_
_
عِــشق فـي بِـلاد حُـروُبِهـــا لا تنتّٰــهي 5 ( شهيـد الـواجب )
في البارت السابق
وقف مصعب مع قاسم وجرو لـ باب صالة الاكل لـ سكروها قبل مايجي حد ويمشي يقول لـ العسكر ، وخلو جابر لـ يبي يجبد سيف من تحت يدين منذر بس منعه هارون لـ قال :فكك خير مايولي عليك حتي انت خليه يربيه
وتلفت لـ منذر لـ بعد من سيف اللي متكمش في روحه علي الارض متألم وهوا مش قادر يرفع راسه لـ منذر لـ نزل كمام بدلته وقال بـ تنهيده :اوووووه هكي نقدر نكمل عقاب يومي بسلام
وتلفت لـ عبدالحميد لـ شاده رواد لـ قال بـ تسهويك وهوا يضغط علي يدين عبدالحميد لـ توجع :تستلمه ولا نكمل عليه اني
جابر :خلاص انت وياه ياسر لدرتوه في المسخ هداكا
هارون :خلوه هدا لـ المره الجايه عاد مش كله في مره وحده ههههه
هز منذر راسه لـ رواد لـ طلق عبدالحميد ودفه وخلاه يجري لـ سيف القعد متلوح علي الارض ويشبح لـ الشباب لـ لمو بعض وطلعو من صالة الاكل بـ ضحكة ولعبه ولا كـ انهم مدايرين حاجه ...
قراءة ممتعة 💛
البـــ التاسع ـــارت
.
.
غَالِيتَكْـ وإنْتَ مَاتَسّوَي كُل غَلاَيَا 🥀🤚🏻
.
.
اتكه هارون علي سريره ورد وهوا لاهي يلعب :تمام وشن جوك انت وحال عمي ومرت عمي
زكريا :تعالا تعالا اركب معاي السيارة ، تمام ماشيه لمور
تلفت هارون لـ قاسم لـ خاش وهوا لاهي في تليفونه و وجها اصفر .
ضيق هارون عيونه وحول سماعة من ودنه وقال :خيرك قاسم
تلفتله قاسم وهز راسه :امي مريضه شوي ورافعينها للمستشفي ومن امبكري نتصل ماحد يرد عليا
خش جابر لـ قرب من قاسم ومدله طاسة امية :خود اشرب وانت تقول عندك الصفير
ضحك هارون :ههههه ماتخافش يابرو بـ اذن الله مافيها شي تلقاهم لاهيين بس
جابر قعمز جنب هارون وشبح لـ تليفونه :تلعب في ببجي
هز هارون راسه ورجع اتكئ علي سريره :طولت اجتماعاتهم هدو وكسدت لانم
جابر :ان شاءالله ديما عند الافنديا اجتماعات ياراجل ريحونا من التماريين والشقاا
بتسم هارون لـ رفع عيونه في قاسم لـ طلع وهوا يرد :ايوه حور
ناض جابر ولحقه وخلا هارون لـ تنهد ورجع يلعب وهوا يشبح في زكريا لـ طلع من اللعبه ، ماهتمش وكمل لعب لين رجع زكريا فتح :هارون
هارون :اممم
زكريا :تي وين مشيت
هارون :الشباب خشو عليا وانت وين كنت ازح قريب قتلونا
زكريا :جتني مكالمة
ماردش عليه هارون بـ عدم اهتمام وبـ تركيز علي اللعبه وخلا زكريا يكمل كلامه :تعرف فدتت امهم هدي بنت عمك حسين شادتها وراي زي الـ.....
