#بينا_سهاري_وذكريات
الحلقه :الرابعه
بقلم :فاطمه سالم الورفلي
....................................
...........
لقيته واخد شنطتي.. ويفتح في باب حوش.. امم ما يعتبرش حوش.. نقدر نقول شقه.. خش هو.. ولحقته.. لحقته . . و ياريتني ما لحقته.. لقيت شي.. لقيت شي يا ناس يقهر يقهرر.. لقيت...تلاته نساوين.. تلاااته.. وكل وحده ترعش اكتر من الثانيه.. وخرت خطوتين.. خايفه.. وحده منهن قالت..
مراه :منو هادي يا جبريل ان شاء الله؟
جبريل التفت شبحلي.. وشافلهن وقال :هدي مرتي
كلهن شهقن ..وفاجئه نطت وحده سمينه وباين عليها الكبر :كيف مرتك كييف... شن تقول انت يا جبريل! .. شن لي قاعد تقول فيه هاا؟
جبريل :بارقه.. نوضي انتي وبنتك واختك لي دارك..خليني ترا .. وهدي مرتي على سنة الله ورسوله
البارقه :يا غبيني يا حليلي يا غبيني... جايبلي ضرة..مالا اسمع يا جبريل اهني... ما تنساش الحوش هادا حوش عمي.. واني مفضله عليك... وجميل هلي واصلك بزايد.. معناها مرتك براا برااا
جبريل تخزرط :كيف يا البارقه! ... شن لي تقولي فيه "التفتلي خايف.. وشبحلهن وبهمس قال ".. غر تربحي يا البارقه.. غير اسمعي.. تي اعتبريها شغاله ياودي.. مش قلتي تبي شغاله!
البارقه تشبحلي وتضحك على جنب بشماته.. وتهز في كتوفها :لا لا هدي بتشاركني فيك.. وبتستفرد بيك.. لالا ماتلزمنيش
جبريل يرعش كيف المروحه:غر تربحي في طولك في عرضك.. يا بارقه... انتي بنت الشيخ كيف هكي اديري!... ياودي لي بديريه فيها ديري يخي اعفسي حتى على رقبتها
-معاش قدرت نتحمل الإهانات وجعتني روحي :شن المهزلة هادي!... كان تبينيش ردني لحوش هلي.. قال ربي عاملوهن بالمعروف يا اما سروحهن بالمعروف.. مش تتزوجو .. واديرو حالات الله.. رانا بشر
اختها " صباح " :ريتي يا بارقه ريتي.. هادي من اول ساعه.. يخي مش اول يوم.. وهكي مالا بعدين ناويه بتلزنا
البارقه ضحكت بهزوه وشبحت لي جبريل :جبرييل
جبريل شبحلها :ها نعم نعم!
البارقه ابتسمت وحطت ايديها في نصها :يا جبرييل.. لم الشوارعيه هادي من وين جبتها خير ما تلحقها
-ناضو اختها وبنتها يضاحكن.. وهو طبس راسه.. لا حس لا خبر.. وجاني يجري يا حنه غوله... وفي ايدها غربال ... لين اني تفركست.. معاش عرفت شن ندير.. ويجيني ياحنه يشدني.. من وشاحي يكركرني.. وهن لحقنه.. وفتح باب دار .. ودخلني فيها.. وبدا فيا ضرب.. ضربني كفوف على بواني.. على كارشوات.. ما خلي ما دار فيا.. وهن نسمع فيهن يضاحكن عاد ويشوفن فيا... وهو ضربني ضربني لين دهش.. وبعد دهش يا حنه.. خدي السبته.. وزاد ضربني اكتر.. واني ما عالم بيا كان المولى.. مش حاسه على روحي.. نبكي لا اراديا.. مش حاسه اصلا ان اني نبكي.. مش حاسه بي شي ... وحال عقلي يقولي "هادي ديرة بوي.. وحسبة حساب لي صاير توا.. هادي ديرة نجمة.. وهي تزوجت لي نحبه ... واني مشيت في الرجلين.. هدا حال غايتها.. وهدا حالي ما يعلم بيه كان ربي ".. وما حسيت على وجع لي في جسمي ... من كثر ما نبكي على روحي.. ومن كثر الوجع النفسي ... نساني وجع جسمي.. وما فطنتش الا بي الباب اصكر بيا.. لقيت روحي نبكي كيف الطويره.. لقيت روحي زاحفه لاخر الدار.. لقيت روحي نتوجع من كل مكان.. لقيت روحي متريشه لين خلاص.. لقيت روحي في حال يرثى له.. في حال ما يعلم بيه كان الله .. تنهدت.. وغمضت عيوني بقوه.. شوي سمعتهن..يتكلمن بصوت عالي..يبني نسمعهن..نسمع في صوت البارقه تقول..
