حبك لي كزخات المطر 🇲🇦 (مكتملة )

الفصل 1

🌧حبك لي كزخات المطر 🌧

☔حبك لي كزخات المطر تنهمر بداخلي دون توقف
☔حبك لي كزخات المطر على أرض جافة☔
☔كنسمات الهواء في صحراء بالنار لاهبة☔
☔كأفواه تتوسل الماء من العطش ناشفة☔
☔كفرس لا تروضها سوى فرسان باسلة☔
☔كالنوم لعيون ذابلة لا تغمض من الأرقِ☔
☔كغريق يتمسك بقشة خوفاً من الغرقِ☔
☔كجمال البحر وروعةِ الشمسِ في الأفقِ☔
☔كنور القمر وجمال نوره اللامعِ الأصفرِ☔ 

تحت المطر .... كيقولو بلي أنسب بلاصة نقدرو نبكيو فيها هي تحت المطر  بلا ما ينتابه لينا شي حد  وبلا ما يشفق علينا شي حد ...
حتى الدموع و حتى الوجع و الآلام ديالنا ما خاصنا نبينوها لحد  ...
ماخاصكش تبكي في العلن كلشي غايتشفى فيك  كلشي غايقرب ليك و غايبغي يعرف مالك و لكن مع الأسف كاين اللي غير كيسول على حالك بدافع الفضول  و كاين اللي غايسول على حالك باش يتأكد من أنك كتوجع و كتألم و يتشفى هذه هي الحياة مع الأسف قليل اللي كيبغي ليك الخير  و قليل اللي كيبغي يشوفك فرحان و الابتسامة على وجهك ....
تحت المطر ... حتى حد ما غايشوف دموعك اللي كينزلو على خدودك من غير الله و انت اللي كتحس بيهم كينزلو من عيونك و قطرات المطر اللي كتواسيك و تحضن دموعك و تخفيهم..

في إحدى شوارع المدينة ...كان المطر كيتساقط بغزارة حتى واحد ما كيتمشى فداك الشارع من غير أصوات السيارات اللي فالطريق غادة بسرعة و صوت الكلاكسون ديالها اللي كيتسمع مرة مرة ...
فواحد الكرسي ديال الحديد مصبوغ بلون أخضر اللي كايكون فمثل هاد الشوارع  تماك بالضبط جالسة بنت و ساهية فالفراغ و الشتاء كتساقط عليها  و الدموع كتنزل من عينيها  بغزراة  ...
ولكن السؤال اللي كيطرح نفسو شنو كدير بنت بريئة بحالها فهاد الظلام وفهاد الجو الممطر من المفروض أنها تكون فدارهم و تحت غطاها و هازة فيديها كأس ديال القهوة و لا شاي الساخن اللي يدفيها من برودة هاد الطقس ولا تكون كتفرج مع عائلتها ولا تكون هازة الهاتف ديالها و كتشوف فمواقع التواصل الاجتماعي كيفما البنات كلها علاش بالضبط هي جالسة فهاد الضلام كن ما الأضواء اللي شاعلة فالشارع كن راه ما كتبانش ...
ولكن شكون عرف واش كتبكي ديال بصح ولا فقط قطرات المطر اللي بللات وجهها ....
طلعات واحد الشهقة قوية منها كتأكد أن الفرضية الاولى صحيحة مية فالمية يعني البنت كتبكي ديال بصح ولكن شنو سر اللي مخبية هاد البنت دات الملامح البشوشة بشرتها بيضاء و شعرها مقطعها كاري فلون البني  و عويناتها فلون الأسود اللي كانو مزينين بنظرات دائرية الشكل  اللي تضببو بقطرات الشتاء ...
حاطة يديها بجوج على حافة الكرسي ومزيرة عليه بحال كتحاول تبرد الاعصاب اللي فيها بهاد الشكل ...
حسات بشي خطوات كيقربوا ليها وريحة عطر رجالية مالية المكان ماحد داك الشخص كيقرب ماحد ريحتو  كتزيد تنتاشر فالمكان ...
هزات عينيها وحيدات نضاضر باش تبان ليها الرؤية بشكل أوضح ابتاسمت ليه بحب وسط دموعها حيت قبل ما ترفع عينيها عرفاتو  غير من ريحة عطرو و طريقة الخطوات ديالو ...
ميلات راسها و تنهدات و كتشوف فيه بحب كبير بمجرد ماشافتو حسات بروحها رجعات حسات بقلبها نبض من بدا وجديد ...
وقف عليها شخص طويل كيمتالك بنية جميلة و شعرو مقاد بطريقة شبابية زوينة شعرو رطيطب و فلون الاسود اما لون عينيه حكاية اخرى لون مابين الرمادي والزرق و دقنو مزين بلحية خفيفة عاطياه جمال خاص بيه بوحدو لابس معطف فالأسود اللي حاميه من قساوة الطقس هاز فيدو اللي كانت مزينة بعدة خواتم  مظل فلون أبيض شفاف...
من عينيه كيبان بلي كئيب و حزين كيبان بحال كلشي كيبكي فيه الا عينيه ربما هو حزنو مضاعف على البنت اللي جالسة فوق الكرسي هي على الاقل دموعها كيخففو آلامها ولكن هو رجولتو ما تسمحش ليه يهبط ولو دمعة رغم ان روحو كتحرق من لداخل ...