جريمة صوفيا ( روايات ليبية )

حلقة 15 🔥

رواية #جريمة_صوفيا 💔🔥
( خيال ممزوج بلواقع )
للكاتب : #إبراهيم_رشيد
الرواية بلهجة الليبية
حلقة  15🔥 " 

قراءة ممتعة
كان الممر فاضي بكل وشاف صوفيا قاعدة مقمعزة على الارض وتبكي بصوت عالي وهكي ومنزلة راسها للأرض
عماد استغرب بكل0_0
وبدا يقرب ويقرب ونزل عليها وحط يدة على يدها وفجأ ترفع راسها
عماد:صوفيا0_0
صوفيا كانت تبكي جديات والسبب كان مجهول
عماد:صوفيا كنك ردي عليا
صوفيا:شي مفش حاجة انا لازم نمشي توا من هنا
عماد:تي شنو تمشي تعالي هنا في حد دارلك حاجة تعالي فهميني
صوفيا:مفش شي يادكتور انا هكي بروحي نبي نطلع ارجوك خليني
عماد:صوفيا تعالي هنا قتلك كنك تبكي احكي في حد ضايقك
صوفيا:ياربي والله تسيبني نمشي يادكتور انا تمام
عماد كان من النوعية الي ميحبش يشوف حد قدامة يبكي وهكي
عماد:وين ح تمشي تعالي فهميني
صوفيا:دكتور ارجوك سيبني انا معش نبي نجي للجامعة هذي اصلآ
عماد:تي شن تحكي انتي معلش عليش فهميني
صوفيا:هكي هكي وخلاص
عماد:صوفيا انا مش ح نخليك تمشي لين تقوليلي
صوفيا:في دكتورة صار خلاف معاها قدام كل الطلبة واحرجتني بكل وقاحة والكل قعد يضحك عليا
عماد:منو هذا وقوليلي شن صار
بدت صوفيا تحكيلة بالتفاصيل شن صار و ح نعرفوا توا كل شي
الدكتورة:في اسم بنت هنا صوفيا سلمتني ورقتها في البحث
صوفيا:انا صوفيا يادكتورة
الدكتورة:ياصوفيا انا نبي اسمك الثلاثي او الرباعي ماهو في ورقة البحث ضروري تكتبي هكي زي كل زملائك
صوفيا:مش ضروري يادكتورة
الدكتورة:انا الي نقول هل هوا ضروري او لا ياريت تكتبيه لأن هكي ح نلغي درجة البحث وانتي مشاءالله واخذة درجة نهائية
صوفيا:بس انا معندش حاجة نكتبها بعدها
الدكتورة:تحبي تعانديني انتي ولا كيف
صوفيا:والله مش قصة عناد بس بجد نحكي مفش شي بعد اسمي
واحد من الشباب قال كلمة
الشاب:كيف هذي في حد معندش اسم كامل
الدكتورة:جديات شن قصتك انتي يابنت
كان الكل يشوف في صوفيا بنظرة غريبة بكل بكل وصوفيا حست انها في موقف محرج وفي نفس الوقت وحيدة
صوفيا:لحظة بس انت صكر فمك مش شورك بكل خير ما وربي نجي ونعرف كيف نربيك
الدكتورة:لو سمحتي تكلمي بأسلوب احسن من هكي
صوفيا:لا مش ح نتكلم بأسلوب معاك صكري فمك وانا مش ح نخش نحظرلك مرة ثانية
صوفيا كانت طالعة وخلاص ماسكة دموعها
الدكتورة:تمام اطلعي برا قليلة الادب مش عارف من وين جايبين هكي ناس لقيطة ولا بنت حرام ولا مش عارفة شن قصتها
سمعت صوفيا كلام الدكتورة وخلاص انهارت وهيا تبكي،وطبعآ انتو عارفين كيف دكاترة الجامعة كلهم متكبرين الا من رحم ربي
طلعت صوفيا وخلاص لين شافها عماد وعماد عرف كل شي
عماد:الدكتورة هيا الي قالتلك هكي
صوفيا:اها هكي قالت ارجوك يادكتور خليني نمشي
عماد:لا واقسم بالله انا ح نعرف نربيها ونوريها بنت الحرام منو
صوفيا:دكتور ارجوك ارجوك تعال هنا
عماد تحول فجأ من دكتور محترم الى شخص غريب بكل
كان قاعد يمشي وصوفيا وراه
وجاء لعند باب القاعة وضربة برجلة
يعني تخيلوا المشهد الشوارعي هذا من عماد
كانت صوفيا ورا عماد والطلبة كلهم يشوفوا في الفضيحة الي ح تصير توا
عماد:انتي انتي تعالي هنا
