Kung itatala ko lahat ng nangyari sa atin ika'y mabibiglaIsang libong pahina ang inihanda ngunit ni isang bakas ng tinta ay wala
Nais ko ng itigil ang kahibangang ito
Dahil sa totoo lang hindi ito ang paksa ng aking kwento
Hindi ito puno ng romansa at kilig gaya sa pelikula
Ito ay kwento ng aking pagtawa sa kabila ng sakit na iniinda
"Di ako galit."
"Mas lalong di kita mahal."
Dalawang pangungusap na halata namang di totoo
Madalas ko ding sabihin pag ayaw ko na
Ayoko na
Ayoko ng mabuhay ng ganito lang
Mabuhay na ang kaaway at kakampi ay magkawangis
At di maihambing ang buhay sa telenovelang nilalabas ang nakakatuwa mong bungisngis
Eto ay istorya ng kontrabida bago siya patayin sa eksena
Mga extra na pagkatapos mapaslang ay makakalimutan na
Wag nating iungkat ang nakaraan
Kung papanong ako'y nagbingibingihan ng iyong sabihing "gusto mo lang ako nyan"
Inaya kitang umalis ng mabilis upang maiwan ang tibok ng puso ko doon
Ngunit hindi
Sa bawat hakbang na tayo ay magkahawak ng kamay
Ang tibok ng puso'y unti unting dumadagungdong
Sa buong katawan ko't pagkatao't kaluluwa
Namamagasa't iniisip na may hindi pa pala ako nagagawa
Hindi ko pa nasubukang halikan ka
Halikan ka bigla at hilingin na sana ay langgamin ako ng tamis ng iyong pagsagot
Ang iyong pagbalik sa akin ng halik na may kalakip na malagkit na pagtingin
Haplusin mo ako gamit ang iyong kamay at ilabas ang lahat ng aking tinatagong lihim na damdamin
Ang dugong dumadaloy sa aking ugat ay tuwang tuwa
Tila nakalimutan at sinapawan ang lungkot at pangamba
Ngunit ito ay mananatiling lihim
Dahil ako ay isang duwag na magmamasid mula sa dalawang kanto ng aking mga mata
Hiniling na langgamin sana ako at tangayin sa mundo kung saan walang nakakaalam
Tag-ulan na naman ngayon
Tanaw ko sa dingding ang mga langgam na sinundan ako sa aking pagtulog
Kahit pa ako'y kagatin, walang maramdaman dahil manhid na
Sinimulan ko ulit sa umpisa
Kung saan ikaw ang tugma, ang saknong at ang sukat
Ikaw ang talinhagang walang kapantay ang hiwaga
Pantasya na nagbigay pagasa sa buhay kong nakakayamot
Sinimulan ko sa simula
Kung paano ako'y naging duwag at nabigo na parang isang tanga
Sandali lang...
Bakit ba ikaw ulit ang paksa nitong tula?
Hayaan mo akong simulan muli mula sa umpisa
Kung saan minahal kita
Sa tagal ng panahon nilumot na ang damdamin ko at tuluyang nawala
Hinihiling ko na sana ako ay langgamin
At dalhin ako sa taong matuturing kong akin