بداية الهداية

الخشوع في الصلاة

👈 تعالوا نلخص الكلام اللي ذكرنه ف بعض النقط كمفاتيح للوصول للخشوع ف الصلاة :

1- معرفة الله :
- هي أهم سبب للخشوع فلازم تعرف ربك الرحمن الرحيم الملك العزيز الجبار الخالق الرازق الحي القيوم لو عرفت ربنا بأسماءه وصفاته حق المعرفة مش هتخشع ف الصلاة وبس بل هتخشع ف حياتك كلها وهتراقب ربنا ف جميع أعمالك وحياتك كلها هتتغير باذن الله.

2- تحديد الهدف :
- لازم تحط الخشوع كهدف قدامك ف الصلاة وتجاهد نفسك علشان توصل له ... وكل ما تسرح ع طوول تفتكر هدفك وترجع تجاهد نفسك وتركز من تجاهد.

3- الخوف من ضياع الثواب :
- وعلشان الخشوع يبقى هدف قدامك ؛ لازم تخاف ع صلاتك وتعرف ان الخشوع هو روح الصلغة ؛ وان ثواب الصلاة ع قدر الخشوع فيها!

4- الاستعداد والتهيئة :
- تهيئة بدنية : بطهارة الجسم ولبس احسن الثياب.
- تهيئة قلبية : حاول تحضر نفسك للصلاة من قبل الاذان ب 10 دقايق.

👈وانتي ياأختي تكوني قاعدة ف مصلاكي ف البيت.

🌻واستشعر ان العبد مينتظرش ان سيده ينادي عليه علشان يروحله .. بل هو من اشتياقه وحبه وحسن خلقه اللي يبادر اليه وكمان الاستعداد قبل وقت الصلاة هيخليك تلحق  تردد الآذان وتلحق الاقامة وتلحق الصف الاول وتكون فرغت قلبك من مشاغل الدنيا وهمومها .. وجهزته للدخول ف الصلاة.

5- البداية من الوضوء:
- ابدأ استعشر حلاوة الصلاة وافتكر انك بتغسل من ذنوبك كلها مع كل عضو بتغسله.

6- استحضر عظمة الملك :
- قبل ماتقول " الله اكبر " وتبدأ ف الصلاة افتكر انت واقف قدام مين ؟؟ واستحضر عظمة ربنا ف قلبك وافتكر وقوفك للعرض ع الله والحساب يوم القيامة.

7-ركز ف كل كلمة :
- تدبر وتفكر بقلبك ف كل كلمة بتقولها ف الصلاة لااااااااااازم تركز ف كل كلمة بتقولها وتعرف معني الكلام اللي بتقوله ..اصل الصلاة عبادة تمارين رياضية بتعملها وكلام بنردده وخلاص.

👈 عايزك تركز ف التكبير ومع كل تكبيرة (الله اكبر ) استحضر معاني الله اكبر ف قلبك وعييييش معاها
-ركز ف دعاء الاستفتاح ومعناه والفاتحة واياتها.

-ركز ف القرآن اللي هتقرأه واشتري كتاب و أفهم وتدبر ف الآيات اللي هتغير حياتك لو فهمتها .

-ركز ف اذكار الركوع والقيام والسجود والتشهد .

-ركز ف كل كلمة بتقولها ف الصلاة لأن كل كلمة ليها معانيها واحاسيسها اللي لو حسيت بيها ودخلت قلبك هتخليك خاشع ومستمتع ومتلذذ بالصلاة .

8-الفاتحة لها شأن آخر :
- لازم يكون لك وقفة مع سورة الفاتحة  اللي بتقرأها ف كل ركعة لازم تقف عند نهاية كل اية وانتظر واستشعر رد ملك الملوك عليك وعيش بقلبك وروحك الموقف ده.

9-التنويع ثم التنويع :
- ورد عن النبي صل الله عليه وسلم أكثر من ذكر ف اركان الصلاة اشتري كتاب الاذكار زي " مختصر النصيحة " واحفظ منهم ونوع ف الاذكار وسور القران علشان متملش من التكرار.

10-اسجد واقترب :
-افتكر وانت ساجد انك اقرب ما يكون من ربك حبيبك والله لو حسيت المعني ده بجد قلبك هيدوب من الخشوع!

11- احترس من خنزب :
-شيطان الصلاة اسمه خنزب اول ما تحس بوسوسته تعوذ بالله واتفل " هواء به رداد من الريق وليس بصاق" عن يسارك 3مرات.

12- آخر الصلاة :
تخيل لو قولتك ان باقيلك ف الدنيا ربع ساعة وهتموت هسيبك تصلي فيهم ركعتين هتصليهم ازاي ؟ اكيد هتفتكر الموت والحساب وهتنسي الدنيا كلها ما انت خلاص هتموت وتسيبها طيب ما هو انت فعلا مش ضامن ان اي صلاة بتصليها تكون اخر صلاة فحاول يكون ده احساسك مع كل صلاة بتصليها.

13- الطمأنينة :
لو صليت بسرعة مش هتحس بأي معني للصلاة فأنا عايزك تدي كل حركة ف الصلاة حقها ف القيام والقراءة والركوع والسجود والجلوس..متستعلجش!

14- لازم تدريب :
- لازم تدرب نفسك ع الخشوع وافضل مدرسة هتتدرب فيها هي مدرسة (قيام الليل ) .. قوم بالليل والناس نايمة وصلي ولو ركعتين واعصر عينك وحاول تبكي واستحضر قلبك واتدرب ع الطمانينة ف الصلاة قول الاذكار بقلبك واتفكر ف معانيها و وقتك ف الركوع وطول ف السجود والدعاء.

15-إدمان الاستغفار :
- ليه بنقول إدمان لأن كل معصية بتعمل نقطة سودا ع قلبك وبتكون طبقة صدا عليه وده بيسبب قسوة قلبك وعدم خشوعه .. الإستغفار بيشيل كل السواد ده ويكسر طبقة الصداء ويخلي قلبك يرق ويلين للخشوع.

16- استعن بالله:
- ادعي ربنا والح ف الدعاء انه يرزقك متعة ولذة الخشوع وقول : اللهم إني اعوذ بك من عين لا تدمع ومن قلب لا يخشع.

🌸 بإذن الله لو بدأنا ف تنفيذ الخطوات دي ومع المجاهدة والصبر زي ما قولتلكم هنلاقي نفسنا بدأنا نحس بلذة الصلاة ...

                   🍥 🍥 🍥 🍥

👈ولسه مكملين معاً في هذه السلسلة الأكثر من رائعة
✅🌟 بداية الهداية 🌟✅... فكونوا معنا..

               〰〰〰〰〰〰〰〰〰

#بداية_الهداية
#هداية_لقلبك_قبل_رمضان
#حياتي_دعوة