وقف هارون علي اللعب وهوا ينهض في روحك يقعمز بـ انقباض ملامح وجهه وقال :توا كانت تكلم فيك
زكريا :ايه ياراجل ديما وهيا تتصل وتتسبل في ابسط شي باش تتصل فدادتهم
سكر هارون اللعبه بدون مايقول اي شي لـ زكريا وخش اتصل بـ رانيا لـ ماردتش ، بعت رساله (ردي ) ، ورجع اتصال تاني وهوا يراجي في ردها لـ جاه في اخر لاحظات المكالمه بـ صوت داهش :انـ ـعم
قال هارون بـ عصبية :وين كنتي
رانيا قرنت حواجبها :برا نسيق في الجنان خيرك فيك حاجه تبي حاجه
وقف هارون وهوا يشبح في الشباب لـ واقفين قدام باب الدار :في من كنتي تكلمي قبل شوي
رانيا :ماكلمت حد
صيح هارون :مارخص ........ ازح اديري في جو المتربية والعاقلة عليا وانتي لايدة علي ولاد العيله كلهم ومجربينك واحد واحد يا....... اهو مازال تتصلي بـ ام امي اقسم بدين الله يارخيصه ياللي مش متربيه لما نقلبها علي راس امك وبوك وخوك
وسكر الخط في وجها وخلاها واقفه مصدومة في مكانها ، ومش فاهمه الكليمات لـ نزلت عليها زي الصاعقه شن دارت باش تتهم بيهم ، هوا قال كلام بس هيا حساته تقول طعنات في نص قلبها ...
.
فِي ظَنَّهُمْ أَنَهُ كَلاَمْ ، وَلاَكِنَهُ طَعَانَاتْ مُمِيتَهْ 🔪💔
.
خدي هارون نفسه من بين عصبيته ولوح التليفون علي سريره وهوا يتلفت علي صياح ودوشة قدام الدار خلوه يتحرك وهوا يسرع خطواته لـ تحولو لـ جري وهوا يخش بين الشباب لـ يحاولو يقربو من قاسم لـ شاد التليفون ويصيح :لا يابوي لا لالا يابوي باللهي عليك قولي تبصر قولي تبصر باللهي عليك تبصر يابوي حرام عليك حرام
جاه صوت بوه ماجد المخنوق بـ العبره من سماعت التليفون :الله يرحمها ياولدي الله يرحمها ادعيلها وترحم عليها هدا قسمها ونصيبها في الدنيا
طاح التليفون من بين يدين قاسم لـ ماعاش أهتم بـ الشباب اللايدين بيه ولا بـ هيبته كـ راجل ، كـ عسكري ، وستسلم لـ دموعه ولـ صوته لـ طلعه بـ قهره بـ فقد بـ وجع :ياااام لالالا يام ياامي لا ماتسيبينيش ياامي ماتسيبنييييش باللهي عليكم لا ياربي ياربــــــي
وطاح علي الشباب لـ شدوه وهما يحضنو فيه ويحاولو يواسوه علي مصيبته ، علي مصيبة العمر ، مصيبة كان صابت الشخص فقد فيها جزء من قلبه ، جزء من روحة ، جزء من فرحته ، الأم كان ضاعت ضاع معاها التكامل ويضيع معاها الامان والحنان ، الأم لما تمشي ماعاش حد يعوض مكانها ، لا أخت ، ولا زوجه ، ولا بنت ، كان ضاعت ضاعت عليك الدنيا ...
.
أُمّيِ ، ثُمَ أُمّيِ ، ثُمَ أُمّيِ ، إِليَ حِينَ يَبَّعَتُونْ 🎈💔
.
.
.
فــــــي الليــــــل ..
(بهار من هدي ؟؟)
وبعتتلها سكرين ايميل بنت لـ شفاته بهار بـ رفعت حاجب وردت (بنت عمتي تسنيم هدي خيرها 🙄)
سما (كان منذر يكلم فيها وله )
قعمزت بهار بـ ضحك خلت بُـتول تتلفتلها :خيرك
بهار :شكله تسنيم الدراه خاشه لـ سما ومقايلتلها علي علاقتها بـ منذر
رجعت بُـتول نظرها لـ تليفونها :إفيكو خوك مشاءالله مامخلي وحده ما مداير معاها علاقه
ضحكت بهار وردت علي سما (هيا قالتلك )
مسحت سما دموعها لـ علي خدودها وبعتت لـ بهار سكرينات محادتات بين منذر وتسنيم خلو بهار تشهق :حي علي امها الكلبه زودي باعته للبنت سكرينات ومقايلتلها يكلم فيها وقعدين علي علاقه لا توا
ناضت بُـتول قربت من بهار وهيا تشوف في الصور وقالت :نهاره احرف خوك هدا مايكنش مايعياش
بهار شبحت لـ بُـتول :زعما حق مكلمها مانعرفش نحس فيها تكدب باش تخرب عليه
رفعت بُـتول كتافها :مرات هدي بنت عمتك شرانيه ادير مكبر
بهار :شن بندير باه اني
بُـتول :ستني نكلمو لبهيم نفهمو منه
هزت بهار راسها ورجعت شبحت لـ تليفونها بـ حيرة وخلت بُـتول تتصل بـ منذر لـ سكر عليها الخط .
