خنجر الغضنفر

بارت٥٧

#خنجر_الغضنفر
#الجزء_الثاني_بارت٥٧
#حنين_حاتم

بلقيس ...
اسبوع عدا اني اتصل حتة صميدع كلما اخابرة يكلي طالع من ارجع اخلي بسعاد تحاجيج وميرجع يدك
كلبي لعب
شي بداخلي يكلي قيصر،يتهرب مني لأن مالها غير تفسير
شمعنة لاهوة رجع دك ولا صميدع
هنا حسيت كرامتي تبعثرت مني
وبيني وبين نفسي جنت اهمس اني اسااهل كل الي صارلي
حتة ابطل اثق بي
ابطل انتظرة بكل مرة وكإن هوة فرصتي لضاعية
ابطل اكون الطرف الي يضحي ويصبر وينتظر
وهوة يبقة الطرف الي ينهزم دائما ويحطني بأسخف المواقف كدام نفسي والحوالية

بهاي المدة امي وخالي ماشايلتهم لفرحة
وكأن أيوب فرصتي لوحيدة بهلحياة
وحجايتهم لولد مينرفض كفر ترفضي كفررر
منو يقبل بوضعج انتي
هذا لكَطة
رحم ماكو ابن منغولي

كلبي يتكطع من حجيهم
عبالك بدون لرجال رح اموت

بليل خابرت خالو احجي ويا
اجة هوة ونوفل
فتحت الموضوع وكلتلهم اني مااريد اتزوج
لا ايوب ولا غيرة

اول من كب بوجهي امي صارت تنتر بعصبية وصياح

متتزوجين لوكبرتي منو يسندج ابنج هوة يريدلة حايط ينتجي علي
ابنج بوسط هلغابة ينوكل منو الة

بلقيس:- اني عندي راتب واعيشة بي وماطولني اشم لهوا نصير يعيش احسن عيشة

خالو احمد كام من مكانة وكعد بصفي وصار يحجي نيابة عن امي

-خالوو ابنج ينراد رجال بضهرة
باجر عكبة لو كبر يتقشمر ويسكطو الج
ابنج بعلج يتقشمر ويروح وية اي واحد غريب
بشنو تسندين نفسج
لراتب ميحمي ابنج
ولا يلم كبرتج
ولا يصيرلج عون من لدنيا لو ماتت امج

_خالو انت ليش هيج تفكر يجوز اني ونصير نموت قبلها وبعدين اني ماببالي الزواج هسة اني مرتاحة
اترجاك رجع رفض لأيوب

_ترفضين لولد على يامال
بزرة مابيج وعندج طفل من ذوي الأحتياجات الخاصة وهم قابل لولد بيج
ترفضي يكدر من عين باجر يلكالة ارملة او مطلقة عدها جهال يعيش احسن حياة وياها
يعوض حرمان جهالها من الاب ويعوضو حرمانة من الخلفة

النقاش تحول الى جدال والجدال صار اوامر ورأي غير قابل للنقاش نفرض علية بارادتي غصب لازم ارضى

اخر حل جانلي انو اتصل بزياد
اطلب منة يتدخل ويكللهم مااقبل تتزوج واذا تزوجت اخذ ابني منها وهنا تكونلي حجة اكدر ارفض بيها
جنت خايفة من هلخطوة
وماعرف ليش كلبي يرجف من هلطاري
مااريد ابقة اعيش تجارب فاشلة
وكاسر خاطري قيصر ماتزوج كل هلسنين
شقا عمرة دفعة حتة يحررني وتالي من انال حريتي اجازي بأنو اروح لغيرة
جان عندي استعداد ابقة العمر كلة لا إلة ولا لغيرة
افضل مااسوي بي هلشي
لساني خجلانة من الدين الي شتايلتة الة بركبتي
شلون اكدر
يسمع خبر خطوبتي وهوة دافع دم كلبة علمود راحتي
ومستعد يدفع اضعاف حتة ينالني