ﺑﻌﺪ ﻣﺮﻭﺭ ﺳﻨﺘﻴﻦ ﻭﺷﻬﺮ
ﺳﻬﻰ
ﻛﻨﺖ ﻣﺪﺩﺓ ﺑﺎﻟﻔﺮﺍﺵ
ﺍﻡ ﺳﻬﻰ ﻭﻫﻲ ﺗﺪﺧﻞ ﺍﻡ ﺍﺑﺮﺍﻫﻴﻢ ﺍﻟﻤﻀﻤﺪﺓ ﺟﺎﺭﺗﻬﻢ
ﺣﺘﻰ ﺗﺠﻲ ﺗﻀﺮﺏ ﺳﻬﻰ ﺍﺑﺮﺓ
- ﺗﻌﺎﻱ ﻓﻮﺗﻲ ﺍﻡ ﺍﺑﺮﺍﻫﻴﻢ ﻣﺤﺪ ﻣﻮﺟﻮﺩ ﺑﺲ ﺍﻟﺒﻨﺎﺕ
ﺣﺘﻰ ﻣﺤﺴﻴﺖ ﻣﻦ ﺯﺭﻗﺘﻨﻲ ﺑﺎﻻﺑﺮﺓ ﺍﺑﺪ
ﺍﻡ ﺍﺑﺮﺍﻫﻴﻢ - ﺧﺎﻟﺔ ﺳﻬﺎﻭﻱ ﺷﺼﺎﻳﺮ ﺑﻴﺞ ﺣﻴﻞ ﻣﺘﻐﻴﺮﺓ
ﻭﻳﻦ ﻫﺎﻱ ﺳﻬﺎﻭﻱ ﺍﻟﻲ ﺟﺎﻧﺖ ﺟﻨﻬﺎ ﻭﺭﺩﺓ
ﺗﺘﻠﻜﺎﻧﻲ ﻣﻦ ﺍﻟﺒﺎﺏ ﺑﻀﺤﻜﺘﻬﺎ ﺍﻟﺤﻠﻮﺓ ﻭﻳﻦ ﺍﻟﻮﺟﻪ ﺍﻟﺒﺸﻮﺵ
ﺍﻡ ﺳﻬﻰ - ﺍﻱ ﻛﻠﻴﻠﻬﺎ ﻳﺎ ﺍﺑﺮﺍﻫﻴﻢ ﻣﻮﺗﺔ ﺭﻭﺣﻬﺎ ﻋﻠﻰ ﺍﺑﻨﻬﺎ
ﻣﻦ ﺍﺧﺬﻭﻩ
ﻟﻠﻴﻮﻡ ﻧﺎﻳﻤﺔ ﺑﺎﻟﻔﺮﺍﺵ ﻭﻣﺘﻘﺒﻞ ﺗﺎﻛﻞ
ﺍﺩﺭﻱ ﻫﻮﺭﺍﺡ ﻟﺒﻴﺖ ﺟﺪﺓ ﻭﻳﺘﺮﺑﻰ ﺑﺒﻴﺖ ﺍﺑﻮﻩ ﺑﻴﻦ ﺍﻫﻠﺔ ﻭﻧﺎﺳﺔ ﻭﺍﻟﻠﻪ ﻫﻴﺞ ﺍﺣﺴﻨﻠﺔ
ﻳﺎ ﻣﺎﻣﺎ ﻣﻴﺼﻴﺮ ﺗﺄﺫﻳﻦ ﻧﻔﺴﺞ ﻭﺗﺄﺫﻳﻨﻲ ﻭﻳﺎﺝ
ﺗﺮﺓ ﻣﻮ ﻋﺒﺎﻟﺞ ﺍﻧﺘﻲ ﻟﻮﺣﺪﺝ ﻣﺘﺄﺫﻳﺔ ﻭﻣﺸﻠﻮﻉ ﮔﻠﺒﺞ ﻋﻠﻰ ﺑﺰﺭﺝ
ﺗﺮﺓ ﺣﺘﻰ ﺍﻧﻲ ﺩﺍﺍﺷﻮﻑ ﺑﺰﺭﻱ ﮔﺪﺍﻡ ﻋﻴﻨﻲ ﻣﺘﺄﺫﻱ ﻭﻣﻮﺟﻮﻉ ﻫﻢ ﺣﺴﻲ ﺑﻴﺔ ﺗﺮﺓ ﺍﻧﻲ ﺍﻡ ﻣﺜﻠﺞ ﻫﻢ ﻓﻜﺮﻱ ﺑﺤﺎﻟﻲ
ﺍﻡ ﺍﺑﺮﺍﻫﻴﻢ - ﻫﺎﻱ ﺑﺪﺍﻝ ﻣﺎ ﺗﺴﺎﻋﺪﻳﻦ ﻭﺗﻌﻴﻨﻴﻦ ﺍﻣﺞ ﻋﻠﻤﻮﺩ ﺑﺎﺟﺮ ﺩﻭﺭﺍﻥ ﺍﻟﺴﻨﺔ ﻣﺎﻝ ﺍﺑﻮﺝ ﺍﻟﻠﻪ ﻳﺮﺣﻤﺔ
