كشف المستور

الحلقة السادسة

#كشف_المستور
الحلقة السادسة
للكاتبة : سالمه الشويهدي
_________________________________________
مشت فيروز وخشت لدارها وكانت متعصبة

فاطمة : شاكة بأن الحوش فيه حاجة يستر الله بس زعما مبني حوشنا علي مقبرة ؟ او فيه جنون ؟

شنو نقول أنا بديت ننجن رسمي الساعة توا 5 نجهز لبستي وفطوري ونشوف فدوى كان واعيه نشيلها للمستشفى وكان هدا بعد مانروح

مشت فاطمة لدارها ولبست وخذت اوراقها وفتحت باب دار فدوى لقت أمها واخدها النوم وفدوى مزالت فاتحه عيونها

فاطمة : صباح الخير

مافيش رد ، ناضت أمها وهيا منفجعة شنو فيه من مات

فاطمة: بسم الله ، قولي خير ياماما منو اللي مات

هدى : رعشتيني لابسه من الفجور وانا كيف خداني النوم

فاطمة : عندي عمل اليوم ، شنو وضع فدوى توا نشيلها للمستشفى ولا بعد مانروح؟

هدى : والله يابنتي ماني عارفة البنت مش مطمنتني دموعها ينزلو من أمس وعيونها ماتسكرو ، وعليما حاولة معاها تتكلم مافتحت فمها ولا قالت حرف

بالك شفتي حد هزبها أمس ولا كشخ عليها لأنها حساسه

فاطمة : حتى لو حساسة مش لهدرجة يا ماما ، تريحي أنتِ وأرقدي توا وأنا هناخد فيروز ونطلع ولما نروح هناخدها للمستشفى

طلعت من جنب ماما وكان قلبي يوجع فيا ومتضايقة مش عارفة شنو السبب ممكن اللي نفكر فيه يطلع صح !؟

دقيت على فيروز مافيش رد فتحت الباب لقيتها مقعمزة على المكتب وجاهزة وعيونها حمر متنفخات كان منظرها مرعب أول مره نشوفها بالشكل هذا

فاطمة : فيروز أنتِ كويسة

فيروز : اه انتِ امتى خشيتي

فاطمة : توا كنتِ تبكي صح ؟

فيروز : شنو تقولي انتِ أنا ؟ مانبكيش بكل ، حي نسيت فاتن قالتلي نوضيني الساعة 7 عندها كلية ، والسواقة متاعها واخده إجازة

فاطمة : متخافيش الساعة توا 5 ونص مزال بدري

فيروز : وانتِ شنو اللي منوضك ومخليك لابسه الوقت هذا

فاطمة : مش جايني نوم ، أنا اللي مفروض نسألك

فيروز : لا أنا متعودة على الموضوع هذا

فاطمة : كيف متعودة؟

فيروز : عليك تحقيق ، قلتها بالخطأ  أنسي ، المهم هيا نكسدو على فاتن ونوضها بالمرة ناخدوها معانا

وطلعت .....

فاطمة : نحلف عليها البنت ماهي طبيعية ، استني فيروز

لحقتها بسرعة لقيتها في دار فاتن وتشوف لي فاتن بصدمة ونكلم فيها ماتردش ، شفت لي فاتن لقيتها أتمتم ركزت في اللي تقول فيه  34يوم 34 يوم  ، أي به عادي شنو تقصد مثلاً وشنو الأوفر اللي دير فيه فيروز !؟