رواية ميراث نور " حلقات خاصة"
الفصل الثالث بعنوان " إخصاب متعدد "
فضلت على كدا فترة كبيرة لحد ما الباب اتفتح تانى ودخلوا , محدش منهم كان مدى أى انطباع على وشه.
حنوش قال :
انت مبتزورش أبوك ليه ؟!! حطيته فى مستشفى المجانين ونسيته ؟!!
قرين أبوك بيقول أنه زعلان منك أوى وحكلنا قصه أغرب من الخيال !
هحكيلك القصة ولو صدقتها هتعيش ولو كدبتنا هنعرف أنك حمار وغشيم وهنضطر نقتلك ونريح دماغنا.
انا هشيل اللزقه اللى على بوقك بس يا ريت متعملش حركة غبية
يدوب شد اللزقة من على بوقى , تفيت فى وشه , تفادها ورجع اللزقة على بوقى تانى..
بص للى معاه وقال :
شكله غشيم ومش هيصدق ، انا بقول نقتله ونخلص !!
مارو قال :
اصبروا عليه يا جماعة ما هو معزور برضه ومفكر أن أبويا هو اللى عمل العمليات الإرهابية , خلينا نقوله على اللى ميعرفهوش وهو اللى يحكم ،احكيله يا حنوش
حنوش شد كرسي من اللى فى الاوضه وقعد قدامى و خد نفس عميق وقالى :
من اكتر من 25 سنة ، كان فيه راجل غنى من عيلة كبيرة اتجوز واحدة من ثوبه بنت أصول.
حياتهم كانت سعيدة ومبسوطين جدا ، حاجة واحدة بس اللى كانت نقصاهم...
طفل او طفلة يملوا عليهم حياتهم ...
لفوا على كل الدكاترة جوه وبره مصر ملقوش علاج
العيب كان فى الراجل، كل الدكاترة قالوله أن نطفته أنطفت وأنه استحالة يخلف !!
الراجل عشان غنى مرضاش يقبل بقضاء ربنا وطرق باب السحر وبالفعل لف على سحرة كتير عشان يشوفوله علاج , دفع فلوس كتير بس برضه فشل.
لحد ما وصل لحد بيجمع ما بين السحر والطب, دكتور جراح وساحر.
الجراح الساحر قاله أنه يقدر يخليه يخلف وأنه هيعمله عملية جراحية داخل فيها طقوس من السحر الأسود.
وقاله كمان أن العملية خطيرة ومكلفة ، ده غير أنها هتتطلب وجود مراته فى الطقوس..
الراجل كان متردد بس وافق حتى بعد مالساحر طلب منه ربع ثروته فى حالة نجاح العملية!!!
الراجل راح قال لمراته واللى رفضت تماما ونصحته يبعد عن سكة السحر , بس هو مسمعش كلامها واصر انه ينفذ الطقوس اللى طلبها الساحر واجبرها تروح معاه عشان الطقوس لازم تتم فى حضور الاتنين ...
مراته مكنش قدامها غير أنها تنصاع لرغبة جوزها وتروح معاه
راحوا للساحر بيته واللى عينه زاغت أول ما شاف مرات الراجل وطمع فيها ...
