Sakuna sa bawat Saknong

Ang lalakeng may taga sa ulo

May isang lalaking gwapo ang naglalakad sa kanto

pantalon niya'y bago, damit ay binugbog ng pabango

habang nagmumuni-muni siya'y naglalakad ng nakayuko

nagulat na lamang siya ng may makitang kakatuwang anyo

Kinusot-kusot niya ang kanyang mga mata

kung imahinasiyon lamang ba ang kanyang nakikita

huli na para tumakbo, wala na siyang kawala

ang imaheng nakikita papalapit na sa kanya

Hindi niya alam kung ano ang kanyang gagawin

sana ay may baril siya't ito'y kanyang babarilin

Sisigaw ba siya, iiyak o mananahimik na lang rin?

dahil ang tanging makaririnig lamang ay ang malamig na hangin.

Sa dilim ng gabi siya ngayo'y nagigimbal

Sa bumabalot na lagim siya'y nangangatal

katawa'y nilalamig at ngayo'y 'sintigas ng bakal

wala siyang nagawa kundi ang magdasal

Pagdilat niya, nawala na ang animo'y rebulto

Nagpasalamat siya at dali-daling tumakbo

nawala na pala't ngayo'y nasa likuran, gilid o sa banyo niyo

ang lalaking mayroong taga sa ulo