#بينا_سهاري_وذكريات
الحلقه :السادسه
بقلم :فاطمه سالم الورفلي
.....................................
...........
زبيدة :ايي يا حي يا حي كان بابا يسمع شن دارت
جبريل استغرب :خيرها شن دارت غاده
زبيدة :غادة يا بابا.. غادة لي بدلتها بي ماما ولا.. هادي امس طبو عليها وحدين بسلاح... ومشت معاهم..
البارقه :ايي ايي هادي لي تزوجها عليا ايي.. احكيله احكيله شن لي صار بتفصيل امس
زبيده :ووه عليا يابابا.. حصلت رعشة امس.. في عز الفجور.. نضت بنصلي الفجر.. عليا الوضوء.. شوي سمعت شوشره.. كهبت من الرواشن.. ونسمع.. ونسمع هادي لي تزوجتها تتضحك وتسهوك.. وهم يقولو في كلام الشيطان يغطي منه وجهه.. ووه عليا ووه شني هادا يا بابا؟
جبريل نصدم.. و وجه قعد اسوود.. وعروقه برزو من اعصاب :وين المفتاح.. وين ؟
البارقه حطت ايديها في نصها:او وين ماشي؟
جبريل :مفتاح السياره وينه؟.. و الدار لي برا.. خلي نلم قشيشها ونفض هالحكايه هدي لي جبتها لي روحي
البارقه :تستاهل تستاهل مايجيك.. لي يجيك شوي.. عاد اني انيي يا جبريل نتبدل؟.. هدا ما نراجي منك اني بعد هالوقت؟
جبريل :حقك عليا.. حقك عليا.. يا بنت الشيخ.. غر نفض الموضوع هدا بس.. وبعدين لي تبيه تم
البارقه عقدت حواجبها:نبي الطلاق.. الطلاق نبيه يا جبريل
جبريل خاف وقعد يشبح يمين ويسار :كيف كيف.. يا البارقه.. كيف يا بنت الشيخ كيف.. والبنت؟.. زبيده كيف هكي؟.. لا لاله عيب هالكلام.. وانتي بنت الشيخ ما يطلع منك العيب؟.. كيف هكي اديري كيف !
البارقه نخصت كتافها:لي سمعته يا جبريل.. هدا لي عندي.. نبي الطلاق "وفنصت في زبيده "
زبيده تبكي بلعاني: ماما ماما لا لا يا ماما.. ما ديريش هكي
البارقه برفعه حاجب: بدلني يا بنتي.. ما كان ودي السية.. ولا نطلب الطلاق.. لكن هو جبرني جبرني يا بنتي
جبريل فار دمه :حقك تاخديه.. تاخديه وبزايد.. لو كان على قطع رقبتي.. وهاني ماشي نطلقها.. وبتوصلها ورقتها..
البارقه ابتسمت:تو نشوف.. هاني نراجي فيك!
جبريل :تم يا بنت الشيخ..
البارقه :زبيده.. عدي اعطي لي بوك المفاتيح.. وساعدي بوك
"ناضت تجري زبيده.. خدت المفاتيح.. وفتحت الدار لي برا.. وبدت اطلع في دبش وتحط فيه على بعضه في الشنطه.. وفتحت السياره.. وحطتها فيها الشنطه.. وركب جبريل.. وخشت زبيدة للحوش.. وبدا جبريل يرحي وياكل في الشيش عليا.. وكبده دم عليا وحال عقله يقول بعد الفيلم لي داراته البارقه 'في سباها قريب خرب حوشي.. غشوني ولاد الحرام غشوني.. لازم نطلقها اي اي نطلقها.. ونفتك.. شن لي درته في عمري اني.. اخخ قبل نبي ولد يحمل اسمي.. اخخ تساتر تساتر المهم توا نطلق.. نطلقها بنت الحرام هدي ونرتاح.. ".. وزاد في السرعه.. "
-طبعا في الغضون هدا.. ولحظات.. اهيا.. بوي كل شوي يشوف في الساعه.. وماشي جاي .. شوي قال
بوي :اسمع ياابراهيم
ابراهيم مقعمز على الفصكيه وحاط ايديه على وجهه :نعم يا بوي
بوي :دخل اختك للمربوعه.. لابدة ساعه اخرى ويجي المريوح هدا
ابراهيم ناض.. وتنهد.. وجاني.. شدني.. وقعد يشوفلي ويبكي بلا صوت.. فتح باب مربوعه بروس صوابعه.. ودخلني.. حطني على الفراش.. وقعد يشوفلي ويضرب على الوطا.. حاس بحرقه.. حرقه القلب كوم.. وحرقه كرت راجل في السوق واعره.. تبدا مش قادر ترفع راسك قدام ناس.. الشرف واعر واااعر خط احمر...
