-لا يا ماما كله إلا دا
= لى بس يا إيمان دا عريس لقطة
-بس يا ماما دا إمام و خطيب جامع
=و فيها اى حرام يعنى
-لا مش حرام بس أكيد متشدد بقى و هيلبسنى النقاب غصب و مش هيعمل فرح و غيره و غيره و انا مش هرضى بكدة
=تصدقى أنه خسارة فيكى اصلا بقى هترفضى الواد عشان إمام و عارف ربنا يا عديمة الدم من الآخر لو مقعدتيش مع العريس مفيش خروج من البيت و هاتى التليفون كمان بقى عشان تتربى
*قعدت اقنعها تجيب التليفون بس حلفت و بابا حلف و اخوالى حلفوا فى حد ف العيلة لسة محلفش عليا !!
-و عريس الغفلة دا هيجى امتى
=هيجى بكرة اقسم بالله لو عملتى حركات العيال بتاعتك دى ما هتشوفى تليفونك تانى
-عيب عليكى يا ماما هو انا بتاعت الكلام دا بردو
*قاعدة مستنية سى الشيخ اللى ماما عايزة تخلص منى و تجوزهولى
-السلام عليكم
=و عليكم السلام و رحمة الله و بركاته
-ازيك يا آنسة إيمان
=تمام الحمد لله ،، هو أنا ممكن أسألك سؤال
-اكيد طبعا امال احنا قاعدين لى مش عشان نتعرف على بعض
=اهو هو دا اللى عايزة اسأله احنا قاعدين لى يا شيخ حمزة
-أولا انا مش شيخ مع ان دا شرف ليا انا واحد بيعافر ضد ذنوبه عشان الجنة غالية ثانيا مش فاهم سؤالك
*فضلت متنحة شوية الكلمة دخلت قلبى اوى بيعافر ضد ذنوبه عشان الجنة غالية !! هو لسة فى كدة
-سرحتى فى اى
=لا مفيش كنت بقلك انتى لى اخترت تتقدملى
-عشان ارتبط بيكى ف الحلال
=و لى ترتبط بيا انا بالذات
-اسألى قلبى و الله ما انا عارف
ضحكت =هما الشيوخ يا استاذ حمزة بيتغزلوا عادى
-و آلله انا ما شيخ انا كائن عادى ملتزم بأوامر الإسلام ثانيا اه عادى دا شئ اتعلمناه من رسولنا الكريم عليه الصلاة و السلام كان دايما يتغزل ف زوجاته
=عليه أفضل الصلاة و السلام
................
-ها عملتى اى يا آخرة صبرى
=و الله يا ماما انا كنت قاعدة عشان اطفشه بس للأسف
-للأسف اى
=للأسف ارتحت طلع لطيف اوى
-يعنى ازغرط !!
=زغرطى
*بابا بلغ حمزة موافقتى و بعدين بابا جه قالى ان حمزة مبسوط جدا و خلاص الخطوبة بعد يومين لأنه مستعجل
*عدوا اليومين بسرعة وجه يوم الخطوبة حقيقى انا فرحانة جدا
-بلاش اغانى ياريت
=امال هنعمل اى هنجيب شيخ و نقرأ ربعين !!
-انتى بتتريقى
=و أنت عايز تشلنى
-و مفيش رقص كمان
=طب ما بلاها خطوبة اصلا
-هو انتى اى مفهومك عن الخطوبة رقص و أغانى و بس كدة
=امال الخطوبة اى بقى أن شاء الله
-الخطوبة بتبقى قاعدة عائلية مفيهاش اى حاجة بلبسك دبلتك و نقعد سوا شوية و بس كدة اه و بالمناسبة مش انا اللى هلبسك الدبلة
=نعم !! امال مين
-والدتك
=و دا لى أن شاء الله
-عشان مينفعش امسك ايدك ف فترة الخطوبة
*اتشل !! هتشل
*الخطوبة مشيت زى ما هو عايز للأسف و أنا متضايقة جدا و عايزة أقوم ارمى الدبلة ف وشه و الله انا وافقت لى !!
-لا يا ماما مش عايزة اكمل و النبى خلينى افسخ الخطوبة دى
=لى بس يا إيمان دا معداش شهر على الخطوبة
-مستفز يا ماما بيحرق دمى مبيتكلمش معايا غير عن الدين و الأخلاق و بس عمره حتى ما قالى كلمة حلوة
= بقى عشان الواد محترم و خايف عليكى و عايز يحافظ عليكى يبقى مستفز و الله انتى عبيطة
-هو انا بنتك و لا هو
=ياريته هو على الأقل عارف ربنا كويس
- طب ما أنا عارفة ربنا كويس و بصلى و بصوم و بقرأ قرآن اى بقى
=لا دا مش كل حاجة فى حاجات تانية بسيطة احنا بنتغاضى عنها و بنقول دى بسيطة بس الحقيقة هى مش بسيطة و لا حاجة دى كبيرة و كبيرة اوى كمان زى مثلا يوم الخطوبة انا اللى لبستك الدبلة مش هو عارفة لى عشان حرام يمسك ايدك مع ان الناس كلها بتمسك ايد ف الخطوبة و مفكرينه عادى بس هو مش عادى شفتى بقى أنك انتى اللى غبية
*كلام ماما خلانى افوق شوية يعنى هو عنده حق و الناس كلها غلط !!
