#أم_عزباء 8 (حقيقيه)
❤️
شيماء:لابسه بيجامة النوم وراقده فوق السرير تهدرز ع دانا في تلفون
شهاب:فتح باب غرفة شيماء بدون م يطق عليها
وكانت انفاسه متسارعه وملامح وجه متعصبه .....شيمااااااء
شافت لي شهاب بصدددمه
اها اكيد جاع....هاته
شهاب:قرن حواجبه....الولد هدا ولدك...
شيماء:تلخبطت وأفكارها خشت بعضها وستاكت😨
شهاب:بصوت عالي....جاوببببي الولد هدا ولد من
شيماء:بلعت ريقها.....ولتواا لسانها
مم م من قالك؟
شهاب:بصوت عنيف....وين بوه؟
شيماء:شن في انا مش فاهمه شي؟
شهاب:شن السبب الي خلاك تعطيه لي خوي؟
شيماء:الأفكار ادور في راسها لكن خايفه تحكي شي وتندم
فهمني شن في وراح نحكيلك
شهاب:حط طه ع سرير....ولد حرام صح؟
شيماء:سكرت عيونها وهيا تاخد في نفس مريح ...يعني معنداش علم بي شي
شهاب:شافلها بنضره غريبه....متحاوليش تكدبي
انا عندي علم بكل شي
شيماء:بدون ردة فعل...زي شنو؟
شهاب:ونا اراجع في اخر مصاريف الشركه
طلع عندي نص مليون مصروف ومافيش شي اسمه حسابات مصحه ولا شي بخصوص محمد
راجعت الموضوع واكتشفت انه كل شي عباره ع كدبه
شيماء:ضحكت وعلامات الخوف ع وجها...ونا شنو خصني في الي تحكي فيه
شهاب:يعني قعده موصره تقنعيني
شيماء:انا معنديش علم بي اي شي انا مربية طه فقط
شهاب:كملتي؟
ومسكها من يدها بعنف....تبي تحكي أو متحلميش انتي وهما انه تشوفو طه تاني؟
شيماء:تشوف لعيون شهاب ومصدومه
في شيً داخلها يقولها احكي خلاص جي الوقت
بس في هلبا حاجات منعتها تحكي حرف ومتتسرعش في اي شي
نفضت يدها منه....اي ولدي شن المشكله يعني؟
شهاب:قام يده وحركها بمعني ستوب
شيماء:قامت طه في حضنها وبساته
شهاب:كان بيطلع وتراجع في خطواته ....متخليش طه بعيد عليك علشان متندميش بعدين
شيماء:شافتله وهوا عطاها بضهره...اكيد🥺
شهاب:كان شابك يديه ببعض وكأنه واخده تفكير عميق
شيماء:جسمها ينخض من الصدمه
شهاب:مسح ع وجه بيديه وخدا بعضه وطلع
شيماء:تنهدت براحه ومنعت دموعها انه ينزلو
ي غبيه اكيد الليله الي رضعتي فيها طه قعده في ذاكرته وزاد تأكد
زعما يحكي ويفضحني💔
_________________________________
رنيم:هههههه يعني خلاص تبي تعرف
ماجد:بصدمه...ع شنو تلمحي؟
رنيم:ع حبوب وع الدكتوره الي متعاونين معاها وانتا وعشيقتك وفاء
ماجد:😨😨
رنيم:خيرك نصدمت؟
شنو تحسابني فرخه نرضع في صبعي
كنتو تمثلو ومتوقعين انه لمياه ماشيه من تحت رجليا
ماجد:الصدمه متوزعه ع وجه....اءءء
رنيم:كنت ميته فيك وفي حبك ضحكت بهستيريا
كنت نشوف فيك الدنيا ي عيني ماجد بكفه والعالم كله بكفه
ماجد الهادي لحنين البريئ الي راح نخليه ينسا الماضي ويحبني
ماجد:يتفرج ع رنيم وهيا بشكل تاني كأنه اول مره يشوفها
رنيم:كنت نخطط لحياتنا كيف راح تكون حلوه ببساطه وبكل شي حلو نكتشف انه وفاء تحبك
شفت المسج يومها ع تلفونك لكن كذبت عيوني علاش؟
لانه وفاء رفيقة عمري ومستحيل تخوني
وبعدين لو كانت تحبك مكانتش خلتنا نتزوجو
تتتتت لكن لا طلع حتا ماجد راجلي يحبها وبينهم مواعيد
وهدا كوم وحرماني من الصغار كوم تاني وانتا الي موصاها عً شي هدا
ماجد:وقفي تخاريف رنيم
رنيم:انتا الي وقف كدب نخدعت فيك مقدرتش حتا ناخد راحتي ونبكي في وسط حوشي
توقعتك تتراجع وطلعها من حياتك لكن لا هههههه كنت تبي تتهمني بالخيانة مع انور
وانتا عارف انه انور أشرف منك وعارف انه انور من زمان صديقي وعارف انه انور مجروح وكل يوم يفكر ينتحر لانه ضميره قعد يذبح فيه
ماجد:منزل رأسه ومكانش متوقع انه يستنا فيه عرض زي هدا
حس بذل والاهانه
رنيم:متخافش انا مش راح نخرب عليك فرحت عمرك تقدر تسافر ولما ترجع ترمي عليا الطلاق
وكيف جايه بتطلع
ماجد:وين كنتي بالقوه هادي
رنيم:نفضت يدها منه....انتم هكي البشر تقعدو تعذبو في الإنسان لن يقسا ويتحول لي وحش
وطلعتت
ماجد:في شنو ورطت روحك ي ماجد بس وقعد يضرب برجليه ع الباب🔥
أنت تقرأ
أم عزباء ( روايات ليبية )
Romanceللكاتبة : ميلو حسن ، ورطة و كارثة و ذنب كبير يواجه حياتها و يقلبها رأس علي عقب رواية درامية " حقيقية " من داخل المجتمع الليبي
