الجمال...؟

part:1

كانت خارجة من الشركة معصبة
هادي هي تاسع شركة تايرفضوها فهاد الاسبوع.. وهادي المرة 11 لي كتسيفط فيها لنفس الشركة كل عام.. شركة العلمي ..الشركة لي كتمنى انها دخل ليها من شحال هادي وقرات مايقارب سبع سنين باش تهز فيها بلا السطاجات لي دوزات بعدما لقاتهم بصعوبة..  رقم قياسي.. والسبب؟

السبب هي براسها ماعارفاهش او بالاحرى عارفاه ومابغاتش تتقبلوو.. مايمكنش  تتقبل ان 19 لعام دالقراية اتضرب ليها فالزيرو بسباب انها ماعندهاش المؤهلات الخارجية..

مابغاتش تسرطليها انها ماغاتقبلش تخدم ولو غا سكريتيرة او نادلة فمقهى بسباب انها خايبة بهاد المعنى..

تفكرات السكريتيرة دالشركة شنو قالتليها
"مادموزيل الشركة هاد الساعة ماخاصهاش خدامة.. نهار يخصونا نعيطولك"

هي: ولكن انا شفت لانونص فجوجل ودفعت اونلاين وعيطولي ندوز لونطغوتيان؟

السكريتيرة خنزرات فيها: داكشي لي كاين قلتولك.. تقدري تخرجي ولا نعيط للسيكيرطي..

سارة تاهي بادلاتها التخنزيرة وخرجات. وصلات لحدا الباب وهي تبانليها لانونص معلقة تم.. صوراتها ورجعات باش توريها للسكريتيرة.. سمعاتها كتهضر مع شي بنت
السكريتيرة:".. "هاد الخيوبية كاملة وجاية بوجهها حمر تخدم فشركة بحال هادي هههههه لا بزااف الله يعطينا شي كمارة بحال كمارتها..  (ضربات فالبيرو بيديها من بعد ماتفكرات) ويلي على دعوة دعيت على راسي الله يسترني ياربي تف"
البنت: '' سحابلها داك الديبلوم دالهندسة غا ينفعها ، هاد الوقت لاماكنتيش تيتيزة ومهلية فراسك، غا سيري شوفيلك فين تكمشي، حيت ماكاينش لي يقبل عليك ونتي جاية بدربالة للخدمة"

بقات غادة فالطريق ودموعها شلال على خدها.. تلفات تخربقات مابقات عارفة مادير الدنيا ظلامت فعينيها..
مولفين تايرفضوها الشركات ولكن بطريقة محترمة وماكانتش عارفة علاش، دابا فاش عرفات السبب حسات بالحگرة،
زوبعة الافكار لي تايدورو وتايتضاربو فراسها دابا  [شنو علاقة المظهر الخارجي بالخدمة؟ واش تايعاون فشي حاجة؟  علاش انا؟؟ علاش انا لي خايبة؟ ماعندي والو، لا زين لا فورمة لا لباس زوين، لا فلووس لا عائلة، مالقيتهاش كيبغيتها من جميع النواحي؟ علاش انا اسيدي ربي]

وقفات حداها واحد الحديدة وااعرة ونزلات منها بنت طويلة وفورمتها اقل مايقال عنها مثيرة،. شعرها طويل وزعر مقاد ولباسها زوين ، جيب فوق الركبة وشوميز وطالون.. ماكياج واعر ، بارفان كايسلب العقل، ابتسامة ساحرة، هزات تيليفونها وقالت (الو حبيبي) مزوجة و غادية فاتجاه والباب دياال واحد الشركة كبييرة..

وقفات متبعاها بعينيها تادخلات، تنهدات وزادت كملات طريقها، وكتفكر بصوت عالي شوية: الحياة غير عادلة شي عطاتو كولشي وشي حيداتليه كولشي.. علاش اسيدي ربي انا؟ ماعندي والووو تاحاااجة..
وقفات قدام واحد المحال بابو على شكل مراية من برا ومن الداخل كولشي تايبان.. بقات كتشوف فراسها وطلع وتنزل
كانت لابسة سروال دجين واسع من التحت، كبوط طويل مغطي المؤخرة ومغطية شعرها بفولار خفيف..
وقفتها مقوسة،...
قادات الوقفة وقربات اكتر كتشوف فوجهها
عينيها كباااار وشفارها طواال بزاف، حجبانها غلااض، وجهها مدور شوية ومكسو بزغيبات ماباينينش بزاف تاكتقرب عاد كتشوفهم، نيفها مقوس شوية وفمها كبيير، سنانها عاديين خارجين شوييية ولكن نقيين.
خسرات ملاميحها فاش تفكرات البنت ديال قبيلة.. قارنات راسها بيها.. فرق شااسع جدا..

دارت كتمشى ببطئ وبخطوات قصيرة، مركزة عينيها المدمعيين فالارض، وسااارحة فتفكيرها و كتجلد فراسها ..
سارة بداات تبكي فصمت وسط الطريق، كتمسح دموعها ويرجعو ينزلو تاني، منزلة راسها للارض باش مايشوفوش فيها المارة.. غادة وكدخل فعباد الله.. للحظة بدات كتجري وتشهق مابقاتش قادرة ماكرهااتش تغوت بالجججهد تخرج هاد الالم لي مستعمرها ، دارت على غفلة باش تقطع الطريق... للحظة عم السكووون.. ودنيها تايصفروو وكتسمع اصوات من هنا وهناك كتتعالى..
بدات تسمع صوت الاسعاف، ومن تماك الظلااام...