ﺍﻧﺘﺒﻬﺖ ﻋﻠﻰ ﺍﻣﻲ ﺷﻠﻮﻥ ﻣﺸﻠﻮﻉ ﮔﻠﺒﻬﺎ ﻭﻳﺎﻱ
ﻭﻫﻲ ﺍﻟﻲ ﺑﻴﻬﺎ ﻛﺎﻓﻴﻬﺎ ﻛﻠﺶ ﻛﺎﻓﻲ ﻭﻓﺎﺓ ﺍﺑﻮﻱ ﻗﺒﻞ ﺳﻨﺔ
ﻃﺒﻌﺎً ﺑﺎﺑﺎ ﻗﺒﻞ ﺳﻨﺔ ﺍﻧﻘﺘﻞ ﻃﺒﮕﺖ ﺳﻴﺎﺭﺓ ﻏﺮﻳﺒﺔ ﮔﺒﺎﻝ ﺑﻴﺘﻨﺎ ﻭﻧﺰﻟﻮ ﻣﻨﻬﺎ ﺍﺛﻨﻴﻦ ﻣﺘﻠﺜﻤﻴﻦ ﻭﺧﺮﻃﻮﻩ ﺑﺎﻟﺒﺎﺏ ﺑﺎﻟﺮﺷﺎﺵ ﻭﺷﺮﺩﻭ
ﻃﺒﻌﺎً ﺑﺎﺑﺎ ﻣﻮ ﺍﻭﻝ ﻗﺎﺿﻲ ﻳﺘﻌﺮﺽ ﻟﻼﻏﺘﻴﺎﻝ
ﻭﻻ ﺍﺧﺮ ﻗﺎﺿﻲ ﺑﺴﺒﺐ ﻗﻀﺎﻳﺎ ﺍﻟﻔﺴﺎﺩ ﺍﻟﻲ ﺭﻓﺾ ﺍﻟﺴﻜﻮﺕ ﻋﻨﻬﺎ ﻭﻛﺎﻧﺖ ﺍﻟﻨﺘﻴﺠﺔ ﻓﻘﺪﺍﻥ ﺣﻴﺎﺗﻪ
ﺑﺲ ﻣﺎ ﺍﺣﺠﻴﻠﻜﻢ ﻋﻦ ﺍﻟﺤﺰﻥ ﺍﻟﻲ ﺍﺗﻮﻏﻞ ﻟﺮﻭﺣﻲ ﻭﺍﺳﺘﻮﻃﻦ ﺑﻲ ﺻﺮﺕ ﺍﻣﺮﺍﺀﺓ ﻋﺠﻮﺯ ﺑﺠﺴﺪ ﻓﺘﺎﺓ ﺷﺎﺑﺔ
.......
ﻃﺒﻌﺎً ﺻﺎﺭﻟﻬﻢ ﺷﻬﺮ ﻣﻦ ﺍﺟﻮ ﺑﻴﺖ ﺍﻫﻞ ﻓﺮﺍﺱ
ﻭﺍﺧﺬﻭ ﺣﺴﻮﻧﻲ ﺍﺑﻨﻲ ﻣﻨﻲ
ﻭﻫﻤﺔ ﻣﺒﻴﻦ ﻋﻠﻴﻬﻢ ﻧﺎﺱ ﺷﻮﻳﺔ ﺑﮕﻠﺒﻬﻢ ﺭﺣﻤﺔ
ﺍﺗﻔﻘﻮ ﻭﻳﺎﻱ ﺍﻥ ﻛﻞ ﺷﻬﺮﻳﻦ ﻳﺠﻲ ﻋﻨﺪﻱ ﺍﺳﺒﻮﻉ ﺣﺘﻰ ﺍﺷﻮﻓﺔ
ﻭﻗﺒﻠﺖ ﻻﻥ ﻣﺎﻋﻨﺪﻱ ﺣﻞ ﻏﻴﺮ ﺍﻟﻤﻮﺍﻓﻘﺔ
ﺑﺲ ﻣﻮ ﺑﻴﺪﻱ ﺍﺑﻘﻰ ﺍﻡ ﻭﻓﺆﺍﺩﻱ ﻳﺤﻦ ﻟﺒﺰﺭﻱ ﻭﺑﻮﻗﺘﻬﺎ ﺍﻧﺘﻜﺴﺖ ﺣﺎﻟﺘﻲ ﻭﺍﺗﻤﺮﺿﺖ ﻋﻠﻰ ﻓﺮﺍﻛﻪ ﺍﺗﺬﻛﺮ ﺷﻠﻮﻥ ﺑﺪﻳﺖ ﺍﻓﻄﻤﺔ ﻣﻦ ﺻﺪﺭﻱ
ﻭﺷﻠﻮﻥ ﻫﻮ ﻳﺒﺠﻲ ﻋﻠﻴﻪ