-بصى يا إيمان فى قواعد هنمشى عليها عشان نبقى متفقين م الأول
=اشجينى يا حمزة خير
-أولا ممنوع تسلمى ب الإيد على اى راجل غير ابوكى و اخوكى و اعمامك و اخوالك يعنى المحرمين عليكى
=طب و عمو هلال البقال
-انتى بتهزرى
=ما أنت بتستعبط يا حمزة و لما يمدوا ايدهم عشان أسلم اقول اى هتحرج
-قولى معلش مبسلمش و بعدين خايفة م الإحراج و مش خايفة من ربنا
=كمل يا حمزة و بعدين عشان مندخلش ف موضوع الجنة و النار و نتخانق
-ثانيا بقى مفيش اغانى ف فرحنا عشان منرتكبش ذنوب ف أول يوم ف حياتنا سوا
=امال هنعمل اى ف الفرح هنغنى ظلموه
-هنعمل اى حاجة غير الأغانى يا إيمان
=ها كمل كمل سمعاك و اى كمان
-مفيش حاجة اسمها شهر عسل احنا هنعمل عمرة و بعدين نبقى نتفسح ف اى وقت
=اه و ماله و اى كمان
-مش هنعمل عزال و الهيصة اللى ع الفاضى دى وقت ما تشترى حاجة تبعتيها ع البيت علطول
=اه طبعا ما العزال حرام كمل كمل
-مش حرام بس هيصة و فلوس ع الفاضى نستفيد م الفلوس دى ف اى حاجة تانية اه و علفكرة هعملك مكتبة بدل النيش
=لا والله و جاى على نفسك لى
-إيمان انا بعمل لمصلحتك
=روحنى يا حمزة
*روحت و فضلت اعيط انا عايزة ابقى زى صحابى اللى بيخرجوا و بيتفسحوا و يقولوا كلام حلو لى يارب ارتبط بواحد معقد
*فضلت يومين مش برد على حمزة متضايقة منه اصلا و كمان عندى امتحان و مش مذاكرة حاجة خالص و أنا بكره الرياضة
-يعنى بتعيطى لى دلوقتى
=عندى امتحان رياضة يا حمزة و أنا مش بحبها و مش عارفة احل حاجة
-تعالى هذاكرلك و بطلى عياط
=اى دا بجد انت بتفهم ف الرياضة
-امال انا مهندس ازاى كنت أدبى يعنى
=من غير تريقة يلا و ذاكرلى
*استأذن حمزة من بابا أنه هيطول عندنا ف القاعدة شوية عشان يذاكرلى و بابا وافق و فضل قاعد معايا لحد بعد نص الليل و بعدين روح و كملنا مذاكرة ع التليفون
*تانى يوم رحت الكلية لقيت حمزة واقف قدام الباب و بيطمن عليا و فضل واقف لحد ما طلعت و حليت كويس و هو كان فرحان أكتر منى
*عدى شهر و خناقاتى انا و حمزة بتزيد كل يوم
*بس فى الشهر دا حمزة بينلى اد اى هو جدع و راجل بجد يعنى بغض النظر عن خناقتنا الكتير بس عمره ما نيمنى معيطة و كان بيذاكرلى و يقف جنبى ف اى خنقة حتى لو كانت تافهة كان بيهتم بتفاصيلى اللى كنت مفكراها مش مهمة بس بردو كنا بنتخانق كل 3 دقائق باين
-و بعدين بقى يا حمزة فى اى هو كل خروجة موال شكل
=موال اى انا مش قلتلك متسلميش على حد بتسلمى على المعيد بتاعك لى
-و فيها اى يعنى هو مد ايده و محبتش احرجه
=يعنى خايفة م الإحراج و مش خايفة من ربنا
-يوووه انا زهقت اقسم بالله دى مش عيشة دى كل شوية خناقة عشان الاغانى و التسليم و حاجة مقرفة انا مش هلتزم بكلامك انا هشغل أغانى و هرقص و هسلم ع الرجالة و ان كان عاجبك
=يبقى اعتبرى دا آخر كلام بينى و بينك و دبلتك هتوصلك بيتك عن إذنك
*اى !! لا يا حمزة متمشيش لا
-أيوة يعنى مقطعة نفسك م العياط لى دلوقتى انتى مش كنتى مش عايزاه
=مش عارفة انا بعيط لى بس حاسة انى زعلانة يا ماما
