كشف المستور

الحلقة الأولى

#كشف_المستور
الحلقة الأولى
للكاتبة : سالمه الشويهدي
_________________________________________

تبدأ القصة عند عائلة صغيرة وهيا عائلة الحاج حسن كان عنده ولدين وكل ولد فيهم عنده ولد واحد وبنات أحمد عنده خمس خوات ومحمد عند أختين ، وبعد فترة من الزمان مات الحاج حسن وكبرو الأولاد وكان عنده قطع أراضي في منطقة راقيه معروفة في طرابلس

محمد وأحمد كانو متعلقين ببعض وفي نفس العمر لما مات جدهم حصلو قطع أراضي ولما قسموهن أحمد قسم مع خواته الخمسة وهنا باعن الأراضي متاعهن ، ومحمد كانت حالته المادية ميسوره خواته قالو مايبوش الأراضي شراء حصتهن هو ودفع لكل وحده حقها

قررو أولاد العم يبنو جنب بعض ويكونو قريبين ؛ بنا أحمد حوش كان جميل وبسيط ، وبنا محمد قصر كبير وكان فخم

ومع هذا كانت علاقتهم مع بعض قوية

تزوج محمد هدى وكانت زوجة صالحة جميلة وهادية جداً وطيبة لعند ماتشكي فيها تحسبيها هبلة

جاب أربع بنات وكان أثنين منهن فاتِنات الجمال والثانيات حتى هنا جميلات
فاطمة 30 سنة خريجة هندسة
فيروز 28 سنة محامية
فدوى 26سنة صيدلة
فاتن 20 سنة طالبة طب بشري وكانت مقعدة
وهنا الأربعة عازبات

وتزوج أحمد نجية وحتى هيا حلوه وبنت أصل وصابره معاه وديما عند هدى

جاب بنتين وولد
نور 29 سنة معهد حاسوب متزوجة وعندها بنت
جمال 26 سنة خريج إقتصاد
ياسمين 20 سنة تمريض ومخطوبة

ملاحظة : ركزو في العائلتين والأسماء

كانو من زمان يزوجو البنات في عمر صغير وهدى ونجية عايشات مع بعض من أول ماتزوجو ويشربن في القهوة مع بعض كل يوم ، وكانت علاقتهم مع بعض أكثر من الخوات

حتى البنات كانت العلاقة اللي بينهم قوية كل عيد يلبساً نفس بعض وفي نفس المدارس

حوش أحمد الباب متاعه مقابل حوش محمد يعني بينهم خطوتين

وبعد فترة من الوقت جاء موعد عرس ياسمين وكان ليهم فترة طويلة مش دايرين اي عرس

نجية : والله نخمم علي عرس هل بنت كيف نديره

هدى : والحق يانجية لينا فتره علي المناسبات ومكسدين المرة هذي بنديروه عرس أسطوري سبع أيام بالياليهن ونلمو أحبابنا من الشرق والغرب والجنوب نبي العرس تحكي بيه ليبيا كلها

نجية : اي والله عندي أقارب في بني وليد وسبها

هدى : وأنا عندي قريب خمس عائلات في بنغازي والبيضاء وعيت خالي في ترهونة

نجية : هو مزال شهرين علي العرس زعما نلحقو نديرو الموالح والحلويات ونرتبو الحوش ؟

هدى : قولي لأحمد يأجر خيمة ونفتح حوشي وحوشك ونسكرو الشارع وكلمي صبياتك ونكلم صبياتي ونبدو في حاجات العرس وغدوة نطلع أنا وأنتِ للسوق للنواقص وبعد أسبوعين نكونو كملنا الحوسة ونعزمو

نجية : والله لولاك ياهدى  ماني عارفة شن صاير فيا

هدي : أنا وأنتِ خوات مش بينا الحاجات هذي واللي بيجو من برا طرابلس يقعدو في حوشي هنفضي الديار انا والبنات بعدين ....فاطمة

فاطمة : نعم ماما

هدى : امشي كلمي خواتك وبنت عمك وهيا ورانا غسل فرش وبندير مقروض وكلمي بنت عمك نور تجي تغير جوها معانا هيا وبنتها

فاطمة : حاضر

كلمت فاطمة البنات وبدو في تجهيزات العرس البنات يغسلن في الفرش والصبايا يديرن في مقروض وكعك للعرس ........
_________________________________________
#يتبع