ﺳﻮﺩﺓ ﻋﻠﻴﺔ ﻣﺎﻣﺎ ﺣﺴﻮﻧﻲ ﻫﺴﺔ ﺍﻧﺖ ﻭﻳﻦ ﻭﺑﻴﺎ ﺣﺎﻝ ﺩﺗﺒﺠﻲ ﻋﻠﻴﺔ ﺗﺮﻳﺪﻧﻲ ﻟﻮ ﻣﺮﺗﺎﺡ ﻭﺍﻟﺘﻬﻴﺖ ﻭﻳﺔ ﺍﻫﻠﻚ ﻭﻧﺴﻴﺘﻨﻲ
ﺍﺍﺍﺥ ﻳﺎﺩﻧﻴﺎ ﺑﻌﺪ ﺷﻨﻮ ﺿﺎﻣﺘﻠﻲ ﻣﺎﻛﺎﻓﻲ
ﻗﻬﺮ ﻭﺣﺰﻥ ﺍﻱ ﺷﻮﻛﺖ ﺍﻋﻴﺶ ﻣﺜﻞ ﺍﻟﺒﺸﺮ
ﺍﺗﺬﻛﺮ ﻣﻦ ﺍﺟﻮ ﺍﺧﺬﻭﻩ ﻣﻨﻲ ﺷﻠﻮﻥ ﻓﺮﻓﺢ ﻣﻦ ﺍﻟﺒﺠﻲ ﻋﻠﻴﺔ
ﻭﺍﻧﻲ ﺻﺮﺕ ﻣﺜﻞ ﺍﻟﻄﻴﺮ ﺍﻟﻤﺬﺑﻮﺡ ﻭﺍﻟﻠﻪ ﻇﻠﻴﺖ ﺍﻛﻤﺰ ﻣﻦ
ﺍﻟﻘﻬﺮ ﻋﻠﻰ ﻭﻟﻴﺪﻱ
ﺍﻧﻬﺎﺭﻳﺖ ﺑﻴﻮﻣﻬﺎ ﻭﺍﻣﻲ ﻭﺭﻳﻢ ﺍﺑﺘﻠﻮ ﺑﻴﺔ
ﻃﺒﻌﺎً ﺍﺧﻮﺗﻲ ﻭﻧﺴﻮﺍﻧﻬﻢ ﻫﺬﻭﻟﻲ ﻣﺎﻗﺼﺮﻭ
ﺑﺎﻟﻄﺎﻟﻌﺔ ﻭﺍﻟﻨﺎﺯﻟﺔ
ﻳﺴﻤﻌﻮﻧﻲ ﺣﺠﻲ ﻳﺴﻢ ﺍﻟﺒﺪﻥ
ﺍﺗﺬﻛﺮ ﻭﻻ ﻣﺮﺓ ﻳﻌﺒﺮ ﻋﻠﻴﺔ ﻳﻮﻡ ﺍﺫﺍ ﻣﻮ ﻭﺣﺪﺓ ﻣﻦ ﻧﺴﻮﺍﻧﻬﻢ ﺗﺬﺑﻠﻲ ﺣﺠﺎﻳﺔ ﺗﺮﺟﻔﻨﻲ ﻣﻦ ﺍﻟﻘﻬﺮ
...........
ﻃﺒﻌﺎً ﺍﺗﺬﻛﺮ
ﺍﺧﺬﺕ ﺭﻗﻢ ﺍﻟﺤﺠﻴﺔ ﺍﻡ ﻓﺮﺍﺱ ﺣﺘﻰ ﺍﺗﻮﺍﺻﻞ ﻭﻳﺎﻫﺔ ﻣﻦ ﻧﻘﺎﻝ ﺍﻣﻲ
ﺍﻧﻲ ﻣﺎﻋﻨﺪﻱ ﻧﻘﺎﻝ ﻻﻥ ﺍﻟﻨﻘﺎﻝ ﺍﻟﻲ ﺍﺷﺘﺮﺍﻩ ﺍﻟﻲ ﻓﺮﺍﺱ
ﻛﺴﺮﺓ ﻗﺘﻴﺒﺔ ﻣﻦ ﺷﺎﻓﻨﻲ ﺍﺣﺠﻲ ﺑﻲ ﻭﻳﺔ ﺍﻫﻞ ﻓﺮﺍﺱ
ﻣﺎ ﺍﻋﺮﻑ ﻟﻴﺶ ﺍﺧﻮﺗﻲ ﻛﻠﺶ ﺣﺪﻳﻴﻦ ﻭﻳﺎﻱ
ﻭﺻﻌﺒﻮ ﻋﻠﻴﺔ ﺣﻴﺎﺗﻲ ﻭﻛﺮﻫﻮﻧﻲ ﺑﻌﻴﺸﺘﻲ ﻓﻮﻙ ﻣﺎ ﺍﻧﻲ
ﻋﺎﻳﺸﺔ ﺑﺠﺤﻴﻢ
ﺭﺍﻭﻧﻲ ﺍﻟﻮﻳﻞ ﻟﻜﻦ ﻗﺴﺎﻭﺗﻬﻢ ﺑﺲ ﻭﻳﺎﻱ
ﺑﺲ ﻭﻳﺔ ﻧﻮﺭ ﻭﺭﻳﻢ ﻋﺎﺩﻱ ﺗﺼﺮﻓﻬﻢ ﻃﺒﻴﻌﻲ