الدكتورة:كيف تسمح لنفسك تخش هكي وتكلمني هكي انت
عماد:تعالي هنا قتلك خير ما نخش انا
الدكتورة:لا تعال يادكتور عماد
عماد:كيف تسمحي لروحك تحكي هكي مع البنت وتقولي عليها كلام كيف هذا واقسم بالله لو كنتي راجل راهو عرفت كيف نتفاهم معاك وكسرتلك راسك هذا تي انتي وين عايشة وشن تحسابي روحك بالضبط تحكي على البنت هذي هكي واقسم بالله لكن ح نوريك ونرد نربيك ياكلبة يا...... يا...........😳
عماد فقد اعصابة لأول مرة داخل الجامعة وبجديات لما كان فارض احترامة على الكل تحول فجأ لشخص مش معروف
من بعد ما صار النقاش الشوارعي هذا طبعآ صارت فضيحة كبيرة بكل قدام الطلبة وهكي وجاء العميد وخذا عماد والدكتورة للمكتب
عماد:تي تكذب عليك هذي تي باهي كلم صوفيا خليها تجي تحكيلك شن قالت عليها
العميد:لا ياعماد مهمة صار انت غلط الي درتة درت فضيحة كبيرة بكل في الجامعة وقلت كلام عيب وكبير في حق الدكتورة لا انت لازم تحترم روحك وتحترم الدكاترة الي معاك
عماد:نعتذر منها؟تي انا معش عندي شغل معاكم بكل اشبعوا بيها جامعتكم ومن بكرا ح تلقا طلب استقالة على الطاولة متاعك،تي انا عندي مستشفى كبيرة ومش مستحق ابدآ للشغل عندكم
طلع عماد بسرعة وخذا معاه صوفيا قدام الجميع ووكبو في السيارة ومشو
صوفيا:دكتور ليش درت هكي بس
عماد:لأن انا هكي من زمان نبي معاهم مشكلة خلاص مليت مليت
صوفيا:بس هكي الكل فهمنا غلط وانا بصراحة مش حابة نكون سبب في خسارة شغلك
عماد:وبالناقص منهم هما وشغلهم تعب على الفاضي
صوفيا:بجد بجد مش عارفة كيف نشكرك لأول مرة نحس ان في ليا سند في الدنيا
عماد:والله ياصوفيا ردي بالك تحسي روحك وحيدة في الدنيا
عماد هكي حس بشعور غريب تجاه صوفيا وصوفيا برضو حست بشعور تجاه عماد
وصلو للمستشفى وبدو في الشغل كان عماد قاعد على المكتب وصوفيا جنبة
عماد:شنو عندك اليوم في الدفتر
صوفيا:دكتور هوا انت فعلآ خلاص معش ح تمشي للجامعة وانا كيف ح نرد نمشي بعد مشكلة اليوم
عماد:ساهل توا ياصوفيا ح تردي وتمشي وراسك مرفوع متفكرش واجد بس وخلينا في زحمة اليوم
صوفيا:تمام اليوم شوف الحالات واجد وفي حالات مراجعة
عماد كانت صوفيا تحكي معاه وهوا فتح الابتوب وكتب كلمة السر قدامها
صوفيا طبعآ على طول حفظتها وطلعت تجري
صوفيا خذت قلم وعلى طول سجلت
صوفيا:يارب يكون هذا الباسوور صاح،من زمان كنت نستنى في الفرصة هذي واليوم جت لـ عندي
نمشو مع بعضنا شويا لـ رشا
رشا من الصبح مشت للجلسة مع فاطمة وكانت جلسة عادية وطبيعية زي ديما وطلعت منها وكانت تسوق
ورن عليها مالك
مالك:وين يارشا
رشا:قريبة من الحوش كنك
مالك:والله يارشا انا البطارية متاع سيارتي متنفعش وعندي مشوار ضروري ونبي سيارتك
رشا:باهي تمام حاضر قريب نوصل وخوذها
مالك:تمام
وصكروا الخط ورن تليفون رشا على طول
رشا:ياربي كنا التليفون هذا اليوم،الو بيسان
بيسان:خير يارشا سمعتي اليوم شن صار في الجامعة
رشا:شن في كنك
بيسان:راجلك داير مشكلة كبيرة بكل وقالب الدنيا وكل الطلبة يحكو عليه
رشا:كيف كيف احكي شن في اصبري دقيقة نوقف السيارة على اليمين بس
ووقفت رشا السيارة على اليمين
