وبعد أن فصفص زوجي كل التحليلات والمعلومات والأخبار المرئية والمسموعة والمقروءة عن أسباب تحطم الطائرة الروسية صعد إلى الطيارة رجل لقدام وعشرة لورا بعد أن تناول حبة مهدئ لأنه يعاني من فوبيا حادة من الطائرات ..
جلس والخوف بعينيه وبعدين ما لقيته إلا مال عليّ مال ثم مال على إيدي وأنا قلت آه يا إيدي لأنو إيديه كانوا متل البوظ وهوه عم يكزّ و يعصر إيدي بعصبية ويوشوشني قديشه خايف ..أنا طبعاً وشوشته أنو وكَّل الله يا رجل ما حدا بيموت ناقص عمر في اللحظة التي مرقت فيها المضيفة الجذابة ورأتنا نتوشوش وشافت أنو يدي تنام كالعصفور بين يديه فابتسمت ابتسامة ذات مغزى ثم أشاحت بوجهها الذي عبّق قليلاً وابتعدت كي لا تنزعلنا المراق يللي حَبَكْ فجأة ونحنا بالجو .. ثم أقلعت الطائرة .
زوجى غفي قمت أخدت حريتي و أطلقتُ يديَّ من إيديه عالهسّي و حطيت السماعات على أدني وصرت أسمع الربيع تبع فريد الأطرش لأنو صاير عندي عقدة اسمها الربيع وفي اللحظة التي كنّا فيها على علّو ١٢٢٣٩قدم وحين كان فريد عم يقول : "وقول يمكن حيرحمني ويبعت في الربيع طيفه"رجّت الطيارة تلت أربع رجّات ماكنين أحسستهم أنا كرّفة جناح فراشة ملونة في الربيع لأَنِّي كنت منسابة مع الأنغام وتقاسيم العود ودموعي تنساب تأثراً على عرض خديَّ غير الورديين و تشرشر من ذقني في حين صحا زوجي من غفوته وقلّي بهلع: شو صار يا دلع؟
قلتله : ما في شي حبيبي رجّة بسيطة
بحلق بوشي وسألني: لكان ليش عم تبكي؟قوليلي الحقيقة شبها الطيارة؟
قلتله: الطيارة ما فيها شي متل الصلاة عالنبي..
قلي : ليش الدموع لكان ؟
قلتله: أنا لسا الأغاني بتبكّيني
تفاجأ زوجي أيما مفاجأة ونظر إلي ّبدهشة كأنني مخلوق قد هبط لتوه من المريخ ثم مال على أدني و وشوشني: معقول؟ نحنا معلّقين بين السما والأرض ويمكن توقع الطيارة أو تنفجر ونموت بأي لحظة وأنتِ عم تبكي من غنية ؟
فملتُ على أدنه و وشوشته: بالسما وعالأرض وفوق الغيم وتحت التراب رح تضل الأغاني تبكيني ولما بدا تسقط الطيارة بفضل موت على صوت الأغاني مو النق والسّق..
وهنا مرقت المضيفة الجذابة فوجدتنا كمان لسا عم نتوشوش قام عبَّق وشا مرة تانية ثم سعلت لتنبهنا أنو الأكل أجا فابتسم لي زوجي ابتسامة مجاملة قدام المضيفة وقلّي :عن جد أنتِ مو معقولة!
قمت ابتسمتلوه نفس الابتسامة وقلتله: والله أنت يللي مو معقول!
قامت ابتسمت المضيفة وقالتلنا: الحقيقة أنتوا التنين ما شاءالله ما شاءالله مش معقولين خالص!
عندما هبطنا أخيراً تنشنشَ زوجي كثيراً.. وصحصحْ منيح ورجع تعبير وشه الصريح ولا عاد في خوف بعينيه ولا عاد قلي وينك فاخترعتُ المتل يللي بيقول:
إذا كان بالسما معلّق .. بيتعمشق
و إذا عالأرض صار .. طار .
