Malimit na sinasabi ko sa aking sarili na, marahil kaya tayo nilikha ng Poong Maykapal ay mayroon tayong tagna na dapat tupdin. 

Ang sumulat ng tula at kuwento ay isa sa isang bagay na hinding hindi ko maaaring tigilan. Nais ko kasing ipabatid sa lahat ng tao na kaya kong maging makata kahit kung minsan nauunahan ng katamaran at hiya.

Sa pamamagitan ng pagtipa ng mga letra mula sa kulay na rosas na tipahan ay naiisambulat ko ang aking damdamin, ang aking pakiramdam, ang aking nararamdaman. Doon ko napagtatanto na hindi ako manhid, mayroon din akong puso't isip na marunong magmahal, mapagod at masaktan.

Nawa'y sa kakarampot na likhang aking nagawa ay mayroon kayong nahimay na mga aral. Mga aral na maaari nating gamitin sa ating mga buhay. 

Ang pakikinig, pagbabasa at pakikialam sa likha ng iba ay isang tunay na magandang simula. Isa lamang ang ibig sabihin nito, hindi ka bulag sa nagdidilim na kulay ng daigdig, hindi ka bingi sa nakatutuliling ingay ng paligid, hindi ka pipi sa mapaglihim na hugis ng kabalintunaan at hindi ka manhid sa tunay na mukha ng iyong mundo.


💋

nateesmale