عِشًگ وَلَدْ اَلْعَمْ

part25

للكاتبة: شهلا

شهاب/ ها دكتورة شلونهة هسة

الدكتورة/ صاير عدها هبوط بالضغط هسة علكتلهة المغذي و انشاالله تمام

شهاب/ انشاءالله

الدكتورة/ شكم مرة اغمة علية او حست بدوخة و من شوكت وشنو السبب

شهاب/ امس اغمة علية بسبب السرعة حست بدوخة و هسة كبل شوية اغمة علية لانة دا تبجي 

الدكتورة/ اذا استمرت الدوخه و الاغماء عدها لا سامح الله رح يكون هبوط الضغط عدها مزمن هسة خلوها ترتاح  و خلو اعصابها ترتاح شوية لا تضوجوهة و و هسة تكدر تدخل عدها

شهاب/ شكرا

الدكتورة/ العفو هذا واجبي

غزل/ شهاب اريد اطلع

شهاب/ خلي المغذي يخلص و نروح

هزت راسها بي دنكت دا تبجي دموعها تنزل عشر عشر ترجع تمسح دموعها و يطيحن مرة الخ

شهاب/ ماكو احد يستاهل  تنزلي هالدموع علموده الي ما يريدني مااريده والي يخرجني من حياتة اخرجة من حياتي مثل ما هو خرجني من حياتة

غزل ببجي/ بس اريد اعرف ليشش هيج حجت اريد اعرف شنو السبب الي خلاهة تحجي هالحجي ها و علي ما سويت شي احبهة والله احبهة هي جانت اختي اختي الي ماجابتهة امي جنت اني الوحيدة الي وياة ادافع عنة ابجي اذا بجت افرح علة فرحهة احزن علة حزنهة بس لييشش تجازيني هييج لييشش شهااب فدوة كلي لييش شسويت انيي ها شسويت

حضنتهة زادت بجي اااخخخ و حمزة لو مو مرة جان حركتها حرك هي و كل عشيرتها علة كل دمعة نزلت على خدج علمودها

وخرتهة مني مسحت دموعها كعدت بصفة
شهاب/ تعودت علة غزل الزغيرونة الي من رغم ضعف شخصيتهة ما تبجي كدام احد و هسة بشخصيتها القوية تبجي بسهولة صحيح اني اكرهج بس ما احب اشوف دموعج تنزل

مسحت دموعها بجف ايدهة و ضحكت

غزل/ ههه شعور متبادل ترة ... بعد ماكو بجي

شهاب/ اوعديني انج ما تبجين بعد

غزل/ ما اوعدك بس احاول

شهاب/ ليش!!

غزل/ لاني بنية و المعروف انة البنية تفرغ الي بكلبها بالبجي علمود هيج ما اوعدك بس احاول ترة ما عدت غزل الزغيرونة الي تعرفهة

شهاب/ هه صايرة رجيجة غزل

غزل/ هههه

ورة دقائق خلص المغذي اجت الممرضة اطمنت علية سندتهة و خرجنا صعدتها ورة حتة ترتاح شوية بين ما نوصل

شهاب/ شوية و راجع الج راح اقفل الباب خوش

غزل/ خوش

قفلت الباب رحت للصيدلية اخذ الادوية مريت بمطعم صاير بسد الصيدلية اخذت لفة و عصير لانة ما اكلت شي من الصبح بس شربت جاي