Take My Rainbow Heart

CHAPTER 3

Tinatahak na ni Whian ang daan habang sinusundan si Michael nang magtaka siya dahil hindi naman ito ang daan patungo sa opisina nito.

Unti-unti na siyang nagdududa dahil nagsinungaling ito sa kanya at pangamba dahil posibleng may matutuklasan siyang lihim nito. Nagpatuloy lamang siya sa pagsunod dito. Umabot ng kalahating oras at isang oras ng hindi niya napapansin, hanggang sa huminto ang sasakyan nito sa isang bahay na hindi naman kalakihan.

Nang bumaba ito sa sariling kotse ay may lumabas namang sexy'ng babae sa bahay, hawak nito sa isang kamay ang isang batang lalaki na sa tingin niya ay nasa edad lima.

Nang makita ng bata si Michael ay agad itong tumakbo, tuwang-tuwa ito at halatang sabik na sabik sa mga yakap ng una. Sumigaw naman ang bata at tinawag itong...

"Daddy!"

Napakagat-labi si Whian sa kanyang mga nakita. Kasabay naman no'n, ang pamumuo ng mga luha sa kanyang mga mata.

Hindi siya makapaniwala sa nakita, dinig na dinig niya ang pagtawag ng bata sa kasintahan.

Nakaramdam siya ng galit at pagkamuhi kay Michael. Sapat na sa kanya ang mga nakita para lisanin ang lugar na iyon.

***

Sa halip na sa bahay siya dumiretso ay nagtungo siya sa isang bar, na kung saan madalas nilang pinupuntahan noon ni Laiza.

Nag-order siya ng isang bucket ng beer at agad binuksan ang isang bote. Naglagay siya sa isang baso at walang pag-aalinlangang tinungga iyon. Kahit hindi siya sanay sa lasa niyon ay pilit niyang nilunok iyon.

Nakakadalawang bote na siya ng alak nang may narinig siyang pamilyar na boses na kumakanta sa loob ng bar at nang nilingon niya nga ito ay nakita niya si Laiza, hawak nito ang isang gitara at kumakanta sa ibabaw ng stage. Tinapunan niya lamang ito ng tingin at nagpatuloy lamang siya sa pag-inom.

Nakakatatlong bote na siya ng alak at medyo lasing na, nang may lumapit sa table niya. Isa itong lalaki na may malaking pangangatawan.

***

Bago pa man mag-umpisa sa pagkanta si Laiza ay nakita na niya si Whian sa 'di kalayuan. Nagpatay mali lamang siya at nagpatuloy sa ginagawa.

Natapos ang kanyang kanta nang hindi sinasadyang napadako ulit ang mga mata niya sa gawi nito. Nakaramdam naman siya ng pag-aalala, nang may makitang papalapit na lalaki rito.

"Excuse me Miss mag-isa ka lang ata. Can I join you?" narinig niyang tanong ng lalaki nang makalapit siya.

"Will you please leave me alone?" matigas na sabi naman ni Whian at tumungga ulit ng isang baso ng beer.

"Excuse me. Kasama ko siya," mahina ngunit maawtoridad ang boses na sabi niya sa lalaki, lumapit naman siya sa tabi ni Whian.

"Ah! Okay," sagot naman ng lalaki saka iniwan na sila.

Nang nilingon niya ang kaibigan ay halatang nahihilo na ito. "Whian? Anong nangyari sa 'yo? At tayka, bakit ikaw lang mag isa? Nasa'n si Michael?"

"Isa ka pa! Ano bang pakialam mo?" asik nito sa kanya habang nangungunot ang noo.

"Lasing ka na. Tigilan mo na 'yan," mahinahon niyang sabi at akmang iaangat na sana ang braso nito upang ilagay sa kanyang leeg nang iwinaksi nito ang kamay niya.

"Pabayaan mo 'ko! 'Di ba galit ka sa 'kin? Oh? Bakit nandito ka?" akmang iinom ulit ito sa baso.

Inawat niya ito. "Halika na. Tigilan mo na kasi 'yan," mahina pa ring sabi niya.

Kukunin sana nito ang baso sa kanya ngunit dahil nga lasing na ito ay hindi ito nagtagumpay. Kinuha naman nito ang isang bote ng beer sa lamesa at tinungga iyon. Aagawin din sana niya iyon nang sa hindi sinasadya ay nadulas iyon sa mga kamay nila at nabasag sa sahig. Sa nangyaring iyon ay marami na ang napapalingon sa kanila.