ايمان قامت عيونها في المراة مصدومة فيها كيف غرست ظوافرها فيها كانت المراة رغم جمالها الملفت بس الكره والحقد اللي في عيونها كانوا مغطييين ع جمالها
فجاة جتها هنية ( ام خالد) تجري شدتها من ايدها وبصوت يرعش: الله يربحك بنيتي فكينا من المشاكل وخلي هالليلة الغبرة تمشي ع خير
ايمان : 😢😢😢😱
رويدة ( طليقة خالد) بحقد ومازال ظوافرها في كتف ايمان: صدقيني مش حتتهني معاه مش انا اللي انخلي وحدة تافهة زيك تأخذ راجلي وحوشي وولدي أنت اللي خشيتي للنار برجليك .. خليك متفكرة كلامي كويس
آلاء لاحظت ان في حاجة مش مزبوطة ناضت تجري لأختها ألقتها ترعش دفت رويدة
آلاء بحزم: تعرفي تطلعي بهدوء وبدون فضايح خير ما نكلم أمن الصالة ونطلعك بفضيحة
رويدة بهزوة: بالشوية عليك ما تستعجليش عليهم الفضائح جاياتكم قريبا
هنية شدتها مع ايدها: اطلعي يا بنتي وفكينا كان يقولوا لخالد يقلبها ع رأسك
آلاء قربت من ايمان وشافت دم ع كتفها : نهارها اسود هذا منها خيرك ماناديتيناش؟ وبعدين من تكون هادي
ايمان دموعها متحجرة بس جسمها يرعش : طليقته .. هادي دعوة عماد وعفاف ليلة عمري هكي نبدأها يارب سامحني ويكون هذا بس عقابك 😭😭
آلاء تحاول تهديها : توا تعوذي من الشيطان وردي بالك تفسدي ليلتك حبيبتي وخليني ندرقلك تخبيشاتها هالقطوس هادي
ايمان بصوت مخنوق : خللي كل شي زي ماهوا وما تدرقي شي
شويا وقالوا المتحجبة تلبس وخش خالد ع اغنية
شوفوا حبيبي يا ناس
كان لابس بدلة سوداء وسورية سكري وقرواطة احمر دمي عنده خصلات شيب في شعره كان جذاب هلبة طويل صح مليان شويه بس ماشي مع طوله وطول ماهو ماشي عيونه عليها وطبعا كان شاد في ايده ولده اللي لابس بدلة بنفس اللون وصل فيها بأسها ع راسها وقام طرحتها وهي باست أيوب وقعمزاته بينهم وهوا كل شويا يشد حاجة اخر شي خذي منها الباقة وبأسها ونساها اللي صار معاها قبل شويه بتصرفاته الطفولية البريئة
اما خالد فكانوا عيونه هايمات في عروسته مش بس شكلها الفاتن لا روحها الحلوة دخلت قليه بسرعة وبدون استئذان ما قدرش ينحي عيونه من عليها
خالد بصوت واطي وهادي: أيوب كلي عليا الجو شكلي منبدا نغار منه
ايمان طبست راسها وتحشمت : ☺️☺️
وفجأة صارت حاجة ردت ايمان لصراعها وخوفها من كلام عماد بان اللي داراته حيوللي عليها
هنية طاحت او مثلت انها مغمى عليها والكل يجري ويشوف فيها خيرها وطبعا أولهم خالد وايمان قعدت مكانها مع أيوب جت بتنوض
أنت تقرأ
مد وجزر
Romanceرواية ليبية خيالية تحكي ع معاناة وكفاح امرأة وتجاوزها الصعاب رغم تخلي الكل عنها تخيل تفقد كل شي وكل شخص في حياتك لحظة واصعب انواع الفقد لما تختفي ناسك من محيطك بارادتها يعني تخلوا عليك ومزقوا صفحتك من كتابهم بكل بساطة
