ﺭﺟﻌﺖ ﻣﻦ ﺍﻟﻤﺪﺭﺳﺔ ﺷﺎﻳﻠﺔ ﺟﻨﻄﺘﻲ ﺑﻴﺪﻱ
ﻭﻣﻴﺘﺔ ﻣﻦ ﺍﻟﺤﺮ ﻭﺍﻟﻌﻄﺶ
ﺩﺧﻠﺖ ﻟﻠﺒﻴﺖ ﻭﺷﻔﺖ ﺍﻟﻮﺟﻮﻩ ﻣﮕﻠﺒﺔ ﻛﺎﻧﺖ ﺍﺧﺘﻲ ﻧﻮﺭﺍﻟﺼﻐﻴﺮﺓ ﺗﺒﺎﻭﻉ ﻻﻣﻲ
ﺩﺧﻠﺖ ﻟﻠﻤﻄﺒﺦ ﻭﺍﻧﻲ ﺍﺑﺎﻭﻉ ﻣﻦ ﻧﻮﺭ ﻻﻣﻲ
- ﺷﻜﻮ ﺷﺒﻴﻬﺔ ﺍﻣﻲ
ﻫﻤﺴﺖ ﻧﻮﺭ
- ﺳﻬﻰ ﻣﻮ ﻫﺴﺔ ﺑﻌﺪﻳﻦ ﺍﺣﺠﻴﻠﺞ
ﺳﻤﻌﺖ ﺑﺎﺑﺎ ﻳﺤﺠﻲ ﻭﻳﺘﻮﻋﺪ ﺑﺼﻮﺕ ﻋﺎﻟﻲ
ﺍﺑﻮ ﺳﻬﻰ - ﺍﻟﻲ ﺍﻛﻮﻟﺔ ﻳﺘﻨﻔﺬ ﻭﺍﻧﺘﻲ ﻣﺎﻟﺞ ﺍﻱ ﻛﻠﻤﺔ ﺑﺎﻟﻤﻮﺿﻮﻉ
ﺷﻔﺖ ﺍﻣﻲ ﺷﻤﺮﺕ ﺍﻟﺨﺎﺷﻮﻛﺔ ﺑﻐﻀﺐ ﻋﻠﻰ ﺍﻟﺴﻨﻚ ﻭﺭﺍﺣﺖ ﻟﺒﺎﺑﺎ ﻭﻭﻛﻔﺖ ﺑﺒﺎﺏ ﺍﻟﻤﻄﺒﺦ
ﺍﻡ ﺳﻬﻰ - ﻫﻮ ﺍﻧﺖ ﺩﻭﻣﻚ ﻫﻴﺞ ﻳﻌﻨﻲ
ﻣﺎ ﻛﻔﺎﻙ ﺯﻭﺟﺖ ﺭﻳﻢ ﻭﻫﻲ ﺻﻐﻴﺮ ﻭﺟﻨﻴﺖ ﻋﻠﻰ ﻣﺴﺘﻘﺒﻠﻬﺎ ﻭﻃﻴﺤﺖ ﺣﻀﻬﺎ
ﻭﺟﺎﻱ ﻫﺴﺔ ﻋﻠﻰ ﺳﻬﻰ ﺗﺮﻳﺪ ﺗﺰﻭﺟﻬﺎ ﻭﺗﻔﻴﻦ ﺣﻈﻬﺎ ﻫﻲ ﺍﻟﻼﺥ ﻣﻴﺼﻴﺮ ﻫﻴﺞ ﺣﺮﺍﻡ ﻋﻠﻴﻚ
ﺍﺑﻮ ﺳﻬﻰ - ﺷﻮﻓﻲ ﻟﺞ ﺍﻧﺘﻲ ﺗﺴﻜﺘﻴﻦ ﻭﻣﺘﻔﺘﺤﻴﻦ ﺣﻠﻜﺞ
ﺑﻨﺘﻲ ﻭﺑﻜﻴﻔﻲ ﺍﺯﻭﺟﻬﺎ ﺷﻮﻛﺖ ﻣﻴﻌﺠﺒﻨﻲ
ﻟﻄﻤﺖ ﻋﻠﻰ ﺻﺪﺭﻱ ﻋﺰﺓ ﻫﺎﻱ ﻋﻠﻴﻤﻦ ﻳﻘﺼﺪﻭﻥ ﻳﺰﻭﺟﻮﻥ ﻣﻨﻮ ﻻ ﻋﻔﻴﺔ ﺷﻨﻮ ﻳﺎ ﺯﻭﺍﺝ ﻭﺍﻟﻠﻪ ﺑﻌﺪﻧﻲ ﺻﻐﻴﺮﺓ
ﺣﺴﻴﺖ ﺑﮕﻠﺒﻲ ﮔﺎﻡ ﻳﺪﻙ ﺣﻴﻞ ﻭﺻﺎﺭ ﺍﻟﻤﺼﺎﻳﺢ ﺑﻴﻦ ﻣﺎﻣﺎ ﻭﺑﺎﺑﺎ
