( كونى غاليه 2)
احمد:حبيبتى ايه رأيك نخرج سوا بعد الكليه
ريم :بس
احمد:هتقوللى بابا و ماما و ما بحبش اكدب انا زهقت و الاجازه جايه و مش هنعرف نتقابل
ريم:خلاص يا حبيبى انا موافقه هكلم ماما اقوله ان رحمه تعبانه و هروح اشوفه
احمد:ايو كده يا قلبى
ريم:احمد
احمد: عيون احمد
ريم:انت بتحبنى صح
احمد: مالك يا ريم ما انتى عارفه انى بحبك و مقدرش استغنى عنك
ريم:مش هتسبنى
احمد:هو انا اقدر انتى روحى
فى البيت
الام :عامله ايه دلوقتى
ريم: هى مين
الام:رحمه مش انتى قولتللى انها تعبانه
ريم: اه يا ماما بس بقت كويسه دلوقتى ( عشان تدارى كدبه هتضطر تكدب ميه كدبه )
الاب:اتعشى يا ريم و شوفى مذاكرتك
ريم: حاضر يا بابا ( و طول الليل طبعا بتكلم احمد )
خلصت الامتحانات و النتيجه بانت
الاب:ريييم
ريم: نعم يا بابا
الاب:ايه النتيجه دى جايبه مقبول ليه كده يا بنتى انتى دايم بتجيبى امتياز ليه تقلى كده جاوبينى
ريم: الامتحانات كانت صعبه
الاب: الامتحانات صعبه فى الترمين و لا انتى الى بقيتى مستهتره و مش بتذاكرى و كل شويه راحه عند صاحبتى صاحبتى تعبانه راحه اشوفها ايه الى شاغلك جاوبينى
ريم:ابدا يا بابا مفيش حاجه السنه كانت صعبه اعوضها السنه الجايه
الاب: انا قصرت معاكى فى حاجه يا بنتى قوللى طلبتى حاجه و قولتلك لا
ريم: ابدا يا بابا انت عمرك ما قصرت معايا
الاب: انا ماليش غيرك يا بنتى عايزك تكونى ناجحه دايما فى حياتك زى ما انا فخور بيكى و باخلاقك و تربيتك خلينا فخور بنجاحك اوعدينى يا ريم تشدى حيلك السنادى و تجيبى امتياز
ريم :حاضر يا بابا
الضمير:فخور بيكى و باخلاقك و انتى بتكدبى عليه هو رباكى على الكدب رباكى على كده هو قصر معاكى فى ايه مش حرام تزعليه كده ده بيستنى نتيجتك علشان يفرح
-عادى يعنى انا عملت ايه مش نجحت وخلاص يعنى لازم اجيب امتياز يعنى انا تعبت بقى
الضمير: تعبتى من المذاكره ولا من الكدب الى بتكدبيه على اهلك
مفيهاش حاجه يعنى كلها سنه و يتقدملى و مش هكدب تانى
الضمير :هتفضلى سنه كمان تكدبى
يووووه بقى انا زهقت
ريم: ايوه يا حبيبى
احمد: انا فرحان اوى اننا هنتقابل بكره واحشتنى اوى
ريم: و انتى كمان يا حبيبى واحشنى جدا
احمد: عندى ليكى مفاجاه هتفرحك
ريم: قوللى يا حبيبى
احمد: بدات اجهز فى شقتنا علشان لما نخلص السنادى تكون جاهزه
ريم: انا فرحانه اوى يا حبيبى امتى يجى اليوم الى نكون فيه مع بعض
احمد: قريب يا حبيبتى
تصبحى على خير يا قلبى اشوفك بكره
............
رحمه: ازيك يا ريم واحشنى
ريم: وانتى اكتر يا رحومه
رحمه: طبعا مستعجله عشان تقابلى احمد مش كده و احنا خلاص مش بتقعدى معانا
ريم: معلشى يا قلبى هشوف احمد و هاجى اقعد معاكم باقى اليوم
رحمه: يعنى كده مش هنحضر محاضرات النهارده
ريم: فكك يا ستى احنا لسه اول اسبوع فى الترم
رحمه :ماشى هنستناكى فى الكافتيرا ما تتأخريش
ريم :ماشى سلام
