Youssef Abdul Azim

أول أمس ، كنت قاعد لوحدي في أوضتي، مهموم كده وحاسس إن الدنيا ماليانة ظلم، وإن الحق ضايع، وخصوصًا حقنا في الأرض اللي كانت طول عمرها عربية. قعدت أفكر: إحنا إيه اللي وصلنا لكده؟ وإزاي ممكن نرجّع اللي ضاع؟ ولقيت نفسي غصب عني غرقان في النوم.
          	
          	حلمت إني ماشي في أرض واسعة قوي، ريحتها كانت غريبة، خليط بين التراب والمطر وريحة غريبة كأنها دموع وألم. فجأة لقيت شجرة زيتون كبيرة أوي، كانت واقفة كأنها شايفة كل اللي مر على الأرض دي. تحت الشجرة دي، لقيت راجل كبير في السن، شكله مليان حزن، وكان عينيه بتدمّع بس ما بينطقش.
          	
          	قربت منه وقلت له: "مالك يا عم الحاج؟ بتعيط ليه؟"
          	بصلي بنظرة توجع القلب، وقال: "إنتو مش حاسين، الأرض دي بتصرخ من وجعها، بتناديكم، بتنادي عيالها اللي نسيوها. الأرض دي عربية، كانت عربية وهتفضل عربية، لكن كل دمعة بتنزّل مني دي قصة شهيد، وكل زفرة مني هي صرخة أم فقدت ابنها أو طفل مش لاقي أمان."
          	
          	الكلام كان زي السكاكين، قلبي كان بيخبط، حسيت إني صغير أوي قدامه. قلت له وأنا عيني فيها دموع: "طب أنا أعمل إيه؟ أنا شخص واحد، إزاي ممكن أغيّر؟"
          	رد عليا بحكمة كأنه عارف كل حاجة: "إبدأ بنفسك. بالكلمة، بالعمل، بإنك تفكر اللي حواليك إن الأرض دي لينا، وإنها عمرها ما هتنسى اللي خانها أو سابها. إحكي عن اللي بيحصل، اكتب عن الحق، خلي الناس تعرف إن القضية دي مش قضية ناس بعيدة عننا، دي قضيتنا كلنا."
          	
          	صحيت من الحلم ودموعي على خدي. الحلم ده كان كأنه رسالة، رسالة بتقولي إن إحنا كلنا مسئولين، وكل واحد فينا عليه دور لازم يعمله.
          	
          	وأنا بفكر في اللي شوفته في الحلم، افتكرت صور أطفال بيتّمهم الحرب، وبيوت اتدمرت، وأمهات بتدور على أمل تحت الركام. حسيت إني كنت عايش في غفلة، إني كنت بتفرج على المصايب دي كأنها فيلم، مع إنها الحقيقة الموجعة اللي لازم نحسها ونعيشها.
          	
          	من وقتها قررت أبدأ بنفسي. بقيت أكتب وأتكلم مع الناس، أحكي عن الأرض وعن اللي ضاع. بحاول أفكر كل اللي حواليّا إن القضية دي هي قضية كرامة وهوية، مش مجرد حدود وأسماء.
          	
          	سؤال:
          	
          	هو إحنا بنعمل كفاية؟ ولا إحنا محتاجين نصحى أكتر ونغير من جوا نفسنا قبل ما نفكر نغير الواقع؟