ﻗﺮﺭﺕ ﺍﻛﻮﻡ ﻋﻠﻰ ﺣﻴﻠﻲ ﻣﻦ ﺷﻔﺖ ﺣﺴﺮﺕ ﺍﻣﻲ
ﻭﻋﻴﻮﻧﻬﺎ ﺍﻟﺬﺑﻼﻧﺔ
ﺷﻮﻳﺔ ﺣﺴﻴﺖ ﺑﺘﺤﺴﻦ ﻣﻦ ﺯﺭﻗﺘﻨﻲ ﺍﻡ ﺍﺑﺮﺍﻫﻴﻢ ﺑﺎﺑﺮﺓ
ﻭﻛﻌﺪﺕ ﻭﺭﺣﺖ ﻟﻠﺤﻤﺎﻡ ﻏﺴﻠﺖ ﻭﺑﺪﻟﺖ ﻣﻼﺑﺴﻲ ﻭﻧﺰﻟﺖ ﺟﻮﺓ ﺣﺘﻰ ﺍﺳﺎﻋﺪﻫﻢ ﺷﻔﺖ ﺭﻳﻢ ﻭﻧﻮﺭ ﻭﺍﻣﻲ ﻭﺟﺎﺭﺍﺗﻨﺎ ﻣﺘﺠﻤﻌﺎﺕ ﺩﻳﺸﺘﻐﻠﻮﻥ ﻭﻳﻄﺒﺨﻮﻥ ﺍﻟﺜﻮﺍﺏ ﺑﺎﻟﻤﻄﺒﺦ
ﻭﺷﻔﺖ ﻟﻤﻴﺎﺀ ﺩﺗﻨﻈﻒ ﺑﺎﻟﺒﻴﺖ ﻭﺑﻨﺘﻬﺎ ﺷﻬﺪ ﺗﺒﺠﻲ ﺭﺣﺖ ﻋﻠﻴﻬﺎ ﻭﺷﻠﺘﻬﺎ ﻭﺷﻤﻴﺖ ﺭﻳﺤﺘﻬﺎ ﺍﻭﻭﻭﻭﻑ ﻫﻲ ﻣﻦ ﻋﻤﺮ ﺣﺴﻮﻧﻲ
ﻃﺒﻌﺎً ﻣﺎ ﺍﺣﺠﻴﻠﻜﻢ ﻋﺎﻻﺫﻳﺔ ﺍﻟﻲ ﺷﻔﺘﻬﺎ ﻋﻠﻰ ﺍﻳﺪ ﺍﺧﻮﺗﻲ ﻗﺘﻴﺒﺔ ﻭﺍﺣﻤﺪ ﺯﺍﺩﺕ ﻣﻦ ﺑﻌﺪ ﻭﻓﺎﺓ ﺑﺎﺑﺎ
ﻋﻠﻨﻮ ﻋﻠﻴﺔ ﺍﻟﺤﺮﺏ ﻭﻛﺄﻥ ﺑﺎﺑﺎ ﻛﺎﻥ ﺩﺭﻉ ﺍﻟﺤﻤﺎﻳﺔ ﻣﺎﻟﺘﻲ ﻭﻣﻦ ﺍﺗﻮﻓﻰ ﺍﻟﻠﻪ ﻳﺮﺣﻤﺔ ﻫﻤﺔ ﺍﻧﻬﺪﻭ ﺑﻴﺔ
ﻳﻌﻨﻲ ﻣﺮﺍﺕ ﺍﺣﺲ ﺑﻴﻬﻢ ﺑﻄﻠﻌﻮﻥ ﻋﻀﻼﺗﻬﻢ ﻛﺪﺍﻡ ﻧﺴﻮﺍﻧﻬﻢ ﻭﻳﺘﻘﻮﻥ ﻋﻠﻴﺔ
ﻣﺮﺍﺕ ﺍﻣﻲ ﺗﺼﺪﻫﻢ ﻋﻨﻲ ﺑﺲ ﻣﺘﻜﺪﺭ ﻋﻠﻴﻬﻢ
ﺭﺣﺖ ﺍﻧﻄﻴﺖ ﺷﻬﺪ ﻻﻣﻬﺎ
ﻭﺩﺧﻠﺖ ﻋﻠﻴﻬﻢ ﺑﺎﻟﻤﻄﺒﺦ ﺑﻌﺪ ﻣﺎ ﺳﻠﻤﺖ
ﻭﻛﻌﺪﺕ ﺍﺳﺎﻋﺪﻫﻢ ﺑﺎﻟﻄﺒﺦ ﻭﺍﻟﺸﻐﻞ ﻭﺍﻟﺘﻬﻴﺖ ﻭﻓﻌﻼ ﻛﺎﻥ ﺍﻟﻬﺎﺀ ﻣﻔﻴﺪ
ﺭﻳﻢ - ﺳﻬﻰ ﻋﻔﻴﺔ ﺧﻠﻲ ﺍﻧﻜﻤﻞ ﺍﻟﺘﻤﺮ ﻭﺍﻟﻠﺒﻦ ﺑﺴﺮﻋﺔ ﺣﺘﻰ
