خديجة فصلية الشيخ حامد

خديجة فصلية الشيخ حامد 4

الشيخ حامد امشي يمة خلصنه العقد
فضة شلج بكل هاي الملابس
ام مهند انة جبتهن لبنيتي شني ما يصير
فضة يلا حملو غراض الفصلية
ام مهند بنيتي شيخة صغيرة ديري بالج عليهه
فضة امشونه نظرة الحقد بوجهه ام مهند والنبرة العصبيه وحدهه تكفي تفهم ام مهند بنتهه مو بخير
ام مهند يمة بنيتي كلبي انعصر
مهند شيخ حامد اختي أمانة بركبتك
شيخ حامد كتلك اخذ روحك اشوية اشوية
مهند اختي بت شيوخ وسباعية اني مربيهه واعرفهه ما اخاف عليهه بس الأمانة من تنحط بركبة الشيوخ ما يخونوهه لهذا كتلك أمانة اختي بركبتك
الشيخ حامد أمانتك بركبتي لا تخاف
مهند ان شاء الله انته كد الأمانة
،،،،،،،،،،،،،،،،،،،،،،،،،،،،،،،،،،،،،،،،،،،،،،،
يلا خوية مودعة بالله أمانة الله ورسولة الله وياج
خديجه بعد روحي دير بالك على أمي
فضة يلا شني ماخذيهه للأعدام
مهند علكيفج لا اجرين اديهه هي تمشي
فضة اي تعالي ولا ترادد انته
مهند روحي خوية (نظرة الخوف الي شفتهه هي نظرتهه الأخيرة )
---------------------
الطريق لبيت الشيخ حامد
فضة اسمعي انسي اهلج من طلعتي منهم ولا اتكولين اريدن شوفتهم فهمتي
خديجة اي ....جوابهه بخنكة وقهر
فضة انتي حالج حال ناجحة خدامة وبس لا تجاوزين حدج
خديجة الله كريم
فضة من احجي وياج ادنكين راسج لا ترفعي .
خديجة تذكرت وصية الشيخ كالي لا ادنكين راسج من جاوبتهه ثارت بوجهي ... ما اعرف ادنك راسي واجاوب واصير ذليلة انة طلعت من أهلي عروس معززة مكرمة وبثوب أبيض طلعت واعرف قدري مو خدامة حجية
فضه كولي شيخة فضة فهمتي وراسج ادنكي غصب عنج
خديجة مو بت الشيوخ الي ادنك راسهه حجية
فضة كتلج لا تراددين ولا تكولين حجية لا تحطين راسج براسي
خديجة رفعت العصا رادت تضربني
الشيخ حامد يمه لا اضربيهه وانتي لا تراددين
فضة خلينا نوصل واحسابج عندي اعلمج بنت الشيوخ اشلون من تنذل
،،،،،،،،،،،،،،،،،،،،،،،،،،،،،،،،،،،،،
بيت الشيخ حامد
خديجة بيت جبير وحلو بنص بستان بس لحظة دخولة بيت كئيب والوجوه الي بي تقرة الخوف من فضة وسلطتهه
فضة دلو الخدامة الجديدة غرفتهه
شيخ حامد الكل يولي لغرفته شني فرجة ما شايفين بشر ناجحة اخذي خديجة لغرفتهه
خديجة حاضر شيخ
تعالي وياي
فضة اسمع انته مو ابن بطني اذا ما تأدبهه
شيخ حامد يمه اخوهه كتل اخوي بس كسر ظهري وأمن اخته بركبتي وانتي بت شيوخ وتعرفين معنى الأمانة
فضه شني يعني ما تكص السانهه طولته على امك
شيخ حامد انة احجي وياهه
فضة لا هلة بجيتج يفصلية وليدي راح من ايدي وطوعي اسمع ولك لا تكول انة شيخ واخذتلك فصلية صغيرة وحلت بعينك انة اهنا الأمر الناهي فهمت
شيخ حامد يمة البنيه أمانة بركبتي تخدمج تنظف لا تأذنهه ما حلت بعيني ولا شي كلامي تسمعنه مفهوم
فضة يمة وليدي انتة شني الي دار راسك جلمة من اخوهه
شيخ حامد لا من رخصتج يمة
^^^^^^^^^^^^^^^^^^^^^^^^^^^^^^^
ناجحة هلا بخديجة
خديجة هلا بيج منو انتي ؟
ناجحة انة منو انة الفصلية الأولى للشيخ حامد
خديجة جا انتي ليش خذوج فصلية
ناجحة اوووف خية ما تسولف انكتل ابن عمهم وانة خذوني فصلية اكلج خية انة هنا اقدم منج فضة شتكلج كليلهه حاضر شيخة وزينب اخته مزوجة ما الج شغلة بيهه طبايع امهه كلهه بيهه
وتجي بالأسبوع مرة بس شني كونهه تجي لا تكربيهه ولا تحجين وياهه وزهرة بس هي طيبة من اهلهه
خديجة جا ورجلج الشيج حامد ابو الفصليات
ناجحة هههههههه خايبه نصي صوتج لا يسمعن اكلج الزلمة زين وروح ابوي بس امة الحية تقرة براسه وتكلبه
خديجة جا انتي عندج اولاد لا
ناجحة لا ما اريدن افرحهم بأولاد خية الذل شفته هنا صرت خدامة الهن وأمرغلهن رجليهن خذني وعمري ١٤ سنة ما رحمني كبرني كبل سنيني تردين افرحهن امداني.... اوف يمة خايبه كلبي يأذيني
خديجة مريضه شمالج كعدي ... كعدي
ناجحة انة الوجع هذا صارلة شهر دعيت الله اموتن ربج سمعني هههههه
خديجة جا تضحكين على المرض والموت صدك انتي تحجين هنا ناجحة عبالك احد فجر كلبهه ودموعهه بدت تنزل وتبجي فرغت كلام السنين الي بكلبهه ....
