#معاناتي
#الكاتبة_ام_مصطفى
الجزء الثاني
زهير
مريم طلبت مني اطلكها لاسراء بس اني رفضت
-ليش اطلكها شصار
-اني حامل بعد ميحتاج
-شنو الي ميحتاج
-اني زوجتها الك ع مود الأطفال وهسة صار عدنا
-وانت هيج عندج الناس لعبة بيدج اني واسراء واهلي واهلج واهلها مفكرتي بينا شتحجي الناس بينة يعني يكولون مريم تمشينه ع مزاجها
هاي وحده والثانية شنو ذنبها كوليلي متخافين الله انت مو البنية يتيمة والله يكول واما اليتيم فلا تقهر
-عفية زهير اني حيل متندمة والله لان زوجتها الك اتسرعت وخربت حياتي بيدي
-شكد كتلج مااريد اطفال خليها ع الله لا تخربين حياتنا بس انت اذن من طين واذن من عجين رحتي خطبتيها الي غصب عني خيرتيني بينج وبين الزواج وانت تعرفين كلش زين اني احبج ومااكدر ارفضلج طلب .
كعدت ع الجرباية وتفرك بيدها
-ادري غلطانه واتسرعت بس نكدر نصلح الغلط
-اني مااصلح الغلط بالغلط مستحيل كطنه واشلعيها من اذنج انو اطلك اسراء انت زوجتي وهي زوجتي انت حامل وهي حامل
-تقارنني بيها
-ايي حالج من حالها وانت الي جبتيها لنفسج
-كول حبيتها
-وليش مااحبها فقيرة وخدومة ويتيمة
-لا تخليني زهير
كامت وكفت لزمتني من قميصي
-تحبها ؟ احجي تحبها صدك ؟
درت وجهي منها ونزلت اديها ودفعتها
-اي احبها ليش مااحبها مو زوجتي
-لا تخبلني زهيييرر كامت تبجي
عفتها وطلعت
جنت حييل مقهور من تصرفها
دخلت للمطبخ اشرب مي من الثلاجة
اسمع صوت شهكة بجي
التفتت
اشوف اسراء تبجي
اجيت يمها
جانت كاعده ع ميز الطعام وخالة راسها ع الميز
اجيت كعدت ع الكرسي وشلت راسها
ب
خليت عيني بعينها
-اسراء ليش تبجين ؟
-زهير راح اطلكني مو عفية اني حبيتكم وحبيت عيشتي وياكم خليني حتى لو خدامة عدكم ولا ترجعني يم نسوان اخوتي والله شبعني ضيم
-منو كال راح اطلكج
-سمعت مريم تكلك طلكها
-ليش اني بكيف مريم امشي
-اني مااريد اسبب مشاكل الكم بس والله حبيتكم
مسحت دموعها
احنة هم حبيناج وغمزت الها
لزمت ايدها بستها لا تبجين ولا تخافين اطلك مريم لو اظطر الامر ومااطلكج
-لا تكول هيج اني مااريد اهجم بيت بنت عمي هي صاحبة فضل علي
اني كل الي اريده اعيش اني والطفل بينكم
لا ترجعوني يم نسوان اخوتي والله شفت الويل وهي تدري بمعاناتي وياهن
هالنوب ارجع مطلقة وطفل بيدي شلون اعيش
كمت وكفت
شتحجين انت اني اطلكج من سابع المستحيل
مريم هي الي زوجتج الي تتحمل بعد
وين رايح
-طالع من البيت
باوعت الها جانت خايفة
تقدمت عليها خليت ايدي ع خدها لا تخافين شبيج
دخلت مريم
جريت ايدي باوعت الها بخزرة وطلعت
-.مريم ..