ﻧﻠﺤﻚ ﻧﻮﺯﻋﺔ ﺗﺮﺓ ﺍﻟﻨﺴﻮﺍﻥ ﻋﻠﻰ ﺟﻴﺔ ﻫﺴﺔ ﺭﺍﺡ ﻳﺒﺪﻱ ﺍﻟﻤﺄﺗﻢ
ﺍﻡ ﺳﻬﻰ - ﻣﺎﻣﺎ ﻣﻮ ﺗﻨﺴﻮﻥ ﺍﻟﺨﺘﻤﺔ ﻣﺎﻟﺖ ﺍﻟﻘﺮﺍﻥ ﻭﺯﻋﻮ ﺍﻻﺟﺰﺍﺀ ﻋﻠﻰ ﺍﻟﺒﻨﺎﺕ
ﻭﻓﻌﻼً ﻭﺭﺓ ﻋﺪﺓ ﺳﺎﻋﺎﺕ ﺧﻠﺺ ﻛﻠﺸﻲ ﻭﺗﻢ ﺗﻮﺯﻳﻊ ﺍﻟﺜﻮﺍﺏ ﻋﻠﻰ ﺭﻭﺡ ﺑﺎﺑﺎ ﻭﺍﻟﺘﻬﻮ ﺍﺧﻮﺗﻲ ﺑﺘﺄﺟﻴﺮ ﺳﻴﺎﺭﺓ ﺟﺒﻴﺮﺓ ﺣﺘﻰ ﻳﺴﺎﻓﺮﻭﻥ ﺑﻴﻬﺎ ﻟﻠﻨﺠﻒ ﻓﺎﻟﺘﻤﻮ ﺍﻻﻗﺎﺭﺏ ﻭﻋﻤﻲ ﻗﺎﺳﻢ ﻣﻨﺎﻙ ﻛﺎﻝ ﺍﻟﺘﻘﻲ ﺑﻴﻜﻢ ﻭﺧﻄﻴﺔ ﺍﺧﻮﻳﺔ ﺍﻟﺠﺒﻴﺮ ﺍﻣﺠﺪ ﻛﺎﻝ ﺭﺍﺡ ﺍﻧﺰﻝ ﻣﻦ ﻣﻄﺎﺭ ﺍﻟﻨﺠﻒ ﻭﺍﻟﺘﻘﻲ ﺑﻴﻜﻢ ﻭﺍﺧﻴﺮﺍً ﺧﻠﺺ ﺩﺭﺍﺳﺘﺔ ﻫﻨﺎﻙ ﻭﺭﺍﺡ ﻳﺮﺟﻊ ﻫﻮ ﻭﺯﻭﺟﺘﺔ ﻭﺍﻭﻻﺩﻩ
ﻗﺘﻴﺒﺔ - ﻳﻤﺔ ﺗﺮﺓ ﺳﻬﻰ ﻣﺘﺠﻲ ﻭﻳﺎﻧﺔ ﻓﺎﻫﻤﺔ
ﺍﻡ ﺳﻬﻰ - ﻟﻴﺶ ﻳﻤﺔ ﻗﺘﻴﺒﺔ ﺗﺮﺓ ﻫﺎﻱ ﺳﻨﻮﻳﺔ ﺍﺑﻮﻫﺎ ﻛﻠﺶ ﻛﺎﻓﻲ ﺍﻧﺘﻮ ﻣﻘﺒﻠﺘﻮ ﺗﺤﻀﺮ ﺑﺎﻻﺭﺑﻌﻴﻦ ﻳﻌﻨﻲ ﺣﺘﻰ ﺍﻟﺴﻨﻮﻳﺔ ﺗﺮﺩﻭﻥ ﺗﺤﺮﻣﻮﻧﻬﺎ
ﺍﺣﻤﺪ - ﻳﻤﺔ ﻧﺺ ﺟﻤﺎﻋﺘﻲ ﻭﺟﻮﺍﺭﻳﻨﺎ ﻳﺠﻮﻥ
ﻭﺍﺧﺎﻑ ﻳﺸﻮﻓﻮﻧﻬﺎ ﻭﻳﺘﺬﻛﺮﻭﻥ ﺳﺎﻟﻔﺘﻬﺎ ﻭﻛﺒﺎﻝ ﺟﻤﺎﻋﺘﻲ ﻭﺍﻧﺘﻲ ﺍﻟﺤﻤﺪ ﻟﻠﻪ ﺗﻌﺮﻓﻴﻦ ﺟﺎﺭﺍﺗﻨﺎ ﺍﻟﻲ ﻫﻨﺔ ﺻﺪﻳﻘﺎﺗﺞ . ﺷﻜﺪ
ﻣﻴﺤﺒﻦ ﺍﻟﻜﺮﻛﺔ ﻭﺍﻟﻠﻐﻮﺓ ﻓﻜﻔﺎً ﻟﻼﺷﻜﺎﻝ ﻣﺘﺠﻲ ﺳﻬﻰ
ﻭﻛﺎﻥ ﻗﺘﻴﺒﺔ ﻣﺆﻳﺪ ﻟﻜﻼﻡ ﺍﺣﻤﺪ