ﻭﺍﻟﻠﻪ ﺍﻣﻮﻭﺕ ﻣﻦ ﺍﻟﻘﻬﺮ ﺍﺫﺍ ﺻﺪﻙ ﻫﺬﺍ ﺍﻟﺤﺠﻲ
ﻟﻌﺪ ﻭﻣﺪﺭﺳﺘﻲ ﻭﺩﺭﺍﺳﺘﻲ ﻭﻣﺴﺘﻘﺒﻠﻲ ﻻ ﻳﺎﺭﺑﻲ ﻓﺪﻭﺓ ﺭﺣﺘﻠﻚ ﻛﻠﺸﻲ ﻭﻻ ﺩﺭﺍﺳﺘﻲ
ﻃﺒﻌﺎً ﻋﻠﻰ ﺍﻟﺮﻏﻢ ﺑﺎﺑﺎ ﻗﺎﺿﻲ
ﺑﺲ ﻣﻊ ﺍﻻﺳﻒ ﺟﺪﺍً ﻣﺘﺸﺪﺩ ﻭﻣﺎﻋﻨﺪﺓ ﺍﻱ ﺗﻔﺎﻫﻢ ﻭﻳﺔ ﺍﻫﻞ ﺑﻴﺘﺔ ﻳﻌﻨﻲ ﺍﻟﻲ ﻳﺸﻮﻓﺔ ﻳﮕﻮﻝ ﺍﺷﻜﺪ ﻣﺜﻘﻒ ﻭﻭﺍﻋﻲ
ﺑﺲ ﻟﺘﺤﻜﻢ ﻋﺎﻟﻜﺘﺎﺏ ﻣﻦ ﻋﻨﻮﺍﻧﺔ
ﻣﺮﺍﺕ ﺗﻜﺴﺮ ﺧﺎﻃﺮﻱ ﺍﻣﻲ ﺍﻛﻮﻝ ﺷﻠﻮﻥ
ﻣﺘﺤﻤﻠﺘﺔ ﻳﻌﻨﻲ ﺍﺑﺪ ﻣﻤﺤﺴﺴﻬﺎ ﺍﻥ ﻫﻲ ﺍﻡ ﺑﻴﺘﺔ
ﻭﻻﻳﻮﻡ ﺷﻔﻨﺎﻩ ﻳﻌﺎﻣﻠﻬﺎ ﺑﺤﻨﻴﺔ ﻭﻋﻄﻒ
ﻭﻻ ﻳﺸﺎﺭﻛﻬﺎ ﺑَـــﺄﻱ ﺭﺃﻱ ﺧﺼﻮﺻﺎً ﺑﺎﻟﻘﺮﺍﺭﺍﺕ ﺍﻟﺤﺎﺳﻤﺔ ﺍﻟﻲ ﺗﺨﺺ ﺍﻟﺒﻴﺖ ﻭﻣﺴﺘﻘﺒﻠﻨﺎ
ﻳﻌﻨﻲ ﻋﻨﺪﺓ ﺍﻟﻤﺮﺓ ﺍﻧﺨﻠﻘﺖ ﺑﺲ ﻟﻠﺨﻠﻔﺔ ﻭﺍﻟﻄﺒﺦ ﻭﺍﻟﺘﻨﻈﻴﻒ ﻭﻣﺎﻟﻬﺔ ﺣﻖ ﺑﺎﻟﺘﻌﺒﻴﺮ ﻋﻦ ﻗﻬﺮﻫﺎ ﺍﻭ ﺗﻌﺘﺮﺽ ﻋﻠﻰ ﻛﻼﻣﻪ ﺍﻭﻭﻏﻴﺮﻫﺎ ﻣﻦ ﺍﻻﻣﻮﺭ
ﺑﺄﺧﺘﺼﺎﺭ ﺑﺎﺑﺎ ﺭﺟﻞ ﻣﺘﺴﻠﻂ ﻭﻋﻨﻴﺪ ﻭﺭﺟﻌﻲ
ﻣﻊ ﺍﻻﺳﻒ ﺍﺧﻮﺗﻲ ﺍﺣﻤﺪ ﻭﻗﺘﻴﺒﺔ ﻃﻠﻌﻮ ﻋﻠﻴﻪ ﺑﺲ
ﺷﻮﻳﺔ ﺍﺧﻮﻳﺔ ﺍﻟﺠﺒﻴﺮ ﺍﻣﺠﺪ ﺍﺣﺴﻦ ﻣﻨﻬﻢ
ﻣﺘﻔﻬﻢ ﻫﻮ ﺍﻛﺜﺮ ﻭﺍﺣﺪ ﺍﻣﻲ ﺗﻌﺘﻤﺪ ﻋﻠﻴﻪ ﻭﺗﻠﺠﺎﺀ ﻟﻪ ﺑﻬﻮﺍﻱ ﺍﻣﻮﺭ
ﺣﺘﻰ ﻣﺮﺍﺕ ﻳﺘﻮﺳﻄﻠﻨﺎ ﻋﻨﺪ ﺑﺎﺑﺎ ﺑﺲ ﻣﻊ ﺍﻻﺳﻒ
