كشف المستور

الحلقة الثامنة ، والأخيرة

#كشف_المستور

الحلقة الثامنة ، والأخيرة
للكاتبة : سالمه الشويهدي
_________________________________________

وطبعاً الشيخ هذا كان معروف ورتبته عالية في الدولة وبدون ذكر اسمه مع أني نعرفه بس مش هنقدر نقول لأن فيه من أسمه شيخ ثاني 🤷🏻‍♀️

فتح الباب وخش و قال : ياريت الكل ينزل في الدور الأول
دار شغله وماخدش الموضوع 10 دقائق

الشيخ : أولاً ماتخافوش المسروقات مزالو قاعدات في الحوش وبيش يتريح قلبكم ، حد فيكم يركب للدور الثاني يخش للحمام اللي على اليمين يفتح الغسالة هيلقى شنطة العزوز وبنتها اللي بالأرقام وفي سلة الملابس هيلقى باقي الذهب محول من الشناطي ومحطوط في شكارة سودة ومغطية بالدبش المسخ والسراقة مزالت قاعدة كانت طامعة تسحر الجعانة وبعدها تهرب الذهب وتروح  وبعد ماتكمل القصة هنقول أسمها وتعتبر قرصة وذن لها

أحمد : أي قصة ياشيخ قصدك مزال

وكانت نجية كيف جاية من المطبخ ومطفية على السحور شافها الشيخ

الشيخ : وأنتِ ياحويجة تعالي قعمزي جنبي هنا

نجية : أنا

الشيخ : وفيه غيرك

قعمزت نجية جنب الشيخ وقال : نبي أهل الحوش كلهم يجو قدامي وبذات البنيات

صبو البنات قدام الشيخ ومافيش حد كان فاهم حاجة

الشيخ : البنت المقعدة هتصبي على رجليها اليوم بإذن الله

وبدا الشيخ يقرا عليهن أغمى على فاطمة وفدوى وفيروز
أما فاتن بدت تقطع في شعرها وتكلم عليها جن ذكر

الجن : توا تبي أطلعني مانيش طالع وأنا أقوى منك

الشيخ : بلاش كلام فاضي من أنت ومن جابك

الجن : أنا أسمي خوراع يهودي قاعد في البنت من 5 سنين توا كيف تذكرتوني لازم تموت وقبلها لازم نسود أيامها ونخليها تتمنى الموت

الشيخ : من أرسلك للبنت

الجن : أسئل الملاك اللي جنبك

الشيخ : جاوب

الجن : مش هنجاوب والسراقة اهيا قريبتهم اللي لابسة أزرق

الشيخ : قلت جاوبني بس ، وبدأ للشيخ يقرأ عليه من جديد

قعد الجن يسب ويلعن في كل الموجودين ويقول في كلام مش مفهوم

الجن : هههههه حابسيني في جسم البنت من سنين ومسلطين عليها وعلى خواتها جنون ثانيات غيري قاعدات في الحوش يخوفو فيهن وقاعدين يهددو فيا لو بصيت عليهم يقتلوني بس أنا في الحالتين ميت هنفضح الكل اليوم

الشيخ : جاوب على سؤالي

الجن : البنت اللي قاعدة قدامك كل ليلة تتعذب وتبكي وماترقدش الليل هيا وخواتها اللي ساحرهم ومسلطني عليهم ومخلي اي حد يبحت في البنات يشوفهم عفاريت قلبه ميت ههه مش هنقدر نكمل جو يبو يقتلوني

قعد الشيخ يقرا ساعات متواصلة لعند الفجر وكان موقف مرعب الصراحة جدتي لما روحت كان السكر متاعها عالي
أصوات الجنون وعياط مخيف

فجأة وقفت فاتن وكسرت الكرسي متاعها

الكل كان يشوف بصدمة ، البنات ناضو وبدن يستفرغن حشاكم في مسامير وخلالات وخواتم وحاجات غريبة

الشيخ : وتوا ياحويجة نجية بتحكي كيف سحرتي البنات وسلطتي عليهن جنون يهوديات وليش سكرتي باب رزقهن  ولا نقول أنا

نجية : اا أ أنا مش قصدي

الشيخ : كيف مش قصدك شنو القلب اللي عندك من شنو مصنوعة أنتِ جاوبي

نجية :  الخطابة كا كانو يجو هلبا للبنات هذينا وبناتي لا كنت نراجي في بناتي ينخطبو ونفك السحر

الشيخ : يعني تبي تضحكي عليا أنا؟ لو أنتِ كلامك صح كان سحرتي بس مش سلطتي جنون وبعدين كيف ترقدي في الليل وهنا فتحات حوشهن لكي أنتِ وبناتك

وهنا نجية معش قدرت ترد ووجها عرق وبدت تحاول تبرر بس صوتها ماطلعش ونفضحت ، وياسمين كانت تبكي على طول حسها هيا و نور لأن ماعندهنش علم بي أمهن وكانو طيبات بكل نفس أحمد

وأحمد وجها في الوطا وطلع برا ولحقه محمد

أحمد : هنا كلمتين مانبيش حد يتكلم معايا وعطيني يومين وهنحول من هنا بكل سودت وجهي قدامكم الله يسود وجها

ومحمد ماقدرش يتكلم معاه ولا يضغط عليه لأن اللي صاير مع بناته مش شويا

وهدى من الصدمة اغمى عليها من الصدمة وأسبوع كامل يضربولها في المهدئ وتقول كله مني ماعمريش فكرت في بناتي

والناس اللي في العرس يحسابو روحهم في مسرحية أو فيلم من الأكشن والرعب والدراما اللي صار قدامهم والكل يقول الخالة سحرت بنات أختها

وفي نفس الأسبوع البنات الأربعة انخطبو من المعازيم
وجاء جمال ولد نجية بيصلح غلطة أمه وبيخطب فيروز مع انها أكبر منت بس ردت عليه فيروز بالرد الساحق وقالت : شكراً مانقبلش بي ولد السحارة

ياسمين و نور أطلقو والسمعة قعدت في الأرض ونجية مرضت نفسياً وأنقلب السحر على الساحر وأنجنت وحطوها في مستشفى الأمراض النفسية

والوحيد اللي يوجع هو أحمد قعد مش قادر يحط عينه في عين ولد عمه ولا أي حد يعرفه وجاته جلطة نغش قدر يتكلم

محمد من الصدمة قلبه تعب وهدى حاسة بتأنيب الضمير والبنات مش مصدقات مش عارفات يفرحن ولا يبكن كان موقف صعب جداً

تزوجاً الأربعة في نفس السنة وعاشو حياة جميلة واكيد وحدة منهن او بناتهن  يقرن توا في الرواية

انشهرت الرواية في وقتها بدرجة كبيرة كل عرف باللي صار ولأول مرة كتبت نهاية سعيدة 😂❤

‏الأقربون طعناتهم أخطر ، فهي تأتي من مسافات قصيرة

وكانت هذي نهاية كشف المستور أنكشفت نجية الله يسحنها ، ونتمنى تكون عجبتكم الرواية وطريقة سردي ونتلاقو في رواية ثانية واقعية وحقيقية .

النهاية 🥀

للكاتبة : سالمه الشويهدي