ﻭﺑﻮﻗﺘﻬﺎ ﺍﻧﻤﺮﺩﺕ ﻣﺮﺩ ﻣﺘﺖ ﻗﻬﺮ ﺣﺴﻴﺖ ﺑﺎﻟﻈﻠﻢ ﻭﺍﻟﻐﺼﺔ ﺷﻜﻠﺖ ﺑﺼﺪﺭﻱ
ﻟﻴﺶ ﺣﺮﺍﻡ ﻋﻠﻴﻬﻢ ﺍﻧﻲ ﺍﺭﻳﺪ ﺍﺯﻭﺭ ﺑﺎﺑﺎ ﺣﺎﻟﻲ ﺣﺎﻟﻬﻢ
ﺑﺲ ﺣﻜﻢ ﺍﻟﻘﻮﻱ ﻋﺎﻟﻀﻌﻴﻒ
ﻭﻓﻌﻼً ﺑﻴﻮﻣﻬﺎ ﻛﻠﻬﻢ ﺭﺍﺣﻮ ﻭﺑﻴﻘﻴﺖ ﻟﻮﺣﺪﻱ ﺑﺎﻟﺒﻴﺖ ﺑﺲ ﺑﻨﺖ
ﺧﺎﻟﻲ ﺗﻮﻓﻴﻖ ﻭﺍﺑﻨﺔ ﻳﺼﻴﺮ ﺑﺼﻒ ﺍﻟﺴﺎﺩﺱ ﺍﻋﺪﺍﺩﻱ
ﺑﻘﻮﺍ ﻳﻤﻲ ﺑﺎﻟﺒﻴﺖ
ﻭﻳﻮﻡ ﺛﺎﻧﻲ ﻛﻌﺪﺕ ﻋﻴﻮﻧﻲ ﻣﻮﺭﻣﺔ ﻣﻦ ﺍﻟﺒﺠﻲ
ﻭﺍﺗﻮﺟﻬﺖ ﻟﻠﻤﻄﺒﺦ ﻻﻥ ﺍﻟﻴﻮﻡ ﺭﺍﺡ ﻳﺮﺟﻌﻮﻥ ﻣﻦ ﺍﻟﺰﻳﺎﺭﺓ ﻓﺸﻲ ﺍﻛﻴﺪ ﺭﺍﺡ ﻳﺠﻮﻥ ﻧﺎﺱ ﻭﻳﺎﻫﻢ ﺧﻄﺎﺭ ﻭﺍﺧﻮﻱ ﺍﻣﺠﺪ
ﺣﺒﻴﺐ ﮔﻠﺒﻲ ﺍﻟﻲ ﺍﺑﺪ ﻣﺘﺮﻛﻨﻲ ﺑﺎﻟﺸﺪﺓ ﻣﺎﻟﺘﻲ ﺩﺍﺋﻤﺎً
ﻳﺘﺼﻞ ﻋﻠﻰ ﺍﻣﻲ ﻭﻳﺴﺄﻝ ﻋﻨﻲ ﻭﻳﺤﺠﻲ ﻭﻳﺎﻱ
ﻭﻳﻮﺍﺳﻴﻨﻲ ﺳﻮﺍﺀ ﻣﻦ ﻋﺮﻑ ﺑﺤﻤﻠﻲ ﺍﻭ ﻣﻦ ﺍﺗﻮﻓﻰ ﺑﺎﺑﺎ
ﺻﺤﻴﺢ ﺑﻌﻴﺪ ﻋﻨﻲ ﺑﺲ ﻛﺪﺭ ﻳﻮﺻﻞ ﺣﻨﺎﻧﺔ ﺍﻟﻲ
ﺭﺣﺖ ﻟﻠﻤﻄﺒﺦ ﻭﻃﻠﻌﺖ ﺍﻟﻠﺤﻢ ﻭﺍﻟﺪﺟﺎﺝ ﻭﺟﺪﺭ ﺍﻟﺪﻭﻟﻤﺔ ﺍﻟﻲ ﺳﻮﺗﺔ ﺍﻣﻲ ﻫﻲ ﻭﺟﺎﺭﺗﻨﺎ ﺍﻡ ﺍﺑﺮﺍﻫﻴﻢ
ﻭﺍﻟﺘﻬﻴﺖ ﺑﺎﻟﺸﻐﻞ ﻭﺭﺣﺖ ﻟﻐﺮﻓﺔ ﺍﺧﻮﻳﺔ ﺍﻣﺠﺪ ﻭﻛﻌﺪﺕ ﺍﻧﻈﻒ ﺑﻴﻬﺎ ﺍﻧﻲ ﻭﺑﻨﺖ ﺧﺎﻟﻲ ﺯﻫﻮﺭ ﻭﺟﻬﺰﺗﻬﺎ ﻭﻓﺮﺷﺖ ﻓﺮﺷﺔ ﺟﺪﻳﺪﺓ
ﻭﺍﻟﻠﻪ ﻭﺭﺓ ﺳﺎﻋﺘﻴﻦ ﺳﻤﻌﺖ ﺍﺻﻮﺍﺗﻬﻢ
.....