ﻫﻮ ﻫﺴﺔ ﺣﺎﻟﻴﺎ ﻣﺴﺎﻓﺮ
ﻃﺒﻌﺎً ﺍﻧﻲ ﺍﺳﻤﻲ ﺳﻬﻰ ﻭﻋﻤﺮﻱ ١٨ﺳﻨﺔ ﺑﺎﻟﺴﺎﺩﺱ ﻋﻠﻤﻲ ﻭﻛﻠﺶ ﺷﺎﻃﺮﺓ ﻭﻋﻨﺪﻱ ﺧﻮﺍﺕ ﺍﺛﻨﻴﻦ ﻧﻮﺭ ﺍﻟﺼﻐﻴﺮﺓ ﻭﻋﻤﺮﻫﺎ ١٢ﺳﻨﺔ ﻭﺍﺧﺘﻲ ﺭﻳﻢ ﺍﻛﺒﺮ ﻣﻨﻲ
ﺧﻄﻴﺔ ﺍﺗﺰﻭﺟﺖ ﺻﺎﺭﻟﻬﺎ ﺳﻨﺘﻴﻦ ﻋﻨﺪﻫﺎ ﺑﻨﻴﺔ ﻭﻫﺴﺔ ﻫﻲ ﺣﺎﻣﻞ ﻭﺣﻴﻞ ﻣﺸﻠﻮﻉ ﮔﻠﺒﻬﺎ ﻋﻴﺎﻝ ﻭﺣﻤﻞ ﺑﺎﻟﻐﻠﻂ ﻳﻌﻨﻲ ﺍﻟﻌﻴﺸﺔ ﺯﻓﺖ ﻭﺭﺟﻠﻬﺎ ﺷﺎﻟﻊ ﮔﻠﺒﻬﺎ ﺷﻜﻮﻛﻲ
ﻃﺒﻌﺎً ﺑﺎﺑﺎ ﺯﻭﺟﻬﺎ ﻭﻫﻲ ﺑﻌﻤﺮ ﺍﻝ١٨ﺳﻨﺔ ﻭﻫﻢ ﺧﻠﺼﺖ ﺳﺎﺩﺱ ﻋﻠﻤﻲ ﻭﺟﺎﺑﺖ ﻣﻌﺪﻝ ﻛﻠﺶ ﻋﺎﻟﻲ ﻳﺨﻮﻟﻬﺎ ﺗﺪﺧﻞ ﻛﻠﻴﺔ ﻃﺐ ﺑﺲ ﺑﺎﺑﺎ ﻣﻴﻌﺘﺮﻑ ﺑﺒﻨﻴﺔ ﺗﺪﺧﻞ ﻛﻠﻴﺔ ﻋﻨﺪﺓ ﻫﺬﺍ ﻣﻀﻴﻌﺔ ﻭﻗﺖ
ﺍﻟﺒﻨﻴﺔ ﻣﺴﺘﻘﺒﻠﻬﺎ ﺑﻴﺘﻬﺎ ﻭﺭﺟﻠﻬﺎ
ﻓﻮﻙ ﻣﺎ ﺑﺎﺑﺎ ﻣﺘﺸﺪﺩ ﻋﻠﻴﻨﺎ
ﻓﻮﻛﺎﻫﺎ ﺍﺧﻮﺍﻧﻲ ﻫﻢ ﻣﻘﻴﺪﻳﻦ ﺣﺮﻳﺘﻨﺎ
ﺣﺼﺮﺓ ﻋﻠﻴﻨﺎ ﺍﻟﻄﻠﻌﺔ ﺑﺒﺎﺏ ﺍﻟﺒﻴﺖ
ﻳﻤﺔ ﻣﺮﺓ ﺍﺗﺬﻛﺮ ﺍﺧﺘﻲ ﺭﻳﻢ ﻛﺎﻧﺖ ﻣﺎﺩﺓ ﺭﺍﺳﻬﺎ ﺑﺒﺎﺏ ﺍﻟﺸﺎﺭﻉ ﺗﺴﻠﻢ ﻋﻠﻰ ﺻﺪﻳﻘﺘﻬﺎ ﻛﺎﻧﺖ ﺻﺎﺩﻑ ﻋﺪﻧﺎ ﺟﺎﻳﺔ ﺧﻄﺎﺭ ﻭﺭﺍﺩﺕ ﺗﻄﻠﻊ
ﻭﻟﺠﺤﻬﺎ ﺍﺣﻤﺪ ﺍﺧﻮﻱ
ﻳﻤﺔ ﺑﻮﻗﺘﻬﺎ ﺟﻨﺰﻫﺎ ﺗﺠﻨﺰ
ﻃﺒﻌﺎً ﺍﻣﺠﺪ ﻣﺘﺰﻭﺝ ﻭﺟﺎﻱ ﻳﺪﺭﺱ ﺑﺎﻟﺨﺎﺭﺝ
