#خنجر_لغضنفر
#البارت_الرابع_والعشرون_٢٤
#حنين_حاتم
قيصر...
صوتة يهمسلي بحسرة
عاد انت عندك جد وبيبة لموكم وعشتو بخير درستو ووصلتو
تدري هاي اختي لكدام عينك جانت تشتغل بلبيوت حتة توفرلي لكمة اكلها وحتة اكمل دراستي
امي وابوي توفو
هم مثلك احنة ايتام ام وابو
_لا إلله إلا الله شلون توفو
-نايمين احنة بلصالة وهمة بغرفتهم فجأة سمعنة صوت صراخ
نفتحت باب لمنور وطلعتلنا امي واجة بيها نار
كلشي منشوف من ملامحها
عبارة عن كتلة نار وتتحرك وتكمز من مكان لمكان ولنار لبيها تلهب لفراش واثاث لبيت واحنة علقنفات صاعدين ونتصارخ برعب
ابوي وراها يركض وبيدة بطانية
حضنها بكل قوتة حتة يطفيها
ولنار نتقلت من عدها لجسمة
لهبت هدومة بساع بساع جانن ملابسة بيهن نفط
وكدام عيونة حتركو ثنينهم
هيفاء جانت تجيب مي من لحمام بطاسة زغيرة علما توصل الهم وهية تركظ ينجب لماي نصة بلطريق
اما اني جنت اصرخ بكل رعب
عمري ١٠ سنين لخوف من منضرهم خلاني متجمد بمكاني وبس اصرخ
وراها اغما علية فتحت عيوني بلمستشفى ويمي خالتي لزغيرة رجعتني للبيت
مااعرف شصار لكيت بيتنا مليان نسوان واطفال
هيفاء معصبة بربطتها لسودة وتدك وتلطم وية لنسوان
وتملخ بروحها
وراها فهمت انو امي حاركة نفسها
وبابا من حاول يطفيها لهبت لنار ملابسة بساع لأن بيها نفط
من دايرة على نفسها نفط هوة متصارع وياها حتة ياخذ لجلكان من عدها ومطفر على ملابسة
مااعرف شنو لسبب ولا عرفت لليوم وبقت حسرة بكلبي اعرف امي ليش ختارت لموت وعافتنا
ليش ختارت نار جهنم وعافت اطفالها لليتم
منا بدت رحلة كفاح هيفاء
ثالث متوسط وشاطرة
تركت دراستها علمودي صارت تشتغل بلبيوت بيت عمي بينا وبينهم بيت واحد بس
يمر علينا عمو يتداين فلوس من هيفاء الي جانن لنسوان يشفقن عليها وينطنها عدا فلوس شغلها
صدقة وزكاة ومن يذبحن تنترس ثلاجتنا لحم
جان وراد هيفاء اختي يعيشنا وجزء منة ياخذة من عدنة عمو بحجة اظمة الكم وماشفنا فلس لليوم
هيفاء طول لنهار تتنقل من بيت لبيت وماشوفها غير ورة صلاة لمغرب
تجي تذب ملابسها تسويلنا لكمة وتنام على وجهها من لتعب
وهيج مرت سنين حياتنا هيفاء اختي كبرت بس لادك بابنا احد ولا احد تقدملها رغم شوفة عينك حلوة وماناقصها شي
بنات عمي ازغر منها تزوجن
اني كملت معهد معلمين جنت متمني اعوظها
وانت معلم مثلي و ادرى لناس بلفلاسين لينطوها النا كراتب
كراوي ماتكفي
_اي وانت لصادك يخوي انة لوما غضنفر اخوي بلظيم حالي
_طلعنة لهنا وحصلتلها شغلة وجاي تدرس خارجي
_شعجب طلعتو اكو واحد يعوف لعراق
_يعني انت ماعفتة هسة
أنت تقرأ
خنجر الغضنفر
Mystery / Thrillerسلي غياهب الردى وحشاشة فؤاد العدا سلي اليالي والنجوم العوالي عن خنجري إن سلت سيوفنا كانت الدماء والنساء غنيمة لنا وإن حطت رحالنا وإسترحنا من ركابنا غابت وجوه وغيُبت عن اوطاننا مالنا في الحب مكاسبُ وماله في قلوبنا اوطانُ فلاتنتظري حباً ولا ودا ول...