وخش مع الشباب لـ الدار وهما يقربو من قاسم لـ مقعمز في زاوية الدار بين الحيط والسرير ومتكمش في بعضه وحاط راسه علي ركابه وشهقات بكاه المقهوره كسرت قلوب الشباب لـ قربو قعمزو جنبه بصمت دام لـ لاحظات قبل مايكسره هارون لقال :حتي اني امي ميته ليها سناتين
ونزل راسه ومسح دمعه شوق كبير لـ الحضن ولـ الوجه ولـ الحن والحب الصادق لطالع من القلب لـ ضاع منه ومستحيل يلقاه في حد من بعد امه .
ورجع شبح لـ قاسم لـ مارفعش راسه وكمل كلام تحت نظرات الشباب ليه :تفجرة عليه بمبلة الغاز
خدي مصعب نفسه وشبح لـ منذر لرفع حواجبه بصدمه زي صدمت رواد وجابر لـ حط يده علي كتف هارون لـ مد يديه وهوا يرفع في كمامه وكشف علي أثار الحرق البسيطة لـ علي جزء من يديه وكمل مع دموعه لنزلو:سألتني علي حروق يدي من شني ، هدو من امي لما تفجرت عليها البمبلة ماكانش حد في الحوش غيري اني خشيت عليها كانت دايبه من النار
وحط يديه علي جبهته وهوا ياخد في نفسه من بين شهقاته لبدت تعلا وكمل وهوا مطبس راسه يحاول يخفي دموعه وشهقاته :اسواء شعور تشبح امك تموت بين عيونك ومش تموت بس تتعدب اشد العذاب ، رفعتها بين يديا وماهبت النار لوالعه فيها ماقدرتش نخليها تتعذب بروحها ونقعد نتفرج عليها
ملو عيون مصعب الدموع وهوا يشبح لـ هارون لكمل بـ عبره :ماتت وعيني في عينها وجسمها دايب عليا ماتت بين يديا وماقدرتش ننقدها
لف جابر يده علي رقبت هارون وحضنه وهوا ياخد في نفسه بـ غصه وألم علي شعور ابداً مش متمني يحسه ولا يجربه وشبح لمنذر لحاوط وجهه بـ يديه بكسرة قلب وضيق علي دموع صاحبه ، صاحبه اللي طعنة موس ماتنزل دمعه منه ، صاحبه العصبي القوي اللي يهابو فيه ، هوا نفسه حالياً دموعه ماليات عيونه وخدوده ، وكيف مايملوهم وغابت عليه روحه ، غابت عليه اميمته ، غاب عليه الحب الصادق ، الخوف الصادق ، الحنان الصادق ، الدعاء الصادق .