ﻭﻗﺘﻴﺒﺔ ﻣﺘﺰﻭﺝ ﻭﺍﺣﻤﺪ ﻣﻤﺮﺗﺒﻂ ﺑﺲ ﻋﻮﺩﻙ ﺷﻨﻮ ﻧﻘﺎﻟﺔ ﻣﺘﺮﻭﺱ ﺍﺭﻗﺎﻡ ﺑﻨﺎﺕ ﻣﻜﺒﻞ ﻭﺷﻮﻛﺖ ﻣﺎ ﺗﺠﻲ ﺍﺷﻮﻓﺔ ﺑﺎﻻﺳﺘﻘﺒﺎﻝ
ﻳﺤﺠﻲ ﻭﻳﺎﻫﻦ ﺑﺼﻮﺕ ﻧﺎﺻﻲ ﻃﺒﻌﺎً ﺍﻧﻲ ﻣﻮ ﻏﺒﻴﺔ ﺍﻋﺮﻑ ﺍﻥ ﻫﻮ ﺷﻨﻮ ﺳﺒﺐ ﻋﺰﻟﺘﺔ ﺣﺘﻰ ﻳﺤﺠﻲ ﻭﻳﺔ
ﺣﺒﻴﺒﺘﺔ ﺑﺤﺮﻳﺔ
ﻭﺍﻟﻠﻪ ﺍﻟﻌﺎﻟﻢ ﻫﺎﻱ ﻳﺎﺭﻗﻢ ﺑﻴﻬﻦ ﻻﻥ ﺍﻻﺥ
ﻛﻞ ﻭﺣﺪﺓ ﻣﺴﻤﻴﻬﺎ ﺣﺒﻴﺒﻲ ١ﻭﺣﺒﻴﺒﻲ ٢ﻭﺣﺒﻴﺒﻲ ٣
ﻳﻌﻨﻲ ﺍﻻﺥ ﻣﺴﻮﻱ ﻗﺎﺋﻤﺔ
ﻃﺒﻌﺎ ﻫﻨﺎﻙ ﺑﺎﻟﻤﺪﺭﺳﺔ ﻫﻮﺍﻱ ﺍﺳﻤﻊ ﻣﻦ ﺍﻟﺒﻨﺎﺕ ﺷﻠﻮﻥ ﻳﺤﺠﻮﻥ ﺑﺎﻟﺤﺐ ﻭﺍﻟﺮﻭﻣﺎﻧﺴﻴﺔ ﻭﺍﻟﻌﻼﻗﺎﺕ
ﻭﺷﻮﻥ ﻳﺤﺠﻦ ﺑﻤﻐﺎﻣﺮﺍﺗﻬﻦ ﻭﻳﺔ ﺍﻟﺸﺒﺎﺏ
ﻭﺍﻧﻲ ﻭﺳﺎﺭﺓ ﺻﺪﻳﻘﺘﻲ ﻓﻘﻂ ﻧﺴﺘﻤﻊ ﺑﺲ
ﻋﺒﺎﻟﻚ ﻋﺎﻳﺸﻴﻦ ﻭﻳﺎﻫﻦ ﺍﻟﻠﺤﻈﺔ ﻭﻣﺮﺍﺕ ﻧﺸﻮﻓﻬﻢ ﺷﻠﻮﻥ ﻳﺘﻮﺍﻋﺪﻭﻥ ﻳﺠﻲ ﻋﻠﻴﻬﺎ ﺣﺒﻴﺒﻬﺎ ﻟﺒﺎﺏ ﺍﻟﻤﺪﺭﺳﺔ ﻭﻳﻨﻄﻴﻬﺎ ﻫﺪﻳﺔ ﻋﻴﺪ ﻣﻴﻼﺩﻫﺎ
ﻣﺮﺍﺕ ﺍﺗﺤﺴﺪﻟﻬﺎ ﺍﻛﻮﻝ ﻫﻨﻴﺎﻟﻬﺔ ﺍﻛﻮ ﻣﻦ ﻳﺤﺒﻬﺎ ﻭﻳﺘﻤﻨﺎﻫﺎ
ﻭﻳﻬﺘﻢ ﺍﻟﻬﺔ ﻃﺒﻌﺎً ﻛﺎﻥ ﺗﻔﻜﻴﺮﻱ ﺗﻔﻜﻴﺮ ﻣﺮﺍﻫﻘﺔ
ﻭﺟﻨﺖ ﻛﻞ ﻳﻮﻡ ﺑﺎﻟﻠﻴﻞ ﻋﻨﺪﻱ ﺩﻓﺘﺮ ﻣﺬﻛﺮﺍﺕ ﺍﻛﺘﺐ ﺑﻲ
ﻛﻠﻤﺎﺕ ﻭﺧًﻮﺍﻃﺮ ﻭﺟﻨﺖ ﺍﺗﻤﻨﻰ ﺍﻥ ﻳﺠﻲ ﺍﻟﻴﻮﻡ ﻭﺍﺣﺐ ﺷﺨﺺ ﻭﻳﺒﺎﺩﻟﻨﻲ ﺍﻟﺤﺐ ﻭﺩﺍﺋﻤﺎً ﺍﺗﺨﻴﻠﺔ ﺷﺨﺼﻴﺔ ﻭﻫﻴﺒﺔ
ﻭﺟﺬﺍﺏ
....