ناجحة الذلة مو زينه خية وزلمتج يعيرج بكتله اهلة جا شني انة مو بشر انة.. ولج يكلي هنا انتي على كد حاجتي وحاجة البيت ولج اهلي حرموني منهم مثل ما راح يحرمونج من اهلج خية وراج مشواررر طويل حضري نفسج واهلج ينسوج مثل ما اهلي نسوني
خديجة لا تبجين شمالج النة الله خية مجرد سمعت دكة الباب نشفت دمع عينهه ورجعت ضحكتهه
(الضحك الصوري وسط هذا الكم من القَتَام الذي نعيش به وسط عالم من الفوضى والأفكار المشتته انه عالمنا الصغير الذي لا نريد لأحدٍ رؤيتهُ انه عالمنا الحقيقي وقوتنا بأن نخبئ هذه الجراح لنجعل منها حياة افضل لنا)
شيخ حامد السلام عليكم
ناجحه عليكم السلام شيخ اترخص انة
خديجة تمسكت بديهه هي الأمان الي بالبيت
شيخ حامد عرفتيهه هذه خديجة مرتي الاولى وانتي الثانية اثنينجن فصليات
خديجة قصدك اثنينه بنات شيوخ ما جبتنه من الشارع وتعيرنه
شيخ حامد لا تراددين فهمتي
ناجحة اي شيخ..... خايبة سكتي
خديجة لا ما اسكت اهلي ما كتلو اخوك ويجي يوم يبين الحك وساعتهه ما ابريكم ذمة
شيخ حامد سمعي اهلج لا تذكريهم بعد
خديجة اذكرهم جا همه عكالي وعزوتي انه مثل المضيف اتنومس بأهلي ومضايفهم المضيف اذا يخلى من اهلة يصير موحش والي ما يذكر اهلة ما مش خير منه
شيخ بغضب حامد ناجحة طلعي..
ناجحة حاضر شيخ
-----------------------------
شيخ حامد سمعي السانج لا اطولينه على اي احد بالبيت
خديجة وانته كول لأهلك انه مرتك موش فصلية لو خدامة اهلك شيوخ اهلي شيوخ
شيخ حامد بعصبية وصياح لا تردين الحجاية بوجهي
خديجة ما ارد الحجاية الزينه منكم بشينه ... بس حجايتكم الشينه اردهه وانة ما كتلت اخوك ولا اخوية الكتلة حتى تفرغ ثارك بيه
شيخ حامد بعد كلام خديجة ضربهه
خديجة انتة زلمة كدرتك على النسوان
شيخ حامد خايبة منو الكدرتة على النسوان اليوم انعل والديك اليوم اشوفج منو كدرته على النسوان ................
