البنت القوية💪🏻👩🏻

القـصة:

نور طالبة كلش مجتهدة بدراستها بس مو معناها إنها درست طب لا
هي كلش شاطرة وما تخلي شي وراها تدرس كلشي يوم بيومة.

راح نبدي....

نور:چنت صف سادس أدبي وچنت أدرس كل يوم بيومة حتى ما تجي حچاية ع أهلي إنّو بنتهم مو شاطرة لأنو عمامي إشوية من النوع اللي متشددين ويانه ويدققون ع كلشي نسويه ومنتضرين شي مو زين منا حتى يحچون عليه ويلزموه علينه ومن هالحچي وآني چنت أول وحدة مٌـقبلة ع جامعـة عند أهلي
ف إجتي فترة الإمتحانات واني ما چان ببالي طب ومن هالسوالف
چان ببـالي إني أنجح وبمعدل جـيد وأدخل جامـعة
المـهم فترة الإمتحانات چان بـسنة 2010 هيچ
چنت كل يوم أدرس الامتحان كلش زين ووصيت أبوي جاب إلي مروحة وبيها ضوا لأن فترة الامتحانات بالصيف ف أصعد بالسطح الكل ينام ويشبع نوم واني أضل أدرس أنام چم ساعة واگعد ادرس الفجر واروح الامتحان

خلـصت الإمتحانات منتضرين النتائج ع نار وخوف وقلق ومشاعر متلخبطة😂
ما چان عندنا نت بهالفترة ف راح أبوي ع السوگ وخلى أبو المكتب يطلعها إلي واني منتضرة إتصال من أبو وگلبي أحسه يدٌگ بسرررعة

إتصل أبوي وما تتوقعون گلبي إشلون صار يدگ
وگالي أبوي بفرحة كللش چبيرة والفرحة مبينة من صوته اشلون فرحان ويحس بفخـر گالي ناجحة بابا گلتله اشگد معدلي گال80 وحسيت أبوي طار من الفرح واني گعدت أبچي الحمدلله والشكر اني ناجحة ما طلعت إكمال ومعدلـي زين الحمدلله وراها إجتي الاتصالات ها بشرو وها ومدري شنو وكل واحد يتصل ابوي يرد عليه يعني يتصلون ع ابوي لاني ما عندي موبايل ف ابوي يجيبوهم بكل فخـر ع معدل بنته اللي رفعت راسه
وچانت أكبر فرحة إلي من امي وأبوي يمشون بين الناس ومتباهيين بيه
إجتي فترة التقديم ع الجامعات قدمت طلعلي محاسبة/تقنيات ماليـة ومحاسبية
ما چان ببالي هالقسم بس الحمدلله ع كل حال....
رحنة آني وأبوي سجلنه وطلع قبولي بالجامعة اللي قريبة ع بيتنه يعني ٢٠ دقيقة مشي اوصل إلها
بديت دوام وچنت أبد ما أباوع لأي واحد ما امشي ويا بنات لأني ما أعرف أي وحده
ورا فترة صادقت بنية آسمها هدى هي أوفى بنية شفتها يعني البقية كلهن من صديقاتي للي عرفتهم الجامعة ماكو تواصل بينا لأن فترة الجامعة بس وكل وحدة راحت بطريقها
هاي هدى بنية كلش مؤدبة وحبابة وع طول السنوات الأربعة اللي قضيتها بالجامعة اني وياها نمشي بس
وعمري وحياتي ما انطيت مجال لأي ولد لأن چان هدفي اتخرج من الجامعة وبس
كل يوم من أروح للجامعة أروح مشي لأنها قريبة كلش واني اريد أخس اشويه😂😂
نفتر اني وهدى بالجامعة  نروح ناكل نستنسخ ملازم يعني حياتي الجامعية ما چانت بيها أحداث عادية
خلصت السنة الأولى إجتي العطلة چنت اشوية سمينة
سويت ريجيم كلش قاسي ورياضة ما تركتها
تركت التمن(الرز) والخبز ومن بدا الدوام للمرحلة الثانية هم ما قبلت أحد يوصلني حتى رياضة من الصبح وكذا😂😂🙆🏻‍♀️

:
:
:
:
طبعاً اشتريت موبايل وداومت السنة الثانية والكل إنصدم اشلون متغيرة
من الجسم ومن الشكل ومن كلشي ف الكل يباوع😁😁
چنة متفقين آني وهدى نلتقي بالكافتريا والتقينا وكملنه سوالف ومشي وضحك لأن اول يوم ماكو محاضرات...
خلص الدوام ورجعت للبيت
وإذااا بالصدمة😳😳😳😳😳😳

اكو ناس ما أعرفهم خطار بالإستقبال
رحت سلمت ع أمي وسألتها گالت خطابة عليچ🤦🏻‍♀️🤦🏻‍♀️🤦🏻‍♀️🤦🏻‍♀️
آني چنت كللش شايلة فكرة الزواج من بالي والإرتباط وهو الرجال ايصير صديق أبوي وياه بالشغل
راحو الخطار
إجة أبوي حچا گلتلة بوية اني ما اريد أتزوج ما اريده
أهلي من النوع اللي كلش ما يجبرون أحد ع الزواج
گال بكيفچ بابا
للعلم آني أصيحله بوية هو يصيحلي بابا🙋🏻‍♀️
بس المشكلة النـاس من النوع اللي كلللش يلحون إجوي مرة ثانية أهلي گالولهم ما اتريد ام العريس گالت اريد اشوفها(حتى تقنعني يعني)
فاتت سلمت عليها وگلتلها ما اريد
إبنها مطلق زوجته بس لسه صغير يعني عمره تقريباً٢٣ هيچ بذاك الوقت طبعاً
ضلت تتوسل وتحچي حتى تقنعني گلتلها والله ما اريد انتو ما بيكم قصور بس اني ما اريد
هي الأم فهمت انو اني ما اريد لأن ابنها مطلق🤷🏻‍♀️
راحت كتبت تعهد بالمحكمة وهي موقعة والابن والأبو
التعهد ينص ع انو( إذا الزوجة الاولى رجعت إلي حق أطلب الطلاق وتعهدت لي مبلغ قدره١٥ مليون دينار عراقي)
گلتلها لا ما اريد
وهالحچي ضلو اسبوعين يمكن كل يوم يجون علينه
بالاخير گلت لإبن عمي اللي أصغر مني گلتله  تعال وگول اني ابن عمها وناهي عليها اريدها من همه موجودين يمنا تعال حتى يشوفوك ويخافون😂😂😂😂😂😂

يتبع.........