الجزء الثالث ... اخت زوجي
بقلم زهرة الياسمين
ضحكت بصوت عالي وقالت يعني مبتدوريش علي دي ورفعتها قدام عيني وكانت فعلا شهاده ميلادها وكانت الصدمه ........
كانت صدمه لما قرأت الشهاده وفعلا طلعت هبه اخت مصطفي نفس اسم الاب واسم الام فرحت اوي مقدرتش اخبي فرحتي لدرجه ضحكت من الفرحه لقيتها بتبصلي جامد حاولت امسك نفسي عشان متعرفش حاجه وقولتلها وانا هدور علي شهادة ميلادك ليه
قربت مني اوي وبرقتلي بعنيها بصراحه نظرتها كانت تخوف وقالتلي افرحي زي مانتي عاوزه بس فرحتك دي مش هطول مفهمتش وبصراحه مكنتش عاوزه افهم لاني شوفت الي كنت عاوزه اشوفه وارتحت ، حاولت اطمنها مسكت أيدها وانا مبتسمه قولتلها ماشي وفرحتي من فرحتك انا مرات اخوكي يعني زي اختك بالظبط
ضحكت اوي لدرجه انها كانت بتعيط كمان طريقتها واسلوبها كانت غربيه وفعلا صدقت أنها مريضه نفسيا وفجأة قالتلي وعيونها مليانه دموع بس انا معنديش اخوات
بصتلها بصدمه وفضلت متنحه فتره مش قادرة استوعب كلامها دنا مصدقت ارتاح ياربي كنت حاسه اني هتجنن بجد مش عارفه أصدقها ولا اعمل ايه لاقيتها بتكررها تاني وقالت ايوه اللي سمعتيه حقيقه انا معنديش اخوات وضحكت اكتر واكتر
حطيت ايدي علي راسي مش عايزه اسمع حاجه تاني قولتلها كفااااايه
وهنا دخلت حماتي اتخضت اول ماشافتني جريت عليا وقالتلي ماريان مالك ايه الي حصل وبصت لهبه وقالتلها انتي قولتلها ايه
خدتني وخرجنا من الاوضه وطلعت شقتي عملتلي للمون وفعلا هديت شويه وقالتلي مش قولتلك يا مريان متقربيش منها واوعي تصدقي اي كلام قالتو انتي عارفه حالتها النفسية وحشه
حاولت أصدقها منا لازم أصدقها وإلا كنت هتجنن رسمي وقلت لنفسي فعلا هي مريضه نفسيا وانا شوفت شهادة ميلادها بنفسي هي أخت مصطف وفجأة افتكرت هي ازاي عرفت اني بدور على شهادة ميلادها أو اي حاجه تخصها ياربي انا اكتفيت مبقتش مستحمله ومن كتر التعب نمت
قمت من النوم في نص الليل من القلق والتوتر جالي صداع بصيت جنبي ملقتش مصطفي قلت ممكن في الحمام ونزلت عند حماتي اسالها علي برشام صداع واول ما نزلت شوفت مصطفي وافق بيتكلم مع هبه وقفت مكاني متحركتش وقلت دي فرصتي عشان اعرف ايه الي بيحصل هنا مصطفي شكله متنرفز جدا وقاللها ليه عملتي كدا قولتلك تبعدي عنها خالص ردت عليه وقالت وهي مضايقه ايه خايف عليها ولا تكون حبيتها رد مصطفي وقال لا بس مريان ملهاش ذنب ردت هبه وقالت
وانا كمان مليش ذنب زيها رد مصطفي وقال لا ذنبك انك اختي ....