تحمحم هارون لـ بعد يد جابروهوا يمسح في وجهه بـ يديه الاتنين وناض طلع وخلا منذر ينوض يلحقه وهوا يرد علي تليفونه :ايوا
بُـتول :طيب فيك لـ رديت عليااا
منذر:شن فيه ان شاءالله خير
بُـتول قرنت حواجبه وحست بـ نبرت صوته متغيره :لالا مافينا شي انت اللي خيرك صوتك متغير
حس منذر بـ يد علي كتفه خلاته يتلفت علي صوت رواد لـ قاله قاصد هارون:وين مشي
اشرله منذر علي ممر الحمامات وقعد يتبع فيه بـ عيونه لين ختفي ، ورد علي بُـتول :لا شي مافيا شي غير تاعب من التمارين
بُـتول :متأكد
منذر نفخ :بُـتول شن تبي
بُـتول شبحت لـ بهار لـ اشرتلها بـ يدها وهمست:خيره
رفعت بُـتول كتافها ، وردت علي منذر :اممم بنسألك تكلم في تسنيم بنت عمتك هناء
منذر قرن حواجبه :لا
بُـتول تنهدت وقالت :امالا راه ابصر كيف لقت ايميل سما وباعتتتلها سكرينات محادتات بينكم
منذر :وسما شنو دارت
بُـتول :شي جت سألت بهار وبهار ماعرفتش شن ادير
هز منذر راسه :تمام مش فاضي توا بنسكر
وقبل ماترد عليه بُـتول سكر منذر الخط واتصل بـ سما اللي ماردتش عليه من اول مكالمة لـ خلا اعصابه تنشد بـ غضب وأعصاب كتمهم وهوا يعاود ويشبح في جابر ومصعب لـ تخطوه وقربو من الحمام لـ قعدو واقفين قدامه قصداً انه مايقطعوش حديت رواد وهارون لـ غسل وجهه مخبي دموعه بين حبات لمية لـ ماقدرتش تخبي احمرار عيونه و وجعهم وقهرهم .
رواد :كلنا ليها ياشامخ ماحد سالم وهارب منها الله يرحمها ويغفرلها
سكر هارون شيشمة لمية وتلفت وهوا يمسح في وجههه بـكم بدلته العسكريه بـ عيون ماتجرائش يرفعهم لـ رواد وقال :اميمتك عايشه
رواد :ايه
رفع هارون عيونه بـ لمعة دموع فيها :ربي يحفظهالك ان شاءالله
ونزل عيونه بـ دمعة كسراته ونزلت وخلاته يمسحها خطف بـ اطراف صوابعه :تراهو ديما شادتها في جرتك وتكلم فيك حتي اني امي كانت هكي كنت نكشخ عليها ومرات مانردش علي مكالماتها
وضرب بـ يده علي صدره وعطي بـ ضهره لـ رواد وكمل بـ عبرة حاول كتمها :غصه يارواد غصه في قلبي كل ماندكر في المواقف لـ عليت صوتي عليها فيهم مانحسابش روحي بنفقد اتصالاتها واسألتها ونشدتها عليا مانحسابش روحي كنت في نعمة وعز ماحسيتش بيهم لين فقدتهم مع فقدها
تحمحم رواد ونزل عيونه وهوا حاس بـ وجع في قلبه حس بـ شوق لـ امه ولـ اتصالاتها ولـ صوتها ، خدي نفسه وهوا يرجع يشبح لـ هارون لـ كان شاد صوت شهقاته بسيف وبـ وجع خلت رواد يقرب وهوا يلفت فيه ليه ويحضن فيه بـ كل قوته وكـ انه يبي يوصله انه حضني مش حـ يجي في مكان حضن امك لكن حضني ياصاحبي فداك .
دفن هارون راسه في كتف رواد بـ استسلام لـ شهقاته لـ تناجي وتبي امه بـ همس طلع من بين دموعه :موعرها ياصاحبي موعر فقدها نبيها اني نبي امي
دمعو عيون رواد لـ زاد حضنه ليه اكتر وبـ قوه اقوة وهوا يطبطب علي ضهرة تحت انظار جابر ومصعب لـ شبحو لـ بعض بـ كسره و وجع علي هارون .