عافني وطلع باوعت الها بحقد
اخذي ملابسج واطلعي من ألبيت مااريدج بعد هنا سمعتي
-وين اروح مريم مو انت تعرفين ضروفي كلش زين
-مشكلتج هاي ابوس ايدج اطلعي من حياتي اني وزهير اني غلطانة وزوجتج فدوه لا تخربيها اكثر
-اطلع بس وين اروح
-ارجعي يم عصام ومرته
-بس همة ميردوني وحدي هالنوب ارجع حامل ليش هجي تسووين بيه مريم ليش خليتيني احبكم واتعود ع عيشتكم واملتيني بحياة سعيدة وراحة
جان عفتيني متحملة وراضي بعيشتي
ليش زوجتيني لزهير وخليتيني احبة ليش
-لا تجيبين طاري زهير ع السانج زهير حبيبي اني سمعتي
-اذا زهير يكلي اطلع من البيت اطلع
-هيج صارت تهدديني
-بسيطة اني عايفة البيت الج وطالعة بسيطة اله اخلي يشمرج بالشارع
-انت ليش هجي انكلبتي علي ليش صرتي عدوانية وياي اني شسويت الج فهميني
-مسويتي شي بس اني اريد زوجي استرجعة انت عبالج هينة علي واشوفة نايم بحضنج لج جنت اموت الف موته جنت ابقى للصبح ابجي واملخ بروحي
بس جنت ساكته ومتحملة علمود زهير اعرفة يحب الاطفال اكول مااصير انانية واجي ع نفسي
بس هسه صار عندي طفل بعد مااتحمل اسراء فهمتي اني ماعندي عداوة وياج اني زوجي اريد استرجعة منج وانعيش اني وزهير والطفل الجاي حالي حال اي اثنين مزوجين
-انت تردين تمشين كولشي ع مرامج اذا مرة مشيتي الامور مثل ماتردين وضبطة وياج فمو كل مرة تضبط وياج اني هسه زوجتة وحامل وحالي من حالج افهمي مريم اني مطالبة شي منج ولا شكيت ولا معتبرتج ضرة انت اختي وبنت عمي وصديقتي والضروف هي الي جبرتني اتخلى بهيج موقف وياج
-الظاهر ميفيد الحجي وياج
اني طالعة من البيت
...زهير .....
رجعت للبيت ومااريد ادخل ابد بس مااكدر اعوفهم هيج عفتهن يبجن اثنينهن واني واكع بين نارين بين حب حياتي مريم وزوجتي اسراء مااعرف شلون اصرف
بس الي اعرفة مستحيل اطلك وحده منهن
فتحت باب الشقة ودخلت
ذبيت سويج سيارتي ع الميز
وكعدت ع التخم جان البيت هدوء
مااريد ادخل ع غرفة وحدة منهن كلت انام هنا بالصالة
شلت الريمون وكمت اكلب
سمعت باب انفتح
درت وجهي ماانتبهت على منو طلعت
ضليت صافن ع البلازمة واكلب بالقنوات
سمعت صوت اسراء
-زهير اسوسلك عشة
بدون ماالتفت عليها
-لا مااريد
بقت واكفة مامتحركة
-زهيير
-كلت ماتريد سم خلوني انام
-زهير مريم طلعت من البيت
التفتت عليها
-شنووو شوكت طلعت وليش تعاركتوا
-لا بس هي طلبت مني اطلع كتلها مااطلع اله زهير يطلب هو مني بالسانة
عاد كالت اني راح اطلع لو اني لو انت بالبيت
جريت مبايلي من جيبي بسرعة
اتصلت عليها يدك مجاوب
كمت بسرعة اخذت سويج السيارة
صاحت وراي اسراء
- زهير رجع مريم واني اروح لبيت عصام اخوي بس اطلب منك طلب اذا جبت الطفل ربوه انتوا ع الاقل يعيش هو مرتاح بينكم
لان مااريد يتعذب وياي
-انت شتحجين كافي خبلتني
-مريم تحبك وانت تحبها واني مااريد اخرب حياتكم اكثر
-اكولج مااريد اسمع هالحجي سمعتي
اني رايح احلها وي مريم ممنوع الكلج طالعة من البيت سمعتي
لزمتها حييل من ايدها وخزرتها بعيوني وصاك ع سنوني
اسراء سمعتي الي كلته ممنوع اطلعين باب الحوش وهذا الكلام لا تعيديه مرة ثانية لان مستحيل يصير
طلعت من البيت والدنيا طالعة من عيوني
مااعرف شلون راح احلها
اسووق واتصل بمريم ماجاوب
اخخخ مريم خبلتيني تعرفين وين نقطة ضعفي
تدرين بيه احجبج وماتكدر اعيش بدونج
اجتي رسالة منها
-زهير طلكني لان طاقة ماعندي اتحمل اكثر
كتبت الها مريم جايج ومتفاهم
اسمع صووت هورنات ادك علي
رفعت عيني من المبايل
واشوف سيارة كبالي حاولت ابتعد عنها ع الاتجاه الثاني صار بوجهي عمود كهرباء جبيير حاولت الزم بريك مكدرت
حسيت ضربة كلش قوية شالتني وطكتني وصارت الدنيا سودة مجاي اشوف شي وراسي ثكل واسمع اصوات من بعيد
اني يمكن متت
توقعاتكم ماذا سيحصل