ﺑﺲ ﻣﻊ ﺍﻻﺳﻒ ﺍﻟﻈﺎﻫﺮ ﻣﺎ ﺭﺍﺡ ﺍﻟﺤﻚ ﺍﻟﺘﻘﻲ ﻣﻊ ﺍﻟﺤﺒﻴﺐ ﺍﻟﻲ ﻛﻨﺖ ﺍﺗﻤﻨﺎﻩ ﻻﻥ ﺑﺎﺑﺎ ﻧﺎﻭﻱ ﻳﺰﻭﺟﻨﻲ ﻭﺍﻟﻠﻪ ﺍﻟﻌﺎﻟﻢ ﺍﻟﻤﻦ
ﺭﺍﺡ ﻳﺰﻭﺟﻨﻲ
ﺍﺑﺎﻭﻉ ﻋﻠﻰ ﺍﻣﻲ ﺩﺧﻠﺖ ﻟﻠﻤﻄﺒﺦ ﻭﺍﺧﺬﺕ ﻣﻦ ﺍﻟﺒﺮﺍﺩ ﻛﻼﺹ ﻣﻲ ﻭﺻﻜﺖ ﻋﻠﻴﻪ ﺧﻄﻴﺔ ﻃﺒﻌﺎً ﻣﻦ ﺣﺮﻛﺖ ﮔﻠﺒﻬﺎ ﻋﻠﻴﻨﺎ
ﺍﻱ ﺍﻡ ﺗﺮﻳﺪ ﻟﺒﻨﺘﻬﺎ ﺍﻥ ﺗﻜﻤﻞ ﺩﺭﺍﺳﺘﻬﺎ ﻭﺗﺎﺧﺬ ﺷﻬﺎﺩﺓ ﺗﻔﺘﺨﺮ ﺑﻴﻬﺎ
ﻻﻥ ﺍﻣﻲ ﻣﻦ ﻋﺎﺋﻠﺔ ﻛﻠﻬﺎ ﻣﺘﺨﺮﺟﻴﻦ ﻳﻌﻨﻲ ﻭﺍﺻﻠﻴﻦ ﻭﺍﺛﻨﻴﻦ ﻣﻦ ﺧﻮﺍﻟﻲ ﺩﻛﺎﺗﺮﺓ ﻭﻫﻲ ﻣﺪﺭﺳﺔ ﺭﻳﺎﺿﻴﺎﺕ ﺑﺲ ﺧﻄﻴﺔ ﺑﺎﺑﺎ
ﺑﻄﻠﻬﺎ ﻣﻦ ﺍﻟﻤﺪﺭﺳﺔ ﻛﺎﻟﻌﺎﺩﺓ ﺑﻴﺘﺞ ﻭﺟﻬﺎﻟﺞ ﺍﻭﻟﻰ ﺑﻴﺞ
ﺍﻧﻲ ﻣﺎ ﺍﺭﻳﺪ ﺍﺻﻴﺮ ﻣﺜﻞ ﺍﻣﻲ ﻭﻻ ﺍﺭﻳﺪ ﺍﺗﺰﻭﺝ ﻭﺍﺣﺪ ﻣﺜﻞ ﺑﺎﺑﺎ
ﻋﻨﺪﻱ ﻫﻮﺍﻱ ﻃﻤﻮﺡ ﻭﺍﺣﻼﻡ ﺍﺭﻳﺪ ﺍﺣﻘﻘﻬﻢ ﺍﺣﺲ ﻣﻤﺴﺘﻌﺪﺓ
ﻟﻠﺰﻭﺍﺝ ﻭﺗﻜﻮﻳﻦ ﻋﺎﺋﻠﺔ
ﺍﺭﻳﺪ ﺑﺎﻻﻭﻝ ﺍﻛﻤﻞ ﺩﺭﺍﺳﺘﻲ ﻭﺗﺤﺼﻞ ﺷﻬﺎﺩﺗﻲ
ﻭﺑﻌﺪﻳﻦ ﺍﺗﺰﻭﺝ ﺭﺟﺎﻝ ﺑﺤﺒﻨﻲ ﻭﻳﻌﺸﻘﻨﻲ ﻭﻳﺪﻟﻠﻨﻲ ﻭﺍﺩﻟﻊ ﻋﻠﻴﻪ ﻭﻳﺤﺘﺮﻣﻨﻲ ﻭﻳﺴﻤﻌﻨﻲ ﺍﻟﻜﻼﻡ ﺍﻟﺠﻤﻴﻞ ﻭﻳﺸﺎﺭﻛﻨﻲ ﺑﻜﻠﺸﻲ ﻭﻳﺴﻤﻌﻨﻲ ﺍﺫﺍ ﺣﺠﻴﺖ
ﻭﻧﺘﺸﺎﺭﻙ ﺍﻧﻲ ﻭﻳﺎﻩ ﺑﺘﺨﺎﺫ ﺍﻟﻘﺮﺍﺭﺍﺕ ﺍﻟﻲ ﺗﺨﺺ ﺣﻴﺎﺗﻨﺎ
ﺑﺲ ﻫﺴﺔ ﺍﺫﺍ ﺭﺍﺡ ﺍﺗﺰﻭﺝ ﻣﺎ ﺍﺗﻮﻗﻊ ﺭﺍﺡ ﻳﺨﻠﻴﻨﻲ ﺍﻛﻤﻞ ﺩﺭﺍﺳﺘﻲ