بيسان:اليوم راجلك دار مشكلة كبيرة بكل مع دكتورة في الجامعة وشتمها قدام كل الطلبة
رشا:عماد يدير هكي مستحيل
بيسان:والله يارشا انا حكتلي القصة بنت تقرا عند عماد وقالتلي المشكلة كلها سببها البنت صوفيا هذي اليتيمة
رشا:صوفيا0_0باهي احكيلي بسرعة معش نقدر نتحمل
وحكتلها بيسان كل شي صار
رشا:والله مش عارفة شن نقول بس عماد مستحيل يقول كلام زي هكي في الجامعة
بيسان:قاله كلة وبجديات تستاهل الدكتورة حرام اهانت البنت
رشا:باهي تمام معاك حق بس عماد يقول الكلام هذا في الجامعة ويدير فضيحة زي هكي عشان البنت هذي صوفيا مش مصدقة انا
بيسان:باهي انتي لما يروح اسأليه
رشا:لالا لا نسألة لا يسألني لو هوا اليوم حب ان يحكيلي باهي غير هكي انا مش ح نسأل حد
بيسان:باهي تمام يارشا المهم انا انصدمت بالموضوع وحبيت نحكيلك بس
رشا:باهي قوليلي كيف حال باتك وامك
بيسان:كويسين وامورهم تمام
مشت رشا لعند الحوش وشافت مالك يستنى فيها
مالك:طولتي ياعيني
رشا:في شوية زحمة بس شكلك من اللبسة الي لابسها ماشي للصيدلية الي في عقلي
مالك:ايوا جايبلها معايا شوية هداية وحاب نعطيهن لها اليوم
رشا:باهي تمام كويس سلم عليها والسيارة اليوم على حسابك منبيهش انا
مالك:لا نبي نمشي لـ يارا وبعدين نشري بطارية لسيارتي بس
رشا:باهي تمام
وطلع مالك وكان ماشي لـ يارا ووصل ونزل على طول
يارا:تعبت روحك ليش مكثرهن هكي
مالك:لا تعبك راحة مفش حاجة من واجبك
يارا:باهي احكيلي كيف حالك انت
مالك:تمام التمام بس انتي طلعتي احلا من الصور بواجد بكل
كان اول لقاء بين مالك ويارا وطبعآ لقاء غرامي بكل بكل المهم مالك قعد شويا مع يارا وطلع
وكانوا الاثنين مبسوطين بكل بكل وكمل اول لقاء
مالك:نعاليا يارشا سمحة بكل بكل احلا من الصور بواجد
رشا:اها والله تهبل ان شاءالله تكون من نصيبك يامالك
مالك:ان شاءالله وراجلك هذا لازم يفهم ان هذي البنت الي نبيها و حـ ناخذها بالغصب عن الجميع
رشا:بالغصب حتى على عماد
مالك:تي كلها حتى عماد ميهمنش عماد منو اصلا عشان يقولي لا
وفجأ رن تليفون مالك وكان عماد
مالك:ااا عماد عماد الو
عماد:وين قاعد انت
مالك:في الحوش
عماد:ساعة 6 عندي ريست ساعة كاملة
مالك:باهي يعني شنو
عماد:يعني ساعة 6 بالضبط تكون مزروع قدامي
مالك:باهي حاضر ياغالي
وصكروا الخط
رودينة:ههههههههه كنك غيرت كلامك طول
رشا:مش توا قلت منو عماد اصلآ
مالك:تي عيب وانتو مصدقين الكلام
رودينة:باهي شن كان يبي عماد
مالك:منش عارف قالي ساعة 6 تكون قدامي ونبيك
رشا:ان شاءالله يكون وافق يارب
مالك:ان شاءالله يحس بينا ويوافق بس
رشا:لا انا متأكدة هوا كلمك معناها حاب يقول شي مهم
قعد مالك يستنى بفارغ الصبر في ساعة 6 لين جت ومشا على طول للمستشفى
مالك خش لمكان عماد وشاف صوفيا قدامة
مالك:معلش هذا مكان دكتور عماد ولا انا متلخبط
صوفيا:اها هوا هنا بس خلاص للأسف الحجز في الصبح
مالك:لا انا مش جاي نحجز ولا هكي انا اخ عماد اسمي مالك
صوفيا:اهلين بيك الدكتور شويا اخر حالة عندة تفضل استناه هنا
مالك:عادي نستنى قدام القمر لعند بكرا
صوفيا:نعم؟
مالك:لا قصدي هوا مطول ولالا
صوفيا:خلاص ح يطلع توا
وطلع عماد.