ﻳﻤﺔ ﻣﻦ ﺷﻔﺘﺔ ﺩﺧﻞ ﻟﺒﻴﺘﻨﺎ ﻭﺍﻟﻠﻪ ﺷﻌﻮﺭ ﻣﺎ ﺍﻛﺪﺭ ﺍﻭﺻﻔﺔ ﺍﻟﻜﻢ
ﻋﺒﺎﻟﻚ ﺷﻔﺖ ﺑﺎﺑﺎ ﺑﺪﺧﻠﺘﺔ ﻻﻥ ﺻﺎﻳﺮ ﻛﻠﺶ ﻳﺸﺒﻪ ﺑﺎﺑﺎ
ﺣﺒﻴﺒﻲ ﺍﻧﻲ ﺷﻔﺘﺔ ﻭﺍﻧﻲ ﻣﻜﺪﺭﺕ ﺍﺗﻤﺎﻟﻚ ﻧﻔﺴﻲ ﺭﻛﻀﺖ ﻋﻠﻴﻪ ﻭﺷﻤﺮﺕ ﻧﻔﺴﻲ ﺑﺤﻀﻨﺔ ﻭﻇﻠﻴﺖ ﺍﺷﻬﻚ ﻣﺜﻞ ﺍﻟﻄﻔﻠﺔ ﺍﻟﻲ ﻣﻦ ﺗﺸﻮﻑ ﺍﺑﻮﻫﺎ ﺗﮕﻌﺪ ﺗﺸﺘﻜﻴﻠﺔ ﻋﻦ ﺍﻻﻟﻢ ﺍﻟﻲ ﺍﺗﻌﺮﺿﺖ ﻟﻪ ﺑﻐﻴﺎﺑﻪ
ﻭﻫﻮ ﻣﻘﺼﺮ ﻓﺘﺤﻠﻲ ﺫﺭﺍﻋﻪ ﻭﺍﺧﺬﻧﻲ ﻟﺤﻀﻨﺔ
ﺍﻣﺠﺪ - ﻟﺞ ﻫﺎﻱ ﺷﻨﻮ ﺑﻌﺪﺝ ﺍﻡ ﺩﻣﻴﻌﺔ ﺧﺮﺏ
ﻣﻮ ﻋﻠﻰ ﺍﺳﺎﺱ ﺻﺮﺗﻲ ﺍﻡ ﺣﺴﻮﻧﻲ
ﺍﺷﻮ ﺑﻌﺪﺝ ﺯﻋﻄﻮﻃﺔ
ﺍﻣﺴﺢ ﺑﺪﻣﻮﻋﻲ ﻭﺍﺳﺤﺐ ﻧﻔﺲ ﻣﻦ ﺧﺸﻤﻲ
- ﺍﻱ ﺻﺤﻴﺢ ﺻﺮﺕ ﺍﻡ ﺣﺴﻦ ﺑﺲ ﻫﺬﺍ ﻣﺎ ﻳﻐﻴﺮ ﺍﻥ ﺑﻌﺪﻧﻲ ﺍﺧﺘﻚ ﺍﻟﺼﻐﻴﺮﺓ
- ﻭﺍﺣﻠﻰ ﺍﺧﺖ ﺑﺲ ﺗﻌﺎﻱ ﺍﺷﻮ ﺣﻠﻴﺎﻧﺔ ﺑﻨﺖ ﺍﻟﻠﺬﻳﻦ
- ﻳﺎﻋﻴﻨﻲ ﻋﻴﻮﻧﻚ ﺍﻟﺤﻠﻮﺍﺕ ﻭﺗﺸﻮﻓﻨﻲ ﺣﻠﻮﺓ
ﻭﺭﺣﺖ ﻋﻠﻰ ﺍﻭﻻﺩﻩ ﻫﻤﺎﻡ ﻭﻧﺒﺮﺍﺱ
ﻭﺍﺣﺪ ﺧﻤﺲ ﺳﻨﻮﺍﺕ ﻭﺍﻟﺜﺎﻧﻲ ﺛﻼﺙ ﺳﻨﻮﺍﺕ
ﻭﺳﻠﻤﺖ ﻋﻠﻰ ﺗﻤﺎﺭﺓ ﺯﻭﺟﺘﺔ ﻛﻠﺶ ﺣﺒﺎﺑﺔ ﻋﻜﺲ ﺯﻭﺟﺔ ﺍﺣﻤﺪ ﻣﻬﺎ ﻭﻟﻤﻴﺎﺀ ﺯﻭﺟﺔ ﻗﺘﻴﺒﺔ
ﻭﺍﺟﺘﻤﻌﻨﺎ ﻭﺍﻟﺘﻬﻴﻨﺎ ﺻﺒﻴﻨﺎ ﺍﻟﻐﺪﺓ ﻭﻛﺎﻧﺖ ﺍﻟﻠﻤﺔ ﻛﻠﺶ ﺣﻠﻮﺓ ﻳﻌﻨﻲ ﺻﺤﻴﺢ ﺍﺣﻨﺎ ﻋﺎﺋﻠﺔ ﺑﺲ ﻣﻊ ﺍﻻﺳﻒ