ﺻﻌﺪﺕ ﻓﻮﻙ ﻟﻐﺮﻓﺘﻲ ﺍﻧﻲ ﻭﺧﻮﺍﺗﻲ ﻭﺑﺎﻭﻋﺖ ﻟﻜﺘﺒﻲ
ﻭﻣﻼﺑﺴﻲ ﻣﺎﻟﺖ ﺍﻟﻤﺪﺭﺳﺔ
ﻣﺘﺖ ﻗﻬﺮ ﺍﺣﺲ ﺍﻛﻮ ﻛﺴﺮﺓ ﻭﻏﺼﺔ ﺑﺤﻨﺠﺮﺗﻲ
ﻳﻌﻨﻲ ﺍﻧﻲ ﺍﺷﻄﺮ ﻭﺣﺪﺓ ﺑﺎﻟﺼﻒ ﻣﺠﺎﻱ ﺍﮔﺪﺭ ﺍﺗﺨﻴﻞ ﺻﺪﻳﻘﺎﺗﻲ ﻛﻠﻬﻢ ﻳﻜﻤﻠﻮﻥ ﺩﺭﺍﺳﺘﻬﻢ ﻭﻳﺎﺧﺬﻭﻥ ﺷﻬﺎﺩﺍﺗﻬﻢ
ﻭﺍﻧﻲ ﺍﺗﺰﻭﺝ ﻭﺍﺧﻠﻒ ﻭﺍﻛﻌﺪ ﺑﺎﻟﺒﻴﺖ ﻭﺍﻟﺘﻬﻲ ﺑﻴﻬﻢ ﻭﺍﺑﺪ ﻣﺮﺍﺡ ﺍﻓﺮﻍ ﻟﻄﻤﻮﺣﻲ ﻭﺍﻟﻠﻪ ﺍﻣﻮﺕ ﻗﻬﺮ
ﺑﺪﻟﺖ ﻣﻼﺑﺴﻲ ﻭﻏﺴﻠﺖ ﻭﺟﻬﻲ ﻭﻧﺰﻟﺖ
ﻭﺟﻮ ﺍﻟﺒﻴﺖ ﻣﺘﻜﻬﺮﺏ ﻭﺍﻣﻲ ﺿﺎﺭﺑﺔ ﺍﻟﺒﻮﺯ ﻋﻠﻰ ﺑﺎﺑﺎ
ﻫﻲ ﺧﻄﻴﺔ ﻣﺒﻴﺪﻫﺔ ﺷﻲ ﺗﺴﻮﻳﻪ
ﺑﺲ ﺭﺍﺡ ﺗﻈﻞ ﺗﺤﺮﻙ ﺑﺪﻣﻬﺎ
ﺍﻋﺮﻑ ﺍﺑﻮﻱ ﻭﺭﺍﺳﺔ ﺍﻟﻴﺎﺑﺲ ﻣﺮﺍﺡ ﻳﺘﻨﺎﺯﻝ ﻋﻦ ﻛﻠﻤﺘﺔ
ﺍﻟﻲ ﺑﺮﺍﺳﺔ ﻳﺴﻮﻱ
ﺑﺲ ﻣﺎ ﺍﻛﺪﺭ ﺍﺳﺘﺴﻠﻢ ﺑﺪﻭﻥ ﻣﺎ ﺍﺩﺍﻓﻊ ﻋﻦ ﺣﻘﻲ ﻭﺍﺣﺎﻭﻝ
ﺭﺣﺖ ﺩﺧﻠﺖ ﻋﻠﻰ ﺑﺎﺑﺎ ﺑﺎﻟﻐﺮﻓﺔ
- ﺍﻟﻠﻪ ﻳﺴﺎﻋﺪﻙ ﻳﺎﺑﺔ
ﺍﺑﻮ ﺳﻬﻰ ﻭﻫﻮ ﻳﺘﻨﻔﺲ ﺑﻐﻀﺐ ﻣﻦ ﺍﺛﺮ ﺍﻟﻌﺮﻛﺔ
- ﻫﻠﺔ ﺑﻴﺞ ﺑﺎﺑﺎ
- ﻋﻔﻴﺔ ﺑﺎﺑﺎ ﺍﺭﻳﺪ ﺍﺣﺠﻲ ﻭﻳﺎﻙ ﺑﺲ ﺍﺭﻳﺪﻙ ﺗﺴﻤﻌﻨﻲ ﻭﻣﺘﻌﺼﺐ
- ﺍﺣﺠﻲ ﮔﻮﻟﻲ ﻫﻮ ﺍﻧﺘﻮ ﻭﺍﻣﻜﻢ ﺷﻨﻮ ﻳﻄﻠﻊ ﻣﻨﻜﻢ ﻏﻴﺮ ﻭﺟﻊ ﺍﻟﺮﺍﺱ
ﺑﻠﻌﺖ ﻛﻠﻤﺎﺗﻪ ﻭﻛﻤﻠﺖ ﻛﻼﻣﻲً
- ﻳﺎﺑﺔ ﺍﺭﻭﺣﻠﻚ ﻓﺪﻭﺓ ﺍﻧﻲ ﻣﺎﻣﺴﺘﻌﺪﺓ ﻫﺴﺔ ﺣﺎﻟﻴﺎً ﻟﻠﺰﻭﺍﺝ ﻋﻠﻰ ﺍﻻﻗﻞ ﺧﻠﻴﻨﻲ ﺍﺧﺬ ﺷﻬﺎﺩﺓ ﺍﻟﺴﺎﺩﺱ ﻭﺍﺩﺧﻞ ﻛﻠﻴﺔ ﻭﺑﻌﺪﻳﻦ ﺍﻟﺤﻚ ﻋﺎﻟﺰﻭﺍﺝ