عماد:مشاءالله طلعت عندك مواعيد
مالك:ياهلا بدكتورنا
عماد:صوفيا انا نازل تحت للكافي ساعة هكي ونرد وحتى انا خوذي راحة شويا
صوفيا:تمام
عماد:هيا معايا انت
صوفيا فتحت التليفون وكانت تكلم
صوفيا:انا اليوم عرفت شي مهم بكل...........اها مش عارف هوا مرات الابتوب يسيب فيه ومرات ياخذ في معاه بس عادتآ ياخذ فيه معاه.............اليوم لو سيبة في المكتب ح نفتحة وندمرلة حياتة كلها......حاضر اليوم لو فتحته ح ندير كل شي اطمن بس
وطلعو وكانو يمشو في المستشفى
عماد:شويا وكليت البنت بعيونك كنك ياراجل
مالك:وكنها البنت صاروخ بكل0_0والمستشفى كلها قاعدة صواريخ هكي
عماد:ههههه طول عمرك هكي ومش ح اتغير بكل بكل
ونزلو هما الاثنين وقمعزوا في الكافي
عماد:شوف بخصوص الموضوع الي كلمتني عليه امس مالك انت هل تقدر تشيل مسؤولية حوش وعيال وتعب كلة والله مش ساهلة راهو شوف حالتي انا
مالك:ياعماد انا لو مع البنت هذي عادي نشيل المسؤولية لأنها بجد غير كل البنات الي عرفتهن في حياتي انا نبيها جديات وخايف هالمرة لو سافرت وسيبتها ح نرد مش ح نلقاها
عماد:باهي فهمني هيا منو ومن امتى تعرفها وهلها شنو عشان نفهموا
مالك:هيا اسمها يارا ونعرفها من حوالي سنة هكي
عماد:يعني خلاص انت مقرر تاخذها
مالك:اكيد هذي ياعماد خوك مكبد عليها بكل
عماد:والله حالتك صعبة انت بكل ولو مدرتش الي تبيه عارفك ح تفشل ومش ح تكمل قرايتك باهي توا فهمني انت مثلآ كم تقدر تقعد هنا
مالك:انا نقدر نقعد هنا حوالي 3 شهور عادي غير هكي الدراسة غادي ح تبدا وتفوتني شوف ياعماد را والله يارا قالتلي منبش منك شي ولا حاجة حتى عرس قالتلي لو انت متبش مش لازم
عماد:هوا شوف بنت توا قالتلك هكي وقالت مستعدة تعيش معاك في ايجار واخرى متبش عرس رد بالك تسيبها لأن واضح بنت حلال
مالك:وهذا نفس الكلام الي قالة ليا وسام
عماد:ياسيدي باهي بما انك تحبها وتحبك وتبو بعضكم انا مش ح نوقف في طريقكم واي حاجة تبيها مني انا جاهز وحاضر
مالك:نعاليا منك والله انت احلى واطيب اخ في الدنيا
عماد:هههههه شوف شن ح ادير وشوف شن تبي وانا معاك و ح نتكفل بكل حاجة وخوذ موعد من الناس عشان نمشو نطلبوها لكي
مالك:باهي تمام تمام بكل يعني ياعماد انا ح نمشي لـ فرنسا ومعايا يارا
عماد:ح تمشي ومعاك يارا وكلة تمام بس رد بالك تطلع طفل ومش قد المسؤولية
مالك:عيب ياعماد والله عيب انا تغيرت ومن اول ماعرفت البنت هذي تغيرت
عماد:باهي تمام في حاجة ثانية لما البنت هذي ترد معاك لـ فرنسا ح تختلف الحياة راهو
مالك:فاهم وعارف هذا كلة حاسبة اموري تمام ياعماد والحياة غادي متفرقش سواء شخص او اثنين
عماد:باهي تمام ربي يقدم الي فيه الخير انا نبي نشرب قهوة وناكل حاجة شن تبي انت
مالك:تي عادي اي حاجة
قعد مالك وعماد قريب ساعة هكي وبعدين مشا عماد رد لـ شغلة
