#خُلِقَتْ_حُرّة
#الحلقه 6
مــــــــلــــك .....
نزل الكحل مع دموعي الي نزلن ، مانعرفش المره الكم الي يمسحنلي و يردن يحطن ، مرن ثلاث اسابيع على وفات رغد و اهو اليوم ننزف للراجل الي حلمت بيه و حباته و خذاته و يكون اب عويلها ، اهو ننزف لراجل اغلى انسانه ع قلبي ، ماضحيتش بالتضحيه هذي الا عشان هذي وصيتها و مش حنخليها زعلانه في قبرها ،
شفت لروحي ف المرايا ، ملامحي باهتات بدون اي حياه و لا فرحه مرسومه ع ملامحي ، معاطيتش روحي فرصة نفكر اذا قراري صح او غلط ف نهايه كان قدر محتوم ، لبست فستان ابيض بسيط يجي لتحت ركبتي و خليت شعري مفتوح مع لمسات خفيفه اصرت امي ديرهن ليا و كأني حنعيش ليلة تحلم بيها كل عروس ؟
انتست رغد و سيره رغد القلوب الي متذكراتها ينعدن ع الايد ، و فعلا مافيش حد خسرها الا عويلتها ، لبست كعبي و طلعت مع ماما نواجه ف الناس و كلامهم
قمعزت و واجهة كلامهم ، هذي تقول كيف رضت بيه ارمل و ترد عليها الثانيه كيف رضت بيه اصلا وهوا راجل صحبتها و بنت عمها ، و الاخرى تقول ماصدقت و المسكينه مزالت ماسكرت ثلاث اسابيع ، رغم ان كل الي كانو من العيله و الكل عارفين الظروف الي اجبرتني اني نوافق ع الزواج و السرعه هذي ، الا انهم لقو حديث يحكو بيه و نسو الاسباب
فارس و ندى ، طول الاسابيع الي فاتن كانو معايا رغم اصرار حنهم انهم يعيشو عندها الا ان جدي خلاهم عندي عشان متعودين عليا ، معتصم كان ياخذ فيهم من الباب و من اخر مره شفته فيها معش شفته ، و اليوم اصرت حنهم ان يقعدو عندها
صبيت بخطوات ثابته و لبست عبايتي عشان نطلع مع معتصم ماكنتش خايفه منه و لا خايفه من اي شي لان حاطه النقاط ع الحروف و حاسمه كل شي مستحيل نكون مكان رغد و لانقعد مع الراجل الي حباته هيا ، حيكون زواجنا ع ورق و بس شكليات قدام الناس اما ف الحوش حيكون نفس الوضع لما كانت رغد ، هذا الي كنت حاسبته في راسي و طلع الواقع شي ثاني
غمضت عيوني بقوه لما سمعت زغروته من ورايا مانعرفش من الي زغرتها ، سكرت بيدي ع طرف عبايتي و مسكت دموعي بالسيف ، طلعت مع معتصم و بحكم اني طلعت ع نفس الشقه و مافيش مسافه طلعت ع كرعيا ، مكانتش مقارنه ابدا بس ذكرت لما طلعت رغد و كيف كانت ردت فعل معتصم الي ركبها السياره و برم بيها ع حواشينا العشره كلهن و هوا يبيب ،
تنهدت لما فتح باب الشقه و خشينا و تسكر علينا باب واحد
_______________________________
جــــــنـــــان ......
شفت لرهف المصبيه و تراجي عشان يجي السيد محمد
جنان : قلبت عيوني بملل ، شكلا مش حيجي السيد الكريم هيا خشي جمدت
رهف : نفخت بعصبيه ، جنان سكري فمك شويا
