مكتوبة ليك - باللهجة الليبية-

الجزء الثاني والأخير.

ابرئ ذمتي من ذنبك عزيزي القارئ
لا احلل نسخ الرواية من دون اسمي ومن دون إذني
-
مكتوبة ليك
بقلم: عائشة الشيلابي
-الجزء الثاني-

كلما نرقد متأخر نحلم بيه، نحلم باليوم اللي بدت فيه معاناتي، كأنه اليوم صارت ونصحى على اذان الفجر زي ديما..

قبل سنة وثلاث اشهر
يوليو ٢٠١٨
عبدالمهيمن: خلي إيلاف تجهز نفسها
سليمة: ليش ياحاج وين مطلعنا
عبدالمهيمن: لا مش طالعين، شوية اخرى جايين عرب يطلبو فيها وانا موافق
سليمة: ينعلي تو كيف تقوللي! شن نحط للعرب
عبدالمهيمن: اهو توا طالع تو نجيبلك ضيافتك كاملة مش مطول
سليمة: ومن هم العرب؟ و كيف انت موافق طول
عبدالمهيمن: ولد صاحبي وراجل كويس ونعرفهم ناس طيبين عليش نلط على البنت
-

إيهاب: ههههه غير خليني نسكر توا بيش نكمل بسرعة ونكلمك
إيلاف: يي عليا كن نلقى ماتمشيش بكل😩
إيهاب: هيا إيلي مش مطول عليك حتى انا مرايفلك
سكرت منه
حذفت فيا إسراء المخدة قالتلي: لعند امتى نبي نقعد نسمع في المزاط متاعكم هذا

تميت مبتسمة نشوف للروشن، نحبه واجد، واجد لدرجة إني مش عارفة كيف نعبر عن الحب بداخلي

سليمة: لوفي بنيتي نوضي البسي حاجة كويسة واسريوة تعالي ساعديني في المطبخ
إيلاف: ليش من جاينا؟ كنك ماقلتيلنا بدري درنا حركات للعشية
إسراء: افطني راه هي لما تقول " راه درنا حركات" قصدها راهو إسراء دارت حركات😂
سليمة: لا لا باتك مشى توا يجيب في حاجات جاهزة جايينا هل صاحبه يتعرفو

لبست بلوزة عادية، بنطلون عادي، رفعت شعري ذيل حصان زي ما إيهاب يحبه..💙

إنتصار : ماشاءالله ماشاءالله هذه هي كنتي؟
سلمت وكل علامات التعجب فوق راسي، انا؟ كنة من؟
كانت معاها بنت من جيلي، و وحدة اخرى في الثلاثينات
من الصدمة اللي جت على راسي قمعزت بدون مانسلم عليهن، والدنيا تبرم بيا نحاول نفهم،
صوت إنتصار المستفز وهي تقول نجيها ياربي تتحشم، ماما تفنص فيا، إسراء خاشة بسفرة العصير.

بعد ثلاث ساعات
سليمة: يابنتي الله يهديك باتك يبي يتريح عليك
إيلاف: مانبيش نتزوجه مانبيش را والله نديرلكم كارثة
إسراء: ماما خليني معاها بروحنا ترا

طلعت سليمة ومشت قمعزت جنب عبدالمهيمن

عبدالمهيمن: مازالت مسكرة راسها صح
سليمة: ياحاج بالك استعجلت راهو الزواج مش بالغصب وإيلاف مازالت صغيرة
عبدالمهيمن: والله يا اسلومة لعند امتى قاعدلهن حتى إسراء نفكر نعطيها نتريح عليها

إسراء: توا فهميني! هو يبي يزوجك لهذا عشان يتريح عليك صح! يعني المهم يعطيك لشخص كويس
إيلاف: هذا اللي قالاته ماما اها
إسراء: خلاص عليك نقناق درتيه لنا وتبكي وتعيطي، بسيطة قولي لإيهاب ويجي يخطبك وقولي تريحت لإيهاب
إيلاف: إيهاب لو يسمع حيبالغ في ردة فعله وتنقلب عليا القصة
إسراء: غير جربي بس و إن شاءالله يصير منها
إيلاف: بس جد انا نبي نكمل قرايتي
إسراء: إيهاب متفاهم وحتى هو مكمل دراسته يعني حيوافق على شرطك اكيد