"بقلم فاطمه سالم الورفلي"
بينما في لحظات هدي جبريل قاعد ياكل في الشيش عليا.. ليين وصل لحوشنا.. طفى السياره.. وفتح الباب.. ونزل.. نزل بالشيح والريح.. وعيونه ما تشوف في شي.. شوي بوي سمع صوت السياره.. طول طلع.. شافه جبريل زادو اعصابه فارو ...
جبريل :هدا دير اديره بنتك؟.. هدا!
بوي استغرب ردة فعله:ليش شن لي صار؟ .. شن في يا جبريل !
جبريل طبس راسه :والله شن بنقولك يا حاج.. استغفر الله استغفر الله
بوي خاف :شن في يا جبريل تكلم؟
جبريل زفر : يا حاج من لاخير.. ربي يستر بيتك وخلاص.. بنتك جوها رجاله رفعوها في عز الفجور.. وشافوها بنتي وزوجتي
بوي حط ايديه على راسه.. وعيونه رقرقو :يا رسول الله يا رسول.. وكيف ما نضتش انت؟.. تي شن سايبه هي.. بنتي وين وانت وين.. انت وين حاطها بنتي؟ .. كيف يصير هدا كله وانت ما تندريش؟
جبريل :استغفر الله.. والله هدا لي صار يا حاج.. وملح وخف.. والحق اني بنرمي عليها الطلاق ... ونفض السيرة هدي
بوي حس وكأن من عطاه كف.. بجد موقف قويي.. موقف قوي قوي ... ويقسم القلب قسم.. بلع ريقه بتوتر وقال :يا جبريل.. استهدي بالله.. وكل شي ينحل بالتفاهم
جبريل :لي عندي قلته يا حاج.. وهي بنتك توا طالق طالق طالق..
-بينما.. اني في لحظه هدي ... حسيت على خوي جنبي.. وفتحت عيوني على صوته يبكي.. وشهقاته.. فتحت عيوني طول جيت مقعمزه.. و مستغربه من لي صاير..
اني :شن في.. خيرك "قعدت نشبح يمين يسار... مستغربه كيف جيت هنا "
ابراهيم التفتلي :شن لي درتيه هدا.. حرام عليك.. حراممم قشرتي وجهي.. وين نمشي بي روحي.. شن نقول لناس.. شن ندير قدام ناس؟... واطيتي روسنا واطيتيهن.. اني راسي لي ديما مرفوع واطيتيه "وهو قال هكي.. جيت بنسأله.. وما عطانيش فرصه.. هو قال هكي من هنا ويضربني من هنا.. واني من ضرب جبريل امس.. حاسه الوجع بالضعف.. قعدت نعيط بدون ما نحس.. ويخش عليا جبريل وبوي.. جبريل خش عليا.. و مصدوم "
بوي جي يجري :حول ابراهيم .. حول حول ستر الله باقي
ابراهيم يبكي :شن خلت فيها يا بوي شنوو
جبريل عيونه فيا :غاده انتي راك طالق.. وتنحرمي عليا ليوم الدين
ابراهيم :عدي يا راجل عدي ... عطيناهلك مافيها حاجه.. من اول يوم ما هنيتش عليها.. ما هنيتش.. تي انت وين.. ويين نبي نفهم انت وين في هدا كله؟
جبريل :... يتبع
........
...
تعتبر حلقه هادي اضافيه.. تعرفو حتى غاده معاش قدرت تتحمل وهي تحكي.. معاش قدرت تكمل .. تي اني بروحي اعصابي نحرقو بذات من البارقه وجبريل هديم حرقو اعصابيي حرررق.. مهم توا تفااعلو باش بعدين تنزل حلقه سابعه حبايبي❤
#فاطمه_سالم_الورفلي
