مجتمع نسوي متعفن

المقدمة

اطرق برأسه ودمعة حارقة شقت طريقها من عينيه الي وجنته وهو يقول بقهر:
ولما واجهتها صرخت في وشي واتهمتني اني نكدي وعايز انكد عليها واصدعها وان دي كلها اوهام في دماغي

ربت والده علي كتفه وهو ينظر لحالته بقلب منفطر:
استحمل عشان عيالك يا بني عيالك هيتبهدلو لو اطلقت والمجتمع مابيرحمش ، الناس والجيران يقولوا عليك ايه مين هتقبل تتجوزك وانت مطلق ، واللي هتقبل يا هتكون واحدة كبيرة قد امك يا هتكون واحدة صايعة ومش كويسة، استحمل يابني استحمل؟!

-ومين قالك اني لو اتطلقت من سميرة هبقي عايز اتجوز تاني انا خلاص هعيش عشان ولادي لا عايز زوجة ولا يحزنون
تحدث بصوت حاسم ليهتف والده بنبرة صارمة منخفضة:
اسمع ياولد انت ، ضل ست ولا ضل حيطة مش عايزين امك تقلب البيت فوق دماغنا؟!
دي لو شمت خبر هتقوم البيت ولا تقعدوش ، ده معاشها يا دوبك مقضينا انا واخوك بالعافية ، استحمل زي ما كلنا مستحملين

استمع الي كلمات والده بقهر بينما يشعر بأن العالم كله قد تكالب عليه ، فاندفع برأسه اليه وهدر وكأن كلامه كان كعود الثقاب الذي اشعل فتيل غضبه:
لحد امتي هستحملها ولحد امتي هتيجي في صفها يا بابا ده العيال نفسهم يشفوها في البيت كل يوم بيسألو عليها فين ماما يا بابا ماما مش بتيجي تاخدنا من المدرسة ليه زي بقية زمايلنا !!
وانا قلبي بيتقطع عليهم ، ركناني في البيت زي اي اباجورة اكنس وانضف واطبخ وهي وعايشة حياتها بالطول والعرض ، اشوف محادثات ليها مع رجالة زبالة واقول استحمل عشان عيالك ياض يا ياسين الراجل مالوش الا بيت مراته ياض يا ياسين بس خلااص يا بابا خلاص زهقت وفاض بيا

دمعت عينيه من حديث ولده ليجذب رأسه اليه يحتويه بين ذراعيه وهو يهتف بنبرة متحشرجة من البكاء:
هنعمل ايه يا بني احنا في مجتمع نسوي ومابيرحمش ، هتطلق وتسيب كل من هب ودب يجيبوو سيرتك ، لو وقفت في البلكونة هيقولوا يلي بيقف عشان يلفت نظر فلانة ولا عشان يغري فلانة ولو نزلت من البيت مش هيرحموك ، واللي هيطلع عليك سمعة والقيل والقال واحنا رجالة يا بني ملناش الا شرفنا وبعدين الست مهما تلف ويبقي ليها نزوات مش هيبقي في دماغها الا جوزها وولادها ، كل الستات ليها علاقات يا حبيبي بس المهم اخر اليوم راسها بتتحط علي مخدة مين؟

هتف "ياسين" بصوت عاجز:
بقيت بقرف منها يا بابا صدقني بقيت بقرف مبقتش اقدر استحمل ، يعني لو انا اللي كنت بخونها كانت هتلاقي حد ينصحها نفس النصايح دي؟!!
ولا هو الراجل ماعندوش كرامة زي الست ماعندها؟

وما كان رد والده الا شهق قوية وهو يبعده بحركة عنيفة عن حضنه ويمسك بتلابيبه بينما يقول بجزع:
اسكت.. اسكت يا ياسين حد يسمعك ويفهمك غلط ايه اللي بتقوله ده الست ست والراجل راجل ماينفعش تنسي ده ابدا

مش عارفة ازاي اتمسحت بعد ما نزلت المقدمة فنزلتها تاني ، فوت يا كتاكيتي وقولولي رأيكم ومتحمسين ليها ولا ايه😚♥️