مسح مصعب علي وجهه بـ يديه الاتنين وهوا ياحول يكتم دموعه المجتمعه في مدمعه وقبل مايقول حاجه جاهم صدا صوت عياط منذر لـ خلاه هوا وجابر يطلعو يجرو وهما يشبحو فيه واقف في الممر التاني واللي ماشي واللي جاي يشبحله كيف يصيح بـ اعصاب :اما ثقه انم لتدوي عليها وانتي من ابسط موقف ماشيه تعاودي لـ بهار شن بهار لـ بتتزوجك ولا اني
جاه صوت سما من بين دموعها وانفعالها :ماتعليش صوتك عليا يامنذر ماتعليشي انت الغالط شن تبيني نجيك ونقولك بعد ماشفت محاذتاتكم بعيوني شن تبيني نقولك بعد ماشفت خيانتك
رفع منذر حواجبه وزاد علا صوته :خيانة شن الـ..... خيرك انت عقلك شن فيه
وسكت شوي وهوا يغمظ في عيونه بـ القوه ويفتح فيهم وهوا يشبح لـ مصعب وجابر لـ يمشو في الشباب لـ وقفو يتفرجو عليه بـ ضحكة عبيطه منهم وهما يشبحوله كيف وطي صوته وعطاهم بـ ضهره وكمل كلامه لـ سما :ولا نقولك تمام اني خنتك معاها ونكلم فيها ونكلم في ستين الف وحده غيرك باهي وكان ماتبيش امها الخطبه بلاش منها واطلعي من راسي وحلي من عليا هي
وسكر الخط في وجها وتلفت مشي وخلا مصعب اللي صفق :هي هي ياولاد المسرحية تمت بنسكرو هي كل واحد لـ خربته
شد جابر ضحكته وجبد مصعب من يده :هههه سكر فمك خير ماتحصل طريحة تو
قرن مصعب حواجبه وهوا يشبح لـ الشباب لـ قعدين واقفين يشبحوله وقال بـ همس لـ جابر :جابر شن رايك نمشو
ودف جابر لـ ضحك عليه وسرع خطواته ولحقو منذر لـ طلع لـ الساحة ...
.
أنَا كَـ عُكَازَة لِـ صَدِيقِي يِسْتَنَدْ بِهَا حِينْ يَتَعَثَرْ بِـ عَتَارَاتْ الحَيَاة القَاسِيةَ ، أَنَا سَنَدَهْ وأنَا قُوَتَـه وأنَا هُوا وهُوا أنا ❣️
.
.
لاَ أتَذَكَرْ بِـ الضَبَظْ مَتَي غُرِقْتْ بِكـ 🌊
.
.
مـريم :سلملي علي ماما وبابا
سامح :يوصل هي تصبحي علي خير
مـريم :وانت من اهل الخير
سامح فتح باب الحوش :تي بري بنتك شارقه في بكاها
نفخت مـريم :باهي توصل للحوش كلمني ظمني
هز سامح راسه وسكر الباب وهوا يطلع في تليفونه من جيبه بس اول مالمح ساجده لـ راكبه فوق قرن حواجبه بـ ابتسامة ولحقها بـ خطوات هاديه لـ السطح لـ فتحاته وهيا تقرب من حاشيه السور وتشبح لـ زحمة الناس لـ تحت وترد علي تليفونها :الو
زادت ابتسامة سامح لـ اتكه علي باب السطح وقال وعيونه فيها :شن الجو
بتسمت ساجده :الحمدالله بخير وانت شن جو الصحراء
سامح :ماشيه
ساجدة :امتي بتروح
سامح :ستاحشتيني
ضحكت ساجده بـ خجل وهيا تساوي في وشاحها لـ طاح بـ سبب الريح :ايه شن مداير
ضحك سامح علي خجلها ولـ تهربها من الجواب وقال :نشبح لـ لقمر
رفعت ساجده راسه لـ السماء وهيا ادور في القمر وقالت :اممم هلال قصدك حني في نهاية الشهر
هز سامح راسه :لالا لـ القمر وقمر 14 فوقها
ساجده :تتسهوك عليا ههههه
قرب سامح منها ووقف وراها بـ التمام وقال وهوا ينزل في التليفون من ودنه :من امتي نتسهوك عليك اني ههههه
تلفتت ساجده بـ خلعه وهيا تحط في يداها علي فمها :انت هني
زاد سامح قرب منها خطوه ورفع حواجبه بـ ضحكة :الشوق خلاني ننتقل عبر الزمن ليك
ورفع كتافه وكمل :اني مستاحشك مش زيك مش مستاحشتيني هههههه
حاوطت ساجده وجها بـ يداها الزوز وهيا تخبي في خجلها وفرحتها وصدمتها بيه وبـ شوفته وهيا تحس بـ ريحته الرجوليه حاوطتها هيا وانفاسه لـ حستهم قريبه منها هلباااا ، وبـ شهقه طلعت منها علي بوسه طبعها علي خدها خلتها تحول في يداها وهيا تشبحله كيف بعد وميل راسه وباسها من خدها التاني وهمس :مستاحشك هلباااا يابنت ليا شهور طوااال وانتي في بالي شهور واني نحلم بيك راه
زمطت ساجده ريقه بـ ضحكة طلعت منها بـ فرح من كلامه لـ خلا وجها يتلون بـ اللون الاحمر من الخجل وهيا اطبس في راسها مع عيونها لـ نزلتهم لـ تحت وخلت سامح يزيد يذوب في جمالها وخجلها .