البارقه :هدا لي يتعدى حدوده شفتي شن صارله يا صباح
صباح تضحك :ايي شفت يا نااري هالشوارعيه
البارقه :تستااهل.. ما قاللها حد تجي لنص حوشي.. وتطوال معاي.. مزال الجري على طلاقها
صباح :خليها تظملنا الحوش قبل..
البارقه :امم زعما؟.. والله حقا خلي نكسدو عليها بالمره
صباح :ايي هههههه شغاله بالبلاش جتنا
بقلم فاطمه سالم الورفلي
بنبكي مش قادره .. ما عنديش جهد نبكي.. جفن دموعي.. مش قادره كيف نعبر.. ولا كيف نوصف.. ولا من نخبر.. ضاقت بيا الدنيا .. ضاق بيا الحال.. معاش عرفت ما ندير.. لقيت روحي ساجده لربي ونبكي.. نبكي ونعيط.. نعيط بقوة قوتي.. بقوة الوجع.. بقوة المرار لي شفته.. بقوة التراكم القهاير لي صارلي.. بكيت بكيت بكيت .. لين جفن دموعي.. وتعبت العين.. ورقدت بدون ما نحس... كيف الميته.. من التعب.. واجهاد النفسي.. حاسه روحي بنموت يا بننجلط.. من لي قاعد يصير... نادمه اني هداكا اليوم مشيت لي نجمه وخبرتها.. خبرتها على فرحتي.. ما كنت نحسابها ادير هكي.. ولا يصيرلي هكي.. بس من سحرني؟.. منو؟.. اخخ حسبي الله ونعم الوكيل.. حسبي الله ونعم الوكيل.. شوي سمعت صوت.. تخربيش على الباب.. خفت.. شوي سمعت حد يقول
:بس بس
-اني كنت راقده.. جيت مقعمزه.. خايفه ونرتعد مع بعضي.. وزاد تكرر الصوت..
:بس بس
-اني بلعت ريقي بخوف .. وقلت :منوو؟
:افتحي اني اني.. بنت جبريل " زُبيدة "
اني زدت خفت :اا.. ما عنديش المفتاح
زبيدة:حقا نسيت.. به تمام استني تو نجي خليك نايضه..
اني كمشت ايدي بخوف وقلت بصوت يرعش:اا به "وقلت في خاطري.. زعما شن تبي؟... حاسه روحي خايفه.. حاسه في شي بيصير؟.. زعما شن تبي هي! ".. وشوي قعدت نسمع في صوت تكشيك المفاتيح.. وطقة المفتاح.. وخشت زبيدة معاها بيلة ضي وسفرة.. وجتني طبست عليا وحطتلي السفرة.. واني نشوفلها ومستغربه..
زبيدة :عارفاتك مستغربه.. لكن قلت اكيد جيعانه.. وبالمره تخشي حمام حشاك
اني فركت ايديا في بعض :اا اي صح.. اا صحيتي شكرا
زبيدة تتفحص فيا بعيونها وادير في الضي عليا:امم سلمك.. باهي ما دوريهاش امي.. غر غيرة وهكي وانتي عارفه هههههه... عارفه الضراير شني!
اني هزيت راسي وضحكت بمجاملة :هههه اي اي صح
زبيدة ابتسمت بخبث..قدمتلي السفرة :هاك كولي خيرك؟
اني شبحت لسفرة ومديت ايدي ونشبحلها... حاسه بخوف ورهبه.. مش عارفه حاسه في شي من وراها..
زبيدة :هههه خيرك كولي؟
اني ابتسمت ورغم هك باين عليا الخوف:اا اي اي تو ناكل تو ناكل..
زبيدة :امم اي شن اسمك!
اني :غادة
زبيدة :هممم غادة.. اي غادة... بااهي ياا غادة ههه.. قوليلي ليش تزوجتي بوي! .. وانتي صغيره وحليوه.. ههه وبوي شيباني عاد
اني زعما نقوللها ولا لا..
زبيدة :احكي شن في... اكيد في شي!
اني :.... يتبع
...................
رايكم وتوقعاتكم.. الباين زبيدة مافيش من وراها خير وانتم شن رايكم تتفقو معاي او لا 👀❤... لي جااي اقووى انتظروني ❤وادعولي بعد شوي امتحاني
#فاطمه_سالم_الورفلي
