#رباط_الروح
🌹بقلم هاجر الريحاني🌹
كالعادة خلص يومنه بخوف وبجي بسبب رائد صرت اكره اظحك اخاف اتعاقب لان الظحك اوالفرح مو الي
راحت الايام واجت الايام اجه رمظان انه صايمة صار اكلنه تنكيط ماهر اتوسل بي يلله يوديلنه مسواك شوي نسد جوعتنه بي جنة اذا تغدية ما نتعشة والريوك خبز وجاي ومرات ام مهدي ادزلنة من غداهم ودوم تمرلنة وتسأل عنه
مبايلي خذو من اول يوم يخابرهم احمد كلولة طاح منهه واحترك وهوة ما يكدر يرجع الة تتعده سنتين
سجى كظتهه مستشفيات وي جهالهه دوم مرظى ما تجيني اجتني بس مرة وحدةوعصرونية وراحت
خلصنه رمظان اجه العيد الثاني وانه هنا هلمرة قررت اروح بألحاح من ايمن وسيف يردون يشوفون اجدادهم
حورية وسيف دخلو مدارس الثاني وهوة الاول وايمن صار عمره ٤ سنين
بدلتلهم الصبح ورحنه من وكت صارلي سنتين ما داخله بيتهم لكيتهم كلهم عازلين بس مروان باقي هذا يموت على الفلس ما يطلع
رحبو بينه عادي ودخلنه للديوانية شوي ودخلو بيت ماهر ومحمد ورائد وانوب طلعو بيت مروان
كلهم كاعدين يسولفون ويظحكون الة انعام خازرتني وكوة كاعدة
انعام...يلله نوال شريفة ازهار امشن نكعد بالصالة كعدت الزلم تخنك
تباوعلي صفح عرفتهه تقصدني
الحجي ...تعالو خلي انطيكم عيديات
التمو جهالهم كلهم وبدة يوزعلهم خمسات سيف وحوراء ظلو كاعدين بس ايمن على فطرته كام وياهم
كملهم وصل لايمن غلس عنه ودار وجهه
محمد...جا انتي تنطي للبطونهم شبعانه وجهال المرحوم تبقيهم وهمة محتاجين
الحجي...اهووو نسيتهم ولله ما بقة بجيبي بس الف هاك جدو
خذا ايمن الالف وفرحان بي اجه رائد ومحمد انطو للجهال عيديات ما قبلو ياخذون
رائد...ليش بوية هاي عيديتكم
حوراء...لا عمو ما نريد ما محتاجين
محمد...حقكم ولله عمي مقصرين وياكم وظالين بيد ماهر
ماهر....محمد كفيني شرك مو بكلشي حاطني هل اصرف عليهم خير من الله حتى البنية كلتلك ما محتاجين المفروظ عيدياتهم تنطينياها انه ولي امرهم
محمد....حطيت عينك حتى على هل جم دينار شكد طماع
ماهر...اهو انتم تجيبون المغثة لو راحت
الحجيه...اعوذ بلله شهل العوينه الطكتنه صارلكم شكد متصافين شمالكم اليوم
عرفتهه تقصدني كمت اريد اروح