.
.
بِـ دْمُوعِي وَدَعْتِكْـ ، وفِي جْرُوحِي مّخَلِينِي نْعَانِي 🥀
.
.
تــــانـــي يــــوم ...
نزلو دموع قاسم لـ مطبس راسه وهوا واقف في طبور العزاء بـ قهر انه الزمن عاد عليه نفس اليوم ، وكـ انه القدر يقوله اول مره ماجربتش شعور الكسره ، فـ رجعتلك باش نحسسك بيها ، مسح بـ اطراف صوابعه دمعه سالت علي خده بـ وجع حسه اضاعف عليه ، وجع الحرمان من امه لـ انحرم منها لـ تاني مره ، وتاعب ، تاعب هلباااا من الدنيا لـ حسها حطت تقلها علي كتافه ، وكـ انها رافضة انه يعيش محاط بـ حنان الام .
رجع مسح دموعه بـ كف يده وهوا يرفع في راسه بـ صدمه اول ماجاه صوت هارون :عظم الله اجرك ياخوي
رجعو الدموع ملو دموع قاسم وسالو علي خدوده اول ماشاف الشباب لـ واقفين قدامه ، وقربو سلمو عليه بـ الحضن بـ الواحد وحاوطوه بـ اهتمامهم و وقفتهم طول اليوم ...
.
الخِلاَفَاتْ البَسِيطَه هِيَا التَّي تُتْبِتْ مَدَي قُوةْ أَي عَلاَقَة 💛
.
رفع منذر نظره لـ الشباب اللي مقعمزين ورا خيمة لعزاء يديرو في الشاهي ويهدرزو ورد علي بهار :كلماتك اليوم
بهار :كلمتها الصبح بس ماردتش
خدي منذر نفسه وطلعه بـ تنهيده :تمام اني شويه ومروح
شهقت بهار لين خلت امها سميه لـ كيف خشت عليها في دارها تقرن حواجبها وتقول :خيرك شن فيك
بهار :مش غدوة عطلتكم علاش خلوكم تطلعو من اليوم
سمية :هدا منذر شن مداير بالك لازينة من الكليه
ضحكت بهار وهيا تصيح علي امها لـ فكت من يدها التليفون :ايوا يافرخ بالك لازينك
ضحك منذر وهوا يخبي في وجهه بـ يده :هدا لتبيه انتي اصلا
و رفع يده لـ جابر لـ ناداه وكمل كلامه :صاحبي في السكن امه توفت ، طلعوني اني وجماعة باش نجوه وعطونا عطله لا لازيني لا سوء
سمية :من صاحبك هدا
منذر :ماتعرفيشي يام زميلي في السكن
سميه :يناري ماتت وهوا بعيد عليها هدي العسكريه الشطان لـ تبوها ها شوف صاحبك تخيل اني نموت وانت بعيد
قرن منذر حواجبه وقال بـ انفعال :الله ياامي الله خيرنا عاد خيرنا بعيد السوء عليك ان شاءالله يومي قبل يومك بالله الدوه الزايده هدي فكينا منها وراسك وغلاتي عندك يام فكينا
رفعت سمية حواجبها وقالت :باهي باهي حاضر بشويه خيرك وبعيد السوء عليك اني نبصر بس ، اهو سكتنا ياودي غير ماتتعصبش
منذر مسح علي لحيته لـ كيف طالعه وقال :مش قصدي بس انتي حشيشتك ياامي النكد والمواضيع هدي وتعرفيني مانحبش ندوي فيهم
بتسمت سميه :كلنا ليها ياولدي كلنا فانيين
منذر :صح لكن فراقك عليا صاعب ياامي مانتحملاش ان شاءالله ربي يكتب يومي قبل يومك
سميه :بعيد الشر عليك الحياة مزاااال قدامك ماتقولش هكي واني اهو قعدتلك علي قلبك لين تتخرج من هـ العسكريه لـ حارقتلي دمي
ضحك منذر وخلا سميه تبتسم بـ شوق ليه وكملت :شن امتي بتروح ولا بتقعدو عند صاحبك هدا
