سفوان

الورقة الأولى

/// البارت الثاني  ///

/// ثغور سفوان ///

                 ⌯ ســـــــــــــفـــــوآنـــــــہ ⌯

ارجوان : .. فصول العمر ..

كل شخص بينه لازم يمر بفصول العمر فصل فصل .. ويتعايش وي ضغوطات و تقلبات كل فصل .. اكو بينا يمرو عليه فصول عمره بدون  ميحس و يلكه نفسه الشيب طغى عليه وهو ممفتهم شي من حياته ..

كل شخص بينه يساير حياته سواء عاجبته أو لا و يلكه نفسه بعد طريق طويل انو هو

يضحك .. و يبجي ..  يتالم .. و يتعافى .. يثق .. و ينخذل ..  يصبر .. و يجزع .. يتحمل ..  و يستسلم .. يطيح .. و يكوم .. ومع كل هذول لازم يبقى كدام الناس هو هو ما يتغير ..

طلع فجر اليوم يعلن عن ابتداء ربيع عمري اول فصل من فصول سنواتي ..

محد يكدر يكعدني من النوم واني بنت سعديه هذا الشي ممنوع .. محد يطخ بنات سعديه ولا يتقرب الهن .. لنو ما يريدون مشاكل وي امي و لسانها ..

كعدت وعيني على الساعه .. ب ٨ ومدري شكد الصبح .. بوقتها جنت لابسه بجامه عريضه كلش لون جوزي غامق و بلوزة .. ومجت لبسه شي جواهن ..

صغير و اتملل وبعدني ممتعوده البس شي جوى ملابسي و با الذات وقت النوم ..

شعر قصير و مكفش .. وجه ممغسول .. ملامح ناعسه ..

كمت من دوشكي و عفته مفروش وراي و طلعت من الغرفه ..

واني احس روحي رطبة و مشيتي مو تمام .. مريت بخطواتي بين الممرات بدون اهتمام منو كدامي .. ما احب اكول صباح الخير .. يمكن اخجل انطقها مع انو شكد الها تأثير حلو الصبح
... بس بعد اخجل اكولها الاهلي ..

ناس تحجي و ناس تفتر اتنضف و ناس تاكل ..مثل كل يوم امي مسويتلنه صينية الريوك الي و السوزان لنو اخر ثنين نكعد احنا ..

ردت اكعد مثل كل مرة .. بس شي وكفني .. و قررت اروح للحمامات بل اول ..

دخلت الحمام جدتي صاير بابه عا المطبخ .. سكرت الباب .. و لحضت دم عا الارضيه .. ستغربت و ضليت مركزة على مصدر الدم .. مني

ضليت بس صافنه لا اخذ ولا انطي .. وبدون سابق انذار كمت اصرخ باعلى صوتي .

... ماااااامااااااا .. مااااامااااا

اجاني صوت هناين وهي تضرب على الباب و ادكول

.... شنو رونه بيج شي شبيج تصيحين

... اريد امي بساع بسااع ماااااامااااا

.... كليلي فهميني شبيج

على صوتنه اجت عمتي نوال .. مدت راسها عليه و كالت

...  شبيج خبصتينه شبيج

.... صيحي امي و اطلعي لا ادخللللين لا ادخلينن ولجج يمممه

على صياحي الكل التم يم الباب حتى عمامي اجو ..