ﺍﻧﺘﺒﻬﺖ ﻋﻠﻰ ﺑﺎﺑﺎ ﻭﻳﺔ ﻛﻞ ﻛﻠﻤﺔ ﻭﺟﻬﺔ ﻳﺼﻴﺮ ﻧﺎﺭ ﻣﻦ ﺍﻟﻐﻀﺐ
- ﻟﺞ ﻋﺎﺍﺍﺭ ﻫﺎﻱ ﻣﻦ ﺷﻮﻛﺖ ﻋﻨﺪﻧﺎ ﺑﻨﺎﺕ ﺗﺤﺠﻲ ﻭﺗﻨﻄﻲ ﺭﺃﻳﻬﺎ ﻟﺞ ﺍﻧﺘﻲ ﺻﺪﻙ ﺗﺮﺑﺎﺕ ﺍﻣﺞ ﻋﻠﻤﺘﺞ ﺷﻠﻮﻥ ﺗﻤﺪﻳﻦ ﺍﻟﻠﺴﺎﻥ ﻭﺗﻮﻛﻔﻴﻦ ﺑﻮﺟﻬﻲ ﺑﺲ ﺍﻧﺔ ﺍﻋﻠﻤﺞ
ﺣﺴﻴﺖ ﺑﻲ ﺳﺤﺒﻨﻲ ﻣﻦ ﺯﻧﺪﻱ ﻭﺟﺮﻧﻲ ﻟﻠﻬﻮﻝ ﺍﻟﻲ ﺟﺎﻧﺖ ﺍﻣﻲ ﮔﺎﻋﺪﺓ ﺑﻲ
ﻭﺍﻣﻲ ﮔﺎﻣﺖ ﻣﻔﺰﻭﻋﺔ ﻣﻦ ﻏﻀﺐ ﺍﺑﻮﻱ ﻭﻫﻮ ﮔﺎﻳﺪﻧﻲ ﻭﺭﺍﻩ ﻭﺩﻓﻌﻨﻲ ﺑﻜﻞ ﻗﻮﺓ ﻳﻢ ﺭﺟﻠﻴﻦ ﺍﻣﻲ
- ﻫﺎﺝ ﺍﺧﺬﻱ ﺑﻨﺘﺞ ﻭﺭﺑﻴﻬﺎ ﻋﺪﻝ ﻻ ﺍﺭﺗﻜﺐ ﺑﻴﻬﺎ ﺟﺮﻳﻤﺔ
ﻫﺎﻱ ﺗﺎﻟﻲ ﺍﻟﺪﺭﺍﺳﺔ ﺗﻌﻠﻤﻬﺎ ﺗﻮﻛﻒ ﺑﻮﺟﻬﻲ ﻭﺗﻤﺪ ﺍﻟﻠﺴﺎﻥ
ﻭﺍﻟﻠﻪ ﺍﻻ ﺍﻛﺴﺮ ﺭﺍﺳﻬﺎ ﻭﺭﺍﺳﺞ
ﺷﻮﻓﻲ ﻟﺞ ﻣﺪﺭﺳﺔ ﺑﻌﺪ ﻣﺎﻛﻮ ﻭﺍﻛﺴﺮ ﺭﺟﻠﺞ ﺍﺫﺍ ﻋﺘﺒﺘﻲ
ﺑﺒﺎﺏ ﺍﻟﺒﻴﺖ ﺍﺩﺭﻱ ﺑﻴﺞ ﺳﻮﺍﻟﻒ ﺍﻟﻤﺪﺍﺭﺱ ﺍﺛﺮﺕ ﻋﻠﻰ ﻋﻘﻠﺞ ﻭﺳﻜﻄﺖ ﺗﺮﺑﻴﺘﺞ ﻭﺍﻧﻲ ﺍﻋﺮﻑ ﺷﻠﻮﻥ ﺍﺭﺑﻴﺞ ﻣﻦ ﺟﺪﻳﺪ
ﺍﺟﻴﺖ ﺍﺗﺨﺒﻞ ﻣﻦ ﻋﺮﻓﺖ ﺭﺍﺡ ﻳﺒﻄﻠﻨﻲ ﻣﻦ ﺍﻟﻤﺪﺭﺳﺔ
ﺭﺣﺖ ﺭﻛﻀﺖ ﻋﻠﻴﻪ ﻭﻟﺰﻣﺖ ﺍﻳﺪﺓ ﻭﻧﺰﻟﺖ ﻋﻠﻴﻬﺎ ﺍﺑﻮﺳﻬﺎ
ﻭﺩﻣﻮﻋﻲ ﺍﺣﺲ ﺑﻴﻬﻢ ﻳﻄﻠﻌﻮﻥ ﻣﻦ ﻛﻞ ﮔﻠﺒﻲ
- ﻳﺎﺑﺔ ﺍﺭﻭﺣﻠﻚ ﻓﺪﻭﺓ ﺍﻻ ﻣﺪﺭﺳﺘﻲ ﻳﺎﺑﺔ ﻭﺍﻟﻠﻪ ﺍﻣﻮﺕ
.....
