Naaalala ko pa kung anong pakiramdam
Nang unang maglapat ang ating mga kamay
Habang tayo ay sumasayaw
Sa saliw ng musikang gamay
Parang nabuhay ang mga paru-parong
Kay tagal namahinga sa aking kalamnan
At nang magtama ang ating mga mata
Ay wari bumagsak ang pinaka maningning na tala
At siyang tinupad ang tanging hiling
Na sana'y iyong mapansin
Ngumiti ka sa 'kin kasabay ng iyong pagtingin
Tumalon ang puso ko sa galak
At tila naglaho ang mga tao sa paligid
At tayo lamang ang laman
Ngunit napawi rin pagkatapos ng awitin
Bumalik sa umpisa na parang di magkakilala
Naglaho ang mga ngiti
At ang saya ay napawi
Lumisan ka nang di ko man lang nalalaman
Kung ano talaga ang iyong nararamdaman
At ngayon, ikaw ay nasa aking harapan
Nag-aalok ng isang pagkakaibigan
Na kailanman ay di ko ninais
Sapagkat higit pa roon ang sinisigaw ng aking puso
Ngunit anong magagawa kung hanggang doon lamang?
