" كونى غاليه3"
الام : مالك يا حبيبتى من الى مزعلك قوللى
ريم: مفيش حاجه يا ماما
الام: يا بنتى رايحين قوللى مالك انتى مخبيه حاجه عليا قوللى فى حاجه مزعلاكى فى الكليه
ريم: سبينى لوحدى انا مش عايزه اتكلم مع حد عشان خاطرى سبينى
الام مشيت و سابتها و قلبها مقهور على بنتها الوحيده
نرمين : السلام عليكم ازى حضرتك يا طنط ريم موجوده
الام: ادخلى يا نرمين يا بنتى ريم فى اوضتها مش عارفه مالها اليومين دول مش بتخرج من اوضتها ولا بتأكل ولا بتشرب ولا حتى بتتكلم معانا مش عارفه مالها يا بنتى قلبى واجعنى عشانها بقالها اسبوعبن مش بتروح الكليه
نرمين: متقلقيش يا طنط هتبقى كويسه انا هدخل اشوفها و مش هخرج غير و هى معايا
نرمين : ممكن ادخل
ريم : ادخلى
اول ما شافتها ارتمت فى حضنها باكيه
نرمين: اهدى يا حبيبتى مش كده
ريم: مش قادره يا نرمين مش قادره انسى نظره الاحتكار الى فى عنيه هو بيقولى انتى رخيصه مش قادره اشوف حد مش قادره اشوف نظره الناس ليا فى الكليه مش قادره اسامح نفسى مش قادره ابص فى عين اهلى و انا كنت بكدب عليهم و خنت ثقتهم فيا انا تعبانه اووى انا غلط اكبر غلطه فى حياتى و مش قادره خلاص حياتى انتهت
نرمين: حياتك ما انتهتش انتى تقدرى تبدأى من جديد افتحى صفحه و انسى الى فات ركزى فى دراستك زى الاول عشان تفرحى اهلك
ريم: مش هقدر اشوف حد من الكليه تانى انا انكسرت قدامهم مش هقدر اسمع كلامهم
نرمين : انا عارفه انها صعبه عليكى بس انتى ادها انتى عارفه الناس ملهاش غير الكلام النهارده بتتكلم بكره هتنسى
و انتى هتتغيرى و مع تغيرك محدش هيتكلم
ريم: طب لو قدرت اتحمل نظره الناس وكلامهم مش هقدر اتحمل تأنيب ضميرى و مش هقدر اسامح نفسى
نرمين: احمدى ربنا انى ضميرك لسه صاحى و بيدل على الصح عشان انتى كويسه من جواكى يا ريم غلطتك انك ما سمعتيش كلام ضميرك الى كان بيدلك على الصح ابتديتى تتنازلى عن مبادئك حاجه حاجه لحد ما تخليتى عن كل مبادئك ارجعى ريم القديمه الى بتسمع كلام ضميرها الى بيدلها على الخير
ريم: عندك حق انا كنت غلط لما ما سمعتش كلام ضميرى بس خلاص فات الاوان
نرمين: خلاص الى حصل حصل نبدا من الاول و جديد
ريم: ربنا هيسامحنى يا نرمين
نرمين: توبى انتى لله و احسنى توبتك و ان شاء الله ربنا يقبل توبتك " التائب من الذنب كمن لا ذنب له " ابشرى برحمه الله يلا قومى اتوضى و صلاه ركعتين توبه لله و ادعى ربنا يعينك على الايام الجايه
ريم : حاضر
قمت اتوضيت و صليت و عيطت كتير اوى اول مره احس اد ايه انا كنت بعيده عن ربنا
ريم: نرمين ربنا بيحبنى
نرمين: ربنا بيحبك عشان كده بعتنى ليك عشان انقذك فى الوقت المناسب
ريم: كلامك بيطمنى اوى عشان خاطرى ما تبعديش عنى تانى
نرمين: انا عارفه انى غلط فى حقك لما سبتك وسط الشله ده لوحدك بس وعد من انا مش هسيبك تانى هنرجع تانى نشجع بعض
ريم: شكرا لوقفك جمبى
نرمين: احنا اخوات يا ريم بس عايزاكى توعدينى انك ترجعى ريم القديمه الى بتحب اهلها و بتعمل كل الى تقدر عليه عشان تسعدهم عايزين امتياز الترم ده
ريم: انا هعمل كده عشان اكفر عن ذنب معهم و هذاكر عشان افرحهم
نرمين: خلاص هعدى عليكى بكره عشان نروح الكليه سوا
ريم: هستناكى
نرمين: يلا قومى اخرجى اقعدى مع طنط انا وعدتها انى هخرجك من اوضتك
ريم : حاضر.