منذر :لا شوي تانية بروح نبدل وبنولي
سمية :باهي اني نستنا فيك
سكر منذر من امه وهوا يتلفت لـ الشباب لـ قرب منهم وهوا يجبد في الكرسي وقعمز جنب مصعب لـ رفع رجليه وحطهم علي كرسي قدامه وشبح لـ جابر :قطران مش شاهي هدا
هارون :ايه ياراجل خيرك مدايره قوي
جابر :الحمدالله صار منه شاهي تي نقولكم اول مره نديره احمدو ربكم ماسممتكمش بيه
رواد رفع حاجبه :لا فيه حرفه لا قانة علي قولت بوي الله لا يدكره بـ الخير ، غير انت ادير في الجو وتبي تورينا انك درت الشاهي
وضحك رواد اول ماكمل كلامه ونزل بـ راسه لوطه وهوا يتخطا في الشبشب لـ حدفه عليه جابر لـ كيف بـ يسبه بس اول ماشبح قاسم لـ جي قعمز جنبهم وهوا يشبحلهم كيف يشبحوله بـ صمت وبـ انتظار انه يتكلم من بعد مالازم الصمت من اول ماسمع بـ خبر وفات امه ، تحمحم وهوا يطبس في راسه ويساوي في طاقيته ورجع رفع راسه وشبحلهم :كيف خلوكم تطلعو
غمزله رواد :ضربت الافندي علي بوكس وقتله تو توقع علي عطله وتخلينا نطلعو وطبعا وافق طول بعد ماشلبخته كف يمين وكف يسار تي ماقصرت فيه تعرف
ضحك قاسم بـ تعب وارهاق :ايح
هارون :تي من تحساب روحك مصاحب انت تي راك مصاحب ثور جحي راك
ضحكو الشباب وقعد رواد يشبحلهم بـ عدم فهم لـ لحظات واول ماستوعب فتح فمه بـ رفعت حواجب وتلفت لـ هارون لـ قبل مايهجم عليه رواد وقف وماخلاش غير غبرته وراه بـ ضحكة خلت منذر ومصعب لـ وقفو يتجارو وراهم وهما يحاولو يبعدوهم قدام الناس والرجالة .
وخلو جابر جنب قاسم لـ يشبحلهم ويضحك بـ سهوه نساته همه ، واول ماشبح لـ جابر القاه سارح فيه .
تحمحم قاسم وقال :الافندي علي خلاكم تطلعو
هز جابر راسه :ايه ، هارون طلب منه نطلعو نجوك مشي وافق وعطانا عطله
بتسم قاسم بـ امتنان ورجع نظره لـ منذر لـ شاد هارون لـ كاتم ضحكة قدام الناس وهوا يتحامي بـ منذر من كدمات رواد لـ يتلاقا فيهم مصعب لـ يعيط ويصيح تحت انظار قاسم لـ قال :بارك الله فيكم جيتكم في وقتها
جابر وقف وجي قعمز جنبه ولف يده علي رقبته وقال علي جيت الشباب لـ قعمزو بـ دوشتهم وصياح مصعب :الله يرحمها هدا حال الدنيا صدقني فقد الام والاب كسره كان انكسرتها ماعاش يكسرك شي من بعده
ملو عيون قاسم بـ الدموع وقال بـ ابتسامة :نحسابها هكي حتي اني ياصاحبي لكن انكسرت تاني
ورفع عيونه في جابر وكمل :امي الحقيقيه توفت وهيا تجيب فيا وهدي مرت بوي
سكتو الشباب فجأة علي كلام قاسم لـ كمل وهوا يمسح في دمعه سالت علي خده :الله يرحمها ماعمرها حسستني انها مرت بوي طول عمري حاسبها امي لـ ربي خداها مني عطتني حضنها وحنها وحبها كـ اني ولدها حق
وماقدرش يشد عبرته ودموعه لـ سالو وكمل بـ شهقات قطعت صوته :ربي كاتبلي نعيش من غير ام
زاد جابر قرب كرسيه من قاسم وحضنه وهوا يشبح لـ الشباب بـ تنهيدت وجع ...
