مكتوبة ليك - باللهجة الليبية-

الجزء الأول

ابرئ ذمتي امام الله من ذنبك عزيزي القارئ
مش مسامحة من ينشر الرواية من دون اسمي
بقلم: عائشة الشيلابي
...

مقمعزة وحدي، غرفتي مظلمة وريحة الارض المبلولة تداعب في انفي..
في جنبي الراديو، يدي على السنسال اللي هداه ليّ قبل سنتين، ونفكر،
ليا فوق السنة نفكر بشكل متواصل حتى في النوم نحلم باللي قضيت وقتي نفكر فيه، رفعت صوت المذياع

" كل لما اقول انا لازم انسى ببقى ليه مترددة، شكلي بقيت بعشق عذابي و على الدموع متعودة."

يتسرب لقلبي احساس إليسا، يشيل فيا لمكان بعيد..

١٩.ديسمبر.٢٠١٥

إسراء: ايلاف صبي هيا بابا قال بنطلعو
ايلاف: خلوني في الحوش مانبيش نعدي
سليمة: نوضي سلم بنتي تو باتك يزعل منك

لبست عشوائي، مالبستش زي ما يلبس الانسان في اليوم اللي حياته فيه حتتغير..
نزلت للمكان، كانت مساحة منه معشبة، على اليمين زرع وعلى اليسار العاب؛ وقديش ما نحب صوت الاطفال وهم يلعبو!♥️

ايلاف: شوفي ياسرو محلاها البنية
اسراء: ياناري مش محصلة دورها من هالعيال
ايلاف: خوذي شنطتي تو نمشي نلعبها
اسراء: اوكِ انا قمعزت هنا جنب ماما
-
ثنيت ركبيا ونزلتلها: شن اسمك ي سمحة؟
قالت بتردد: اسمي روز
قلتلها وانا عارفة مش حتفهمني: وانتِ فعلاً روز ياروزي

خذيت بيدها وانا ندرجح فيها، بان الابتهاج على وجه روز ونزلت تجري

طاحت في حضن الراجل اللي جاها، وانا وقفت متجمدة في مكاني
ايهاب: قولي شكراً لعميمة اللي كانت تدرجح فيك
روز برمت بابتسامة كبيرة قالتلي: قالك بابا ايهاب شكراً
عيوني مازالن فيه وافكار واجد يتخبطن في راسي، بين إني مستغربة وإني فرحت..
رفع روز حطها في حضنه؛ ومازلت متجمدة: عفواً في حاجة؟
جت اسراء ونغزتني، صحيت وقتله: ابدا مافيش، روزي كانت تبي تلعب ومعش حصلت دورها بس.
مسك روز بيد وحدة وحط يده في جيبه،ابتسم ومدلي كرت: شكراً واجد، هذا كرتي لو احتجتي شي..
-
خشت اسراء لدارنا وفي يدها سفرة
اسراء: ايلاف ولقت اليسا شن يفضها عاد توا
ضحكت وقلتلها: الله يسامحك قطعتي عليا افضل جزء
اسراء: شن نديرلك غالي عليك النكد، تعالي قالتلك ماما قمعزي معانا ودرت سفرة بيش تصوريها
نزلت من فوق المكتب، عدلت شخشيري وطلعت..
-
الشتاء و صوت المطر و ريحة الارض المبلولة، النوم بدري، وقعدتنا كلنا حوالين الدفاية على مسرحية قديمة، صوت هلي ونحن نهدرزو.. كلهن حاجات يدفن قلبي مهما كانت درجة الحرارة..🖤

رقدت على رجل ماما، وبدت تمسح على شعري
سليمة: شاغلني حالك والله، امتى بتردي لقرايتك
ايلاف: ماما ليا سنة بس موقفة قيدي راه
سليمة: دفعتك قريب تتخرج وانتِ قاعدة هك وخلاص
ايلاف: حيجي يوم نكمل فيه نوعدك لكن انت ادعيلي يكون اليوم هذا قريب..
اسراء: ايلاف وسعيلي مش امك بروحك راه
ايلاف: مش موسعتلك،موتي☻
اسراء وهي تكر فيّ: وسعيلي حتى انا ياريتني ماكلمتك عليك قصة