاي راه هو مكتعرفش امتا كيجي فاي لحضة يكون هنا ... الحاج : لا مجايش غير تهناي ... راوية : ماعرفت ابابا ...انا غاتبقا فيا البنت ...اجي شحال فعمرها ... الحاج : صغر منك بخمس سنين ... راوية : mais nooooon بزاااف باقي صغيرة ... الياس : كيتك البايرة ... صهيب : عههههههه راوية : بزاااف عليك انا راه غانقرا مستقبلي هو لول ماشي فحالك ماشديتي الاجازة غا بزز الكسول ... الياس . : غانوض نضرب حبك تيبان ليك الخدير ...جمعي راسك وحتارميني ... يوسف : اليااااااس راوية جمعو راسكم وكونو تحشمو اش هاد البسالة يلاه فطرو وسدو فامكم 😡... راوية والياس : وخا سمح لينا ... الفرحة ديال العرس كتكون مرة وحدة فالعمر واخا يكون زواج ثاني ثالث ديما فرحة العرس الاول كتكون وحدها ...طبعا لان العروس كتكون اول مرة ليها وخاصة وهي بنت كتكون فرحة مخلطة بتوتر ودقات قلب كتسارع ... كان الصباح ...الجو زوييين مشمس بعد ايام دازت ديال شتا فديك المنطقة ...باقي دنيا مغيسة ...كان اب يامنة واقف قدام باب دار مصايبة ومشطيبة دنيا ومقادة الخزانة او البنية ...واقفين العيالات قدام الباب ويامنة لداخل فبيت باها هي وجداها ....خرجت سارة لعندهم ... مصطفى : هاهما جايين ...بانت ليهم زوج طوموبيلات من نوع كاتكات واخرا رينج روفر داخلين لدوار والدراري صغار تابعينهم كيتجاراو حتى قربو لدار عاد بعدو ... كانو العيالات هازين طبسيل تمر معمر بالكوك ملون نضرا للحالة متسمحش باش يكون لوز ...وابريق ديال البديع فيه الحليب بما زهر بجنبو كيسان ديال البريق ...ومريشات عامرين بما زهر ...غير وصلو وهما يبداو يصليو عالنبي ويزغرتو ...حتى وقفو ...هبط الحاج بجلابة فالمسكي وبلغة صفرة ...ومعاه يوسف بقميجة فالابيض وسروال كحل فصالة وصباط كحل لامع ...وراوية بجلابة ديال مليفة فالبيج مطروزة بالطرز الفاسي وطالقة شعرها وبوط فالمارون ....والطموبيل لاخرا فيها الياس بقميجة كحلة وسروال دجين وسبرديلا …وصهيب بكومبلي فالاسود ...ومعاهم نجود ...الي حتى هي بجلابة جوهرة فالاخضر فاتح بالتحتية ديالها فالابيض ...دايرة شال فلون التحتية مزوق بلون جوهرة سخون ...وكاب على كتافها ... الياس مشا حدا يوسف وصهيب وراوية تستفو كي العزاية ههه ... الياس : احح داك تمر المعمر ... صهيب"ليوسف " : تا ضرب ليا عالزين كاين فهاد البلاد اعشيري يوسف : من الي وعيتي وبلغتي ونتا باغي تخطب هلكتينا فصحتنا بهاد الهضرة ... صهيب : غا باش تسكت الوليدة والوليد ... راوية : واااعر هنا بغيت نشوف المعاز والبهايم 😻... الياس : شوفي غير فالمراية وغادي تشوفيهم ...ايه تهضري نملخ ملتك وسط شي خرية ديال البهايم ودي متعاودي ففرنسا ... الحاج تعانق هو وخوه وهو يتقابل مع ولادو زيدهم سلمو عليه واحد تابع لاخور وحتى نجود ... مصطفى : مرحبا مرحبااا ...عطاوهم الحليب وتمر وبداو كيرشو عليهم من بعيد بالمريشات ...حتى دخلو والعيالات يزغرتو ويصليو عالنبي محمد عليه افضل الصلاة والسلام ...دخلوهم لدار المجاورة الي كبيرة ومصلوحة بحكم مولاها كيعيش فالخاريج كان بالفرحات عليه يسلفها ليهم ونيت يضورو بيها وينقيوها ...دخلو لداخل وكلسو فواحد صالون كبير ومصلوح مزيان بالنقش وصباغة ديال تدلاكت مفنين فزواقها ... حاطين صينيات كباار ديال برارد اتاي وصينيات كبار فيهم المجامع الي هازين نعناع واتاي وسكار ديال القالب ...وطبسيل ديال الفاكية وواحد ديال الحلوة ديال غريبة الكوك والبهلة والفقاص ...وحداهم راجل كيصايب ليهم فاتاي وحداه بوطة صغيرة فوق منها مقراج كبير ديال الما كيطيب لاتاي ... مصطفى : على سلاامتكم ومرحبا بيكم اوليداتي ... الحاج : الله يبارك فيك اخويا ...فينهي بنتي يامنة ... راوية : اه اعمي بغينا نشوفو مرات خويا ... الياس "تيهضر مع صهيب ويوسف بشوي " : غاكتقول هاد الكلبة هاكا تيشدني الوجع فكرشي اخويا ... يوسف : ترجل نعلديلمك روي ستون وهنينا تيدوز كلشي بيخير ... صهيب : فرح ونشط وشطح …"هز راسو لسما "ياااربي يكونو شيخات ياربي ... مصطفى : ايييه هاهي نعيط ليها هي ومي زينة .. الحاج : وخير ماتعمل .... #تمشى بخطوات سريعة كيقرقب بصبطاو فالممر المؤدي لمكتب ديالو ...دق حتى حنحن ليه ودخل ... فلاديمير : نعماس ... فؤاد "هز فيه عينيه مخنزر " : داك صباط لمرة جايا منسمعش صوتو هنا ... فلاديمير : وخا سمح ليا ... فؤاد : الاسبوع جاي وسط سيمانة بضبط مع صباح لفاس نيشان ... فلاديمير : وخا غانمشي نعطي تعليمات دابا ...حدر راسو وخرج من المكتب ... فؤاد "ساط دخان لگارو بزااف وعض فشفايفو كيشوف قدامو بنضراتو شرسة "....
STAI LEGGENDO
قصة يامنة (بدارجة المغربية) مكتملة
Poetryالكاتبة sana mina♥️♥️🌹 لقصة فيها كل مكيعجبكوم او حتا لبطلة مختالفة بزاااف علا لي قريتو بطلة طبعها حشومية او وزينة.... اما بطل شرقي بزاااف يعني تقليدي شوية او مكيضحكش بزاااف غير إبتسامة عكس لبطلة هاد زوج غدين يتزوجو بطريقة غريبة تبعو لقصة او عطيني أ...