ﺟﻨﺖ ﺍﺗﺬﻛﺮ ﻛﻼﻡ ﺍﻟﻤﺪﺭﺳﺔ ﻣﺎﻟﺘﻲ ﻣﻦ ﺗﺤﺠﻲ ﻋﻦ
ﻣﺴﺘﻘﺒﻠﻨﺎ ﻭﺍﻟﺸﻬﺎﺩﺓ
ﻛﺎﻧﺖ ﺗﮕﻮﻝ
)) ﺍﻟﺸﻬﺎﺩﺓ ﺑﺎﻟﻨﺴﺒﺔ ﻟﻠﺒﻨﻴﺔ ﻣﺜﻞ ﺍﻟﻲ ﻳﻤﺸﻲ ﺑﻨﻔﻖ ﻣﻈﻠﻢ ﻭﻳﻜﻮﻥ ﺑﻨﻬﺎﻳﺔ ﺍﻟﻨﻔﻖ ﺑﺼﻴﺺ ﻣﻦ ﺍﻟﻨﻮﺭ ﺍﻟﻲ ﻳﺨﻠﻴﺞ ﺗﺘﺒﻌﻴﻨﺔ ﻟﺤﺪ ﻣﺎ ﺗﻮﺻﻠﻴﻦ ﻟﻨﻬﺎﻳﺔ ﺍﻟﻨﻔﻖ ﻭﻫﻨﺎﻙ ﺗﻜﻤﻦ ﺍﻟﺤﻴﺎﺓ ﻭﺍﻻﺣﺘﺮﺍﻡ ﺍﻟﺬﺍﺗﻲ ﻟﻠﺸﺨﺺ ﻭﺍﻟﻨﻮﺭ ﻳﻌﺒﺮ ﻋﻦ ﺍﻻﻣﻞ ((
ﻳﻌﻨﻲ ﺷﻨﻮ ﺍﻧﻲ ﺍﻧﺪﻓﻦ ﺑﺎﻟﺤﻴﺎﺓ ﻭﺍﺑﺎﻭﻉ ﺑﻌﻴﻮﻧﻲ ﺻﺪﻳﻘﺎﺗﻲ ﺷﻠﻮﻥ
ﻛﻠﻬﻢ ﻳﻜﻤﻠﻮﻥ ﻭﻳﺘﺨﺮﺟﻮﻥ ﻭﻳﺼﻴﺮﻭﻥ ﺍﺣﺴﻦ ﻣﻨﻲ
ﻭﺍﻟﻠﻪ ﻛﻔﺮ ﺍﻧﻲ ﺍﺷﻄﺮ ﻭﺣﺪﺓ ﺑﻴﻬﻢ ﻭﻣﺘﻔﻮﻗﺔ ﻭﺍﻟﻠﻪ ﻇﻠﻢ ﺍﻣﻮﻭﻭﺕ ﻭﻻ ﺍﺧﻀﻊ ﻟﻘﺮﺍﺭﻫﻢ
ﻟﻜﻦ ﻣﻊ ﺍﻻﺳﻒ ﻣﻘﺎﻭﻣﺘﻲ ﻭﺭﻓﻀﻲ ﻟﻘﺮﺍﺭ ﺑﺎﺑﺎ
ﻛﺎﻥ ﻳﺮﺟﻊ ﻋﻠﻰ ﺍﻣﻲ ﺑﻮﻗﺘﻬﺎ
ﺍﺗﺒﻌﺖ ﺳﻴﺎﺳﺔ ﺗﺠﻮﻳﻊ ﺍﻟﻨﻔﺲ
ﻭﻇﻠﻴﺖ ﻣﺎ ﺍﻛﻞ ﻭﻻ ﺍﺷﺮﺏ ﻭﺻﺮﺕ ﻣﺜﻞ ﺍﻟﺸﺒﺢ
...................
يتبع
أنت تقرأ
ثمار العار بالاحلال
Teen Fiction((ﺍﻗﺘﺮﻓﺖ ﻏﻠﻄﺘﻲ ﺑﺎﻟﺤﻼﻝ ﻭﻟﻢ ﺍﻛﻦ ﺍﻋﺼﻲ ﺍﻟﻠﻪ ﻓﻲ ﺫﻟﻚ ﻟﻜﻦ ﺗﻌﺘﺒﺮ ﻓﻌﻠﺘﻲ ﻓﻲ ﻣﺠﺘﻤﻌﻲ ﻋﺎﺭ ﻳﺴﻘﻂ ﻟﻪ ﺍﻟﺮﻗﺎﺏ ﻭﺗﺴﻮﺩ ﺑﻪ ﺍﻻﻭﺟﻪ ﻓﺨﻄﺄﺋﻲ ﻓﻲ ﻧﻈﺮﻫﻢ ﺍﺻﺒﺤﺖ ﻣﺴﺎﻭﻳﺔ ﻟﻤﻨﺰﻟﺔ ﺍﻟﺰﺍﻧﻴﺔ))