-و الله حمزة دا كان زينة الرجال و خسارة فيكى
*قمت دخلت اوضتى انا مش ناقصة تقطيم من ماما
*شوية و فتحت الفيس لقيت فى بنت عندى ف الفريند منزلة صورتها هى و خطيبها و بتقول أنه وافق أنها تبقى بشعرها ف الفرح و فرحانة اوى و خطيبها حاطط ايده على كتفها ف الصورة !! انا أفتكر أن كان بينى و بين حمزة 3 متر أقل حاجة !! فضلت اقلب شوية ف أكونت البنت دى لقيتها هى و خطيبها فشكلوا !! لا وايت كدة يعنى بعد ما كان بيلمسها ف فترة الخطوبة بالشكل المقرف دا سابها !! فينك يا حمزة يا زينة الرجال بس
*ساعتها بس عرفت قيمة حمزة و أنه كان عايز يحافظ عليا اد اى انا كنت غبية
*اسكت !! لبست و رحتله
-السلام عليكم
=انتى بتعملى اى هنا
-جاية اصالحك يا باشمهندس معندناش رجالة تزعل من حريمها دا احنا بناتنا أشرف من الشرف
=لا و الله
-اه و الله
=مش هشغل أغانى ف الفرح
-أستغفر الله أغانى اى بس يا شيخنا مش عايزين نبدأ حياتنا بذنوب
=مفيش رقص
- رقص اى بس لا اله إلا الله إحنا بنات عائلات محترمات
=مفيش تسليم على رجالة
-لا تسليم اى توبنا إلى الله
=مش هتنزلى صور ليكى على السوشيال ميديا
-صور اى بس دا حتى العين فلقت الحجر
=مفيش شهر عسل
-شهر عسل اى دا بدعة من الكفار يا راجل
=مفيش عزال
-عزال اى بس دا كلام فاضى
=مش مرتاحلك
-طب ممكن اطلب منك 3 طلبات
=عنيا فداكى
بتضحك -اى يا شيخنا مش كدة المهم ممكن تحفظنى القرآن
بيضحك و عينه لمعت م الفرحة =انتى بتتكلمى بجد
-معندناش حريم تهزر مع رجالتها
بيضحك =ماشى و الطلب التانى
-ممكن تصلى بيا الفجر جماعة كل يوم
=ياريتنا كنا كاتبين الكتاب دلوقتى
-لى
=كنت هحضنك
*بتضحك و بتحط الطرحة على وشها
-طب خلاص الطلب التالت اى
=ممكن تاخد ب أيدى للجنة
- مش فاهم
=عايزة تبقى علاقتى بربنا كويسة زيك كدة يا حمزة مش عايزة ابقى مسلمة ب الاسم بس عايزة ابقى بعافر ضد ذنوبى عشان الجنة غالية
- يلا نكتب الكتاب دلوقتى
=لى
-عشان احضنك
*دا طلع مجنون فعلا و كتبنا الكتاب يوميها
*بمجرد ما كتبنا الكتاب حضنى و فضل متبت فيا ربع ساعة و عينه بتلمع م الفرحة
-أخيرا يا حمزة بقيت زوجى و قرة عينى
=قرة عينك !!
-اه و فلذة كبدى كمان
=انتى بتجيبى الكلام دا منين لا دا باين انى اتضحك عليا
-نعم قصدك اى
=قصدى انى بحبك
-و أخيرا يا شيخنا حنيت عليا و نطقت
=عنيا قالتها قبل لسانى يا أميرتي و تاجى
-الله و كان فين الكلام الحلو دا يا حمزة
=كنت مستنيكى تبقى حلالى
-و اهو بقيت حلالك
=انا كدة مش عايز حاجة من ربنا تانى غير حسن الخاتمة و الله
* ضحكت و حضنى و فضل يردد دعاء ف ودانى *" يا ربي إنّك تعلم أني أحببتها فيك فاجعلها هديتي في الدنيا يا رب العالمين، يا رب إنّك تعلم أني قد صنتها من أجلك فاجعلها لي حوراً في الآخرة يا رب يا حليم"*
*عيطت من الفرحة و عرفت بس ساعتها أن الشيخ حمزة دا هدية ربنا ليا انا كدة مش عايزة غير حسن الخاتمة و الله...💙!
*تزوجى الرجل الذى يحافظ عليكى و يجعلكى خير نساء الأرض تزوجى رجل يأخذ بيدك إلى الجنة...!!*💙