(طلعو وسدو الباب وراكم )
____________________________________
خديجة الصبح كعدت عظامي توجعني من الضرب
ناجحة تعالي خية كعدي يمي لا ترحين يمهم
خديجة ظهري ولج يأذيني
ناجحة جا انتي ليش تراددين الزلمة سمعتة يضربج وما اكدر اتدخل خية لا تخلينه يمد ايدة عليج
خديجة يهين أهلي واسكت
ناجحة سكتي اي ولا اليسوة والما يسوة يضربج
لا تخلينه كلما عندة حجة يضربج اخوج بري وما كاتل اخو الشيخ ربج عادل ويبين حكج انه وانتي وغيرج انظلمن ونبقى عكل لأهلنه فهمتي لأهلنه لا اصيرين بلا عكل(عقل ) وادعي ربج يبين حوبتج ابدال ما تراددين
فززنه صوت فضة وين الفصلياااااات
كاعدات هنا كومن كملن شغل وانتي ناجحة كومي اليوم اجازة وخديجة تنظف وتطبخ
ناجحة انه وهي نساعد
فضة انه شكلت شني ما اسمعين
ناجحة حاضر شيخة
فضة كومي انتي
ناجحة انطيني ايدج خية
خديجة انة اكوم وانظف حجية اسهل ما طلبتي
فضة جا شني انتي عناد وما تكولين شيخة لو شني رايدة
خديجة ال أعرفة الشيخة للزلم موش للنسوان والتنظيف سهلة من رخصتج ابدي شغلي وراية غداكم وعشاكم
فضة ولج لا تحطين راسج براسي لا وروح ابوي كتلتج البارحة اخلي اليوم يعلج بنص البيت
ناجحة ح ..... شيخة شيخة تسمع كلامج انه اعلمهه بعدهه اصغير
فضة لسانهه مو مال صغيرة علميهه ولا تاخذين طبايعهه ولن من وجهي وجيبن الريوك وراي
ناجحة حاضر شيخة شني انتي احجي وياج منا يطلع منا كتلج لا تراددين شني تسوالج يضربوج ويطولون السانهم عليج ويصيرون اهل الحك براسج
خديجة جا اسكت ويغلطون علية وعلى اهلي ويذلوني شني انتي شمالج انه عشت بنص اهلي معززة مكرمة
ناجحة كومي ما يفيد الحجي وياج كملي تنظيف وانه الحك بيج بين ما اودي زقنبوت الشيخة شني بوية كتلج لا تخلين احد يضربج لا تعاندين
خديجة اي بس لا يضيج خلج انة اكمل تنظيف وانتي تعالي ورايه
ناجحة انه يضيج خلكي من يضربوج بعد روحي لا تخليهم يمدون اديهم عليج خايبه لو يسووون اخ يالزمن الأغبر خلانه بيد ناس ما تسون والناس صعدت صيتهم
خديجة الله كريم روحي كفي شر العجوز الشمطاء
ناجحة ههههههههه بعد روحي كملي جا انتي مظلومة مثلي
خديجة الله كريم يجي يوم ويبين الحك
_________________________
زهرة صباح الخير انتي مرت اخوي الجديد
خديجة صباح الخير اي انة انتي منو
زهرة انة اخت حامد واختج صرت اسمي زهرة
خديجة هلا بيج
زهرة اشبي وجهج ازرك
خديجة ما مش شي انضربت ما ادري
زهرة اخوي ضربج انة ما راضية بسوالفهم ويظلمون بنات الوادم ويكسرون بختهن
خديجة الله بالمرصاد لكل ظالم من رخصتج اكمل شغلي
زهرة انة احجي ويا ما يضربج
خديجة لا اتركي خلي يطغى ويظلم حتى حوبتنه تبين زين بي
زهرة جا انتي اعيونج حلوات زرك عليمن طالعة
خديجة على امي طالعة
زهرة فدوة جا امج مثلج احليوة
خديجة ههههه اي امي بكبرهه وحلوة
زهرة كون يرزقج بفروخ يشبهونج ما يشبهون اخوي
خديجة الله كريم هههههه انة اروحن اكمل شغلي
زهرة انه اساعدج تعالي
خديجة جا اهلج يحجون عليه
زهرة تعالي تعالي ما يحجون
___________________________________
بالليل الكل ينجمع عدهم عمامهم وخوالهم انه وناجحة بقينا وحدنة بالمطبخ دخل علينه الشيخ حامد
السلام عليكم كواجن الله
ناجحة عليكم السلام كواك الله بعد روحي محتاجين شي
خديجة ما رديت السلام اتعجب عليهه متحملة كل هاي الذلة وساكته
الشيخ حامد الأصول رد السلام يبت الأصول
خديجة السلام يردو على الناس الي تقدر الوادم العدهه مو لتكلهم خدم وتضربهم
الشيخ حامد الوادم التحجين عليهم السانهم مو اطول منهم وما يجيب الهم الضرب فهمتي كتلج لا تراددين
خديجة ان شاء الله شيخ
شيخ حامد انة رجلج شني عود عنادج انتي
خديجة انة وين العناد
شيخ حامد لا بوية انة الي اعاند وعشيرتي مو انتي اروحن للزلم كبل لا اكتلج واكتل روحي
خديجة جا روح للزلم
شيخ حامد استغفر الله العلي العظيم ابقي بهذا عنادج
ناجحة ولج خايبه والله الشيخ حامد خوش خوش زلمة كتلج هاي امه هي تكلبه اكسبي
خديجة لا اكسبة ولا شي
ناجحه ابقي بعنادج
خديجة اكلج انة نعست شني اريدن انام نبقى اناطرهم
ناجحة نامي هنا وانة اكعدج من يفض مسامرهم
خديجة جا اجتي السعلوة اشلون
ناجحة يا هي تجي
خديجة امة الشيخة سعلوة
ناجحة ههههههه نايمة خايبه تاليتج من السانج
نامي انة اكعدج
خديجة انامن احسن
ناجحة فرشي جودلية تغطي بعباتي
(قبل سؤال يطرح من الكل ليش ناجحة تعامل خديجة وهي الزوجة الثانية للشيخ حامد لأن هي انظلمت وانجبرت على حياة وتحملت الذل من عمر ١٤ سنه لهذا شافت نفسهه بخديجة والشخص الوحيد الوكف وياهه زهرة ...)