ﻓﺎﻗﺪﻳﻦ ﻧﻌﻤﺔ ﺍﻟﻠﻤﺔ ﻭﺍﻻﻟﻔﺔ ﻳﻌﻨﻲ ﻣﻨﻜﻌﺪ ﻋﻠﻰ ﺍﻻﻛﻞ ﺳﻮﻳﺔ ﺍﻭ ﻧﺠﺘﻤﻊ ﻛﻠﻨﺎ ﺑﻔﺪ ﺻﺎﻟﺔ ﻭﺣﺪﺓ
ﻫﺬﺍ ﺍﻟﺸﻲ ﺍﺧﺘﻔﻰ ﻣﻦ ﺣﻴﺎﺗﻨﺎ
ﺍﺧﻮﺗﻲ ﺍﺣﻤﺪ ﻭﻗﺘﻴﺒﺔ ﻛﻠﻤﻦ ﺑﻐﺮﻓﺘﺔ ﻭﻳﺔ ﺯﻭﺟﺘﺔ
ﺣﺘﻰ ﻣﺮﺍﺕ ﻳﺘﻐﺪﻭﻥ ﺑﻨﻔﺲ ﺍﻟﻐﺮﻓﺔ ﻋﺎﺩﻱ ﻋﻨﺪﻫﻢ ﻣﻴﺸﺎﺭﻛﻮﻧﺔ ﺍﻭﻗﺎﺕ ﺍﻻﻛﻞ ﻭﺍﺗﻌﻮﺩﻧﺎ ﻋﻠﻴﻬﻢ ﻭﺍﻣﻲ ﻣﻦ ﺍﻟﻨﻮﻉ ﺍﻟﻤﺴﺎﻟﻤﺔ ﺍﻟﻲ ﻣﺘﺤﺐ ﺍﻟﻤﺸﺎﻛﻞ
ﻭﻣﺮﺕ ﺍﻻﻳﺎﻡ ﻭﻻﺣﻆ ﺍﻣﺠﺪ ﺗﻌﺎﻣﻞ ﺍﺧﻮﺗﻲ ﻭﻳﺎﻱ ﻭﺯﻣﺨﻬﻢ ﻋﻠﻴﺔ ﺣﺘﻰ ﻣﺮﺍﺕ ﻳﺪﺍﻓﻌﻮﻥ ﻟﻨﺴﻮﺍﻧﻬﻢ ﻭﻳﻈﻠﻮﻥ ﻳﻐﻠﻄﻮﻥ ﻭﻳﺘﺠﺎﻭﺯﻭﻥ ﻣﺮﺓ ﻣﻦ ﺍﻟﻤﺮﺍﺕ ﺳﻤﻊ ﺍﺣﻤﺪ
- ﺷﻮﻓﻲ ﻟﺞ ﻋﺎﺭ ﺍﻧﺘﻲ ﻫﻨﺎ ﻋﺎﻟﺔ ﺗﻜﻌﺪﻳﻦ ﻭﺗﻨﺠﺒﻴﻦ
ﻓﺎﻫﻤﺔ ﻟﺘﺘﻄﺎﻭﻟﻴﻦ ﻋﻠﻰ ﻣﺮﺗﻲ ﺗﺮﺓ ﻣﻬﺎ ﺗﺎﺝ ﺭﺍﺳﺞ
ﻋﻠﻰ ﺍﻻﻗﻞ ﺍﺷﺮﻑ ﻣﻨﺞ ﻣﻨﻄﺖ ﻧﻔﺴﻬﺎ ﻭﺻﺎﻧﺘﻬﺎ ﻟﺤﺪ ﻣﺎ ﺍﺟﺘﻲ ﻟﺒﻴﺘﻲ
ﺳﻬﻰ - ﺍﺣﻤﺪ ﻣﺎﻟﺔ ﺩﺍﻋﻲ ﻫﺬﺍ ﺍﻟﻜﻼﻡ
يتبع
أنت تقرأ
ثمار العار بالاحلال
Fiksi Remaja((ﺍﻗﺘﺮﻓﺖ ﻏﻠﻄﺘﻲ ﺑﺎﻟﺤﻼﻝ ﻭﻟﻢ ﺍﻛﻦ ﺍﻋﺼﻲ ﺍﻟﻠﻪ ﻓﻲ ﺫﻟﻚ ﻟﻜﻦ ﺗﻌﺘﺒﺮ ﻓﻌﻠﺘﻲ ﻓﻲ ﻣﺠﺘﻤﻌﻲ ﻋﺎﺭ ﻳﺴﻘﻂ ﻟﻪ ﺍﻟﺮﻗﺎﺏ ﻭﺗﺴﻮﺩ ﺑﻪ ﺍﻻﻭﺟﻪ ﻓﺨﻄﺄﺋﻲ ﻓﻲ ﻧﻈﺮﻫﻢ ﺍﺻﺒﺤﺖ ﻣﺴﺎﻭﻳﺔ ﻟﻤﻨﺰﻟﺔ ﺍﻟﺰﺍﻧﻴﺔ))