.
لاَ يُمْكِنْ لِـ أحَدْ أنْ يُمْلِئْ مَكَانْ أحَدْ ، ولَكِنْ هُنَاكْـ أحَدْ يِلَمْلَم جِرَاحِكْـ حِينَ تَفٌقِدْ أحَدَهُمْ 🎈
.
.
.
جوري :خيرها شن صاير
رفعت ايناس كتافها :مش عارفه ، مش عارفه
وتنهدت وهيا اطلع في تليفونها لـ شرين وردت :الو
القَـاسي :ها وينك يابنت الجيران
بتسمت ايناس وطلعت لـ الجنان :نعم تبي حاجه
القَـاسي هز بـ راسه :ايه نبيك انتي
ضحكت ايناس :هههههه صهيب هبلك وله
تنهد القاسي وتلفت بـ راسه لـ صهيب الراقد جنبه علي السرير ورد:لا اهو راقد جنبي
عيطت ايناس :لالا علاش يابالقاسم علاش مرقده تو بشيطلي ريقي فليل باش يرقد
القَـاسي :تي وربنا حرق الدم ماصدقت نعسه النوم خليه يرقد كان تعبك في الليل اعطيه منوم
ايناس :اي هدا لي فالح فيه انت
ضحك القَـاسي :اني مش فالح في شي الا فيك انتي هيا تعالي ستاحشتك
ضحكت ايناس وتلفتت بـ راسها لـ جوري لـ فتحت الباب :ايناس عميمة فاطمة تبيك
هزت ايناس راسها :هي جايه
خشت جوري وهيا ترد علي حازم لـ معاها علي الخط :نعم
حازم :وينك انتي
جوري :حوش كنتنا وفي نفس الوقت حوش جيرانا سور في السور
حازم :مكسده عندهم ولا عندهم حاجه
جوري :اخت مرت خوي بيانها الجمعه وجيت نوتي معاهم
هز حازم راسه :اممم باه كويس ربي يهنيها ويهنينا
بتسمت جوري بـ خجل :ان شاءالله يارب
حازم :يعني الجمعة والسبت مش فاضيين
جوري رفعت كتافها :لا السبت ماعندنا شي هيا تلبيسه بسيطه مش هديكا الحوسه والزحمة
حازم :اها كويس بكل امالا بنبعت امي واختي باش يحددو موعد العرس
شهقت جوري بـ ضحك :هههه عرس طول هكي طب زن
حازم :ههههه اني راجل نحب نضرب الحديد وهوا حامي
زادت ضحكت جوري لـ رفعت راسها لـ باب دار سما لـ سكراته وهيا تتلفت لـ تليفونها لـ يشرين .
أنت تقرأ
عشق في بلاد حروبها لا تنتهي 5 ( شهيد الواجب )
حركة (أكشن)حُـب الــوطَـن لـا تُـغَـيـره الــمـحـن ... 🇱🇾 حُـب الــوطَـن لـا يُـواريـه لـا ثَـري ولـا كَـفـن ... 🇱🇾 حُـب الــوطَـن لـيـنـا كــ الــروح بـ الــبَـدن ... 🇱🇾 . الجزء الجديد والجزء المميز جداً من اطول رواية ليبية ، سلسلة... #عشق_في_بلاد_حروبه...