اجة الشيخ للمطبخ شاف خديجة نايمة على الجودلية وناجحة منومتهه على رجليهه ومغطيتهه بعباتهه
الشيخ حامد ليش ما صعدتي فوك لغرفجن تنامن
ناجحة غير بقينا خاف تحتاجون شي احنه هنا
الشيخ حامد نامت ام عناد
ناجحة ههههه نامت تعبت اليوم نكلت هواي شغل
الشيخ حامد صعدي نامي مشكورة تعبتج وياي ناجحة ديري بالج عليهه اختج الصغيرة
ناجحة بعيوني جا انة يمهه النهار كلة اليوم رفعت ضغط الشيخة وتكلهه حجية لو تكلهه اعرف المشيخة للزلمة مو المرة خلت الشيخة تفور
الشيخ حامد ههههههههه جا كالت الحك هي المشيخة للزلمة كومي بويه وانة اكعدهه
خاب ام عناد ام عناد حلالج المطبخ كومي بوية
خديجة شني وين اولي اريدن انام وروح جدي نعسانه
الشيخ حامد جا الغرف المن
خديجة لأبوي اريد انام ما بيه حيل التكفخ مالك اروحن يم ناجحة
ناجحة انة اترخص شني نعسانة
خديجة وانة شني
ناجحة زلمتج يمج كسرتي رجلي شني
الشيخ حامد ههههه روحي نامي وانتي كومي
خديجة جا الجودلية احسن نومتهه
الشيخ حامد جيبيهه وياج للغرفة عجبتج اظاهر
خديجة المطبخ كلة عجبني
الشيخ حامد لا اله الا الله اشلون تفض بعنادج ابقي هنا وحدج
خديجة اي ابقى شني اخاف
(جا شني انتي تخافين صايرة سباعيه بوية ظلمة يمة راح اموت )فزيت على صوت الشيخ حامد وبيدة جكارته
الشيخ حامد جا طلعتي بس السان كومي للغرفة
خديجة شني عبالك اخاف
الشيخ حامد لا بوية سباعية انة صارلي ساعة ارجف بالمطبخ ههههههههه كومي للغرفة لا اكعدلج الحجية بهالليل
خديجة اي كمت لا تكعدهه مبيه حيل
الشيخ حامد هههههههه
^^^^^^^^^^^^^^^^^
مر اسبوعين نفس الضيم امة ومذلتهه أهلي حرموني منهم وممنوع اشوفهم

فضة اشتغلي ما بيج حيل كل الحيل بيج
خديجة هي اصيح بس دفعتني بالعصا وكعت
ناجحة خديجة شيخة البت مريضه انة اكمل مكانهه
فضة ما بيهه شي كعديهه وخليهه تكمل
زهرة كومي ناجحة نشيلهه يمة خلي بكلبج رحمة البت مريضه ومصخنه خاب ناجحة روحي كولي لزلمة يصيح اخوي من المضيف
ناجحة اي
فضة وخرن عنهه اشوفنهه انة ما يحتاج دكتور
زهرة يمة شني
فضة سدي حلكج لا تراددين وخري
ناجحة اجة الشيخ حامد وامة ما تقبل انشيلهه ونوديهه المستوصف
شيخ حامد يمة انة اخذهه
فضة مرتك حامل
زهرة اشلون عرفتي جا انتي مو دكتور
فضه لا تراددون اخذوهه
_____________________________
فضة سمعي موش عبالج حبلتي تكعدين انة جنت بكدج وليدي ابطني وانكل حطب ........

ناجحة يمااااي خديجة خية
اعتذر عن التأخير القصة انزلهه بين يوم ويوم بسبب وجع بعيوني لازم اترك التليفون يوم ارتاح ويوم اكتب