مالك:والله مش وقت الواحد يروح ضروري ناخذوا برمة في المستشفى كلها طروف0_0
قعد مالك يبرم في المستشفى وطلعت فاطمة من قسم النفسية وجت قدام مالك
فاطمة:مش مصدقة
مالك:فاطمة اهلين اهلين
فاطمة:ياهلا تي وين وين متغير من باريس
مالك:هههههه كيف حالك لنا زمان ماتقابلنا
فاطمة:انا كويسة كيف حالك انت
مالك:والله تمام التمام
وطلعو مع بعضهم لعند برا وكل واحد ركب في سيارتة ومشا
مالك كان فرحان بكل بكل لأن عماد وقف معاه مش ضدة وكلم يارا وبلغها وكانت طايرة من الفرحة وبرضو روح للحوش وقاللهم وكان الكل فرحان
مالك:يعني ياامي انتي مش رافضة بكل بكل
منال:وعليش نرفض ياوليدي بما ان وسام قالك عادي وعماد قالك تمام معناها ربي يقدر الي فيه الخير واهم حاجة البنت تكون تستاهل بس
مالك:لا والله تستاهل ولما تمشي تشوفيها بس ح تحبيها على طول
رشا:لا بجد حلوة وسمحة وشكلها عاقلة
رودينة:باهي بالمناسبة هذي مفش حاجة ح اديرها لنا
مالك:لا اكيد شن تبو وحاضر
رودينة:عدي جيبلنا عشاء وهكي اعزمنا يابخيل
مالك:تي لا مش بس عشاء ح نطلعو كلنا نتعشو برا اليوم وعلى حسابي
رشا:هيا عمتي امشي معانا
منال:لالا انتو عارفين انا منحبش المطاعم وهكي امشو انتو وخلو حبيبي سراج ولينا معايا
مالك:لا لينا تمشي معانا لكن سراج برا صقع عليه يقعد هنا جنب الدفاية احسن
وطلع مالك ومعاه رشا ورودينة ولينا وبرمو شويا وتعشو وكان يوم جميل بكل بكل
عماد كمل شغلة وكانت صوفيا معاه
عماد:تي خليني نوصلك كنك
صوفيا:لا والله يادكتور انا اصلا طلبت تاكسي وانت توصل فيا يوميآ مش حلوة نعطلك
عماد:مفش تعطيل ياصوفيا
صوفيا:والله خلاص طلبت تاكسي
عماد:باهي باهي تمام
صوفيا كانت عينها على الابتوب وكان واضح ان عماد مش ح ياخذة معاه اليوم
صوفيا:باهي دكتور شنو بكرا نجي انا للجامعة ولالا
عماد:تعالي عادي وحتى انا جاي ونبي نكتب طلب استقالة ولو ما اعتذروش منك انا ح نسيبها لهم
صوفيا:والله مفش داعي لـ هذا كلة حرام نخرب عليك خليهم يفصلوني انا
عماد:بكرا نحكو تصبحي على خير صكري وطفي الضي واطلعي
صوفيا:باهي تمام قدامك الخير
طفت صوفيا الضي كـ اجواء قدام عماد وهكي وتأكدت ان عماد طلع برا بكل وردت بسرعة للمكتب
صوفيا ولعت الابتوب وقعدت قدامة وكانت الدنيا ظلام بكل بكل
عماد ركب في السيارة وكانت معاه الشنطة
عماد:كيف طالع بالشنطة فاضية هكي،بكرا ضروري نسلم الكشوفات للجامعة والدرجات عشان نبي نسيبها لهم والموضوع يبي الابتوب،ياربي وخلاص شنو هذا شن قاعد يصيرلك ياعماد بس كنك قاعد تنسى واجد بكل
صوفيا كانت على الابتوب وعماد كان جاي0_0
عماد بدا يقرب ويقرب وصوفيا مازالت نفس ماهيا
وفجأ عماد حط يدة وفتح الباب................😳
عماد:...................😳
صوفيا:.................0_0يتبع الحلقة السادسة عشر