TAKBO NG AKING BUHAY

Bakit ang bilis ng panahon?
Ayoko pa namang tumanda
Pero lahat ng bagay-bagay, mga pangyayari, mga taong nakakasalamuha,
Lahat mabilis na dumarating at lumilisan sa mundo ko

Hindi ko ba maaaring angkinin ang aking mundo at sarilinin ang oras?
Alam kong hindi, pero masarap ang magnais, hindi ba?
Hindi lamang ako ang nasa mundo
Hindi lamang sa akin nakasalalay ang pagtakbo ng oras
Pero kung maaari, nais ko itong hablutin at patigilin ng panandalian

Natatakot ako sa mga pangyayari
At hindi ko maitanong sa utak ko kung nakakahabol pa ba siya sa kidlat-bilis na pagikot ng mundo
Hindi ko naman nais kontrolin ang mga ito
Ngunit ang sabay-sabay na pagragasa nito ang nagpapaunot ng aking noo

Gusto ko munang lumayo
Malayung-malayo
Nais ko munang maging si AKDA
Maintindihan ang aking sarili
Mapagkalas-kalas ang buhul-buhol na kable ng aking utak
Kailangan ko ito bago ako maging isang responsableng mamamayan ng Pilipinas

Ano sa tingin mo?
Siguro tumatakas lamang ako…

Ayoko pang tumanda, pero kelangan ko ng makisabay
Ayoko pang masaktan, pero kailangan kong masugatan
Gusto ko pang maging korni
Humalakhak na parang walang bukas
Matatamis na mga sulyap
Walang takot at pag-aalinlangan.
Hindi pa handa ang mga balikat ko, pero kailangan ko ng pasanin at harapin ang mga problema
Mabigat
Nakakatakot
REPONSIBILIDAD

Nakakaligalig ng mundo ang bilis ng mga pangyayari
Kelangan kong matutong humabol
Ang matalo sa karera ng bayan ay hindi ko balak tanggapin
Ang manalo, taas-noo kong ipagmamalaki
Habambuhay kong yayapusin ang kalaban kong oras
Tumitikitok
Tumitikitak
Nakikipagkarera ng walang katapusan
Ang oras na laging nananalo
Walang kapaguran sa pakikipagunahan sa akin, sa iyo, sa atin.