" လွမ်းပို "
ရှေ့ကနေ ငိုက်စိုက်ငိုက်စိုက်နဲ့သွားနေသော ကလေးငယ်က သူ့ကိုလှည့်ကြည့်လာ၏။ ထို့နောက် သူ့လက်ထဲက စာအုပ်အထပ်ကြီးမြင်တော့ ဘာမပြောညာမပြောနဲ့ ဆွဲယူလေ၏။
" မဟုတ်ဘူး ... ဆရာက သားကို စာအုပ်ကူသယ်ခိုင်းမို့ မဟုတ်ပါဘူး .."
ကလေးငယ်၏လက်ထဲက စာအုပ်အထပ်လိုက်ကြီးကို ပြန်ဆွဲယူကာ အသည်းအသန်ပြောရ၏။ သူ့လက်ထဲစာအုပ်တွေပြန်ရောက်တာနဲ့ လွမ်းပိုဟာ ချာကနဲ လှည့်ထွက်သွားချေပြီ။
" လွမ်းပို "
" ... "
ခေါင်းကလေးလည်လာသော ကလေးငယ်လေးက မျက်နှာသေနှင့်။ အရယ်အပြုံးလည်းမရှိပေ။ ထို့အပြင် အနည်းငယ်လည်း မျက်မှောင်ကြုံ့နေသလို။ နေပါဦး။ သူကပဲ ဒီကလေးကို တမင်လိုက်ရစ်နေမိပြီလား။
" မြို့နယ် စာစီစာကုံးပြိုင်ပွဲရှိတယ် .. သားပြိုင်မယ်ဆိုရင် ဆရာ့ဆီ လာစာရင်းပေးလို့ ပြောမလို့ပါ .. တခြားအသေးစိတ်သိချင်ရင် သားတို့အတန်းပိုင်ကို မေးလိုက် "
" ဆုရမှာလား "
" အင်း ရမှာပေါ့ "
" ဟုတ် "
ခေါင်းလေးညိတ်ပြကာ ချာကနဲလှည့်ထွက်သွားသည့် ကလေးငယ်ကို သူ့မှာသာအကြောင်သားကြည့်နေမိတော့သည်။ ဒီကလေးက အနည်းငယ်တော့ အရိုအသေတန်သည်။
ဆရာတစ်ယောက်ကို မကြည်သလို ကြည့်သွားခဲ့သည်လေ။ ဒီလိုတော့ မဖြစ်သင့်ဘူးမလား။
အိမ်စာထပ်ထားသောစာအုပ်တစ်ထပ်ကြီးကို အခန်းထဲသယ်လာရင်း ခုံပေါ်စာအုပ်တွေတင်ကာ လူပါဝင်ထိုင်လိုက်၏။ အနည်းငယ် အသံကျယ်သွား၍ထင်သည်။ အခန်းတွင်းမှ ဆရာဆရာမများက သူ့ထံလှည့်ကြည့်လာ၏။
" ... "
တောင်းပန်ပြုံးလေးပြုံးပြကာ ခေါင်းလေးညိတ်ပြရင်း အိမ်စာစာအုပ်တွေသာ အမှတ်တိုက်ဖို့ ပြန်ကြည့်လိုက်ပါတော့သည်။ ထို့နောက် ဆရာပိုက်ထွေးတစ်ယောက် မကြာသေးခင်က ဖြစ်ခဲ့သည့် မကျေမလည်မှုများကို မေ့သွားလေတော့၏။
ထည့်ယူလာသည့်ထမင်းဘူးကလေးကို ဖွင့်တော့ မနက်ကအချိန်မရ၍ ညကကျန်သည့် ခရမ်းသီးနှပ်ကလေးကို ထည့်ယူလာမိသည်မှာ တကယ်ကိုငါးပါးမှောက်ချေသည်။
YOU ARE READING
လွမ်းပို(Completed)
Romanceအချစ်နှင့်သိက္ခာ မာနနဲ့သစ္စာ တရားသဖြင့် ယှဥ္ပြိုင်ကြရအောင်