وقفات الطوموبيل ديال شيفور حدا واحد العمارة فحي راقي ...نزل الشيفور وحل ليها الباب ...
كانت شاردة فالفراغ مجددا ما حساتش بلي راه وصلات لمكان المنشود..هدا هو حالها ديما دماغها ماشي معاها ديما ساهية و كتفكر... ديما كتستحضر دكريات الماضي الشيئ اللي كيخلي عيونها دمع بعض الشيئ ...
~لالا راه وصلنا
شكون سمعوا الآنسة روان ما كايناش فهاد العالم...حط يدو على كتفها و هي تقفز من بلاصتها وحولات عينيها لكتف اللي حاط عليه يدو و عاد شافت فيه
~ لالا راه واقيلة واصلنا
روان هزات صاكها و خرجات بلا كلمة بلا جوج سد الشيفور الباب و قال مع نفسو بعدما دخلات للعمارة
~الله يرد بهاد البنت ديما ساهية
●●●●
دخلات روان و طلعات فالأسانسور و دارت رقم طابق اللي باغا تطلع ليه ماهي إلا دقائق حتى تحل الأسانسور فالإيطاج رابع ...
خرجات و بقات غادة فداك الممر الطويل و صوت كعبها العالي مالي المكان...حتى وصلات لحدا واحد الباب دقات و بقات كتنتاضر يتفتح سمعات واحد الصوت جاي من لداخل
~شكوووون
روان:غير أنا أماما حلي دغيا
حلات الباب واحد المرأة تكون فحدود الأربعينات دايرة نظارات فعينيها و شعرها أسود ولابسة قميص دجوهرة و فيديها سرتلة ديال دهب
~أ الله يا بنيتي مشيتي و جيتي ياكما ما خدمتيش
دخلات روان و بدات كتحيد صباطها و لاحتو فالباب و قالت
روان: غانخدم فدار أماما
~إوا منين هاكاك لاش مشيتي شقا على رجليك
روان باست ماماها فراسها و قالت
روان: أولا ماكاين شقا على رجليا الحمد الله شيفور كيديني و يجيبني ثانيا خرج ليا شي شغل من جنب ما نقدرش نخدمو فالبيرو ضروري خاصني نجي لبيتي و نتوكونسونطرا معاه مزيان
~اوا الله يسهل ليك ما صعاب
باست يديها و قالت
روان: اللهم أمين
خطات خطوات لامام و هي تعيط ليها ماماها
~رواان
دارت عندها و قالت
روان: نعام
قربات ليها و حطات يديها على خدها و قالت
~مالك ابنتي ما كاتكلي ما كتشربي و ديما ساهية و عينيك ديما حومر بحال كاتكوني كاتبكي واش عندك شي حاجة و مخبياها على ماماك فتحي ليا قلبك و عاودي ليا
روان قالت بابتسامة
روان: ماكاين والو أماما غير سطريس د الخدمة و الله بلا ما تشغلي بالك بيا
عطاتها بضهر و دخلات لبيتها و خلات ماماها كتحرك فراسها و حاطة يديها على دقنها و قالت
~ هادا أبنيتي سطريس د القلب أشمن سطريس د الخدمة
●●●●
دخلات و حيدات لافيسط ديالها و حيدات ليلونتي من عويناتها و بدات كتسلت حوايجها بايسة ببياسة و دخلات للحمام و طلقات الرشاش و تحشات تحت منو ...
ما دافئ كدفئ أحاسيسها و مشاعرها كينهمر على داتها دون توقف ...هزات راسها و بدات كتدوز بيديها على شعرها و مغمضة عويناتها و الما هابط بسلاسة على جسدها الأبيض الممشوق الناعم اللي مافيه لاخبشة ولا نبشة ...بشرة صافية كي الحليب ...بطنها مشدود ... باينة فيها إنسانة رياضية بامتياز ...
دازت ساعة تقريبا وهي فالحمام كتاخد دوش و دماغها غير مع المقالة اللي خاصها تكتب خدات هاد دوش باش تصفي دهنها و تفكر فشنو غادير حيت الإستحمام كيساهم فالإسترخاء و فصفاء الدهن سبحان الله ...
خرجات من الحمام لاوية الفوطة على شعرها و لابسة بينوار فلون الأبيض ...
حلات الماريو و جبدات دوبياس فالأسود مع شورط حد الفخيضات فالابيض مع ديباردور فالأسود ...
لبساتهم و جلسات حدا المراية كتنشف شعرها حتى رداتو جاف مافيه حتى قطرة د الما ...
جمعات شعرها على شكل كعكة و دارت نظاراتها و ناضت تكات من فوق سريرها و صدرات منها تنهيدة عميقة ...تنهيدة كتعبر على تعبها من الحياة
حلات المجر اللي كان حدها و جبدات منو مدكرة ديالها مع ستيلو و ربعات رجليها و حيدات الغطاية د ستيلو بفمها و لاحتها و شدات ستيلو بيديها بإحكام و حطاتو على الورقة و قالت
روان: روان نتي قادرة تكتبي على أي موضوع تعطى ليك ماغاديش تفشلي فموضوع تافه بحال هدا أصلن الحب ماكاينش الحب هو مجرد خيال الحب هو فقط خدعة دارت باش يتفلاو بها على أصحاب القلوب الضعيفة مايمكنش نبقى انا محبوسة فالماضي خاصني نعطي لراسي فرصة نتي قادرة أروان تحداي راسك و تنساي الماضي و أكبر دليل هو أني غانكتب على أكثر موضوع ألمني اللي هو الحب
كتبات {حب} فالمدكرة ديالها و بغات تزيد تكتب و لكن حسات بيديها تشلالات و حبسات على الكتابة بحال شي حد رابطها ليها مابقاتش قادرة تزيد تكتب شي حاجة مزال ...شافت أثار الماء على الورقة ابتاسمت حيت عرفات دموعها سبقوها عاوتاني واخا تعيا تقوي راسها كتبقى روان انثى ضعيفة و داكشي اللي دازت منو ماشي ساهل ...بدات كتضحك بشكل هيستيري على راسها ... كتشفق على راسها حيت ما بقاتش قادرة تعيش بلا به نهار على نهار صحتها كدهور و شرودها كيزيد و عمرها كينقص و قلبها كيضعاف شنو دارت فحياتها باش تعاني من ألم العشق ؟؟ ...
أنت تقرأ
حبك لي كزخات المطر 🇲🇦 (مكتملة )
Romance____________قصة رومانسية كاملة _________ 🇲🇦حبك لي كزخات المطر🇲🇦 بقلم : Fatima zahra ouba # حبك لي كزخات المطر ☔☔ ☔حبك لي كزخات المطر تنهمر بداخلي دون توقف☔ ☔حبك لي كزخات المطر على أرض جافة☔ ☔كنسمات الهواء في صحراء بالنار لاه...
