BYAHE

Byahe 1

Dunay panahon nga maabtan ko og kalaay sa akong kaugalingon. Mawad-an kog gana sa mga butang o kaha mga buluhaton nga naandan na akong buhaton.
Busa, duna usa ka adlaw nga nakahuna-huna ko nga mobiyahe kog layo. Akong nahuna-hunaan nga laagan ang Davao. Nakalaag nako niining lugara dihang bata pako busa posibling ma-enjoy nako ang akong kaugalingon kung molaag napud kog utro nga ako lang mag-inusara.
Tayming pud kaayo nga mobiyahe kay gihatagan kog allowance sa akong igsuon nga babaye, lahi pa usab ang allowance nga gihatag sa akong inahan.
Wala koy higala nga gisuginlan sa akong plano nga pagbiyahe basin kung masayod sila manguban na hinuon nako. Buot lang gyud nako nga masulayan ang mobiyahe nga ako lang usa.
Ang pagkahibalo sa akong usa ka higala nga mo-uli kog Dipolog kay nagpuyo raman ko sa usa ka boardinghouse sa Cagayan de Oro.
Wala mi klase pagka-ugma tungod igo nalang gipahuman sa among professor ang among mga thesis. Nahuman na nako ang akong thesis, busa pabor kaayo alang kanako ang maglaag-laag. Dali lang nahuman akong thesis kay abtik pud kaayo ang akong partner nga si Mercy.
Okey pud kaubanon si Mercy, pero wala gyud ko mosulay pagdiskarte niya nga labaw pa sa higala tungod suod pud nako kaayo ang iyang boyfriend.
Adlawng Biernes, pagkahuman sa among last subject nagdali-dali kog uli sa akong boardinghouse aron kuhaon nako ang akong bag nga gisudlan sa akong mga gamit nga dad-on nako sa biyahe.
Mag alas 5 sa hapon dihang nilarga ang bus nga gisakyan nako padulong sa Davao. Didto ko sa pinaka-ulahing lingkoranan milingkod. Nagpalit lang ko og sandwich ug softdrinks nga maoy akong gibalon. Excited kaayo ko niadtong higayona, tungod premirong higayon nako sa biyahe nga ako lang usa wala ang akong inahan o kaha igsuon.
Tungod tingali sa kakapoy, nakatulog ko sa lingkoranan. Nakamata lang ko dihang mihunong ang bus sa Malaybalay City. Ubay-ubay ang mga pasahero nga mikanaog. Halos tunga nalang ang nahabilin ug murag ako nalang pud usa ang naglingkod sa pinaka-ulahi nga lingkoranan.
Gipalong sa drayber ang silaw nga suga ug bugtong ang pula nga kolor lamang nga bombelya nga naa sa atubangan ang gipasiga. Kasagaran, ginatuyo gyud kini sa mga drayber pagpalong aron dili madisturbo ang mga pasahero sa pagkatulog.
Gipadayon nako ang akong pagkatulog bisan nabantayan nako nga dunay nitapad nako dihang mihunong ang bus sa usa ka bus stop. Taod-taod, nabatyagan nako nga midikit sa akong abaga ang ulo sa akong katapad nga sa paminaw nako usa ka babaye tungod ang baho niini pambabaye. Humot og shampoo ang buhok niini. Wala ko molihok sa akong gilingkoran ug gipamatyagan lang nako…ATANGI ANG SUMPAY!